العودة   ::: مـنتدى قبيلـة الـدواسـر الـرسمي ::: > :::. الأقســــام الـخــــاصـــــة.::: > :: قسم اللقــاءات والفعاليات والتغطيات الخاصة::

إضافة رد
انشر الموضوع
 
أدوات الموضوع انواع عرض الموضوع
قديم 29-12-2014, 06:32 PM   #1
 
إحصائية العضو







الإداره غير متصل

الإداره is on a distinguished road


افتراضي التغطية المصورة لجولة موقع قبيلة الدواسر الرسمي الثالثة لـ محافظة الافلاج " الــبــديــع "




الحمد لله رب العالمين والصلاة والسلام على سيد الانبياء والمرسلين سيدنا ونبينا محمد ابن عبدالله وعلى آله وصحبه ومن وآلاه ومن اهتدى بهديه واستن بسنته الى يوم الدين

إخواننا أعضاء وزوّار الموقع الرسمي لقبيلة الدواسر




أعدّ التقرير

عضو مجلس إدارة الموقع الأستاذ فهد بن هادي الغريري
عضو مجلس إدارة الموقع الأستاذ راشد بن محسن المسعري



قام بالتقاط الصور

هادي بن فهد الغريري





الجزء الثالث من جولة موقع قبيلة الدواسر الرسمي لــ محافظة الافلاج



حيث تم طرح الجزء الاول من الجوله على الرابط التالي
http://www.alduwaser.org/vb/showthread.php?p=758999


وتم طرح الجزء الثاني من الجوله على الرابط التالي
http://www.alduwaser.org/vb/showthread.php?t=69172



فإننا ليسرنا أن نستعرض عبر هذا المتصفح الجزء الثالث من الجوله لزيارة محافظة الافلاج بمعية:إداري موقع قبيلة الدواسر الرسمي الاستاذ فهد بن هادي الغريري وإداري موقع قبيلة الدواسر الرسمي الاستاذ راشد بن محسن المسعري وعضو المجلس البلدي بالمنطقة الشرقية الاستاذ فالح بن راجس بن نبجان الشرافي ولاعلامي راشد بن حماد الغريري والاستاذ دغش بن حمد بن منصور الصخابرة والاستاذ هادي بن فهد الغريري.




" الــبــديــع "

إحدى مناطق الأفلاج الأثرية وتأتي في الدرجة الثانية بعد ليلى قاعدة الأفلاج
من حيث الاتساع وكثرة السكان.وتقع جنوب ليلى قاعدة الأفلاج بمسافة (36) ستة وثلاثين كيلاً.

وقديماً كان يسمى " البديع " المذراع. والمذراع جمع مذرعة وهي البلاد المتوسطة بين الريف والبر.




مرحبافي ملتقى الطيب في دار البديع=عد ذعذاع الهبايب وهتان السحاب

عند بانين المراجل هل الشان الرفيع=متعبين قرح الخيل وظهور الركاب

عزوة في حزة الحرب للانفس تبيع=ساعةٍ فيها اشهب الملح والبارود ذاب



" الـــصــخــابــرة "

اول مايتبادر الى ذهن الشخص عند سماع اسم الصخابره ينطق بهذه الكلمه المشهوره ( هل الابل ) مع العلم ان قبيلة الدواسر معروفه بالابل ..

ولكن هذا شي متعارف عليه ولاغرابه في ذلك .. فهم اهل المجاهيم الغوالي وساس البعارين الطيبه من ابلهم ..

الصخابره قبيله كبيره وفرسانها كثر ولقبوا
( بعيدين المغازي ) لكثرة مغازيهم وانتصاراتهم الكبيره
ومن عزاويهم المعروفه ( سقم الحريب انا بن صخبور )


لابتي شارت العليا تفوز بها=مبعدين المغازي يوم الاكواني

لاد صخبور عوق اللي يحاربها=ضد للمعتدي مزبان للجاني

حن هل الابل ومن جاها يجنبها=لاعرف وسمها خلاه بالعاني

دونها ارواحنا للموت نجلبها=لابتي فاللقى ماهم بذلاني

وان غزينا من العدوان نكسبها=مانهاب الخطر لاثار دخاني

كم افعولن لنا التاريخ يكتبها =سجلت من فعول طوال الايماني



اكثرهم في ذالك الوقت بدو رحل ولازال بعض منهم لحد الان بدو رحل
ولهم ديرتهم ( البديع )

استوطن بعض الصخابره في الخرج والرياض والاحساء والشرقيه
كذلك في العراق يسكن ال نغيمش واميرهم وامير الدواسر كافه هناك هو / بن نغيمش ..

هذه نبذه بسيطه فقط .. علما ان الصخابره تحتاج قصصهم البطوليه وفرسانها وعن كرمهم لكتب وليس تقرير بسيط لذلك نقدم لكم هذه النبذه البسيطه عند مرورنا بالبديع ايام عيد الفطر المبارك وتقديمهم الدعوه لنا بزيارتهم ونحن على عجاله ..







