قصائد رثاء قيلت في الأمير دهمي بن فرحان ال جعيد (رحمه الله)

[معلومات العضو راشد محمد المقابله]

بسم الله الرحمن الرحيم

الحمدلله والصلاة والسلام على أشرف الأنبياء والمرسلين

سيدنا محمد عليه أفضل الصلاة وأتم التسليم

أما بعد..

هذه قصائد رثاء قيلت في الأمير/ دهمي بن فرحان ال جعيد (أمير قبيلة ال جعيد)رحمه الله



عرف عنه الكرم والطيب والإصلاح بين الناس

ولن أستطيع ذكر جميع خصائله الطيبه رحمه الله



أترككم مع القصائد :

أحسن الله عزاكم يالجعيد أجمعين=في زعيم ورثتو من رحيله نباه
شيخكم في الخلاس بشوت متمشيخين=كم رهن في رضاكم كل زهرة صباه
أبكو أبكو فراقه والفواد الحزين=يزفر العبره اللي في حشاه وخباه
دمع الاجناب فتق وجعة الاقربين=اه لقفاي شيخ مايحس أقرباه
راح دهمي فوات وعادنا مملين=ان دهمي لنا فيما نبيه ويباه
ليه ياموت ماضيعت بينه وبين=والله انك تنقى مادخلك اشتباه
اه ورزم بها عن عصبة مستحين=لعنبا اللي يماثل به باحد لعنباه
فارق في اثنتين وصامل في اثنتين=الفطين احتضاها والغبي في غباه
وغيرها وكد ان الليث بيته عرين=وشب نار تقبس في بيوت انسباه
بعد شوفه ونياته تقل كفتين=يذبح اللون الاسود في ردون العباه
سيف أسطى مذهب يعجب الناظرين=وسيف حرب مجرب والخطر في شباه
ياعسى لحد قبره روض خلد مكين=ومن رضى منه ربه كل خير هباه
وكانكم بالجعيد اجواد ومبختين=فن في عيال دهمي واحد مثل اباه

الشاعر / مانع بن شلحاط العجمي




== == == == == == == == == == == == == == == ==

لاعاد علم وصلني يوم الاثنين=علم جرح كبدي وحول دموعي
علم شنيع يجرح القلب والعين=همه تمكن والتوى بالضلوعي
ياعين هلي الدمع ياعين تكفين=هلي وجودي وامطري بالدموعي
ياما توفا من الاوادم ملايين=لاشك دهمي فارق فالجموعي
أموات عيال أموات والنا س دارين=لاكن أبو فرحان موته يروعي
ياموت أشوفك وأنت قدلك من سنين=ماتاخذ إلاكل قرم قنوعي
ماتاخذ إلا النادرين الوفين=اللي عطو الدنيا من العزم كوعي
ماتصد من شرواهم يسار ويمين=وتشل من شوفه يعل ويلوعي
يالسين ياشيخ فقدناه يالسين=شيخ توفى عاد مشيه طلوعي
شيخ له القاسي من عزومه يلين=خلى الصعب بالعزم والباس طوعي
من جاه يبغى العون ماوجهه يشين=يزوع نفسه للمواقيف زوعي
طيبه مع الادنين والحقه الاقصين=سيف مذهب بين ربعه بتوعي
ذرب اليمين اللي الا كبرت يبين=وإلى تقدم مارضى بالرجوعي
مواقفه تبقى إلى ساعة الدين=تبقى على ألسنة النشاما تفوعي
أقفى سليل الطيب ورث الكريمين=أقفى وهو يذكر بزين الطبوعي
أقفى وهو ماقد شكو منه الادنين=ولاعلى الدنيا خذته الطموعي
ماقلب لو يطعم الزين والشين=ولاشجره إلا وفيها فروعي
عساه في جنات من له مصلين=أقولها ساجد وعند الركوعي
وعسى السحاب اللي تعجبله العين=اللي سواده في قنوفه يروعي
يمطر ويسقي قبر طلق الحجاجين=ويبني عليه من الزهر كل نوعي

