::: مـنتدى قبيلـة الـدواسـر الـرسمي ::: - عرض مشاركة واحدة - الشاعر شافي النتيفات... وقفات مع شعرة
عرض مشاركة واحدة
قديم 15-03-2014, 03:12 PM   #1
 
إحصائية العضو








فهد الغريري غير متصل

فهد الغريري is a jewel in the roughفهد الغريري is a jewel in the roughفهد الغريري is a jewel in the rough


:t-t-5-: الشاعر شافي النتيفات... وقفات مع شعرة



الحمد لله رب العالمين والصلاة والسلام على سيد الأنبياء والمرسلين سيدنا ونبينا محمد ابن عبدالله وعلى آله وصحبه ومن وآلاه ومن اهتدى بهديه واستن بسنته إلى يوم الدين

إخواننا أعضاء وزوّار ومرتادي الموقع الرسمي لقبيلة الدواسر



يسرنيان اطرح بين ايدكم في رحلة شعرية مع الشاعر شافي بن راشد النتيفات أحد شعراء القبيلة البارزين الذين مثلوها خير تمثيل في الكثير من المحافل والمنابر الإعلامية . فـــ بعض من قصائدة.




الدوسري والنعم عود ورا ذوده

حان الوعد واشتغل فكري بمجهوده = واشد حملي على اللي نيها نابي
حمل ثقيل رفيع عالي الجوده = واشهربها في الوجيه ولاني أحابي
وان جيت في محفل يزودني زوده = اهديه للي لفا قريب واجنابي
يامرحبا عد مايمطر على السوده = واعداد مايطبع وينشر من كتابي
واعداد مالاح برق وحنت رعوده = ترحيب طيب وكرم ما احصيه بحسابي
عن موقع للدواسر بان مردوده = وعن طاقمه قمت ارحب وابدي اعجابي
موقع فخر فيه آمال الخير معقوده = بين المواقع ثبت ماهزه اربابي
الموقع الرسمي لياعدت بنوده = يعطيك مافيه من عادات وآدابي
انتم والاعضا ومنهو زاره شهوده = ولولى رجال عليه تحوف ماطابي
ذا الليل عيد علينا يالله تعوده = جمعا بني عمنا مردودها ايجابي
تكاتف ومعرفه والوصل مقصوده = ماله سوا غيرها مقصود واسبابي
وشوفة رجال تنوش الطيب وتروده = اللي واحدهم لاجاه العلم ماغابي
وبالطيب والمعرفه مايجهل حدوده = على النقا قام حظه فوق ماعابي
درب الردى مايجي شرعه ومنقوده = وبيت الفشل مايجيله ساس واطنابي
وشلون وهو الذي لاذكرو جدوده = فان كان للفخر جرم اعده ارهابي
الدوسري والنعم عود ورا ذوده = يطرد وراها ويفتل روس الاشنابي
والدوسري والردى نار وباروده = ماتجتمع دام للناموس كسابي
ربعي حماة الوطن في الضيق وجنوده = صبيهم لا احتمى الميدان ماهابي
صبينا في اللقا مابيح سدوده = يسد في ماجبه ويفك الانشابي
وصبينا يفخر بماضيه ويذوده = يوم الجهل يوم عصر الشلف وحرابي
صفاتنا ماهي بسهله ومعدوده = بالفعل والا لاجيت لعد الانسابي
هذا قليل كتبته واعرف ردوده = والصدق مثل النهار يبين الغابي
كل القبايل بفعل الطيب معهوده =مدحي لربعي ماينقص حق الاجنابي
واليوم في الامن كل مدد عضوده = في ظل حكم على درب القدا صابي
حكم السعودي ليامن ذكرو فهوده = تداوي اللي ماينفع جرحه اطبابي
الله يعز الوطن شامخ مع طوده = عبدالله اللي رجانا فيه ماخابي
عبدالله امام الامه ماش يكوده = في السلم سلم وبوقت الحرب حرابي
الله يعزه ويرحم امه وعوده = ياليت يشرى شبابه وادفع حسابي
واعطيه لو كان من عمري ومردوده = انه يعود شباب اهم الاسبابي


قصيدة القيتها في مناسبة ترقية ضباط وموظفين دواسر الشرقية


هلا مرحبا لو ينتقدر بالاثمان = ماوسط البنوك ادون من راس ماله
هلا مرحبا واعداد ماهلت امزان = وعدد من سكن في الصين قدر وجلاله
على حفلة اهل الطيب خطلان الايمان = بني عمي اهل الجود واهل الشكاله
ازف التهاني والمودة وعرفان = لضباطنا واللي ترقا تناله
حضرنا وجمعانا على العز من دان = وياللي جهلت افعالنا خذ رساله
على الطيب مبدانا ولافيه خذلان = في نجد وجنوب الدار والا شماله
هل العزوة اللي كل مافتح ميدان = تسمع وتسمع عزوة مع صماله
خوي الدواسر من عزيزين الاخوان=لامن حدته سود الليالي ثناله
نزبن دخيل الدار وارواحنا رهان = وناسم عصاه ونتركه في مجاله
بهذي الصفة ما احدا خذاها ولابان = صعيبة على اللي هيبته من رياله
نكرم قصير البيت لاحل سكان = ويلقى الشحم والكيف يزها دلاله
جريس اليماني قصته خير برهان = يوم ان الليالي حدته من حماله
نزح صوب من طيبه على الطيب ربان = بعد مانزل عند الدواسر لقاله
رجال تنادي كل مامر ضيفان = وكل يقول اقلط وعندي رحاله
ويشهد لنا بن مطرف بكل ماكان = بعد ما وقفنا وقفة تنعناله
ومنها رجع طلابه بكل خسران = وذا طبعنا من هازنا عزتاله
نسوق الديه للجار من دون نقصان = من جدار بيته والعوض في عياله
على الخيل دفقين ورفقين لابان= عدوا نوانا ماتهنا لياله
ودون الخوي نفدي بالارواح مجان = دليل الكلام الشمري في عطاله
والى من طلع فينا ردي وجابان = نعديه حتى من المجالس الحاله
هل الشيمة اللي قالها طير حوران = شهدها الملك عبدالعزيز بمقاله
جبال كما سنجار والنير واذقان = واحدنا يموت وعز نفسه سباله
كريمين واللي حده الوقت وانهان = بدار الدواسر مزبن اللي عناله
وحنا من اول وايضا بوقتنا الان = هل البل وكل حطها اول حلاله
عطايا الله اللي يدفع ارواح وابدان = ثمنها ومن جاها فيومه دناله
تسج الرجل في كل ديرة وجيان = الى شافت الجو المطرف تواله
وترعى وحنا في طرفها مسيان = قبل لايجي الراعي نظم الكفاله
وتفخر بنا لاثار في الجو دخان = وياما خذينا واحتمينا السلاله
اقول الصحيح ولا ارجي فلان وفلان = ولاية لربعي مارجينا بداله
ومدحي ماينقص حق من كاين كان = وكل بحقه والمواقف دلاله
جميع القبايل والنعم دون نقصان = وكل بطيبه يظهره ما جناله
ترا من حقر فعل الرجاجيل غلطان = ومن همش حقوق المطاليق عاله
وذالحين في حكم شمل كل الاوطان = ولا اعيب من يفخر بشي مضاله
تحت ظل عبدالله ونايبه سلطان = بعد حكمهم راح الجهل والظلاله
ومن خيرهم من حده الوقت فقران = تبرع له الشعب السعودي بماله
ولا فيه مثل بلادنا بامن وامان = يسير الرجل باهله ومرتاح باله
بلاد العدل ماتنقص حقوق الانسان = بدينا بنهج كل مجد براله
بنهج الموحد حامل السيف شامان= على اللي رفض معاد ينفع جداله
ظهر له بدار كلها جهل من دان = وجمع الشمل والوحده اكبر مناله




