معركة القمعة

[معلومات العضو فكــاك^النشــايب]

صباح الخير للجميع


وانا اذكر االسوالف ليس كرها من احد ولكن للافتخار ويحق لغيري ان يفتخر في مافعلت قبيلته وربعه


ويمكن تلاحظون ذكري لبعض القصائد اللي على العجمان وهذي لشجاعتهم ولفخري انا وقبيلتي بهزيمتهم ولو انهم ما يستاهلون لم افتخرت بمعاركنا عليهم ولهم الحق بان يفتخرو بما فعلو بنا

مقدمة حتى نقلع ابليس


//////

قال الشيخ والفارس راكان بن حثلين في معركة القمعه وقد وقعت في فيضة أم معقلا بين العجمان وبني عمر ..

بني عمر جونا كما السيل دفار=وانا لهم نشدي لخشم الزباره
يستاهلون الهيل والبن وبهار=وانا السنام مشلخن في فقاره
نردع شباهم دون حسكات الأوبار=بمطارق نلحق بهن الثباره

والقصيدة اطول وكان راكان يمدح سبيع ويفتخر بربعه

المهم أضاف البطبوط من ال سليمان من العجمان قوله

:

ماهمني ناموس تسعين حمار=على فريقن طاح منهم سماره

فقال الشيخ ثنيان بن هديهد امير عجمان الرخم من بني عامر :

ياراكب من عندنا فوق عبار=راعيه لي ركبه يجود زواره
تلفي لراكان حمى دون الامهار=ابو فلاح اللي كما الشمع ناره
يافضحكم ماعاد فيها تستار=راحت عليكم يالمعيضي خساره
خليتو الخلفات والدق وعشار=وخليتو اللي حط في الخشم شاره
وشيرو على البطبوط لايلبس الكار=اللي جواده ماتداني المثاره
بني عمر ماهم بتسعين حمار=أهل مهارن لبسوها غياره
من حربهم كنك على واهج النار=ولاجاك منهم كود مقدم شراره
ساعة تواجهنا على قحص الامهار=كثرت عثايا خيلكم في الزباره .

 

 

 

 

[معلومات العضو سعد المقابله]

الله لايهينك

 

 

 

 

[معلومات العضو فكــاك^النشــايب]

ومن يقول يالسنافي


اسعدني مرورك

 

 

 

 

[معلومات العضو صقرالجميعةالدوسري]

لاهنت اخوي فكاك النشايب على هالمشاركة الطيبة , بيض الله وجهك يالنشمي.
تحياتي لك.

أخوك صقر بن مطلق الجميعة الدوسري

 

 

 

 

[معلومات العضو بن مشخص المسعري]

لاهنت اخوي فكاك النشايب
ونعم فيكم
لكن عندي تعقيب سؤال على

معركة القمعه وقد وقعت في فيضة أم معقلا بين العجمان وبني عمر ..
اخوي ماوضحت منهم بني عمر



تحياتي
ابن مشخص

 

 

 

 

[معلومات العضو فكــاك^النشــايب]

ولانت ياصقر وتسعدني مرورك



بن مشخص ولا انت يالسنافي


بني عمر = بطن من سبيع


تحياتي لكم

 

 

 

 

[معلومات العضو ابوحمد الشامري]

ارحب يا فكاك مبطي يا صبي عامر بن صعصعه ما واجهناك والعماني كله خير وبركه الا يجمع الوجيه الطيبه الا مثلك وشرواك .

شف يا السبيعي يكون لك الشرف والفخر كما ذكرت في مقدمتك ان تكون مهزوم من العجمان او انتم هازمينهم، حتى بني هاجر يفاخرون يوم الرياحية في ذا البيت يوم يقول عبلان :

والذبح جا في المخاضيـب الهلاليـه=فرسان دهم السرايا عيدهـا الشالـي

مع ان فيه البيت هجاء بس ال مخضبه يفخرون فيه.

ورح لمنتدى ظفير وتجد هذا البيت مع انه بيت تحدي من راكان يوم يقول:

بين الظفيري والمطيري وعساف= ننزل ولو جانا النذر والزحامي

وعجران الشرفي جايه حارق في كبده من المعيضي اقصد ابو فلاح راكان بن حثلين يوم ارسل قصيدته مع ابن سهيله الشامري وهجاء فيها عجران الشرفي وخلاه مثل الشوفات يدرج وسط البيوت يوم قال ابو فلاح قصيدته التي يعدها حكام البحرين ال خليفه من شيخات القصائد ويسمونها الشيخه يوم يقول عجران :

وين انت يا راكان ما عاد تنشاف=حِلمت يا راكان حلـمٍ إنهزامـي
من عقب ما تامن على كل خراف=اليوم يومر لك إبقـل الطعامـي

رد عليه الامير راكان وقال :

