ミ☆ミ ألــفــيــة ( ابــن عــــمـــــار ) ミ☆ミ - ::: مـنتدى قبيلـة الـدواسـر الـرسمي :::

العودة   ::: مـنتدى قبيلـة الـدواسـر الـرسمي ::: > :::. أقسام ( دغــش الــبـطــي) الأدبـيـة .::: > :: قسم قصــه و قـصيــده ::

إضافة رد
انشر الموضوع
 
أدوات الموضوع انواع عرض الموضوع
قديم 05-03-2008, 10:32 AM   #1
 
إحصائية العضو







ابن شمسان البدراني غير متصل

ابن شمسان البدراني is on a distinguished road


:e-e-7-: ミ☆ミ ألــفــيــة ( ابــن عــــمـــــار ) ミ☆ミ


بسم الله الرحمن الرحيم




مساكم الله بالخير جميع





هذي (ألفية) قديمة لشخص من أهالي مدينة ثادق يقال له (محمد بن راشد بن عمار)



وقصته :


أنه كان ساكن في مدينة ثادق وشاف له في يوم الأيام وحده من البنات وأعجبته وصار يحبها حب شديد .. ولما راح لأهلها يبي يخطبها صاروا من أهل الشمال وقالوا : الحقنا لم ديرتنا ..
وقام الرجال وسافر لم ديرتهم عشان يخطب البنت ..

لكن جاء واحد من الأشخاص وسبقه لم أهل البنت وقال لهم : لا تزوجون ذا الرجال تراه خضيري !! يوم وصلهم ابن عمار رفضوه وقالوا : أنت صانع ولا تصلح لنا ..

بعدها رجع الرجال لم ديرته وكتب هذي الألفية ..

وبيّن شيء من هذي القصة بحرف (الضاد) ..


ويقول أحد رواة مدينة ثادق وهو عبد الكريم بن عمير : أن ابن عمار اختل عقله بعد ما كتب هذي الألفية وذهب إلى أحد الكهوف القريبة من ثادق وجلس فيه وابتعد عن الناس .. ويقول : كنت أجيب له الطعام والشراب وكان يسمعني الكثير من قصائده .


والخلاصة أن هذه الألفية تعتبر من أقوى وأروع الألفيات التي قيلت وهي تقريبا 112 بيت .





يقول فيها :