خمسين عام ونجد يفخر بطيفة


يطير ياللي ما يوني رفيفه = احمل سلامي يوم بالجو حايم
وصل سلامي للوجيه النظيفة = وصل سلام عد وبل الغمايم
لبو فهد سلمان هاك اتعريفه = راع المكارم والوفا والغنايم
والعدل والناموس يبقى وليفه = وان كبرت القاله يشد العزايم
حر شلع فوق الجبال المنيفة = مايعوقه المشراف والا السمايم
هيبة وعز ومجد دايم حليفة = له طلة تمحى جميع الظلايم
هاز الصعايب والامور الكليفة = وجاته مطيعه من عصور قدايم
خمسين عام ونجد يفخر بطيفة = ويمرها طيفه بوسط النسايم
اسمه باسم نجد المسمى رديفه = كل الوطن في حب سلمان هايم
يانجد شيخك مايحصل وصيفه = لاجا نهار فيه حذف العمايم
تبقين يانجد العذية شريفة = ما دنسوك اهل البغي والجرايم
اهل العقول الناقصات السخيفة = ماتهز نجد وشيخها حي قايم
عز لداره نجد درعه وسيفة = قسمه لداره من خيار القسايم
العود طيب والخليفة خليفة = عبدالعزيز اللي يفك الخصايم
عسى كتابه باليمين النظيفة = في جنة الفردوس نازل وقايم



عسى الله لايجزاك بالخير يالنسيان


عسى الله لايجزاك بالخير يالنسيان=قطعت بوصالك لين زودت في هموم
تعاونت وايا فهيد ضدي وانا شفقان =على طاري ايام مضت والعلوم علوم
تذكرت منزال لنا من ورى الشقران =والا يابن محسن كن ما حال دونه يوم
مداهيل ربع تكرم الجار والضيفان=هل بيوت تبنا على النايف المزموم
بني عمي اللي ذكرهم فالمواقف بان=حدن راح واحدا فوقها يرجي المقسوم
تذكرتنا يافهيد جدي ولد وطبان=عسى الله يحرم وجهه النار والسموم
وتذكرتنا مساوي ليا عدو الخطلان=عسا ربنا يرحمه في الموقف المرسوم
وتذكرت رجل الدين والطيب بن حشان=عسا الله يظله تحت ظله نهار يقوم
وذكرتني يافهيد بمحمد كحيلان=ولد مدهش اليامن ذكرته عداه اللوم
وذكرتني شافي ويوم عليه كان=فلا عاد يوم راح به شافي المرحوم
عسا ربنا يجزاهم العفو والغفران=نهار به المخلوق عاري بدون هدوم



كانت الدنيا ظلام وتشتت

كانت الدنيا ظلام وتشتت وانحدار = القوي ياكل حلال الضعيف الاجودي
فوضوية قبل قرن اختصرها باختصار = اندثر الاسلام والنور طافي واسودي
قتل وحروب وسبي كيف ما اقول اندثار = الا من معدوم مافيه شخص مهتدي
ليل يمسي كاسب وليل مكسوب ودمار = مال نفسه رادع إلا الشهامه توصدي
ماش دين يردع النفس في كل الديار = القوي في ذيك الأيام سيفه يجردي
يوم ربي راد للدار خير وإعتمار = جاك رجل فوق ظهر الذلول معمدي
بان نوره مثل نور القمر يقدح شرار = الشرار العدل وسياسه ونور الغدي
جاك من صوب الكويت يحداه الانتصار = معه من شبه الجزيره حزام يحمدي
قايد لستين رجل شغاميم وحرار = وصبح المصمك وعجلان للفوضه فدي
وأذن المذن ترى الحكم لمعزي جهار = قالو العربان سمع وطاعه وابعدي
وارسل جيوشه وهذا تراه أول قرار = يدعو إلى كلمه الله ودين محمدي
طاعوا المندوب واختاروا الدعوه خيار = يعرف إن البيت مايثبت إلا باعمدي
واسس لنا دوله تبهر العقل إنبهار = قال قانوني ترى الشرع والدرب أوحدي
حط شرع الله وسنه نبيه له مسار = جدد التوحيد والسيف حده حددي
الظلام الأولي راح وخلفه النهار = ياعسى ربي يطول نهار سرمدي
الأسد مدد يده والثعل لاذ الفرار = الثعل خله مادام الأسد متجندي
حنكوا للدار باسم عسى يبقى عمار = السعوديه مابين الدول نور وهدي
ياعسى يختار جنب النبيين اختيار = في جنان الخلد يهنى بعيش ويرغدي
حيث وحدنا وخلف حرار من حرار = نهجهم واحد ولافيه نهج مبتدي
استلمها سعود كم عام حتى الاحتظار = عاشت بخير ورضا وجه خير ويسعدي
واستلمها فيصل وطور الدوله ودار = السياسه هزت عروش قوم تحتدي
قادها يم المسيره وقادت باقتدار = وارتفع شان الوطن من ورا نجم الجدي
وغادر الدنيا وسلم لخالد مايدار = واستلمها خالد الخير والعيش ارغدي
ياعسى عظامه تحرم على دار البوار = في زمانه يذكر ان الفهد خير سندي
الفهد ذخر الفهد له مواقيف جسار = في زمانه حلحل أشيا صعيبه تو بدي
يوم جار اخوان مريم غدرهم يوم جار = قال انا دون الكويت لعلمها منجدي
وفي شهر سته سنه 26 غار = موت ابو فيصل وخيم نهارا اسودي
الوكر ثابت إلى راح حر جا حرار = وانبلج نور لتالي سواده يحصدي
جاك ابو متعب وزال الحزن والاحتسار = خادم البيتين صقر العروبه جددي
العهود الماضيه وابتكر خير إبتكار = المواقيف النبيله لهلها ترصدي
خادم البيتين وابو التواضع والوقار = كم ضعيف وقف لهيبته يستنجدي
وكم فقير من عطى كف يمناه استدار = وكم عدو رغم خشمه نظر له مقتدي
وكم وضيع يرفعه من مكان الاحتقار = وكم رفيع لابطش هد حيله وازودي
وكم طريق مظلم لامشى معه استنار = كل علم طيب في رصيده يرجدي
لو كتبت معلقات الشعر عندي قصار = ماوفيت بحق صقر العروبه سيدي
وعضده الأيمن كبير واعده من كبار = سيدي سلطان راع العهود المجدي
يكفي إن سلطان عضده وهذا الافتخار = والله ان ذا فخر ماله نديد يوجدي
والي للعهد طبعه يغير ولا يغار = غيث لامن شبت الفتنه يهل بردي
عاشوا آل سعود درع من كل نار = شجره في ظلها نعيش خير ونرغدي
بإسمي وبإسم الدواسر نبايع بافتخار = لوفاكم ياذرا شعبنا مانجحدي
عادة للدوسري مامشى درب اليسار = يكرم من اللي على حكم داره يعتدي
وعشت يالشعب السعودي في خير وإنتصار = واذكر الله وأشكره مالغيره نسجدي