قال المعيضي بالضحى يبـدع القـاف=فـي دارسمحيـن الوجيـه الكرامـي
عسى لهم بآيات مـن حـج وطّـاف=عـزٍ لحاضرهـم وللـحـي دامــي
يا راكبٍ مـن عندنـا فـوق هيـاف=بتيـل سـاجٍ ومقتفـيـه الـولامـي
فليا دعم صدره على عذيات الاسيـاف=دنـوا ثـلاثٍ يشتـهـن الـولامـي
بواطن يشـدن الادامـي بالاوصـاف=وان زرفلن يشـدن الجـول النعامـي
يمشن ثلاثٍ عقب ألومـا والاصـلاف=والرابعـه يلفـن لـولـد الامـامـي
سلم على ربعٍ كما وصـف الاشـراف=واختص ابـو تركـي بـرد السلامـي
سلام أحلا مـن لبـن كـل مشعـاف=واخن وانـوج مـن عنابيـر شامـي
ولفتها يا شيـخ مـن كـل الاطـراف=نمرا كمـا وصـف الجـراد التهامـي
والله لـولا جمعـك اللـي لـه أرداف=دولة هـل العوجـا سـواة النظامـي
إن قد إن عدلكم علـى كـل مزغـاف=فعـلٍ إتعرفونـه جـديـدٍ وعـامـي
إبمطـارقٍ فيهـا غلـب كـل هيـاف=وحدب الظهور اللي اللي تقص العظامي
والكل ينكس عايفٍ عقب مـا شـاف=غصـبٍ ودورات السبايـا دوامــي
عاداتنا لمـا التقـت دقـل الاشنـاف=ثم ردّعـوا سـرد الرمـك بالولامـي
في ما قفٍ خطرٍ على الروح باتـلاف=في روشنـن غنـى بركنـه حمامـي
ننسف على الطوعات زينات الاطـراف=ما بين مصـري ومـا بيـن شامـي
ودروع منعـات ثقـيـلات لـصـاف=متحزمـيـن فوقـهـن بالحـزامـي
إليا أقبلت حومةٍ زرفهن كمـا القـاف=نركض مراكيـضٍ ترمـي الكهامـي
عاداتنـا عنـد المظاهيـر تنـشـاف=إليا طار حل ستر إمعورجات الوشامي
(ونحري برمي الشيخ وإن جـن زلاّف=ويطيح بيـن الخيـل مثـل المقامـي)
(ما هي بهرجة شاعـرٍ يبـدع القـاف=طـوّل إلسانـه فعـل ولـد الامامـي)
(حنـا ترانـا علتـه بيـن الانـجـاف=نقزي عيونـه مـن لذيـذ المنامـي)
(وقلبه لو هو نـازحٍ يرجـف إرجـاف=ونصّبحـه لنبـاج نـور الظـلامـي )
(والله إن ننزل بين بوشـه والاسـلاف=ونودعـه يتـرك حِلتـه والجهامـي)
(ويجنب الخفـرات زينـات الاوصـاف=بيـض الترايـب زاهيـات الزمامـي)
(كنـه خريـشٍ بـدل العقـل بإهفـاف=وأسبـاب خفـه إفـعـولٍ إقـدامـي )
ليتك لنا يـا شيـخ بالعيـن تنشـاف=يـوم أقبلـت دولات صبيـان يامـي
معهـم إفرنجـي لحسـه تقـصـاف=مثـل الـرد فـي مدلهـم الغمامـي
حنا ذرا الديره عـن البـرد ولحـاف=ومن زارها زرنـاه كـدغٍ إشمامـي
يا شيخ ما ارسلنا نبي منـك محـذاف=قـومٍ تبنـي مـن ورانـا الخيامـي
بين الظفيـري والمطيـري وعسـاف=ننزل ولـو جانـا النـذر والزحامـي
وبيوتنا تبنا فـي طويـلات الاشـراف=أيضـاً ولا يبنـى وراهـا إخيـامـي
ويروح فـي جمعـه كثيـر التعجـاف=ولا خيـر فـي هـرجٍ بليـا تمامـي
حنـا كمـا حـرٍ تعـلا إبمـشـراف=صيده من جـل الجـوازي إجسامـي
جاه أسمرٍ في صايـده سـم الاتـلاف=طقه وحـط أطـراف ريشـه هدامـي
وجـازت المغلـولٍ جـداه التلـهـاف=هيا اركبـوا يـا مشتهيـن الكلامـي
وصلاة ربي عـد مـن حـج وطـاف=على النبي مـا حـج بيـت الحرامـي

ركز في الابيات ما بين الاقواس جعلك تحيا.
بعدين ما احترام لك واحترامي لقبيلة سبيع العجمان يوم حرب الحساء كانوا جلاوية في العراق ولا كانوا كلهم بعضهم وغزوا غزوات عظيمه تاتي ذا الحين وتعد امور خليتها ملاحم يا اخي حنا في ارض ماهيب ارضنا يوم العجمان في العراق وسط اجناب ولا قاع ماهيب قاعهم ويكسرون الظفير والانجليز والقبايل الاخرى في كون العريف يوم يقول منوخ المتلقم :

بين علوى والظفيري وشمر= والمدّين والكفر والامام
نازلين في كل حي يتخبر= نازلين الجو يوم الزحام

علوى الدوشان ومطير
المدين : الاخوان
الكفر: الانجليز
الامام: الملك عبدالعزيز

يعني ما احترامي لك يا فكاك لا تزاود في الامور العجمان قدروا على ذا القبايل كلها عاجزين في سبيع.

ودمتم

 

 

 

 

[معلومات العضو فكــاك^النشــايب]

البقا يابو حمد والصبي ماتنقال لي الله يصلحك ويهديك


ان المنتدى واهله كلهم خير وبركه والعماني من عرضهم


///

شف يا السبيعي يكون لك الشرف والفخر كما ذكرت في مقدمتك ان تكون مهزوم من العجمان او انتم هازمينهم، حتى بني هاجر يفاخرون يوم الرياحية في ذا البيت يوم يقول عبلان :



اي نعم لنا الشرف ولهم الشرف لاكسرونا ولا كسرناهم ...

