الزواج قسمة ونصيب

[معلومات العضو الــخــضــرانــي]

بسم الله الرحمن الرحيم

السلام عليكم ورحمة الله وبركاته..

اعجبتني قصه قالها لي واحد من خوياي يقول لي القصه عن خويه...

خويه اسمه حمد

يقول لو تشوف وجهه تصد على طول من الجكر

[حمدلله على كل حال هذا خلق الله بس القصه موضعها الجكر ]

المهم حمد خطب بنت عمه ويقول خويي ان مرته ماشاءلله فيها جمال من الله

ورفضت البنت رفضا قاطعا [ لعنبو لايمها ] هههههههههههه

وابو البنت معطي ابو حمد كلمه انه بيزوج حمد بنته [ طيب ولا غصب ]

كشر عن انيابه ابو حمد [ عزتيلها ] قال بتنطين ولا توقعين عرسكم الشهر الجاي بتموتين فعجلي.....

البنت قامت تبكي وتحاول في امها ما فيه فايده [ تسبدي لها ] هههههه

فرضت بامر الواقع تحدد العرس واعرسو الرجال مستانس والبنت تقول ميت احد عندهم

تنبيه: الرجال ترا ما يدري انها ما تبيه بس الله يهدي ابوها

المهم وشاف وجهها وقال لها انتي وشبلاك انا مسوي شي يزعلك ولا احد قايل لك شي

وقعدت ساااكته البنت ما تكلم وهو يحاول فيها يبي يعرف وش السالفه واخذت تبكي لين صفا راسها

ولاعرف وش يسوي الرجال قال يمكن هذه البنت اول ما تعرس وعقبها تزين الاوضاع

مر اسبوع واسبوعين والبنت قدها هاديه بس ضايقه

قال ما تعلميني وش اللي فيك

قالت يعني ما تدري > هي تحسب انه يدري انها ماخذها غصب

قال وش اللي ادري عنه

قالت انا منيب موافقه يوم خطبتني وابوي غصبني وابوك يدري

[ من شاف وجه حمد عزاله يطرش الله يكرمكم ]

قال بس هذا اللي مضيقك ما عليه مع الايام بتعودين علي وبتزين الامور

[انا اقول ما ضنتي هههههههههههههه استغفر الله العظيم]

مع مرور شهرين تخيلو كل ما جا غرفه النوم راحت لغرفه الثانيه وارقدت فيها

وكل ما حاول يتقرب منها ابد ما صوبك احد

تنبيه: ترا الرجال من يوم الدخله ما ارقد معها كل منهم في غرفه

ومر ثالث شهر البنت مهيب راضيه تكلمه حتي...

وقام الرجال يفكر انه يطلقها خلاص المراه عايفته

وهو في الدوام طبعا هو عسكري وهو قاعد في الاستراحه في الدوام قاعد لحاله

يفكر خلاص اتخذ القرار انه يطلقها لا رجع البيت ويجي خويي انا يا محاكيكم

قال لخويه حمد انت وش بلاك الشهور اللي راحت منت بطبيعي وانا كان ودي اسئلك من زمان بس ما جالي الفرصه اكلمك

الرجال ضااااايقن خلقه حتى ليله الدخله ما دخلها وفيه هم في قلبه ولا يبي يزعل اهله واهلها انهم تطلقو بسرعه

بس الرجال معاد قدام الا الطلاق

المهم قعد يفضفض لخويي

خويي اعرفه في السوالف ذي فلته خخخخخخ

قال خويي لحمد شف عندي لك حل واحد ما فيه غيره وصعب حييييييل ويمكن تنجح فيها ويمكن لا

قال انت قوله الحين ونشوف

قال سافر انت وياها لديره الغرب ولا تروح للدول العربيه ولا الخليجيه رح لاوروبا

قاطعه حمد وما اقتنع

قال خويي خلني اكمل واحكم في الاخير

قال حمد كمل ببروده دم

قال خويي اول ما توصلون شوفو لكم شقه وحطو اغراضكم ورح على طول للسوق او اي مكان

وحاااااول انها تضيعك وانت لا تضيعها يعني اول ما تضيعك راقبها من بعيد
وخلها لين تبكي قاطعه حمد قال ان صاحي ولا خبل

قال خويي اسمعني لين اخلص

قال حمد كمل الحمدلله والشكر

قال خويي اول ما تبكي اطلع في وجهها وبس

قال حمد وبس قال له اعلمك من ذلحين ان حلك هذا بااااايز [ خرطي ]

قال خويي انت اذا جربت بتخسر شي واذا ما عندك فلوس مستعد اعطيك اذا انقصك شي

قال خويي انت لا تستعجل فكر بعد وعلمني

وهو راجع البيت قعد يقولبها يمين ويسار انا اقصد السفره مهوب المراه عشان محد يفهم غلط