سعود ينخى

تكفون تكفون ياهل الطيب واهل الفعول = اللي تبيّن ليامن جات حزاتها
اهل الظفر والكرم والجود فعل وقول = اتّثبت افعالها لاجات وقفاتها
خطلان الايدي رجال المجد نعم الزحول = وقفاتكم جات يالابطال حزاتها
وقفاتكم بانت وكل عرف ويش اقول = في اسبوع هانت على لجواد ضيقاتها
يوم ابن عواد جيتو ماتغيب صمول = ويوم ال بريك انتخو جيتو بهقواتها
وقفاتكم ماتعدد ياجمال الحمول = اللي تبين نهار الضيق فزعاتها
واليوم يوم الرجال اللي تعرف الاصول = يوم الدواسر وذي يالربع عاداتها
ولدكم اليوم ينخاكم ودونه قفول = يقول عيني تبي ياعزوتي ذاتها
يدعي عسا الله يوفق في دعاه القبول = ويرجي عطا من اليدين وجود مسعاتها
وانا هنا اليوم بنخاله وانا له رسول = وارفع بصوتي لربع تظهر اثباتها
وانتم كفو والحبل من شدكم مايطول = سعود ينخى وعينه وين نظراتها
في موقف يابني عمي بصيته يهول = وانتو لها ردوا النفس لملذاتها
يازين جمع النشامى والتكاتف يطول = والكلمة الواحده تنهي مهماتها
والتفرقه ياعرب مامن وراها محصول = الا التعاسه على الدنيا وغاراتها
دنيا الشقا فانية واللي عليها يزول = كم غافل من غثاها ذاق لوعاتها


المنتدى الرسمي

ياهاجسي معاد لك مقعادي = حان الوعد والوضع ماهو عادي
حرك مناديبك وانا استقبلها = واصوغها بابيات شعرٍ كادي
القّم الطبخة ببن وهيلي = حتى تجي للشاربين قنادي
واصبها واسوقها في الحالي = على الشلي وابو شنار بادي
والا الردي ماله محل عندي = اللي على حبل الردى مقوادي
ما اجلس بقربة لو جلست لحالي = منشار ظهر وللوجه عبّادي
باجلس على نتي واتابع ربعي = في موقع فيه التلاحم سادي
فيه الاخوة والفخر والعزة = على تراث ابناء القبيلة جادي
المنتدى الرسمي وباسمه نسمو = بيت الدواسر بالسمو يزدادي
بيت الرجال اللي لهم وقفاتي = شموخ وامجاد ونسب وشدادي
مزبنة من جار وقته ضده = ناسم عصاه ويهتني برقادي
عز الخوي واضرب مثل في ذلك = ياليت وقت الشمري ينعادي
ونشوف وش سوى خوياه بجمسه = شالوه ماخلوه في المحيادي
وجريس يوم انه لجا باحمانا = شاف الرخا من عقب ماجا حادي
والا الشريف اللي هدف بجيوشه = يقول يوم شفتكم لاعادي
والعامرية قصة مشهورة = مانستمع في هرجة الحسادي
سقنا الدية في عيالها اللي راحو = باسبابنا حتى نست لحدادي
لو جيت بذكر فعلنا بايجازي = والله ماحصي مافعل لجدادي
قد قالها عبدالعزيز الفيصل = في مجلسه يوم نشده نشادي
الدوسري نفسه عزيزه منهم = خذيت مجد ضيفله لامجادي
بمدح بني عمي ولاني قاصر = حق القبايل مثل نور بادي
اعود واسترسل على موقعنا = واذكر بعض مايحمله من زادي
فيه الثقافة والولافة وايضا = شعار ورواة وبعد نقادي
فيه الفوايد والعوايد تدعي = تاقف على اهل الشر في المرصادي
الله يبيض وجه من يتعبله = ادارته والمشرفين سدادي
والله يحيي كل عضو زاره = وضيوفه اول مافتح وجدادي
حنا علينا ندعمه ونزيده = صرخة ندا في المنتدا ونفادي
اموالنا واوقاتنا ماتكفي = واللي تعبله وانتسبله فادي
من كان عنده فكر لايذخربه = يطرح مشاريعه على الروادي
بضرب مثل برياضة اهل الكورة = اعضاء الشرف ترا عمود النادي
وختامها ياهايف بن مبارك = يامشرفين المنتدا لسيادي
باسمي واسم شيخ القبيلة مطرف = وكل القبيلة من جمع وافرادي
شكراً لكم من شاعرٍ نتيفي = اللي على رد الثناء ينقادي


قصيده في الشيخ الصييفي بن حمد الهواشلة

مدح بغير اهله ندامه ومنقود=يستاهل الامداح من طالت ايديه
اللاش مايمدح ولاهوب مفقود=جعله افدا اللي بان وابعد مغازيه
احود من من مدح الردي ليه ماحود=مثل الطبع في الثوب ماش بيمحيه
فكري يشوقه فعل من فعله يكود=عوق الخصيم وسعد ربعه وعانيه
اللي نهار الضيق تلقاه ماجود=يظهر بوجهه والسعد في مباديه
مواقفه مع لابته مالها حدود=كم كايد بامر الله ان قام ينهيه
في الصلح له وقفه وعادات وجهود=بالجاه والحكمة وجهده مبديه
كريم ماهمه هل النقص والزود=هداج تيما اللي وروده تلاقيه
عدا رهيا دايم الدوم مارود=تلقى النشامي عند بابه تراعيه
ذاك الصييفي والمدح فيه مقصود=افخر بمدحه مثل من يفتخر فيه
يابوحمد طيبك مع الناس معدود=مع ربعك ولجناب بانت مواريه
لاكبرت الدعوا لها قد وقدود=تاقف لها ميقاف يعد قاصيه
والله كفو يابوحمد منبع الجود=ماقلتها مرائي ولالشي ابغيه
والله ثم والله ماليّ مقصود=يكون شي داخل القلب ببديه




خميس اللي يفتخر به نسيبة


حشمة لربعي كاسبين المواجيب = خليتنا ظروف علينا صعيبة
تقدير دعوة كاسب الجود والطيب = خميس اللي يفتخر به نسيبة
جينا نحث اقدامنا والمكاتيب = والله يجملنا بهرج نجيبه
سلام ياربع تعلا المناصيب = سلام ياهل المعجزات التعيبة
سلام ياهل الوضح حرش العراقيب = واهل الثمان اللي تفك الطليبة
تهمل وترعى في حدود الاجانيب = في هيبة حماهم تفج الكتيبة
لاد الغييثي معتلين المراقيب = لاقام كل يتقي في قريبة
في مدحكم ياربعنا مالنا طيب = حق علينا واجب نرتقيبة
هذا كلام الصدق من دون ترتيب = واللي يقول الكذب ربي حسيبة
والله لوبكتب من الشعر واجيب = ما احصي ما نذكر من فعول غريبة
قلته وربعي تارد العد لاهيب = نتيفات واهل للسلوم العجيبة
وانتم وحنا ملتقانا بلا ريب = دواسر ما نرتضي بالغليبة
دواسرٍ في نجد خذنا المطاليب = مهما ابتعدنا دوسر ننتخيبة
هذا وكل فيه قسمه من الطيب = كل بفعل الجود حصل نصيبة