ولكن موضوع بني هاجر ماهو موضوعنا


//

ورح لمنتدى ظفير وتجد هذا البيت مع انه بيت تحدي من راكان يوم يقول:

بين الظفيري والمطيري وعساف= ننزل ولو جانا النذر والزحامي


مايحتاج اروح اعرف البيت وموجود في منتدى سبيع


///////

وعجران الشرفي جايه حارق في كبده من المعيضي اقصد ابو فلاح راكان بن حثلين يوم ارسل قصيدته مع ابن سهيله الشامري وهجاء فيها عجران الشرفي وخلاه مثل الشوفات يدرج وسط البيوت يوم قال ابو فلاح قصيدته التي يعدها حكام البحرين ال خليفه من شيخات القصائد ويسمونها الشيخه يوم يقول عجران :

وين انت يا راكان ما عاد تنشاف=حِلمت يا راكان حلـمٍ إنهزامـي
من عقب ما تامن على كل خراف=اليوم يومر لك إبقـل الطعامـي


(((( يابو حمداولا موضوع القصيدة ومعركة الحسى اللي تقول مو هذا موضوعها لان المعركه هذي بين العجمان وسبيع ولالها دخل في ابن سعود وغيره ولكن بما انك فتحت الموضوع انا برد على صلب الموضوع اما الكلام السب والامور هذي ماهي عندي لان الذم مايهفي للاجواد ميزان.

سبب القصايد وبدايتها كانت عندما طلب ابن سعود من راكان بن حثلين فرسه وقصد راكان بفرسه وانه لن يبيعها ويبيها لاجت الغاره او المعارك فلهذا قصد الشيخ عجران بن شرفي :

ان كـان يطـري السابـق اللـي شمـامـي // ارجـــو ان كـذبــه يـاجــواده يـدربـيــك

يالله يـالـحـمــرا يـجــيــب الــوســامــي // حـتــى بـــراي الله ســريــع نـقـاضـيـك


فهو بهذا الكلام يتوعد راكان بن حثلين ويتمنى فرسه تجيبه اللي شح فيها على ابن سعود وذكر له عدة معارك ويذكره بفعلهم ::


الـعــام حـــدر فـــي لـيــال الـصـيـامـي // وأودع هــل النـقـرة دكـــوك ودواكـيــك

صـبـح هــل الـوفـره وخـذهـم شـمـامـي // بـلـيــل وخـلـيـنـا غـنـمـهــم مـشـاكـيــك

والصبـح ابـن حجـرف ونجعـه قسامـي // غشـاهـم الـعــج الـحـمـر لـــه دوامـيــك

والـيـوم الأخــر فـيـه جـــردة حـزامــي // بـيــن الــعــدام وبــيــن وارة مـكـاويــك

ورابــــع نــهــار جاعـلـيـكـم غـمـامــي // وجمـوعـنـا لـجـمــوع يــــام مـحـابـيـك


ذا فـعــلــنــا بـمـخـالـفـيــن الامـــامــــي // يالضـبـعـة الـعـرجـا تـعـالــي نـعـشـيـك


الله يــرمــي مــــن غــــدر بـالـوهـامـي // البايـر الـلـي حــط فــي الـديـن تشكـيـك

ابــــوه قـبـلــه قــــد رمــتــه الـمـرامــي // رمــاه رمــاي الـوحــش بالشبـابـيـك ..





وعقبها حصلت المعركة وجلو العجمان للبحرين بعدما انكسرو من ابن سعود وسبيع والسهول وباقي الجيش



قصد عجران هذي القصيدة منها البيتين اللي ذكرت :

وين انت يا راكان ما عاد تنشاف=حِلمت يا راكان حلـمٍ إنهزامـي
من عقب ما تامن على كل خراف=اليوم يومر لك إبقـل الطعامـي

وبعدها ارسل راكان بن حثلين القصيدة يطلب من ابن السعود السماح له بان يرجع هو وقبيلته العجمان
///

(ونحري برمي الشيخ وإن جـن زلاّف // ويطيح بيـن الخيـل مثـل المقامـي)
(ما هي بهرجة شاعرٍ يبـدع القـاف // طوّل إلسانـه فعـل ولـد الامامـي)
(حنـا ترانـا علتـه بيـن الانجـاف // نقزي عيونـه مـن لذيـذ المنامـي)
(وقلبه لو هو نازحٍ يرجـف إرجـاف // ونصّبحـه لنبـاج نـور الظلامـي )
(والله إن ننزل بين بوشه والاسـلاف // ونودعـه يتـرك حِلتـه والجهامـي)
(ويجنب الخفـرات زينـات الاوصـاف // بيـض الترايـب زاهيـات الزمامـي)
(كنه خريـشٍ بـدل العقـل بإهفـاف // وأسبـاب خفـه إفعـولٍ إقـدامـي )



واذا بالنسبه لتركيزي للابيات هذي مركز ولكن ان سعفتني ذاكرتي لم يحصل ماقال راكان وحصل ماقال عجران وانت احكم اذا على القصيدة موجود القصيد والكلام ولكن هنا يبقى الفعل ..؟؟؟؟



/////////



بعدين ما احترام لك واحترامي لقبيلة سبيع العجمان يوم حرب الحساء كانوا جلاوية في العراق ولا كانوا كلهم بعضهم وغزوا غزوات عظيمه تاتي ذا الحين وتعد امور خليتها ملاحم



((( سؤال لماذا الحجه الضعيفه اللي اشوفها دايم ..؟


يعني اذا انكسرتو العجمان قليلين واذا كسرتو العجمان مجتمعين ..

