علمنا علم على وضح النقا يابن عطيه=
لكن الدنيا يا بوراكان واقعها الظليمه
الله اللي عزنا بالدين وزال العنصريه=
في وطنا والعلم مرفوع يالله ان تديمه
والسلوم الطيبه ماهي على الطيب خفيه=
وانت حرا ياحمر العين ومجاذيبك كريمه
جيتكم حسب الاصول وجيتي عن كل جيه=
وشيمتي ترفع مقامي عن سواليف عقيمه
ان وردت ارد شيوخ القوم وعزومي قويه=
وان نصوني حصلوني بالمواقيف العظيمه
راس مالي سمعة تبرا لها نفس أبيه=
والمروه ورثنا هالحين وسنين قديمه
الله. مكرم لحانا عن مداهيل رديه=
وان ظهر فينا ردي نذبحه ذبح البهيمه
نحفي الاقدام للمطنوخ ود ومقدريه=
والكفو نسعى لمعرفته ونكسبها غنيمه
الطموح العز ورجال الشرف واهل الحميه=
وكل عرق فيه خير نعرفه حسب الوسيمه
لاول يوصي بطيب الخال لو من لاجنبيه=
مهرة حره وبنت حصان له صيت وشكيمه
لاالتقت روس الاكابر مع ملوك الزايديه=
قربو قوس الربابه واشعلو نار الوليمه
تعذر ماقسم ربي نصيب وقابليه=
فالمعرفه راس مال وكسب والنيه سليمه