نصيحة


بسم الله الرحمن خير البدايات = إلهنا رب السما والبريات
سبحان من خيره على الخلق ظافي = الرازق الباسط بديع السماوات
الظاهر الباطن والاول على الكل = حق لنا نعبده ونكفر اللات
شرد المعاني تجتول داخل الراس = ولولى الرجا بالله ماسقت الابيات
يالله ياربي رفعنا يدينا = وحنا تحملنا ذنوب وخطيات
اغفر خطايانا وثبت خطانا = على طريق الخير في كل وجهات
ونسألك غيث مدلهم خياله = لانشى ربابه والتحم جاله اصوات
حن الرعد والبرق في مقدمه لاح = ينساق صوب ديار نجد العذيات
ويهل وبله في الفياض العجيبه = يحيي نبات طالت ايامه سبات
كله من ذنوب علينا كثيره = حتى اللمم صارت علينا بسيطات
يارب لاتواخذ عصاتك علينا = وارحم عباد تقضي الليل طاعات
اليوم في وقت علينا تغير = ياكثر ماشفنا من الوقت غارات
ياسامعين القول عندي بضاعة = بلاش ما يلحق عليها خسارات
من اولا تشرى وذا الحين تهدى = عشاقها قلت وفيها المسرات
اسمع ياغافل لايغرك نشاطك = وقتك ثمين ودور الايام عجلات
استثمر اوقاتك على مايسرك = اما مع اهل الخير رفقه وجلسات
والا بترك الشر حث الجهودي = اياك واهل السو لهو وغفلات
شبابنا له هيبه وعز وصيت = بكم الامم تفخر بكل المجالات
ياما عليكم تعتمد نصرة الدين = شباب الامة ياشباب المروات
في ما مضى عمود للدين وانصار = واليوم في غفلة وترك الصلوات
كم عمر ابوطالب علي يوم فدى = دون الرسول وحاز لاعلى الدرجات
هذا الشباب اللي عليه الكلامي = الله واكبر ما اكبر الفرق للذات
ذيك الهمم ياطالبين المعزه = اللي تسوق اصحابها للطويلات
في طاعة الله كل همه تعلا = وسنة نبيه من مسكها له اثبات
وترك النواهي واتباع الاوامر = هي مخرجك لاجالك ازمة وضيقات
والامر بالمعروف يلزم علينا = تراه من افضل جميع العبادات
ومن بعد طاعة والي الكون كله = لايفلت برك ترى الحبل فلات
الوالدين حقوقهم واجباتي = حيين والا بعد من حسبة اموات
جنتك تحت اقدام الام الحبيبه = والله ماتلحق جزا الام بالذات
تسعة شهور تنقلك في حشاها = تصبر على ضيم الليال العسيرات
وعامين حطت عضدها لك مخدة = ومع ذا وذاك عيونها لك لبيبات
وابوك عضدك كل ما احتجت في شي = اياك لاتنسى حقوقه عظيمات
وبنخا شباب اليوم ياصفوة الجيل = بقول شي شفت ما عقبه سكات
لا ياشباب هلك في رغبة النفس = لاتطيع نفسك رغبة النفس شهوات
تكسب امراض وتكسب ذنوب وهموم = ويروح عمرك بين حسرات واهات
لافات شي مارجع لك على الكيف = تعاني همومه سنين طويلات
النفس مثل الخيل صعبة ومطواع = ان ماعسفت النفس راحت بك وجات
ما تقول يانفسي عن الشر شومي = وامشي مع اهل الطيب طبع وعادات
رفقة رجال الطيب هي مكسبالك = والمرجلة ماتنجلب بالسهالات
جالس جليس العز واياك والسؤ = اللي حياته بين نمه وعثرات
حطه رسول الله كما نافخ الكير = ترى جليسك في نظر غيرك مرات
وياللي نقل حتفه على كتفه وسار = بسّمٍ يفرح كل عاذل وشمات
لا للمخدر ياعيال الحمايل = غزوا غزانا حط خلق الله اشتات
يسحب خلايا المخ حتى النهاية = كم نسمع وكم ينشر من الدعايات
وعيوننا تنظر والاحساس ميت = ما نتعظ قبل الامور الملمات
يجيك راعيها كما سالم الزير = ما احدٍ فعل فعله وهي بس ساعات
يبني ويهدم ما تعدى مكانه = في كل موضوع وضع فيه بصمات
لاتروح منه انظر بعدها بساعة = وان ما استفدت اليوم تلقى المهونات
قلته لكسب العبره ونستفيدي = والله ما قلته مرائي وشمات
وين انت ياعود يبري ضميره = قدام لاتجرع من الوقت لوعات
ابناك في رقبتك مهمة صعيبة = وانت الذي حملت كل الامانات
العود لامن يبس يصعب عداله = تغانم اعيالك قبل ياتي اوقات
تلقى المهونة من قريبين وبعيد = وكل نظر لك نظرة الذيب للشات
ياناس دنياكم جمارك مروري = والله لو ناقف مع الذات لحظات
معاد تسوى في نظرنا ولاشي = يوم فرح وايام ناكل مطبات
غدارة خوانة مالها اصحاب = تضحك وهي تخفي من الوقت نكبات
بالله لحظه وين سيد الخلايق = صفوة جميع الناس هو مابعد مات
لاوالله الا مات وانا على الدرب = نمشي ولامعنا عليها ضمانات
فيالله تحسن خاتمة من يخافك = لعمال تختم دايما بالنهايات
واغفر خطايانا وثبت خطانا = على طريق الخير في كل وجهات
وختامها مني صلاة وسلامى = على رسول ماكتب له خطيات



اليكم القصة


ياديريتي ياديرتي دار السلام = دار الرخا والامن والحكم السليم
دار العدل والشرع دستور ونظام = دار الوحي منزل بها كتاب عظيم
قبلة جميع الناس للبيت الحرام = فيها ومسجد سيد الخلق الحكيم
ارض وطاها من بعث يجلى الغمام = لبى ثراها من عمان الى الحطيم
واصحابه اهل الفضل وانوار الظلام = والتابعين ومن تبعهم من حكيم
ائمة الحق ومرابيع المرام = ايامهم ما فيه ليل مستديم
واليوم غيرنا الطريق والالتزام = اللي تبع نفسه وشيطان رجيم
راح التقى والدين مع نوح الحمام = والناس تاهت وسط تيار عتيم
منهم فئة بخصهم في ذا الكلام = والمشكلة ماعينوا منهم خصيم
اليكم القصة وما شفته تمام = وسط العليا والمربع والنظيم
والموت عند المملكة جنب الوسام = شرق البنا شمالي الخط القديم
في موتر تكسي واظنه برقهام = شباب باع المرجلة منها عديم
من شافهم يبطي وعينه ما تنام = ويقول عود جابهم ليته عقيم
قبوع مكياج وسلاسل باهتمام = ومشيا غنج ومقلدينٍ للحريم
ومحمرٍ خده عسى عمره عدام = والشعر منفوش كما جثة هشيم
اذا قعد يعجز مايقدر فالمقام = بينه وبين العز نيران وجحيم
اعرابهم عكسه حروف الانحطام=العين واليا والالف من بعد ميم
هذا رجل لا والله ان هذا خمام = مابه حيا ولا خلق عنده صميم
كرمكم الله يالعزيزين الكرام = من ذكر جنس يقطعه رب كريم
نعوذ بالله من حياة الانهزام = والله حرام بيننا ذولا تقيم
ياهيئه الحسبه عليكم الانتقام = منهم وردوهم لدرب مستقيم
والا على الدنيا وهذولا السلام= ويالله عفوك وانت تواب رحيم