غزو غزوات عظيمه كلن له مغازي عظيمه اظن انك سمعت بسالفة اهل العشر كانو قليلين وانتصرو بتوفيق من الله وشجاعته واهل الثمان كانو قليلين وروق من عتيبه انتصرو في معركة طلال على ابن سعود وجيوشه وكان الجيش اضعافهم


وليش مانخليها ملاحم ان كانك تشوف العجمان قبيلة لاتستاهل ان الشخص يفتخر لكسرتها .. هذا رأيك الشخصي اما العجمان قبيله عزيزة النسب ولها من الافعال لاتعد ولاتحصا حالها كحال قبايل الجزيره عزيزة النسب ...

///

يا اخي حنا في ارض ماهيب ارضنا يوم العجمان في العراق وسط اجناب ولا قاع ماهيب قاعهم ويكسرون الظفير والانجليز والقبايل الاخرى في كون العريف يوم يقول منوخ المتلقم :



بين علوى والظفيري وشمر
والمدّين والكفـر والامـام
نازلين في كل حي يتخبـر
نازلين الجو يـوم الزحـام


اولا ليس هناك مايدل على معركة او حرب حصلت بينهم


ثانيا لو يوجد معركه يحق لك ان تفخر ولكن هل تقنعني ان القبايل هذي مجتمعه او انها افراد من ظمن جيش ابن سعود وثالثا بما انك ذكرت الاخوان اليس اغلبيه العجمان مع الاخوان ؟؟؟



///

يعني ما احترامي لك يا فكاك لا تزاود في الامور العجمان قدروا على ذا القبايل كلها عاجزين في سبيع


السؤال هذا وجهه لك لاتوجه لي لماذا انتو تقدرون على ذا القبايل وبني عمر وبني عامر يكسرونكم وليس كل سبيع ... هل تعرف لماذا ؟؟ الا اذا كانك تقول ان سبيع لم تكسر العجمان (( انا اتكلم عن المعارك القبليه وليس مع الدوله )) برضو هذا رأيك



/////////


هذي قصيدة بما انك ذكرت فعلكم في بعض القبايل وافتخرت فيحق لي ان اذكر نقطه من بحر في تاريخ قبيلة سبيع


يقول شاعر سبيع ( قويفل بن ناصر )

يا البيض كان الغبن من ذبحة وريك *** أربع مية غير القلايع طرحنا
يوم المـرة و الـهواجر مدابيـك *** وياماً وقحطاناًُ وعبلي سنحنا
خلي بتالي القوم يندب كما الديك *** ولامنهم اللي عنة يقمح دمحنا
من دونكن يا لابسات السماويك *** أمثوريناًُ بالثني في ملحنا
عشرين من يمنا حجاب مصـويك *** يقلع سمار القوم لين استرحنا
ياذيب عان محمد أجة ويعشيك *** سود الجنازع في مطاوي برحنا
............................................*** أغواة شيطان العراد ونطحنا
أبن ثاني حول بهم لتهاليك *** ونا لهم دون العدامة نصحنا
لعيناك يا وريك فرق ونعطيك *** وياكثر ما زيزوم قوماً ذبحنا
أولاد على لمن عدو بالمشاويك *** أبشر لو أن الموت جمراً لفحنا
وسبيع ربعي محتمين المعاريك *** الي صلح ولد الردى ما صلحنا



والقصيدة اطول

واسم محمد المذكور هو محمد بن هادي بن قرمله عندما اتته مكاتيب ابن ثاني بان يفزع معهم طلبو منهو سبيع ان لايشارك لان كان بينهم عهود ولم يستجب فاتاه مالم يكن بالحسبان مثل معركة الحويا



تحياتي لك اخوي ابو حمد الشامري وارجو ان تستقبل كلامي بصدر رحب وان تطرد ابليس وترفع نفسك من امور السب واتمنى انك منت ماخذ موقف من قبيلة سبيع لاني اشوف في خاطرك كلام على قبيلة سبيع


وتحياتي للمتابعين


اخوكم / سعد بن شايع

 

 

 

 

[معلومات العضو ابوحمد الشامري]

مرحبا يا فكاك ارحب شف التاريخ ما ينزعل منه وما دام انك ذكرت الوقعات انا كنت انتظر ردك لاني عندي حكي واجد وابغي اكتب ذا الرد قبل صلاة الجمعه علشان لا صليت ان شاء الله ان الذنوب تنمحي

شف طال عمرك :

انا ابذكرك لك الوقعات اللي صارت بين العجمان وسبيع :

وقبل لا اتكلم واذكر الوقعات يكون في العلم ان قبيلة سبيع الكريمة نادرا ما تحارب العجمان منفرده يعني دايم متحالفه مع القبائل الاخرى:

اولا الرضيمة يوم يقوم الشاعر خفيف :

تسمو بنا الغلبا سبيع بن عامر= وتمسو بنا لين الله ادنى ذهابها
ومعهم من اولا النشيطي جماعه=وحضران وبدوان كثير حسابها
لكن تخيضاع الجنايز بينا= عياد تهطع من علاوي رقابها

