فمان الله يادارً ليا جت حزة التوديع =يودعني بكفً دق رمحه بين الاضلاعي
وفمان الله يامدهال خلً عشرته تلويع= فمان الله يانجد المسمى زين الاطباعي
وفمان الله من قلب على طاري هواك يميع =عذابه كل ماذعذع من اقصى نجد ذعذاعي
وفمان الله من عينً على شوفة ثراك تبيع = دموعً من ورى جفنً دعاه مع الهوى داعي
وداعً من غريبً لاذكر ربعه وذاك الريع =ومنزاله وخلانه وطول الليل يرتاعي
عسى يانجد عذري عن غيابي يقنعك تقنيع =برب البيت خلاق البشر منيب خداعي
انا يانجد ماقفيت من شان اتركك واصيع = تركتك يوم شفت الوقت وده يلوي اذراعي
انا مالي سوا وحده اليا عيّا الزمان يطيع= اطيعه لين اشوفه صار في يمناي مطواعي
واجي لك عقب هجرً مزّع عروق الحشا تمزيع = بقلبً بين حد الكذب وصدوق اللقا ضاعي
وبنسى طاري الفرقى وبنسى لوعة التوديع = واقبّل كفك اللى دق رمحه بين الاضلاعي