مرثية في الامير نايف رحمه الله

لاعــــادك الله نهــــار السـبت وعلومـه =هدّفـــــت علــــــم تكـــــدر خاطـــــري منه
آمنــت باللـــــي لــــه الطاعات ملزومـه=وكفــــرت باللــــي علــــينا حربــــه يشنه
الله يحســـن عـــــزاء شعــــب فقـد نومه=والدمــــع فــــي داخــــل الاعيان ماكـنه
نايــف رحـــل والله اللـــي كاتب يومــــه=خيّــــم عليــــنا الحـــــزن والهــــم ونكنه
وان مات نايف ترا الاوضاع محســـومه=فصل الربيع يحضر لـــو طالـــت الكـــنه
روح عظـــيم السجايا طيّـــب القــــومه=رجل الامــن والعداله ناصـــر الســــنه
حارب وجاهـــــــد وفاد وبانت رسومه=ماله وجهــــده فــــدى للـــــدار ماحنه
رجل الفكر و السياسه مبعد الحومــه=عــــدو الارهاب جعـــل عظامه الجنــه


قصيدة مناشده في اعتاق السجين نايف بن عساف



الله واكبر وارفع الصوت تكبير =الله واكبر خالق الانس والجان
في موقف ماعنه صده وتبرير=ارفع بصوتي بالقوافي والاوزان
بلسان من حده زمانه على الكير=سجين ومكبل وعاجز ومنهان
نايف قضى عمره ورى الباب ماغير=مهموم ومن امه تغربل وحيران
هم يجيه الصبح وهم مع عصير =وهم حرمه النوم الى وقت الاذان
يقول ياربعي عذاب الطوابير=وقفاتكم تبعد عن القلب الاحزان
ينخى الدواسر محزمه في المعاسير=لاصك جال جال رجالهم بان
وينخى القبايل كلهم ماله مجير =بعد الله الا فزعة تقضي الشان
ينخى قحطان وشمر وحرب ومطير =وينخا عتيبة والخوالد وزهران
وسليم والسبعان واللي بهم خير=كربي ويامي والشلاوى وهمدان
وينخى الظفير وزعب وكل المناعير=الصيعر وبني عطية وشمران
والحارثي والاسمري دون تقصير= بجهينة وباكلب ولو كان ماكان
وبني تميم ولاد وايل مغاوير =ولاد الحويطي وال مرة وعجمان
وينخى البقوم وغامد وفكره يحي=وثقيف وبلقرن وبلي دون نقصان
ويالاد زيد والاحمري حثو السير =ويالمالكي مر العسيري ولاهان
جمع الشراري والرشيدي مغاوير=وبني عقيل وعمر وينخى لشهران
تكفون بعد الله ولي التدابير=ردوله الامل ترى موعده حان
لا احد يتراخى لو تطول المشاوير=الخير والناموس في عتق الانسان
الفو على اللي يكرمون المسايير=اللي لهم في سلم المجد مسكان
الاد الاشين محتمين المظاهير=للعرف عرافه وللحرب ظفران
وال الشريطي خص ماغيرهم غير=اللي لهم فعل النواميس عنوان
قولو لفيناكم بجاه المناعير=نبغى العفو بالجاه والمال والشان
واختامها عد السحاب المزابير=صلو على اللي خصه الله بغفران




حفل الحراجين


بضيافة اللي خذا الناموس مثنيا = لاد الحريجي تبين بساعة الثورة
ما جالهم طيبهم ذالوقت مشريا = من عصر شيبانهم متعدي طوره
اهل الفخر والكرم والبيت منصيا = يوم ان بعض العرب طيبه بمقدوره
نيابة عن بني عمي وانا هنيا = جيت اتكلم وكل يبدي شعوره
اعداد ماداج وسط الكون من حيا = واعداد صبح تنفس وانبلج نوره
واعداد ما مال وسط القايلة فيا = واعداد ما رفعت الرايات منصوره
ترحيب طيب وكرامة يشبه الضيا = ترحيب بين القبايل عالي دوره
بين الدواسر حزامي عزوتي وايا = قبيلة بالوفا والطيب مخبوره
صبيان مرة الى من جات لحميا = ربع تنومس نهار تكثر شروره
مرية تقنع الطماع لاعيا = حتى يطيح السطر من راسه وجوره
من يام يام الفزوع اليا بدا عيا = يام السطر والحمية قول اخو نوره
قلته عن العزوة اللي تحمي العيا = دواسر مجدهم تفخر به سطوره
دواسر كل ما نادى الندى هيا = سحاب صيف زبر مايومن جوره
عرق الوفا لاصدرنا منه ملحيا = نلحاه حتى من اقصى عرق بجذوره
كل عرف واعترف للعز مرعيا = عادات وامجاد في التاريخ منشوره
هذا وحق العرب ماهوب ملغيا = كل القبايل بفعل الطيب مذكوره
ايضا وحق الوطن ماهوب منسيا = مصيون من عرضة الغدار وشروره
في ظل حكم علينا اليوم مبنيا = حكم السعودي فخرنا طالت عصوره
في عهد صقر العروبة للعرب حيا = رمز المهابة يحل الصعب من شوره
ياما وقف وقفة لاذكر منخيا = الله واكبر هذا في وقته اسطوره
والله يعز الحكم ويعز من هيا = الامن حتى تعيش الناس مسروره



يتفجيح وسعود


يافجيح وسعود لا احد يبيح بسره = ياقل منهو تجاوز سن سبعيني
اشوف كل على الايام يتشره = تبون عمراً مديدٍ مير بعديني
قولوا لناس ورا الايام منغره = تطرد ورا حلوها وتخلي الديني
ما احداً صفتله ولا احداً قمت ببره = من اول الخلق حتى الناس ذا الحيني
كم واحد من غثاها جيبه يطره = عزيل منهو تجرع مرها سنيني
ورا الهوا يلحق الكره ورا الكره = يضحك وهو مادرا بالغيب مسكيني
من مات مثل الشهيد محمد الدره = قال العنا بالهناء والموت قافيني
وانتم رجال مواقفهم لها سره = ياما على الطيب حثيتو البعاريني
الذيب ما يلتفت في جرة الهره = والبوم ما عمره يرافق شياهيني
وحنا على دربكم بنسير في الجره = منا بمن غيره جو البلاديني


سلايل ولد بدران


جبرني نبا صيتك وذكرك وطرياك=ياراع العلوم اللي يشرف نباها
ابجزاك بلساني ولو ما اقدر اجزاك=بيوت الشعر في مدح مثلك تباها
كسبت المراجل يالسنافي بمبداك=تميزت من بين العرب باحتواها
كريم بمداتك وجودك وحسناك=سحابة وفا كل يعاين وراها
حليم بطبعك ماتدور للاشباك=عزيزا ونفسك رافع مستواها
تبنيت كل العز من عزك وجاك=وعزيت نفس عزها ما عزاها
تلقيت مدح الناس من ذا وهذاك=وتاقف وتلقا عندكم مبتغاها
وذاليوم ياابراهيم قافي تنصاك=ابهديك شرد ن عالي مستواها
لانك كفو والمدح كايد ويزهاك=ولانك من اللي ينتذرا ذراها
تلقيت طيبك يالشلي من نواياك=تفاخر بك السمعه وتلقا هواها
ياجعل الردي من وين ماكان يفداك=وياللي فديت ربوعك بملتقاها
مايفعل لفعلك كون مثلك وشرواك=كريم ماتحسب للخساير وداها
ترا المعجزات صعاب وتروم يمناك=يمين من الجزلات ربي عطاها
وريث الشيوخ اللي بنو في الديار املاك=خوال الملوك اللي مايقرب حماها
سلايل ولد بدران عامر اذا جاك=ذكره صفات الطيب كله حواها
بدارين من زايد ومن دوسر وهاك=مراجع وتاريخ يبين وفاها