ثانيا يوم الطبعة يوم ذبح الامير راكان ابن فراج من ال ابو اثنين شيوخ سبيع وذبح شقير الدويش يوم يقول :

يشدون هيضات الدباحيل ما فاج= ركن (ن) كسب والركن الاخر مفاليس
وعيناش يا الصفرا ذبحت ابن فراج= كله لعينا وقفتش في المناسيس
خليت دمه بين الاضلاع زعاج = بشلفا حداها كف سبر العراميس
والله لو لش مع الدرب منهاج = إن قد نوقف موقف(ن) ما بعد قيس
ولعيناك يا عود(ن) غدى ذيك الامواج= هذا الدويش وكب عنك الدنافيس
من كف ولدك يوم ولد الردي ماج= يروغ عقله من لميع العبابيس

يذكر اسم الدويش اللي قتله الامير راكان الشاعر عبدالله ابو سبعه الدامر في قصيدته التي قيلت بعد الطبعه ومرسلها الى الامام عبدالله يوم يقول :

شقير صادته القدر والمكاتيب=والفغم خلى طايحـن فـى لقاهـا
كم كاعب من ضربنا طرت الجيـب =تبكـى وليـفٍ راح معـاد جاهـا
ربعى مواريد الفعـول المذاريـب=لكامت العقـلا تقارع حصاهـا
ياما تلتنـا مقلعـات المشاعيـب=لادرهمت واسبورهـا فـى لقاهـا
ديار(ن) حميناهـا بحـد المغالـيـب=ولامن اول خيـر محـدن عطاهـا
لها المطيرى والسبيعـى مراقيـب=مثل النهال اللـى ترد ابظماهـا
ولا الظفيرى راح غصبٍ بلا طيـب=وعقب العبيـد وهيتـه مانساهـا
قدنا على كبر البـلاوى دواريـب=ناخذ مصالحهـا وننطـح غثاهـا

ويوم مناخ قدام وهزيمة سبيع ومطير والهواجر يوم يقول عبلان :

ألا يا الله ياربٍ رحيم=جزل المد يارب العباد
يا رزاق خفاق الجناح= لا أمسى ما ظهر لصبح زاد
عبدٍ لك مطيعٍ ما عصيت= ما مشيت في درب الفساد
وفي قاعة قِدامٍ من جنوب= نوخنا وعقلنا العظاد
جانا شافي وابو اثنين= كن إجموعهم كثر الجراد
ومعهم باشة البدو الدويش= مثل الغوج من قطع القياد
سمينا وسبلنا عليهم= في يومٍ على الصديق عاد
سام الروح سوم المرخصين= وجعلنا له الشقرا وساد
صار الذبح في قوم الدويش= مثل الزرع في أيام الحصاد
في صبيان علوى المترفين= أهل الخيل مقحمت الطراد
هذا إهديناله من الصفرا كفوف= يـبي الطول ومهارٍ إتقاد
فجازونا بذبحتهم فلاح = وعند الله فيها للخونة إمراد
غير لا تنشد عن جدنا الاول عريب= وذبحت المطيري في سداد
ألا يا سعد دنوا الركاب= عوص الجيش من سفن الحماد
كن ذليلها ضرب السماح= مثل السيل في أرض الحشاد
وكن مرواحها جهجول صيد= شاف الزول مع وقت البراد
أو مرواح عجلات الوحوش= صوب العشب من عقب المصاد
تلفي لابتي صبيان يام = زرع القلب لاجاوِكْ إجراد
يام إموطيت النجوس= لامنه نهق عير الرشاد
هم ذِرعانا وحنا الكفوف= وهم صوابنا وحنا لهم إزناد
هم دايم لنا غارٍ كنين= وهم البيت وحنا لهم إسناد
وارخينا حدود المرهفات= وكثرنا لطير الجو زاد

يوم جودة :
يذكر الرواة الثقات ان يوم جودة ذبحوا العجمان الفين لحية من جيش عبدالله الفيصل وكان من ضمن الجيش سبيع ومطير والهواجر وقبائل العارض حتى واحد من شيبان السهول يذكر يقول ان يوم جودة ذبح منا يا السهول 40 لحيه وللعلم السهول بني عم السيبع .
يوم جوده من الايام العظيمه للعجمان يقول المؤرخين والرواة :
ان فارس العجمان العظيم منصور الطويل هو اللي طرح القائد السعودي الامير محمد الفيصل وأسره وعرضه على حصانه حتى سلمه الى أخيه سعود الفيصل ( ابو هلا) صديق العجمان واللي كان مع العجمان يوم جوده ، فقال منصور الطويل : خذ أخيك يا سعود والله لولا حشمتك وتقديرك ان أمسط رقبته بالسيف وأنا اخو سلمى.
ويوم جوده يقول عبلان :

يوم على جال جوده ترهـق افناعـه= يوم عبوس غشى الصفـرا مخاييلـه
جمع العوارض نطحنا كـن تهزاعـه= سيل تحـدر علـى جـاري مساييلـه
بارودهم في الخضيرا كـن تنيزاعـه= برقه يرفرف حقوق وان درج سيلـه
دفنا لهم من كثيـر المـوت واقناعـه= ماغير قو العزيمـه والظفـر حيلـه
تسع ميـه عسوجـي طايـل باعـه= كن الخشيع الخشـب جثـا رجاجيلـه
وسيوفنا في جماه الـروس قضاعـه= كم جوهـر دمـر جهـالنـا خيلـه
ارخى الشنق واهمل اليسرى بمصراعه= لين استداب المطوع وادبـرت خيلـه
خلي المبيرق يـدق الحـزم بكراعـه= والراس فاخت حساب يديـه ورجيلـه

المطوع : هو محمد الفيصل قائد الجيش السعودي في جودة.

