السلام عليكم ورحمة الله وبركاته
مبروك عليكم الشهر الفضيل الله يجعلنا واياكم من صوامه وقوامه
وتقبلوا هذه المتواضعه وسامحونا على قلة التواجد
بديت بسم اللي خلق وابدع الخلق=الله سبحانه وجلا جلاله
من بعد ذكره للمثايل بدا طرق=من شاعرن لاطرب غنا لحاله
يحرص من النقاد ويجنب السرق=ويتعب على المعنى وفحوى مقاله
الشعر عدن جمته دونها عمق=وكلن حسب فكره يجاذب حباله
احدن يوردها على قمة الأُفق=واحدن على الميراد خانه خياله
واحدن يجيب اللي لها فالشعر سبق=واحدن يدير الفكر مثل المحاله
واحدن قصيده بالغثا ماحقه محق=ماينسلم شره وحتى هباله
غوجن على اعراض العرب معجل الدرق=والشعر سيفن ينثلم بالجهاله
واحدن يحسبنه عن الناس به فرق=شاعر ومتغطرس وعنده صماله
والا الحقيقه غارقن في الجهل غرق=مابه من الثنتين شعر وجماله
ماكل من غنى مع نايح الورق=يستاهل ايقلط مع اهل الشكاله
ان كان ماهو مع هل الطايله لَبق=مايرفعه شعره لو انه جزاله
المرجله منهاجها بينة طُرق=واللي مشاها طاب حضه وفاله
والشاعر اللي للوفا جاذبه عرق=يستاهل انك اتقدره واتعناله
وختامها صلو على سيد الخلق=محمد المبعوث لجل الرساله