الحب في قلبـــي مســـوي ســوايا= منه السهر شاهد على ما فعــــــــــــلبي
من يوم حــل وجال وسط الخلايا= خلا عروق القلب ما تتصـــــــــــــــلبي
قامت هواجيـــسي تـــوارد هذايــا =واليوم موجبها تعلاه ســــــــــــــــــلبي
نسيت كــل اللي فعل من خطايـــا =يذمّه لساني ويمدحه قـــــــــــــــــلبي
يقـــول ياشافـــي عديم السجـايـــــا= غلب خيالك عنده الناس غـــــــلبي
ياصاحــبي لا ياجمــيل الحـــلايـــا=جلبت روحي يازبونن لجــــــــــلبي
هاك اخذها من ظمن كـل العطايــا =لاتصير مثل الوقت يومه نكــــــــلبي
فتّـح قفـوله ليـن خشـــت يــدايـــــا= من بعد ما مكن قفوله قفـــــــــــــلبي
حتى وردت وشفت حوض المنايا= شربتلي جرعة وقام وغفـــــــــــــــلبي
سويت مع همي ووقتي حمايـــــــا= هـــذا خطـــا وشفيــــــك ماتنفصلبي
وتقول مافي خاطرك من حكايـــــا=والا علــــى موبايلـــــــي تتصــــلبــي
وتخلي اهل الحقد واهل الزرايــا= اكشف على قلبك قبل كشف قلبي



هل الهدار


سر ياقلم واكتب على شف ما ابغاه = أبيات شعر من ضميري منقاه
أبيات شعر تعجب اللي قراها = من هاجس في لازمه ما ذخرناه
اقطف ثمار الورد واتعب عليها = قول الصراحة يعجب اللي تملاه
ما أقول قول الا وعندي دليله = وما أقول هرج الا صريح بمعناه
اثبت المعنى علشان يبقى = تداوله من بعدنا أجيال تقراه
ياراكب اللي يعجبك زين لونه = جيب جديد يقرب البعد ممشاه
فكسار من صنع اليهود محفوفي = لونه سماوي والتوانك معباه
لامن مشى خلا المواتر تفاهق = كنه شجيع هاش والقوم تنخاه
يسوقه اللي في اللوازم مضرا = في لازم أهل الطيب حنا زهمناه
يمشي من الهمجة مع طلعة الشمس = ماياقف إلين النفود يتعداه
ينصابنا الهدار ديرة ربوعي = أهل المواقف في اللقا وجه وجاه
نصه لربع عز منهو نصاهم = كسابة الناموس والطيب تجناه
أهل الوفا والطيب سقم الحريبي = تاريخهم معروف ماحداً تناساه
ود الرسالة للرفاقة عمومي = تلقى الشحم والطيب ودلال مركاه
مع زايد الترحيب من جيت منهم = كل يقول اقلط ومن جيت تلقاه
كسابة الجزلات ذربين الايمان = أهل الظفر يوم الليالي معاناة
والنعم في ربعي هل الطايلاتي = اسم النتيفي يرفع الراس طرياه
الكل منهم ياهل العرف وافي = أهل الكرم في مقدم الوقت واتلاه
وانّا لهم يوم اللقا عضد ايمن = بحر يعوم ويغرق اللي تعلاه
لاد الجميلي في المواقف سلاطين = عدونا من ضربنا عاف دنياه
مدح الرجال الطيبين افتخر به = ابمدح أهل الطيب ما ابغى مجازاه
من غير قاصر في جميع القبايل = مدحي لربعي تاج للراس ودواه
واسمع ياراع الجيب حذرا تناسى = وصيتي يالقرم ماهيب تياه
لا جيت بن نمشان وقف وريض = سلم عليه وحب خشمه ويمناه
مقدامنا اللي يرفع الراس طاريه = اسمه تعلا واعتلا عالي علاه
رمز الوفا رمز الكرم نسل الأبطال = مطرف سنام المجد كله تبناه
مطرف عريب الخال والجد والعم = اثر الوفا من كف مطرف ترجاه
مفراص حق ومزبن اللي عناله = انا اشهد انه عز منهو تنصاه
أنت الأمير ابن الأمير المسمين = اللي لهم في المجدالاول ملاقاه
ماهيب وهبة مير ورث عن جدود = ابوه قبله قادنا واتبعناه
عساه في الجنة مخلد ومرحوم = فهد فهد فهد الفهود المسماه
اللي على العدوان سيفه بتوعي = كم طامع رده وهو ينقل رداه
الشبل من ذيك الاسود الصعيبة = والحمدلله جاب من يتبع خطاه
وارجع واثني وافتخر واتباهى = بانك علينا شيخ والحمدلله
أنت الذي تستاهل المدح بالذات = ومدح على معناه كل يتلقاه
مايدخله ناقد ولاقلب حاسد = والحاقد لسانه نشب داخل شفاه
طيب بن عمي دايماً تاج راسي = افخر بفعله جعل الانذال تفداه
بلغ سلامي عد ما لا ح براق = واعداد نجم في السماء بانت اضياه
واعداد من زار الحرم والمدينة = واعداد من زكى وللفرض صلاه
هذا وصلى الله وسلم وابارك = على شفيع الخلق يوم الملاقاه


مربه ما مربي


ياوجودي وجد من مر ثم اغضى وصد = واخنقته العبره وهل دمع كاتمه
عقب ما مر المكان الذي فيه اتحد = فاقد فيه القرايب ولحمه مع دمه
او وجود اللي فقد عز جاهه والجهد = شايب اقفى شبابه ولوّح محزمه
مربه ما مربي من سبب غض النهد = بدد احلامي وخلا حياتي مبهمه
وان بغيت ارتاح واترك سبيله والوعد = عيت الشيمة وعهد علينا لازمه





الزام


الا ياوجودي كل ما قرب الزام = تقارب هموم فوق قلبي رهينه
احاتي غياب طال عام بعد عام = وقلبي على الفرقى تزايد حنينه
من اول يمر العين في طيف الاحلام = وذا الحين قل النوم غير روتينه
غدا القلب كنه مركب فوق قسام =وقسام قلبي ثابت في يدينه
الا ياحبيبٍ صرت للحب رسام = رسم لي طريق واضح وسط عينه
رمتني مقادير الهوا عبر الايام = على خارطة حب عراها متينه




لاد الغريري

يالله قدرني على المنظومة = القاف زان وتو ماجا يومة
لاعدّ بين الناس مالة غاية = ما احدٍ يبيه ولا يريد علومة
لاصار في مدح الكفو فاصغوله = اللي لهم مجدٍ نعرف سلومة
من ترثة جميلة هل الفزعاتي = غريريةٍ أفعالها مرسومة
لاد الغريري كل ما جا هيّه = تبين لاجا ساعة محتومة
يشهد لهم ميقافهم في الماضي = كل جعل شاشه بدال هدومة
عزومهم يوم الوغى تدفعهم = يفداهم اللي مايشيل عزومة
هل فزعة تظهر ليا احتجناها = تضيّع اللي وهقته حلومة
من تغلب الغلبا هل الوقفاتي = دواسرٍ امجادنا معلومة
خوينا في ظفنا نتعبله = وعدونا له حربة مسمومة
واليا اعتزينا واجتمعنا جينا = مثل البحر ماحدٍ توهق عومة
والجار له حق علينا واجب = والضيف يلقى عندنا ملزومة
ياجاهل بافعالنا ذي نبذه = من شاعر عدا بعال ارجومة
نتيفي ساسي عريق وطيب = هل فزعة يوم الوغى ديدومة
حنا كفو والناس كل بحقه = الطيب واضح سلعة مسيومة
بين القبايل مثل نور الظلما = يفوز به من لاسبح في نومة
وارجو المعذرة لاقصرت بحاجة = مافيه نفس من الخطا معصومة