يوم كنزان : قتل من قبائل العارض وسبيع الكثير كما ذكره المؤرخين امثال الزركلي واصيب الملك عدالعزيز وقتل اخاه سعد بن عبدالرحمن.
يوم يقول نغيمش بن هادي الشاعر :

ليل على ابن سعود يا ليل الندم = ذبح الاصايل والعمار الغالية
اخوك ياعزيز من الموت انكتم= وراك تهرب منه وانت اتخايله
صابك وصاب اخوك من الموت السهم = بالليل الاظلم..ليتنا بالقايلة
عقب التدنجر ما تفكون اللزم = وارقابكم من ضرب الايدي مايله

يوم العيينه :
يذكر الشاعر يوم العيينه فيقول في هزيمة سبيع :

تِماسطوا ظفرانا وظفرانهم= إمشوِّكات(ن) وردِّداً إشيوف
لكن زعيج الدم بينا وبينهم= وروس(ن) تخالف مالها إكتوف
منهم السبيعي طق يبغي ديرته =والهاجري مِتزبن(ن) الجوف

ويقول الحريصي في وصف معركة العيينة :

ليل العيينه مزينه ليل السعد =بان الشجاع وبان من طق الشرود
جود الامير وحن سرينا للوعد =ماهمنا كثر المخايم والجنود
لاميرنا ضيدان قاضينا فهد =ونحمد اللي حان خوان العهود
ونحمد اللي حان خوان العهد = قيده طريح يوم خلوه الجنود
سرنا عليهم بالله الفرد الصمد = بالاد مرزوق موسعة الحدود
يوم المشوك بيننا مثل البرد = يصبح على جو العيينه به رعود
من قبلها ترى حن تعشينا سعد = في ليل كنزان عسى مثله يعود
ومن قبلها ليل على جوده بعد = حنا دمار الحاكم لا جا فيه زود

بالنسبة لما ذكرت من كلام الي دار بين الامير راكان وعجران الشرفي شاعر عبدالله الفيصل كان عجران الشرفي يتقوى ويفتخر بفعل ولد الامام عبدالله بن الامام فيصل بن تركي يوم يقول الامير راكان :

ما هي بهرجة شاعرٍ يبـدع القـاف=طوّل إلسانـه فعـل ولـد الامامـي

طول لسانه عجران بفعل ولد الامام وهو عبدالله الفيصل فكان قصيد عجران الشرفي كلام في كلام والفعل لعبدالله الفيصل كما هو مبين في بيت الامير راكان.

وبعدين تقول ان الامير راكان ما سوى شيء او ما وفى في وعده لعجران انظر الى المعارك اللي انا ذكرتها وانت تعرف.
وبعدين معارك العجمان اللي في العراق منها كون العبيد وكون العريف معروفه واقدر اذكرها لك الان ولكنها لا تفيدك بشيء في موضوعنا.

وسلامي للجميع

ويمكن يا الربع اني ما عود لهذا الموضوع لرد لاني والله العظيم مشغول كثير والاخ الغالي العماني يعرف انشغالي في منتدى مجالس العجمان الرسمي اللي انا اديره الان.
وفي النهاية ما نقول في قبيلة سبيع الا ونعم وهذا تاريخ راح ولى مع ناس الله يغفر لهم ويحسن اليهم.

فمان الله

 

 

 

 

[معلومات العضو مسلم]

ونعم بسبيع وبالعجمان وبكل القبايل

بس الشهادة لله مال للسبيعي على العجمي من يوم خلقة الوسيعه والسبعان قبيلة طيبه وفعلوها غنية عن التعريف بس مثل ما قال الشامري ما قد واجهت العجمان الا في ذرى ابن سعود وبدعمه ومساعدته وهي قبل كانت في ذرى بني خالد بس ما يمنع هذا ان تكون فيه حالات استثنائية وهذي تصير كثير واظن سبيع منقسمه على عمرها وهذا مادفعها للتحالف مع ابن سعود
حيث انها انقسمت على نفسها بعد الرضيمة كما هو معروف فبعد هزيمتهم. اجتمعوا عند فهيد الصييفي فاتاهم نوال السبيعي فقال له فهيد :ـ
يانوال وسع صدورنا بسالفه والاقصيده
فقال ماعندي مايونسكم .
وقصد قصيدته المشهوره.

ولـوا سبيـع التمر ماحداكـم لــوم ***ولا حدكـم غـرس تسـقـا بمـاهـا
طحتوا بنار صلوهـا يطـرح الحـوم ****والـي ورا نجـران قـاده سنـاهـا
وأسقيتوا الشري المربرب على الصوم ****وعيونكـم بالشـب جـود ادواهــا
ويـلاه ياشيـخ" غـدى بـاول القـوم ****خـلا رباعـن طافيـاتـن ضـواهـا
ومجلاد(ن)اللي في القسايذبح الكـوم ****ولاجى طـراد الخيـل بيـح عزاهـا
مع ناجي الادغم فزع كـل مضيـوم ***معطي جياد الخيـل مهفـي عطاهـا
ياماعطـى مـن سابقـا" مالهـاسـوم ***لـو انهـا بالبيـع ماحد(ن)شـراهـا
وياما فجع كبـد المعاديـن مـن يـوم**على مهـار(ن) ربـح اهلهـا غذاهـا
أشقر يدير الموت كنـه مـن الـروم ***دور السيـات البـلا لـيـن جـاهـا

ناجي الادغم ومجلاد بن نافل وعدد من فرسان سبيع قتلوا بالرضيمة .