(ألف) أولف من جوابٍِ نظيفي=ودموع عيني فوق خدي ذريفي
من لامني في حب الحبيّب وليفي=دقاق رمش العين سيد الخوندات
خوندات الذي ما بعد عاشرنه=قله تراهن بالهوى يذبحنه
قلبي وقلبك من عروقه خذنه=عزي لمن مثلي تعرض للآفات
(الباء) بليت بحب خلي على ماش=ولا حصل لي منه ما يبرد الجاش
غديت أنا وياه طاسه ومنقاش=بالوصف كني يالمعزي سلامات
سلامات الذي يذكرونه=يبغى المعزة منه وهي المهونه
يقول طيب مير غارت عيونه=سبب ولدكم صوبه واحد ومات
(التاء) تبعت الزين والزين مقفي=أمشي وحتفي شايله فوق كتفي
لا شفت مجدوله وكتف وردفي=مقوى ألتفت لو طوحوا لي بالأصوات
أصوات قالوا ياهبيل وسايح=طرد المقفي يالشقاوي فضايح
قلت ماريد أشواركم والنصايح=مثل المطر فوق الطياس المكفات
(الثاء) ثمانه حب رمان طايف=أو قحويان في رياض عطايف
متنقلٍ بالزين سيد العفايف=عمهوجة ٍفيها من الحور شارات
شارات فيها من ظبي الحمادي=هي لذة الدنيا وغاية مرادي
وإن كان راح صويحبي من بلادي=عليه جاوبت الحمامة بالأصوات
(الجيم) جاني من عشيري كلامي=ولا لقينا من يرد السلامي
عليه زرع القلب هايف وظامي=ما لي جدا كود البكاء والتنهات
أبكي على ما فاتني من زماني=يوم الحبيّب زارني في مكاني
وراي ما خذت القضاء يوم جاني=توي دريت البيض فيهن غرٌات
(الحاء) حليه في الوطن ما لقيته=عذلت قلبي عنه ولا قويته
لوه يذكر يم مكة نصيته=أنصاه لو بيني وبينه مسافات
مسافات في وسط البحور الظلامي=في وسط بتيلٍ حداه الولامي
وإلى حصل ليه بلوغ المرامي=أصبر ولو طبيت بحر الظلامات
(الخاء) خليلي صار مني قريبي=جعلي نصيبٍ له وهو من نصيبي
ودي أواجه نور عيني حبيبي=مار الوحيد لهيد ما فيه نوهات
ما فيه نوهات ٍولو من غثا البال=دب الليال مسِيم عمال بطال
وإلى استراح البال عن ذيك الأحوال=دنياك هذي يا ريش العين نشبات
(الدال) دامي ما قضبت الذوايب=لو قلت لك طيب فلا نيب طايب
دنوا ستاد القبر ودنوا النصايب=ودنو دواة الحبر نكتب سجلات
سجلات أريد أكتب لي وصيه=عمري غدا ياوجد أهيلي عليه
قولوا لصافي اللون ياقف عليه=ياكود يرجع ويتحسف بما فات
(الذال) ذا لي عنه مدة ليالي=لو قيل طيب فأنا أبخص بحالي
والله ما يطري علي شف بالي=إلا أنت ياراعي الثمان الرهيفات
رهيفات فيها للمشقا طرابه=مجمول مدلول ولا به طنابه
هني من يدخل معه في ثيابه=وأسـج أنا وياه فالعمر سجات
(الراء) ردوف صويحبي ثقلنه=مثومنٍ ما أحلى بياضه ودنه
ونهوده الثوب الحمر شلعنه=والساق فيها مثل عرق الأرطات
أرطات غرمولٍ ذرته الذواري=والله يا لولا إني من الناس أداري
لأضوي عليها مثل ذيب الغداري=جايع وبالغابة عياله مجيعات
(الزاء) زماني شفت منه الهوايل=لا عاد حظي فالغنادير مايل
وراي ما أترك كل قاصر وطايل=مار العقل ياديب هيهات هيهات
هيهات لو إن العقل فيه لبه=ما كان يتبع واحد ما يحبه
لي صار هرجه لك خريطٍ بدبه=وش لك بشوفه بالعيون المشقات
(السين) سقنا من الدراهم وعيا=واللي نبي من صاحبي ما تهيا
يقول والله لو تحب الثريا=خذني على السنة تشوف الطرابات
طرابات ينسنك جميع الدروبي=يا كود في باقي حياتك تتوبي
إجعل مقرك بين جلدي وثوبي=حتى تشوف البيض فيهن جنات
(الشين) شاب الراس ياعذب الأنياب=واللي برجوى توبته ذاك قد تاب
مار إن بدا لك حاجة فافتح الباب=ويرحمني اللي عالم بالخفيات
يرحمني إني فيك يا زين مفتون=من حبك أسهر والخلايق ينامون
ألهيتني عن مذهب اللي يصلون=ما عاد أميز لو قران التحيات
(الصاد) صيدي يوم ألاوي غريمي=شفق ٍعلى الحبه وقضب البريمي
مهوب صيدي قلة في الحريمي=لا شك كل له مع الناس مشهات
مشهات فيك ياظبي الفريدي=حب الملا ينقص وحبك يزيدي
لا شفت زولك ذاك هو يوم عيدي=تصبح بساتين الضماير مريفات
