بدعت من جزل الهجوس اسمانها = احكم معانيها واحبك اوزانها
قصيدةٍ فيها المثايل والحكم = روابعٍ تفخر بعذب الحانها
ما بين هيض وغيض جيت اعنّها = بيدي الى حمي الوطيس اعنانها
اصرف جواهرها كما صرف الذهب = من بحرها اجمع لولها وْ مرجانها
واللي على بدع القصيده حدني = وخلا هجوسي تشتعل باشجانها
مشاكلٍ تثير من يفطن لها = وتحيّر العاقل بكشف اضغانها
اخر زمان وفيه يا كثر المحن = تخفق بيارقها على شفيانها
من بعد ما الفتنه تغط بنومها = قامت تواشى فالحطب نيرانها
واللي يثير الفتنه ويسعى بها = يستاهل مْن المسلمين العانها
وانا بهذا الوقت اشوف به الفتن = يعيد حاضرها قديم ازمانها
شفت العصبيه تدق طْبولها = دخانها يثور من بركانها
عادة من احداث الليالي ما سلف = ما ماتت الفتنه ولا شيطانها
داحس مع الغبرا تعيد فْصولها = خسرت قبايلها وفاز حصانها
وحرب البسوس اللي لها الناقه سبب= سراب جت منها تجرإبطانها
احداث مرّت فالسنين الماضيه = سوادها غطّى جميع الوانها
طغت عليها الجاهليه والفتن = وكم من قبايل غَرْقتْ بْْطوفانها
واليوم ياهل العرف واهل المعرفه = الجاهليه مقبله باضعانها
ولا خوفي الا مثل ما يقول المثل = بكره تصير اكوانها بأخوانها
قبايلٍ لامن تولّجها الغضب = بيدينها تنتف هدب حجّانها
تضيع فاليوم النكيد عْقولها = وفيها الحميه تصطفق جنحانها
اما على الالقاب ووسوم الابل = من شدّة الضيقه يجن إجنانها
والا على عدّ الروى بعد الظما =يموت قدّام العطش ظميانها
وعند الحدود وعند ما يشبه لها = تزحف جحافلها على جيرانها
تثير نعرات الفتن وتشبها = وتضيع شيمتها بضعف إيمانها
وحنا على الجهال ما نسوق العتب = شرهة مهبلها على شيخانها
ما يحل عسرات الامور الكايد = الا مراشيد العرب واعيانها
وانا معي كلمة شرف واقولها = تسبق قوافي حكمتي قيفانها
اجهر بها واشهر بها وابديبها = وتنصى زحول القوم معْ شيبانها
شيوخ قومٍ ما تحل المشكلة = تبعد عن الشيخه وعن ميدانها
وشيوخ قومٍ جالها ما ينومن = خابت وخاب اللي زبن مزبانها
وشيوخ قومٍ ما يجمل صيتها = عسى القبور تظمها باكفانها
وانا اتكلّم باسم رواد الحكم = روس الرجال اللي طوال أيمانها
نبي شيوخٍ تحتمي ميقافها = قبل يسابق عجّها دخانها
ونبي شيوخٍ يردعون المعتدي = ما تميل معْ جهالها وخبلانها
الى بدوا في كل موقف جمّلوا = وعن المدائح ما قصرت ذرعانها
والشجره اللي ما يظلل ظلها = ما حقها الا من يقص اغصانها
والحمد لله العظيم المعتلي = عالم خفايا اسرارنا واعلانها
حنّا بدولتنا نعيش مكرمين = وتامن قبايلنا مع حدانها
الدوله اللي تحكم بشرع النبي = وتحارب اصحاب البدع و اوثانها
ابلادنا هي امّنا بعد امّنا = اللي غذتنا من رحيق افنانها
ارهت علينا فالشدايد خيرها = وتظمنا وقت الشقا باحضانها
تحفظ كرامتنا ونحفظ حدّها = وننعم بنعمة امنها وامانها
نرخص لها لارواح في يوم الردا = وتبّت يد اللي بالخيانه خانها
والفضل بعد الله لروس املوكنا = اللي على الامه يعم احسانها
ال السعود اهل الشهامه والشيم = شيوخ نجد اللي رفيعٍ شانها
نجدد لهم عهد الموده والولا = وحنا اللي حان الطلب فرسانها
واختامها صلوا على سيد البشر = عدّ النصوب اللي تهل امزانها