هذا ما حصل عليه من قصيده ابن نوال وهي أطول من ذلك . فصفق الصييفي فهيد دلاله ونثرها على الضو .
وقال:ـ لا عادت جيتك لنا يا بن نوال أردنا أن تسلينا فجمعت علينا همومنا

 

 

 

 

[معلومات العضو فكــاك^النشــايب]

بسم الله الرحمن الرحيم

هلابك يابو حمد وذلحين مسكنا خط جديد وانت انسان تبي تسبب مشكله منت جاي تناقش عن سالفة القمعه او سالفة عجران وفي نفسك على سبيع امور مايعلمها الا الله .

...

..

وقبل لا اتكلم واذكر الوقعات يكون في العلم ان قبيلة سبيع الكريمة نادرا ما تحارب العجمان منفرده يعني دايم متحالفه مع القبائل الاخرى:
..


يجوز كلامك صحيح ولكن ليس كل سبيع يابو حمد فقط بني عمر من سبيع ...هم اللي نادرا يغزونكم منفردين واذا اسعفتني ذاكرتي (( محقبه والقمعه ومقتل ال شامر الذين سميت باسمهم الفيضة واكيد انك تعرف فيضة الشامر غير المغازي والمعارك التي لاتحضرني الان )) ولكن انت ياخ ابو حمد اذكرلي مره واحد او مرتين غزيتو على بني عمر منفردين ...؟؟؟ وثانيا التحالف لايضر ولا يعيب الا اذا في مفهومك انه يعيب او ينقص من قدر القبيلة يعتبر هذا رايك ولي اجابه خاصه عليه ..


///////


وبما انك ذكرت الرضيمه وهذي حال القبايل يوم لك ويوم عليك

ولكن انك لم تذكر فعل بني عمر من سبيع ولا نسيت قول الشاعر راشد المعيضي ماني متاكد من الاسم

ان كان تبغى من عيالك بضاعه=وصهم بذلن مع اللي يذلون
بني عمر في حربهم سم ساعه=ولامن هزعناهم شوين يعييون .
يالايمي عساك شلفا عجرش=ويلحقونك من سبيع الجمالين
لامن لفونا لاهم مثل المخرش=مايرجعون الا برجح الموازين

وهناك قصائد كثيره

////


الطبعه

هل هي اللي حدا فيها راكان عندما هربو العجمان او خانتني الذاكره ؟؟


وثانيا من هو ابن فراج ياليت اعرف اسمه لاني لم اسمع باحد ينقاله ابن فراج ولاتصير مثل منتدى مطير يقولون محمد ابو ثنين مدري منين جابوه ..؟؟ واذا كانك تقصد فراج بن عساف فسياتي الكلام عليه ..؟؟


اما قصيدة الدامر لاكلام عليها لانه لم يذكر قتل ابن فراج على قولتك او احد من شيوخ سبيع فلا نقاش عليها يناقشونك مطير فيها ..


******

مناخ قدام على قولتك


هل سبيع وبني هاجر ومطير مجتمعين ولا من ظمن جيش ابن سعود .؟؟؟

لانهم لم يجتمعو من قبل ولا صارت واذا كانو من ظمن الجيش فهذا كلام ثاني له نقاش ثاني



////////

جودة ومااادراك ماجوده

ابو حمد اكتشفت انك مضيع الجادة

احد ينسى موقف بني عمر مع العجمان وهو السبب الرئيسي لانتصار العجمان وخسارة ابن سعود الله يصلحك

احد ينسى (( جاذوب ياسبيع ))

عندما تواجه الامير والفارس راكان بن حثلين بالامير والفارس فراج بن عساف ابو ثنين وقال له ((ياعم )) انزل من الفرس واركب هذي الين لك وهو بهذا القصد يطلب من سبيع الخروج من المعركة .... هذا ماقاله المؤرخين

وهي ان سبيع زعلت على الحاكم واقلبو عليه مثل ماقال عجران بن شرفي


اللي مايدري يدري ترى لي قبيلة=عسرين الانفس تنقل الغيض وانجوس

كم حاكمن لازاله الله نزيله=نسطي على مخه من ورى العظم بالموس



على العموم ابحث عن جوده وتعرف القصه كامله لا احب ان احرق الفقره عليك


///////


اما كنزان والعيينه ليس بي فيهم علم ولا اتناقش في شي لا اعلم فيه

لان لم اسمع عنهم الا اليوم وقبلها في منتدى العجمان ولكن سيتم البحث عنها والاجابه الشافيه عليها ..

