بسم الله الرحمن الرحيم
هذي القصيدة كتبها الشيخ الشاعر /حفيظ بن عجب بن حفيظ في عمه الامير /ناصر بن فيصل بن حفيظ بعد الوعكة الصحية التي المت به نسأل الله ان يطيل في عمره.
خطاك سو المرض يا عمي الغالي=وعافاك ربي وزادك من كسايبها
يا شيخنا اللي تروم العز وتحالي=جدانك اللي تفانوا دون واجبها
لك في المحافل مواقف مالها تالي=بالعرف والحكمة اللي ماتجنبها
لا قلت قولا جميع الجمع يهتالي=من فصل قولك الى من جبت غايبها
عريب جد ونسب للعز مدهالي=شيخ ولد شيخ والشيخان متعبها
ناصر ولد فيصل ابن حفيظ حلالي=حلحيل شهم يفك اكبر نشايبها
كم شيخ قوم نصاك وهمة جبالي=سريت عنه همومه لين جانبها
ملفى كبار الامور اللي لها صالي=لا خاف منها كبار القوم ترهبها
يا نعم ياشيخنا اللي دوم متعالي=عزيز نفسا يجنبها مثالبها
يا عم دنياك هذي مرها حالي=دايم وهي ماتصفي لك مشاربها
ان أقبلت زرفلت يمك بالآمالي=وان ادبرت بينت لك من عجايبها
توعد وتخلف ولا تصدق بالآجالي=واعمارنا ذاهبة والموت جاذبها
في كل يوم تقربنا وتحتالي=واللي عرف مكرها يخشى عواقبها
دنياك هذي تسر اللي بها سالي=واللي يروم المعالي ما يصاحبها
لو دامت لحي دامت لافضل الآلي=رسولنا اللي تذوّق من مصايبها
لا حبك الله بلاك بكل الاهوالي=واعظم لك الاجر في اللي فاز طالبها
عسى الله يسلمك في كل الاحوالي=ويثبتك في الجنان اعلى مراتبها
وصلاة ربي علي المختار بانفالي=رسولنا اللي تعالى عن مكاسبها