ان كان صالح

ان كان صالح يطلب الزود بزيد = في مدح ربعي يفخرن القوافي
موثق هرجي لياجيت بافيد = مايدخله شكة وراعيه شافي
قد قلتنا ثم قيل واليوم باعيد = حنا الدواسر قسمنا دوم وافي
في نجد حزنا المجد والمجد مابيد = يوم ان كل من قصيره يخافي
قصيرنا ناسم عصاته ولاصيد = في ظفنا يامن ويلقى العوافي
ويشهد لنا جارٍ حدوه المقاريد = جيناله حزامٍ جويداً لحافي
وفينا صفات مالها الا لواليد = اهل الكرم واهل اليدين النظافي
صبيان دوسر كاسبين الاماجيد = عز النفوس طبوعنا يالسنافي
وقت مضى يوم ان شح المواريد = مسبلين الماء كلام يشافي
ولانداني سيرة اهل المناقيد = ولانحب اهل النفوس الضعافي
نعمي عيون من وفانا حواسيد = كم من حسود عاد ركبه مقافي
وخوينا تفداه الارواح تمجيد = وقت مضى يوم السنين العجافي
لو بذكر الوقفات وشلون باجيد = صفات منهم يستحقون قافي
موجز بسيط قيل واليوم باعيد = قول الصراحة واستلم يالسنافي
واسلم وسلمني على كل صنديد = الاد دوسر في المواقف تشافي



يازين حبك

يازين حبك حط في قلبي فلوج = واصبحتنا من حبكم تايه الراي
قلبي كما قاع على الدرب مسهوج = هذاك رايح في لزوم وذا جاي
واللي سهجه من الغنادير عمهوج = اذوب ىفي ضحكه كما سكر الشاي
ياليت من ياخذ معه سجه وروج = من قبل لا للقبر تجريبي اخطاي
ياحظ ياللي تالي الوقت مفلوج = الصبر فاجأني وحضر لي دواي
صبرت صبر الشاطي لصفقة الموج = واخذت درس منه عفت التمناي
ياما وصلني من تلاميح وهروج = تلفي علي من كل عاذل ووشاي
في ساعة يظهر بها كل مرجوج = فرصة زمن وده يبي يدخل حماي
وقت الرخا ياتون فوج ورا فوج = كل على المرقاب تسمع له عواي
والا بوقت الضيق يظهر لك علوج = جعله فدى اللي رفقته وسط مخباي
كله لعين اللي جعل قلبي فلوج = غاية مناي وبهجة الروح ودواي



نتاج القريحه


اعز ما املك هو نتاج القريحة=لاقام كل يفتخر في مباديه
واللي ما يعرف قدره أنسى مديحة=ما أريد وقفاته ولا مدحه ارجيه
يدور في صدري هجوسٍ صريحة=والغيظ نرجو عفو ربي لكانيه
ابدي هجوسي للوجيه الفليحة=اللي تقدر ما نكنه ونعطيه
ما نيب من رافق وجيه قبيحة =اللي ورا الرجال تبحث خوافيه
وما أجلس على المترديه والنطيحة=من شان ما يلحق عليّه مشاريه
ومن وقف بدربي عن الدرب أزيحة=ما همني وضعه ولو كان نغليه
اللي ورا الأدنين تسمع نبيحة=لو هو قريب لي واخو ما التفت فيه
من حقي افخر بالعلوم الفليحة=إذا اعجب البنيان من كف بانيه
عقل الفتى مفتوح مثل الشريحة=احداً براسه كل علم يقديه
واحداً براسه كل علم فضيحة=والرابح اللي منهجه ما يخليه
منهجه منهاج الوجيه الصريحة =منهجه منهاج الوجيه الصريحة
هذا على فرقاه باذبح ذبيحة=القلب داله منه والفكر ناسيه
احب فكر كلمته لي فصيحة=لان الرجل فكره على الدرب واليه
وأنا بنات الفكر قبل القريحة=تظهر بشعر يرفع الراس طاريه




لاد الحبيبي


من هاجس اللي حصل له ظرف عجلاني = كني على اللي حصل ذالليل متنبي
ان كان يا موتري تبغى تحداني = لا جيت دار الحبيبي لاتعطلبي
من يوم في دارهم حطيت الارداني = ما نته بواقف على اللي صار تضحكبي
جاوك رجال تعز الضيف والعاني = اهل السجايا الحميدة للوفا تجبي
صبيان تغلب هل الوقفات والشاني = اهل الفخر والظفر لادرهم الركبي
واهل العشر يوم بيع الروح مجاني = ما احداً خذا حقهم يوم العرب تسبي
اهل الوفا والكرم ذربين الايماني = واهل الحسب والنسب وافعالهم تنبي
تارخهم طيب وفي الحرب ظفراني = جريحهم والله ان يعجز به الطبي
الجود مطلوبهم من ماض الازماني = والا الردى ماله منادي ولا ملبي


قصيدة تحمل اسمي


شاق النظر برق تكاشف نوره = بسري عليه وبقرب المحظوره
اشد حيلي واستعين بربي = لعيون منهي للجمال اسطوره
في عهدها نسيت كل همومي = وامشي ونفسي دايما مسروره
يازين وقف وانتظر لحظاتي = عيني على نظراتها مجبوره
رسيت لحظه واخلفتني عينه = يامن يقاوم نظرة مسحورة
اعني سحر فرعون وسط عيونه = غندورة تسوى مية غندوره
شكيت له قال انتظر يافلاني =اثر يمينه سكرت حنجوره
دعيت له يالله تزيل العثرة = والعظم هش وزودته كسوره
اصبر ياخلي والفرج عند الله = البدر نوره سابق لظهوره
لبيه يانو طلع من شرقي = سيله خريف وانتظر لزهوره
نوخت ذودي في فياض سالت = والخد زان وودعن دهوره
تتالت مزون الخريف وعلت = والوسم عقب شهور يبدي دوره
يحيي قديم والندى في عروقه = هذا الفرج والله يزيد عصوره
فيا باغي درب السعاده عانه = قد قلت صدرك لاتفوح قدوره
اهلا هلابك عقب ما عدنالك = واللي سواتي لايفوتك شوره
تروح والا تبتعد ماهانت = نفس من اللي مرها مذعوره



الله من قلبي المشحون=اللي تولع ولا فادي
الهم في داخله مسجون=مافادبه نصح الاجوادي
اليوم في حبهم مفتون=والصبح بيجيب الاعيادي
هذا الهوا كان ماتدرون=هم ن وضيقه يالاجوادي
لو كان عود بليا سنون=لاطاحبه عاف لرقادي
يصير له دايما مرهون=ومنين ماسيق ينقادي
والرابح اللي بليا شطون=سالي ومرتاح وحيادي
لان اكثر الناس فيه يخون=ياقل منهو له يفادي
في كل سوق ن يبي يشرون=واحدهم ان جاتله صادي
تقول ماخلق فيه عيون=ورا هوا النفس طرادي
وشلون وشلون مابه لون=والرمي دون الهدف بادي
لاصار مافيه حب وصون=متبادلينه بالايادي
فاحسن لي اروح منه بهون=ولاحياة ن بها جهادي
عزيز نفس ن ولا مرهون=بيدين من يجهل شدادي
واقول وان كان ماتدرون=ياقل من بالهوا فادي



