قصيدة الشاعر مفرج بن ناصر بن جنبان المخاريم في حفل محمد بن ستان الشرافا
ياهجوسي هاتي اجزال القوافي=هاتي اجزال البيوت اللي فريده
لجل لامنه قفا الابيات قافي=ما يعين وسطها نقدٍ يصيده
جميلني و انهلي من كل صافي=والمشاعر عبريها في قصيده
موعدٍ ما عنه صده و انكفافي=رابع الاعياد جعل الله يعيده
كل قرمٍ لجل راع الحفل لافي=من قريب الدار والا ومن بعيده
وما لفوه الا على شانه سنافي=فاتحٍ بابه عسى سنينه مديده
و يا عسى يفداه من مرقده دافي=ولا له فعولٍ قدام ولا جديده
يوم جاه الختم وبشوتٍ نظافي=وزودها علّق على جداره حديده
قال ابويا حامي الحم الشعافي=و قال جدي فارس الحرب و عقيده
وقد مدحنا بفعلنا صقر النصافي=واثره مزور على لسانه نشيده
ما خدعنا من خدع في السلم غافي=البليد يظن خلق الله بليده
الكبر و الشك يجلب لانحرافي=و الجهل يهدم له قصورٍ مشيده
الاماره ماتبي لاشِ وهافي=ضعيفٍ عايش و في عيشه زهيده
مجلسه مهجور تسفيه السوافي=ولابه الا حرمته والا وليده
ولا تبي منهو يسبب لاختلافي=بين ربعه يزرع احقاد ومكيده
مهنته فرّق تسد بين الولافي=ودايمٍ منشب بديده في بديده
ولا تبي من في اللقسا زنوده ضعافي=لا ثقل حمل القبيله ضاع جيده
الاماره ما تبي ياكود وافي=فاتحٍ بابه و في الشدة وليده
يصلح الاخصام لو طال الوقافي=مايمل و دايم اريائه سديده
مثل راع الطيب و الجود الشرافي=طيب الوقفات و الجزله رصيده
محمد اليا قال بالاقوال يافي=حاضرٍ بالطيب و فعوله شهيده
بشته المن جاه في الشده لحافي=يفرح المحتاج و الناقص يزيده
الكريم اللي بفعل الطيب نافي=مجلسه مدهول و افعاله حميده
لا غرابه طيب من فعله يشافي=لانه امن اللي حمو خضرا الجريده
محتمين الدار وبكار صخافي=بالمزرج و السيوف اللي حديده
الشرافا مروية حدبٍ رهافي=في الملاقا و العدو اترد كيده
لابةٍ تسقي العدا سمٍ زعافي=وخصمها لادارت الهيجا تبيده
دايمٍ قدام ما ترجع خلافي=ياردون الموت لا شبت وقيده
مكرمين الضيف في سنينٍ عجافي=و الخوي ايعيش في عيشه سعيده
وجارهم لو جار ما يشكي اخلافي=يعاملونه بالسلوم اللي جويده
درعنا لاجا نهار الكون ضافي=وسيفنا عند المواقيف الشديده
ودوسر اسمٍ عن جميع القول كافي=اسمنا تفخر به امجادٍ تليده
يومها بخيول و بسيوف وشلافي=ما خذينٍ حقنا علومٍ وكيده
ونحمد الله اليوم في امن و عوافي=تحت حكم اهل الزعامه و العقيده