أخذت مع نقش الطلاسم مده=وسجلت في صفح الورق مسوده
وعلقت في ظهر البعير أشدادي=من غير لاقربه ولا مزوده
حرن لياطال السفر وأفحمته=يشرب هوا الغربي ويشبع صده
العلم يظهر لاضربت البيدا=والبعد يقرب لاوطينا خده
من عاش متعافي فلاهو سالم=لابد يومن يطرحه لابده
أماعلى الدنيا توسد يدها=أو أرجع لحظك توسد يده
أيامنا بالغيب مانعلمها=ماتعطي الخاطر على ماوده
كم واحدن سافر وهو له نيه=له نيتن يرجع ولا الله رده
مرن شمال ومروجهه حدرا=نفسه عزيزه والظروف أتحده
من ناشته عله تردى حاله=ومن زمته نفسه يرد لحده
من صافح الهين يعيش أهوين=ومن صافح الشده يعرف الشده
يعرف قسا الايام من جربها=لاأفترت الدنيا يعد العده
لوهو صغيرن فالحياه وتوه=يصبح مثل هرشن وطته الكده
أن ماكليت أمن الشحم بذراعك=محدن حذف عندك ولحدن مده
أضرب على العوجآ وتطلع سمحه=واللي معه مدخل يبيح سده
ماكل أبن عمن ذخيرة محزم=لوتكربه فالنايبه وتشده
ماكل من يضحك معك يفزع لك=ثوب الرخا فالضيق ماهو قده
دورعلى الصيد الجفول أدسمهن=فرع لهن حرن ينومس هده
لاتنكف أمعذب وجيبك فاضي=أن ماتغدى ضيف جارك غده
واللي عزم روس العرب زعلها=أبطا عشاه وسفرته ممتده
علمن تمنيته ولاالله جابه=وعلمن سمعته ليت ربي لده
حوت البحر الاحمر غدا باللؤلو=سبب هبوط التنميه في جده
لاشفت خلان الرخا طلقهم=ون قلت وش رأيك نقول أمسده
يقطع فتاةن ذرها ماينفع=لابو صلايبها على آبو جده
في صيهد الشيمه مضارب كوعي=أفضل من اللي باسط لي مده
أخذ الرساله يالنسيم الغربي=وأجنب ولاتجنب على جرهده
أنحر وبلغ والسلام أوداعه=بمركم ساعه وأغيب مده
الركب الضامي والموارد تيما=خلها تكسر فوق ريهج عده
امنول عود الشيوخ الفاخر=كنه على خشمي يذعذع نده
أثر الزمن يلغي صداقه مبطي=حبل الوفا هملت يدي من مده
العام ماأعدد ضحاي وليلي=واليوم لافات العصير أعده
قامت توخر حاملات الوسمي=الارض جفت والمزون أمصده
حتى الشجر يبست فروع أغصونه=كنها أشوش أعيالنا في هده
في كل يوم ألبس جديد الخامه=وفي كل يوم أرقا الحجا وأقده
طب المجنن مايعالج صاحي=هاك الصديع وجب صديع أ وده
صارت على تشكيلت اللعيبه=بين الدفاع وهجمتن مرتده