قصيدة في الشيخ عبدالعزيز الحسين الودعاني


ياراكب اللي ليامن جيت بعدد = صفاته احتار ويش آخذ وش اخلي
صنعة زعيم الكفر من راسه محدد= ماكان يحتاجله ومشيكه فلي
في فزته جاني ن من قومه مهدد=لولى ردا الحظ والنكبات ماجلي
في وقفته مثل شيخ خلفه يردد=مليون والفين مسلم خلفه يصلي
اقطم رصاصي قصير ولونه معقد=بين الرصاصي وبين الورد والفلي
جي امس يوكون وفحصه توه مجدد=تصميم ميزاته سعودي ومتعلي
اليانطحته مثل صاروخ مسدد=تقول كن بينه وبين الوطا ملي
والياقفيته ماتدري رايح معود=كن فوق نور اسطبه لامن هدا طلي
على الخطوط الطويله عاش متعود=واليوم سقته لشيخ يطرب الكلي
لدار عبدالعزيز القرم ماردد=لانه كريم ومواقيفه تبينلي
ولانه حكيم من اهل العرف متمجد=ولانه وفي من اهل الطيب متحلي
ولانه يحل الحبل لاصار متعقد=ولانه على قمة الامجاد قد حلي
اكيد لانه على الامداح متعود=ابن الحسين الذي للمدح متولي
من لاد ودعان قوم مجدهم يمجد=اهل الثمان السوالف دوم عزلي
ومدين جار لهم من بيته المنهد=وعز الخوي يوم بان الضيق ماخلي
صفاتهم تعجز اللي يكتب ويسرد=مدري ويش آخذ ولا ادري ويش اباخلي



نفرح ونشقى والفرح له مظامين

نفرح ونشقى والفرح له مظامين = وان طالت الفرحة مداها قصيرة
الا فرح مجي حبيب الملايين = يبقى ما دامه في ربوع الجزيرة
يامرحبا ترحيب غالي بغالين = ترحيبة تبقى سنين كثيرة
ياغيثنا اللي طلتك تبهج العين = ياظلنا لازاد حر الظهيرة
ياسيفنا اللي قوم الشرع والدين = ياعزنا اللي ماندور لغيرة
ياجودنا اللي بدل الشين بالزين = عين العما من جود كفك بصيرة
يفرح بشوفك من شكى الضيم والشين = وتفرح بشوفك كل نفس حسيرة
ويفرح بك العاجز وكل المساجين = وتفرح بك جموع ترقّب غفيرة
نموت لجل تعيش ظمن السلاطين = ونعيش لجل تقود حبل المسيرة
الك الولى من شعبك اللي وفيين = انقل ولى شعبك عشيرة عشيرة
عهدا علينا ورثوه القديمين = يبقى ما دام الملك وسط الجزيرة


الملتقى الخامس لقبيلة الدواسر
قصيدة تشرفت بالقائها في الحفل الخامس لقبيلة الدواسر المقام
برعاية الشيخ / فيحان بن شجاع بن سويلمة

يافكري اللي لك مقام وجابه=هذا الحفل قد شرع الك ابوابه
في ليلة تظاف ظمن احلامي=ليلة فخر ليلة وفا عشنابه
نفوسنا مشتاقه وولهانه=عدا اربعه والخامس الله جابه
حفل الدواسر قام في ذالعامي=الله يبيض وجه من جانابه
برعاية اللي كمل الماجوبي=شيخ وساسه طيب ومن لابه
من عزوة ال بريك سم عداها=صبيهم يوم اللقا يغزابه
فيحان بن شجاع لامن طري=الطيب ساسه والنعم يزهابه
الله يحيي من تعنا صوبه=اقدم الترحيب عنه نيابه
جمع بني عمه وذي عاداته=رز الهدف وابوشجاع صابه
واللي بناه المنتدا من فتره=صرح بني كالغابه الخلابه
للابه اللي مجدهم ماثوقي=تاريخهم بافعالهم يقرابه
دواسرا بين القبايل ندرا=يوم المواقف فعلنا يدرابه
حماية الجيران لامن حلوا=ناسم عصاة الجار لايغدابه
ونزبن الجالي ليامن جانا=علم موثق يفتخر كتابه
ومدين جار البيت من جدرانه=من خوف لايلحق علينا كابه
عز الخوي لامن حداه اللالي=نفداه لو بالروح مماصابه
وحنا هل البل من على الجداني=كم حد قوم ذودنا ترعابه
موسعين حدودنا لرضاها=الله من طمع لها جينابه
خطلان الايدي لاحتما الميقافي=عذروبنا لارواحنا جلابه
اهل الكرم يوم السنين محيله=كم من فقير ظفنا يلجابه
مسبلين الما على الوراده=عيب علينا بيعه وطرابه
من اولا في نجد حزنا امجاده=طيب ولقا صدق ونقا رحنابه
هنا وقفت ولي مكان وقيمة=نتيفي لي عزوة غلابه
في فرعة الهدار والا الهمجة=وفي كل دار صيتها فزنابه
قلته ولا انسى حق غيري وادري=مجد القبايل حاسب حسابه
كل القبايل للفعايل حازت=يشهد لها التاريخ والنسابه
واليوم في حكم علينا دايم=حكم السعودي مارضينا الابه
الله يرحم من بنى لامجادي=موسس بلاد عشقنا ترابه
ارض الوحي وارض الحرم والقبله=ارض وطاها المصطفى واصحابه
ارض حكمها معزي وطوعها=بشرع الله المسنون وايضا كتابه
حل ورحل جزاه ربي عنا=خيرا على ماقدمه واوصابه
حتى وصل عهد المليك العادل=العاهل اللي كلنا نرضابه
صقر العروبه سيدي عبدالله=امام الامه والسمو يحضابه
الله يرده للوطن متعافي=جعله طهور الذنب مماصابه
باسم الدواسر كلهم باعلنها=الك الولى ياسيدي نبدابه
عهدا توارثناه من لجدادي=لو كان مهما كان ماخنابه



اذا شفت باب ياريش العين ملحوط

يقولون لي وشفيك مانته بمبسوط =وانا اقول عشت الهم طولت حياتي
الى جيت بسلا وانبسط والعب الشوط =تذكرتنا مافات من مغرياتي
انا طير حرن ماكفخ جنب شبوط =ومن عافني عفته ولوكان ياتي
اعيف اللقا لن كان حطيت فيه شروط =واحب اللقا اللي مقتفيه الغناتي
اذا كان تبغى في حياتك مية نوط =تعوذ من الشيطان واسمع وصاتي
اذا شفت باب ن يا اريش العين ملحوط =فجنب عنه مالك بجنبه مباتي
واذا اسمعت صوت بين الاصوات مشحوط =فلعاد ترجي منه كبر النواتي
واذا جاك من صوب الاجاويد مخطوط =فلا تجحده وتقول انا منك احاتي
ظروف الليالي بين لاقط وملقوط=ومن بيت الممسين يلقا بياتي
ابقول كلمة تحتها فوق عشر خطوط=على متنك اثقل من جبال السراتي
الى من هويت انصح والى من بغيت تشوط=تراني ما اهين النفس خلف البناتي



وكل الأماني بالتوفيق لشاعر شافي بن راشد النتيفات

 

 

 

 

 

 

التوقيع