(الضاد) ضد حال بيني وبينه=يقول هذا صانعٍ لا تبينه
عسى الولي يبلاه في صبي عينه=يسهر ولا يمرح من الليل ساعات
ساعات فيها ما يشوف الجدارا=ولا يعرف الليل هو والنهارا
وعساه يوم البعث يحشر حمارا=محمل من حمل الاسراف سيات
(الطاء) طويت الياس والسد باحي=وما عاد شفي في ظبي البياحي
لعلها هفت خفوق الجناحي=اللي سبوقه فوق رجله مطوات
مطوات وطار في يوم هبه=راعيه لو رز اللواء ما ينبه
شاف الحباري رابضات بخبه=يبي العشاء من بين فخذ وفندات
(الظاء) ظمانه لا تعاشر لك ثنين=لازم تخلي عشرتك يامسيكين
واللي إبتغى له بالمرابط حصانين=يجي لهن حوس ودوس وصقلات
صقلات يصقل كل ما جاء طعامه=يجري لهن مع المعيشة بحامه
افهم كلامي يالهبيل العدامه=إلى جمعت الحصن فالحصن خطرات
(العين) عن من ينقل الهرج حذراك=تراك كنك شايلٍ داك برداك
إلى سمع له هرجةٍ من حكاياك=يحطها كبر القصور المبنات
يبني عليها كبر راس الغرابه=ويكدر المشروب عقب الطرابه
وهو يشابه بومة في خرابه=لا ينّقل هرجه ولا كفو هرجات
(الغين) غاب العقل بأول شبابي=وأدميت من تلعات الأرقاب نابي
واليوم شاب الراس والكيف طابي=ماني على الفايت كثير الحسوفات
حسوفات لا تفرح على اللي يجي فيك=أيضا ولا تندم على اللي مضى منك
مدراك لو هو خيرة صدته عنك=ناهيه والي العرش رب السموات
(الفاء) فؤادك لا توليه حساد=واحذر يجي لك مع هل الفي مقعاد
اضحك وكنك عن جميع العرب صاد=ثم اعتبر بالذيب يضوي بغارات
يضوي بغارات وهم ما دروا به=واللي يوقف فالمحاري حكوا به
كم واحد وقف ولا قضى نوبه=يكسر إلى شاف الطعم كنه حدات
(القاف) قل للي يريد النواميس=واللي شقي بالهوى يرخي الكيس
إلى بذلت النفس والفلس وابليس=يطيح ناس يدعون الديانات
طاحوا وصاروا للخلايق علاجه=يلقى بهم راعي الهوى قضى حاجه
وإلى نثرت الحب جتك الدجاجه=حارت وباضت لو تبي عشر بيضات
(الكاف) كن السد في كل الأحوال=واحذر لسانك لا يقولون ذا قال
حتى تجي عند العرب خوش رجال=لا صرت بالمجلس نواظرك صقلات
صقلات لا تجلس مع اللي يشاكيك=هو علتك ودواك هاللي يشانيك
ياذيب كان الله على الرشد هاديك=اكتم كلامك بالضلوع المحنات
(اللام) ليت العمر ينكس لحله=قيمة ثلاثين السنة هي محله
الرجل قبل الشيب ياحلو دله=وإن لاح فيه الشيب ما فيه لذات
ما فيه لذات ٍولا يقبلونه=لو حط له رده وكحل عيونه
أهل الهوى عقب الغلا ينكرونه=لو هو مصافيهم على فايتٍ فات
(الميم) ما غيري من الناس جرب=ولا غيري أحد في حياته تطرب
لاعبت صافي اللون فوق المضرب=كن العدو عني عيونه مداوات
مداوات جعله ما يجي لك عباره=واللي بصد ٍعنك وش لك بكاره
الحر ما ياطا بوسط الخباره=لازم يجي فيها عقارب وحيات
(النون) نام الحظ ما فيه حيله=عيا يباريني وأنا أزريت أشيله
من يوم خلاني عريض الجديله=دليت أكسر في حشا الصدر عبرات
عبرات أكسرها بداخل ضلوعي=عليك يا خلي حسين الطبوعِي
عليك ما جفت محاجر دموعي=دايم عيوني في مهاواك سهرات
(الهاء) هواي الخافية يالفطيني=والعاشرة ياللي تعرف الرطيني
مخفية ما ودي لضدي يبيني=والتاسعة تحصاه باعداد الاميات
ميات مات القلب من كثر همي=وأشكي عليك الحال ياولد عمي
أنته عضيدي وأنت لحمي ودمي=ترضاه يجفاني ولا نيب مجفات
(الواو) ويل أهل الهوى من هواهم=إن كان هاللي سم حالي وطاهم
كم ليلة ٍيصبح جفيفٍ عشاهم=إلا لقيمات مع الحلق مرات
مرات لين أقضي من الترف شفي=وأوسده عضدي وزندي وكفي
وأكشف عن اللي غابي ومتخفي=حتى يجي للأكل والشرب لذات
(الياء) يحبه صلف ومراقده كلف=لو هو يتمم مطلبي كان أقول ألف
حيثه يقرر لي على الحب بالولف=ولا فغيره لو يبي عشر بيزات
بيزات ما أفلها لغيره بلاشي=من جنس راس الظبي ما به عراشي
إلا لمن مايه على ماه ماشي=هذاك هو من له فلوسي رخيصات