المهم وافق اخيرا حمد وقال للبنت استعدي بنسافر انا وانتي

على طول قالت منيب رايحه

قال لها انا دازين الدوام يومين للندن عشان الشغل وهناك ما عندهم اكل ينوكل بناخذ اغراضنا من هنا وبروح يومين وراجعين

البنت هي قايمه في البيت بس العلاقه بينهم صفر

وسافرو اول ما وصلو قال لها ما يمدي تطبخين بنروح للسوق وعقبها بنتعشى وبنرجع وقالت خلاص

وطبق الخطه اللي قالها خويي له

واول ما ضاعت وهو يشوفها من بعيد قعدت البنت تلفت تدور زوجها تعاين يمين يسار اختفى فجأة

على طول انهارت بالبكاء وتصيح تقول يا حمد ويييييييييييينك وتبكي حييل

لين تجمعو عندها الاجانب لا تعرف انجليزي ولا تعرف الديره اول مره تجي لندن ولاتعرف احد

تنبيه: انا وهو انا رجال وضعت هناك بدنها خليليه يعني ببتسي يعني ببكي هههههههههههههههه

المهم هو يعاينها ويشوفها تبكي ووده يطلع لها بس خويي محذره لا يطلع على طول يخليها لين تأيس

لين يكاد ان تنجن

وطلع لها اخر شي قال لها وينك ادورك وهي قاعده على الكراسي ولا سمعت صوت حمد وهي ما زالت تبكي ولا حست بوجود حمد من كثر الخوف

قال حمد بصوت مرتفع يا مره وش بلاك ادورك لي ساعه

اول ما شافته على طول ضمته ضمه ولا فكته ويقول ادورك لي ساعه

وهي تبكي وهي ضامته

يقول والله ما فكته الا عقب نص ساعه وقعد يهديها ويمسح دموعها كل شوي

وهي تبكي تقوله سامحني

قال لها يابنت الحلال ما صار الا الخير

ويرجعون البيت ويجيب لها عشاء ويحاول يضحكها شوي

ويقول حمد كانت ليله دخلتي في لندن

وعقبها البنت متغيره 180 درجه

ويرجعون ويجي عليهم عيال واستمرو في الحياة للحين

اول ما رجعو لديرتهم واصبحو دق حمد على خويي ويبشره ان خطته انجحت

تعرفون عاد قعدو يتحالفون بالعزيمه الا والله بلى والله على الحرام .... الخ

ويقول حمد لخويي والله ما انسى لك المعروف هذا ما دامني حي

قال يا رجال الله ميسر الامور

النهايه...

ملاحظه: القصه على قول خويي ان صدق وان كذب
وعلى ما قال المثل ان تسذبت فعنز؟

واسف على الاطاله بس حبيت اجيب لكم القصه بالتفاصيل

وهذا تقبلو تحياااااتي وفائق الاحترام.............

 

 

 

 

[معلومات العضو حمد ابن فهد]

الخضراني بيض الله وجهك اتحفتنا بقصة من اجمل ماقرأت وبيض الله وجهه هذا الخوي اللي لاتضايقت شار عليك الشور الطيب

تقبل سلامي

 

 

 

 

[معلومات العضو محمد راشد النتيفات]

لاهنت على القصة الرائعة

 

 

 

 

[معلومات العضو بومطلق]

يعطيك العافيه، وقصه في قمة الروعه.

 

 

 

 

[معلومات العضو الــخــضــرانــي]

ووجهك ابيض يا حمد

وعساك على القوة

تحياتي......

 

 

 

 

[معلومات العضو الــخــضــرانــي]

ولا انت يا ابو راشد

 

 

 

 

[معلومات العضو الــخــضــرانــي]

الله يعافيك

يا ابو مطلق

شاكر لك

تحياتي.......

 

 

 

 

[معلومات العضو سالم الخضراني]

بيض الله وجهك اتحفتنا بقصة من اجمل ماقرأت وبيض الله وجهه هذا الخوي اللي لاتضايقت شار عليك الشور الطيب

تقبل سلامي

 

 

 

 

[معلومات العضو الــخــضــرانــي]

ووجهك ابيض يا الخضراني

والله يسلمك على ما قال الصديق وقت الضيق

تحياااااتي.........

 

 

 

 

[معلومات العضو دوسري هلالي]

الله يعطيك العافيه .. شكرآ لك

 

 

 

 

[معلومات العضو شافي بن راشد النتيفات]

سلمت اناملك الذهبية على النقل الجميل تحياتي وتقديري