***********

بالنسبة لما ذكرت من كلام الي دار بين الامير راكان وعجران الشرفي شاعر عبدالله الفيصل كان عجران الشرفي يتقوى ويفتخر بفعل ولد الامام عبدالله بن الامام فيصل بن تركي يوم يقول الامير راكان :

(( عجران بن شرفي ليس شاعر لعبدالله الفيصل بل شاعر سبيع وهو لم يطلب منه عبدالله الفيصل ان يقصد ولكن هو قصد عندما طلب الامير الفرس من راكان ورفض راكان وقصد قصيدته فقصد عجران ويحب يذكره ان فرسه ماسوت شي في اكثر المعارك )) ويوم محقبه هل كان شاعر الامير عبدالله ولا بس بالقصيده هذي ؟؟؟؟


طول لسانه عجران بفعل ولد الامام وهو عبدالله الفيصل فكان قصيد عجران الشرفي كلام في كلام والفعل لعبدالله الفيصل كما هو مبين في بيت الامير راكان.



(( ياسبحان الله ياخي اذا انتصر ابن سعود صار الفعل له واذا انكسرو صارو سبيع المنكسرين )) ولكن اترك المقارنه لاخواني القراء والمتابعين ان يحكمو من صدق كلامه ومن تكلم من فراق


عجران قصد واوفا قصيدته بان العجمان جلو وانكسر في اكثر المعارك

وراكان قصد ولم تغادر قبيلة سبيع منازلها ولم يحصلهم شي والتاريخ يدل على ذلك



ماتشوف شر انشالله يابو حمد


اما عن مسلم فاجابتي في مناخ الرظيمه على ابو حمد يكفيك ولكن بزيد عليك شوي



//////

عن التعريف بس مثل ما قال الشامري ما قد واجهت العجمان الا في ذرى ابن سعود وبدعمه ومساعدته وهي قبل كانت في ذرى بني خالد بس ما يمنع هذا ان تكون فيه حالات استثنائية وهذي تصير كثير واظن سبيع منقسمه على عمرها وهذا مادفعها للتحالف مع ابن سعود

(( يامرحبا يامسلم

يامسلم الان كلنا في ذرى بن سعود والكلام الزايد ماهو زين عليك

ولكن قبيلة سبيع اللي كانت تدعمه وتساعد وليس العكس والتاريخ يدل على ذلك من السعوديه الاولى حصلت كثير من المعارك بين سبيع وال سعود وحصلت الكثير من العهود والاتفاقيات وبطلت وانكسرنا وكسرناهم وبالاخير هدانا الله واتفقنا على نصرة الحق والحمدالله ولكن بطيب خاطر برسل واتفاقيات حتى تعاهدنا وليس مجبرين مثل غيرنا غصب عن شاربه ولا فوق هذا عينه قويه يناقش في الامور هذي ...

اما بني خالد نعم ولكن لاتنسى ان حصلت بيننا وبينهم حروب ومعارك ومن ظمنها على مااذكر ان ابن عريعر كان غازي على سبيع فاكسروه سبيع واسرو ابن عريعر ولكن لايحظرني اسمه وفدوه باربعة الاف حمر (( اي ناقة )) وحظه الاقشر اللي زعلنا عليه وحصلت معركة السبيه وانتهى حكم ابن عريعر يامسلم


وبالنسبه للقصيدة ابن نول يذكر سبيع بقتل مجلاد ابن نافل وناجي الادغم لانه نصحهم من قبل في معركه ليست لهم مصلحه فيهاااااااا ولكن دفعتهم صداقتهم بابن عريعر


وبالنسبه للاستثنائيات .. هذا يدل ان سبيع غزتكم ولم تكن في ذرى ابن سعود



تحياتي لكم


اخي تركي الودعاني لو تمسح الموضوع باكمله افضل لان النقاش سيطول ولا نهاية له

وهناك شباب الله يصلحهم يتضايقون اذا انكسرت قبيلتهم ويتعومسون


والحمدالله على نعمة الاسلام


اخوكم / فكاك^النشايب

 

 

 

 

[معلومات العضو ابوحمد الشامري]

شف يا فكاك انا لو ابرد عليك ما راح تقتنع من اليوم الى بكرا ولاني مشغول مثل ما ذكرت، بس اسمع انا ابرد عليك بيت وهو للامير راكان بن حثلين والكل يفسره على حسب فهمه للبيت

يا راكب (ن) حرٌ جفل من ظلاله= ممشى الشهر يمشيه يوم(ن) على الهون

ابو حمد الشامري

 

 

 

 

[معلومات العضو ولد الهواجر]

ابو حمد الشامري عضو اكن له كل الاحترام في منتداهم منتدى العجمان الكريم

ارجوك اخي الكريم لاتدخل بني هاجر والعجمان على حساب غيرم

بني هاجر لها من المفاخر على العجمان والعجمان لها مفاخر وهذي حال العرب والدنيا من خلقت

كلن غالب ومغلوووووووم اتمنى انك تكون فاهمني يااااااااا وجه محلف

ولكم تحياتي/ ولد الهواجر المصيبحي الهاجري.

 

 

 

 

[معلومات العضو إبـراهيـم بـن راكـــان]

ونعــم بالعجمـــــــان , ومـاعلى السبعـــان من زود


ولاهنـتو على الطـرح وعلى المنـاقشـه الطيبـه , الى هو مـن عـوايدكـم

 

 

 

 

[معلومات العضو راكان العجمي]

لاهنت يا بو حمد الشامري على الرد الوافي

وعز الله انك كفيت و وفييت ,,,

واحب اذكر بيت للأمير والشاعر راكان ابن حثلين ( رحمه الله ) :


ما قل دل وزبدة الهرج نيشان , , , , والحكي يكفي صامله عن كثيره

تقبلوا تحياتي