تحياتي ،،،

 

 

 

 

    

رد مع اقتباس
قديم 13-03-2008, 04:34 AM   #2
 
إحصائية العضو








ابو زابن المسعري غير متصل

ابو زابن المسعري will become famous soon enoughابو زابن المسعري will become famous soon enough


افتراضي رد: ミ☆ミ ألــفــيــة ( ابــن عــــمـــــار ) ミ☆ミ

الاخ الغالي ابن شمسان البدراني

بيض الله وجهك على هذه الالفيه

ومن الحب ماقتل..رحم الله الشاعر

 

 

 

 

 

 

التوقيع

لاصار حظك ردي والوقت ماياوي= مناطح الروس خيرا من مصافحها
وإن لم تكن ذيب في راس الجبل عاوي= اصبحت طمعة لعاويها ونابحها

    

رد مع اقتباس
قديم 16-03-2008, 03:51 PM   #4
 
إحصائية العضو







ثويني الخالدي غير متصل

ثويني الخالدي is on a distinguished road


افتراضي رد: ミ☆ミ ألــفــيــة ( ابــن عــــمـــــار ) ミ☆ミ

الاخ الغالي ابن شمسان البدراني

بيض الله وجهك على هذه الالفيه

 

 

 

 

    

رد مع اقتباس
قديم 06-06-2008, 02:41 AM   #6
 
إحصائية العضو








فهد-69 غير متصل

فهد-69 is on a distinguished road


افتراضي رد: ミ☆ミ ألــفــيــة ( ابــن عــــمـــــار ) ミ☆ミ

بيض الله وجهك يا ابن البدراني

 

 

 

 

    

رد مع اقتباس
قديم 06-06-2008, 10:53 AM   #7
 
إحصائية العضو







ابو فهد الغييثي غير متصل

وسام الدواسر البرونزي: للأعضاء المميزين والنشيطين - السبب: التميز والنشاط
: 1

ابو فهد الغييثي is on a distinguished road


افتراضي رد: ミ☆ミ ألــفــيــة ( ابــن عــــمـــــار ) ミ☆ミ

بيض الله وجهك على هذه الالفيه

ومن الحب ماقتل..رحم الله الشاعر

 

 

 

 

    

رد مع اقتباس
إضافة رد


الذين يشاهدون محتوى الموضوع الآن : 1 ( الأعضاء 0 والزوار 1)
 
أدوات الموضوع
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة

الانتقال السريع

 


الساعة الآن 06:47 PM


Powered by vBulletin® Copyright ©2000 - 2024, Jelsoft Enterprises Ltd.
---