الشاعر / صالح بن علي المفلوج المري



== == == == == == == == == == == == == == == ==

كل يعيش أيام عمره شفاليح=أحد كسبها عز وأحد خذلها
وأحد يقوم مع الفزعات ويطيح=من السطر والطيب رجله عقلها
وحنا فقدنا من كبار الزحازيح=محازم فالضيق تدفع جملها
مثل الفحل دهمي بعيد المشاويح=ماتملكه نفسه لغيره بذلها
احزام من صكت عليه النوابيح=اهموم ربعه فوق كتفه حملها
ماهمته دنياه كسب ومرابيح=كسبه سنام الطيب حل ونزلها
واليا دلهم الخطب بين المشافيح=يبرك لها دهمي ودهمي فحلها
سنايع المعروف عنده تصاريح=ختمه عليها بين خذها وشلها
كم ديرة(ن) تبكيه والخرج والسيح=تبكي مداهيله وتبكي أهلها
توشحت بالحزن تنعاه وتصيح=راحت محاسنها وبين هزلها
بان الكسر فينا ومنا مجاريح=هذا يجامل ذاك وهذا قذلها
ياموت ماخليت راس المفاليح=استغفر الله عند ربي أجلها
هذي كواكب في فضاها سوابيح=نجم يغيب ونجم يظهر بدلها
وحنا عزانا فالنجوم المدابيح=تبعد من الكبد الحزينه اعللها
نسأل كريم في يديه المفاتيح=الغيب وأسراره حشا ماجهلها
يرفع مكانه في جنان ومصابيح=وروحه من الرحمن عفوه شملها

الشاعر / عامر بن فالح ال بوشنب الودعاني


== == == == == == == == == == == == == == == == == == ==

الهم في قلبي تزايد لهيبه=والنود عيت ماتهب العدامه
مرت ثلاث أيام سود غريبه=والحزن يكربني وأنا اكرب احزامه
والشعر طب القلب وأنا طبيبه=أخذ حلال وأتجنب حرامه
وياطر جيب الشعر ياطرجيبه=علم شنيع وحسرة(ن) من ندامه
مصيبة ياكبرها من مصيبه=من هضبة ال جعيد لين اليمامه
ومن اليمامه للكويت وقليبه=ومن الخليج اليعربي لتهامه
فجيعة(ن) فالشرق الأوسط تصيبه=فوق السحب قامه وفالأرض قامه
من فقد شيخ(ن)غالي نعتزيبه=ماوالله نحسب لابسين العمامه
فالشرق له هيبه وفالغرب هيبه=ومن هيبة دسنا الخطر بالسلامه
أبوسعد شيخ الشيوخ العريبه=دهمي ولد فرحان ساس الزعامه
راع الشداد اللي سمعنا نحيبه=من طاح شيخه مالتفت للمسامه
نبكي على فرقاه شاب وشيبه=فرع تلوع الحر قبل الحمامه
ويبكي صحيبه قبل يبكي قريبه=وفقده على أهل الطيب وأهل الشهامه
وحزن عليه اللي سمع ذكر طيبه=وكل حظر من سمعته واحترامه
شيخ(ن) يجي ويروح شيخ بريبه=من كل قوم وأرض ينعى مقامه
أهل البشوت موسمين الضريبه=في عيونهم فرقاه مثل العلامه
تزاحمو فأيام سود(ن) صعيبه=من كثر ضول الناس كنهم غمامه
وأقول ياربعي كتيبه كتيبه=الله يجبرنا ويرحم أعضامه
الشيخ وادعنا واجه نصيبه=يالله تغفرله وترفع مقامه
وجعل السحاب اللي تزبر بغيبه=يمطر على قبره غمامه غمامه

الشاعر/ محمد بن مبروك الجعيدي



== == == == == == == == == == == == == == == == ==

البارحه مامرحت والدمع همال=من لامني جعله يفارق عضيده
أنشهد إنه حط فالقبر رجال=وأنشهد إنه راح منا فقيده
لوخلقت أجيال ولوخلقت أجيال=ماجا مثل دهمي ولا جا نديده
أبغى أتصبر بس ماني بمحتال=الموت جاني يوم شفت الجريده
أنشد إنه للثقيلات حمال=وترى الكرم والصبر دايم رصيده
ياجعل له في جنة الخلد منزال=وياجعل ماقدم لربعه يفيده
وجعل البقى في اخوان دهمي والأشبال=سعد وفرحان وفهد عضيده
وماقل دل وزبدة البن فنجال=وماني بمداح لنضم القصيده

الشاعر / فرحان بن فهيد الجعيدي



= == == == == == == == == == == == == == == ==

سبحانه المعبود اللي البقاء له=وكل يأمل في حياة طويله
محد عليها مستريح وداله=لابد ماتاتي من الوقت ميله
والحمدللي نبتهل بالرجاء له=من غيره اللي نسجد وننحنيله
يامر بحكمه لاقضى بالعداله=ونرضى ولو وسط الضماير فتيله
و اليت علمن ناقله كيف قاله=ياقو باس اللي لفا به يشيله
فال الله ولا العلم هذا وفاله=يالله لطفك والمصيبه مهيله
راح الذي ماينتعوض بداله=ومادون حكم الله وسيله وحيله
احد اليا من مات عزو عياله=واحد تعزى فيه كل القبيله
دهمي ولو نبغى نعدد خصاله=الطيب له سلعه ودهمي عميله
كم جادمن حاله وكم فاد طاله=من دون ربعه ماتوانا حيله
مرحوم ياللي كل ماجا مجـاله=ترزم على المجلس ثناه المخيله
بعيد سبر وغايته للشكاله=لين جناب ومطمحه للجزيله
كانه يوصي بالثقيلات حاله=عظم الجزيله كب هبر الهزيله
سبحان من خلا السماحه قباله=بشوش وجه والخواتم جميله
الله هو المعطي وماقد خذاله=وذي سنته في كل يوم وليله
لله وجهنا جميع الدعاء له=تجعله في خايع رياض خميله
ومافي يدينا كود جودك سؤاله=يشمله لطفك في الليالي الفضيله
دنيا طريق وماعليها طواله=وكل زهابه في المزاود غصيبه
يميز العاقل عن اهل الجهاله=والهرج يكفي عن طويله ذبيله
وصلوا على اللي جاب اطيب رساله=وتحمدوا من حطنا ننتميله

