اخواني الاعزاء في هذى المنتدى الشامخ
السلام عليكم ورحمه الله وبركاته
انني اعتذر عن قله مشاركتي معكم وذلك لظروف اجبرتني عن الابتعاد وانني من خلال هذه الصفحه اتقدم بكبير العذر لقبيلتي عامه ولابناءها خاصه عن ابتعادي وانا فعلا
ما زلت في بعض الظروف اللتي لاتسمح بان يكون الانسان متواجداً باستمرار وانا حتى الآن دخولي هنا لاقدم لكم قصيده كتبتها عن قبيلتنا العريقه وان لم تكن القصيده كافيه فحق القبيله اكبر من قصيده ومن معلقات ولكن باصرار من بعض الاخوه جزاهم الله خير الجزاء دخلت لاطرحها لكم آآآآملاً ان ترتقي الى مسامعكم ولكم مني وافر الحب والاحترام
يقول منهو للمثايل هواوي=يتلّها تلّه زعاجيل الآقطاع
لامن بغيت القاف ماله ملاوي=ينقاد لي من جمله الفكر مطواع
برايقه تشعق بغيمه سناوي=وإليا احتما تظرب صواعق للآسماع
ينهلّ ماطرها وسيله نحاوي=الحق جذيبه في مغيبه إلى زاع
سخرّتها في مدح ربعي مهاوي=لعلّها توفي بوافين الآسناع
دواسرٍ لامن عوى كلّ عاوي=تقدم على الجزلات لامن دعا داع
دواسرٍ سمٍّ على كلّ غاوي=للسيف سيف ولطيب السلم بِتّاع
دواسرٍ لازعزعن العزاوي=توفي إلى قامت على الكيل بالصاع
دواسرٍ لاروّحو بالحداوي=تجزع سبور القوم مع كلّ مطلاع
دواسرٍ لاضيّعنّ الهقاوي=تآصل هقاويها وللحقّ قطّاع
دواسرٍ عوقٍ لعسر الدعاوي=لا أوحا عزاويها غدى له تجزّاع
دواسرٍلانوّخنّ البلاوي=جزّت حبال الهمّ عن كلّ ملتاع
دواسرٍتضرب بحدّ النقاوي=على الوعد فالوجه والسيف لمّاع
دواسرٍ حدٍّ رهيفٍ شقاوي=على العدا لا زاع من بين الآضلاع
دواسرٍرمحٍ شطيرٍسطاوي=إليا ضرب فالجوف حطّه تمزّاع
دواسرٍ منها يجظّ الغزاوي=من حدّهم يضرب تفاكيره ارباع
دواسرٍ فالطايلات العلاوي=يرسخ بها مجدٍّ على كلّ مذياع
دواسرٍ منهو نصاها جلاوي=ينزال همّه كنّ مالحقه اوجاع
دواسرٍ منها عجز كلّ راوي=يذكر فعايلها ومن كثرها ضاع
دواسرٍ مع كلّ مجدٍ تهاوي=ورسومها فالوقت من كلّ الآنواع
دواسرٍمعها تزول الشكاوي=واللي يشاكيها جلت عنه الارواع
دواسرٍ ضلعٍ طويلٍ صداوي=يرسي ولا هزّه من الوقت زعزاع
دواسرٍ تقطع رجيّ المناوي=امسى عشا للطير غادي له امزاع
دواسرٍجمٍّ غزيرٍ رهاوي=على الخوي برده على الكبد لافاع
دواسرٍ سارت بجيشٍ نداوي=في رايه اهل الدين ترفع لها شراع
دواسرٍ سارت بحث الخطاوي=يوم الملك في نجد للحكم نزاع
دواسرٍ سارت بليل حراوي = لفتح الرياض وكبّر الحق شعشاع
دواسرٍ والحق ماهوب ثاوي=يوم الرغامة في مقاديمها سباع
دواسرٍ حصن منيع وعراوي= للي لحقه من الليالي تجرّاع
دواسرٍ يوم الموسس يداوي=نجران في فتحه لها مركز وباع
دواسرٍ مازعزعتها المهاوي=جيزان في فتحه لها موقفٍ ذاع
دواسرٍيوم المحنّك قداوي=حدّ البريمي راح سوره تشلاّع
دواسرٍ يوم الرضيمه فداوي=جت له مقيّدت الجمل تسهج القاع
دواسرٍ في معركتها شفاوي=في وقعه الهدّار والروح تنباع
دواسرٍ يوم الشريف المكاوي=تناوشنّه عن زبينٍ شكا اللاّع
دواسرٍ واللي زبنهم خلاوي=يسلا ولا كنّه من الوقت مرتاع
دواسرٍ مع برك سارت تخاوي=تقدى عقيدٍ طيب فعله له اصداع
دواسرٍ فالمعتلا والضماوي=من دونه الحربات والخصم ينصاع
دواسرٍ مثل الشهاب السماوي=صمّ الجبال الشامخه حطّه اقطاع
دواسرٍ كم شيخ قومٍ نعاوي=تنعاه قومه راح راسه تفلاّع
دواسرٍ لامن تغلّى الغلاوي=باعت رخيص الروح من دون مهزاع
دواسرٍ من دون ستر الغطاوي=تموت مايكشف لها ستر وقناع
دواسرٍ تكسب كبار الغناوي=كم هجمةٍ زاعو بها بين الآفزاع
دواسرٍ لاطاح وسمٍ سخاوي=قطعانهم ترعاه في كلّ مرباع
دواسرٍ بالطيب ديمٍ حياوي=يروي ولا يجرح لوبله تتبّاع
دواسرٍبالفعل ماهي تراوي=تفعل ولاتنشد من الغير مطماع
دواسرٍ والعذر منها رجاوي=عجزت اعدّ فعول مجدٍّ لها شاع
وسلامه الجميع
وارجو السموحه اذا زدت حرف او انقصت وللجميع وافر الحب والاحترام الكبير