الشاعر / حمد بن سعود ال سارحه الجعيدي


== == == == == == == == == == == == == == == == == ==

يالله عونك يامعين انك تعين الصابرين=اللي عليهم قدرتك في ذا الزمن متتاليه
حكمك على خلقك مضى والموت ياربي يقين=ونفوسنا في حزنها في همها متباليه
ماغير نتمسك بحبل الله وحبل الله متين=فيه الأمل.. فيه الرجاء.. في لوله والتاليه
واسبابها واللي جرى خلاّني اكتبها حزين=في من ترك داره وناره والحياه الغاليه
رحيل شيخٍ من على الدنيل كما الحصن الزبين=عزوة وفزعه للضغيف اللي يدينه خاليه
الشيخ دهمي زارع المعروف في دنيا ودين=كن الشهامة والكرم في حضرته متماليه
عزالله اللي من رحل وإنّا على دمع وحنين=وإلى ذكرنا شيخته تبكي النفوس الساليه
يامن تعز الدين وتعز العباد المومنين=تجعل مقام الشيخ في جناة خلد العاليه
يالله ياللي تسمع النجوى من العبد المدين=تغفر ذنوبه ياعزيز برحمةٍ متواليه
وتصبّر اللي ماهتنى بالنوم ودموعه دنين=من حزنه الطاغي صلاه من الليالي صاليه
رحمالك ياربي تصبرنا بصبر الصابرين=يوم البلاوي جاتنا في ذا الزمن متتاليه

الشاعر / ناصر الجعيدي





أسأل الله الكريم أن يجعل قبره روض من رياض الجنه

وأن يسكنه الفردوس الاعلى وجميع أموات المسلمين




كتبه / راشد بن محمد المقابله

 

 

 

 

[معلومات العضو مبارك بن شافي النتيفات]

أسأل الله الكريم أن يجعل قبره روض من رياض الجنه

وأن يسكنه الفردوس الاعلى وجميع أموات المسلمين

الله يبيض وجهك يابومحمد على نقل هذه القصائد

 

 

 

 

[معلومات العضو عبدالكريم العماري]

الله يرحم الأمير/ دهمي بن فرحان ال جعيد ويجعل قبره روضة من رياض الجنة

وبيض الله وجهك أخوي راشد المقابلة على جمع القصائد

 

 

 

 

[معلومات العضو بخيت الغييثي]

لاهنت يابو محمد بيض الله وجهك على النقل والله يرحم الشيخ دهمي ويسكنه فسيح جناته ويعطيك العافيه

 

 

 

 

[معلومات العضو ابو زيد الغييثي]

الله يرحم الامير / دهمي بن فرحان آل جعيد

و لاهنت يا ابومحمد على هذا الموضوع

و بارك الله فيك

 

 

 

 

[معلومات العضو راشد محمد المقابله]

الله يعطيكم العافيه جميعا على المرور

 

 

 

 

[معلومات العضو دغش محمد الصخابرة]

الله يرحم الامير / دهمي بن فرحان آل جعيد

وبيض الله وجهك أخوي راشد المقابلة على جمع القصائد

 

 

 

 

[معلومات العضو فهد المقابله]

الله يسكنة الجنة

 

 

 

 

[معلومات العضو خالد المشاويه]

الله يرحم الامير دهمي بن فرحان

ويغفر الله ويسكنه الجنه

وصح السنت الشعرا

 

 

 

 

[معلومات العضو راشد محمد المقابله]

الله يعطيكم العافيه على المرور

 

 

 

 

[معلومات العضو سالم الخضراني]

الله يرحم دهمي الجعيد

وبيض الله وجيه الشعراء على القصائد

ولا هنت يا راشد المقابله


تحياتي وتقديري

 

 

 

 

[معلومات العضو النجم الجنوبي]

لاهنت وبيض الله وجهك

 

 

 

 

[معلومات العضو راشد محمد المقابله]

سالم الخضراني

النجم الجنوبي

لاهنتو على المرور