بدعوة كريمة من الشيخ حمد بن منصور آل شاهر الصخابرة
لــ موقع الدواسر الرسمي بمنزله بـــ البديع حيث كان في استقبالنا فالشيخ حمد بن منصور آل شاهر الصخابرة وجمع من الصخابرة الكرام




الشيخ حمد بن منصور آل شاهر الصخابرة



توجهنا في البدايه الى الشيخ / حمد بن منصور بن دغش ال شاهر الصخابره



يقول الشاعر محمد بن مبارك بن حبيان في احد مشاركات حمد بن منصور بن دغش في مزاينات الابل :


ترى ماهي غريبه لو يفوز الفوز بن منصور=ترى فوزه بفعل الطيب ماروثن من اجداده

سلايل شاهر اللي قد مضاله في الجزيره دور=مناخ الجيش عنده في مراويحه ومعواده


كان مناخ الجيش عند ال شاهر وهذا معروف عند القبايل

ومن فرسانهم على سبيل المثال :

الفارس ( الصعصاع ) محمد بن شاهر
وسمي بالصعصاع لانه كان يضرب بسيفه على راسه وهو محتفل بفعل ربعه فما درى الا يعلمونه انه يضرب راسه بشذرة السيف لين ادمى

كذلك الفارس دغش بن محمد بن شاهر
والفارس عايض بن شاهر


يانديبي فوق زينات الوجيف
مكسب الفرجان من ظفرة عماني
نصه الصعصاع مدهال النكيف
جعل عود ارثه يرد الجناني

ويقول الشاعر / مسعود بن سعد المقابله عندما حقق حمد بن منصور الفوز والمراكز الاولى في جميع الاشواط في مزاين الدواسر في خبة القرو تحت رعاية الامير عبدالعزيز بن تركي
:

رقم واحد مالكم فيه حظ ولا نصيب=دام بن منصور حاظر بها قافٍ وشاب

جاه من الصعصاع وبن شويرب كل طيب=عزوةٍ يوم اللقى تحتمي تال الركاب

ابن نطاح المواجيب باليوم الصعيب=ذاك منصور بن شاهر مكثر بالرحاب

الشحم لايمانهم فوق مفدوع العصيب=والعشا لركابهم يوم عشاي الركاب


وبن شويرب الذي ورد اسمه في الابيات هو الفارس محمد بن شويرب ال مفرج الصخابره


ويذكر في احد المرات ان الصعصاع هد جدار قصره لادخال ابل عليها نزاع بين احد القبائل وارتضوا حكمه ذاك الوقت ..

اهل الكرم واهل المناخ المعروف للقبائل عند شاهر بن عبدالله في ذاك الوقت ثم استمر الكرم والمناخ عند ابنه محمد ( الصعصاع )

ثم عند دغش بن محمد ونذكر سالفه مختصره انه في احد المرات جاوه ضيوف وحلفوا عليه انهم مايحط لهم الا التمر والصفو .. وبعد ماقلط الواجب عليهم رفض اللي حلف انه مايمد يده فقاله تفضل الصفو مايجي من الجابيه مايجي الا من الابل والا من الغنم

........

كذلك فيه رجل ضافه وكرمه وشد منه ورجع بعد سنه فحط الحطب وقال للي عنده شب الضو وعجل القهوه فسئله قال متى علمك بالقهوه قال الضيف من يوم رحت منك فعتزا وقال عطونا اللي عندكم من تمر ولبن وجهزوا العشاء

ثم توالى الكرم على ابنائه / محمد بن دغش
ومنصور بن دغش

ومنصور بن دغش له سالفه عن الكرم مشهوره وهي عندما نزلوا العتبان والشلاوى والبقوم ايام الحيا الطيب حدرا من الافلاج فتح الاشياب في البديع وسبل النخل وكان مايمشي موتر الا عذوق النخل معه في السياره وكان يامر عياله كذلك يطلعون يسقونهم ويسقون ابلهم في البر للي مامعه وايت كذلك لربعهم وبني عمهم من الدواسر..

وعندما شدوا الى ديارهم وطاح الحيا في نجد شدوا الدواسر ونزلوا في نجد ومعروف ان القبائل الاخرى غير الدواسر يبيعون الماء فحصل ان الدواسر مسكوا سرا مع الناس على شيب لواحد من عتيبه فطلع العتيبي ورفع بالصوت

من كان دوسري يطلع من السرى
من كان دوسري يطلع من السرى

فطلعوا الدواسر فقال تقدموا على الشيب بدون سرا والماء لكم ببلاش كله علشان منصور بن دغش راعي البديع

كذلك لاحد اعلام هذه الاسره موقفٍ تاريخي يسجل باسم قبيلة الدواسر وهو موقف الشيخ / دغش بن محمد بن دغش ال شاهر
مع ربعه في ( قضية الشمري المشهوره ) عندما تعطلت به سيارته

ويقول بن باني المخاريم :

ومـوتــر للـشـمـري عـلــم صـحـيــح=يــوم وقــف فــي ديــار مـوحـشـات

فـكـكـوه وحـمـلـوه ابـنــاء الـرجــال=فــوق ســت مــن الـمـواتـر جـاهــزات

ثــــم شــالــوا حـمـلـتـه زود عـلــيــه=والـمـدافــع قـاصـفــه والـطــايــرات

خـبـرة سـنــوا لـهــم سـلــم جـمـيـل=اعـتـلــوا بـالـمـجـد روس الـنـايـفـات

مـــن وداعـيــن وصـخـابــره عــــزاز=وشـكـره يـثـنـون عـنــد الـجـاذيـات


كان بن سعيان الزهيري جلاوي في البديع وعند ال شاهر لسنوات كثيره وصلح الزهيري مع خصماه وشد لاهله وقال قصيده ماتحضرنا منها الا ابيات :

قصر ال شاهر من على العز باني=ومناخهم مدهال عوص المواجيب

منزالهم بالعز روس المباني=ترفع لهم بيضى بروس المراقيب



مصدر المعلومات التي ذكرت عن آل شاهر: الشيخ حمد بن منصور الصخابرة






من اليمين عضو المجلس البلدي بالمنطقة الشرقية الاستاذ فالح بن راجس بن نبجان وبجانبة عضو المجلس البلدي في البديع الشيخ ناجي بن محمد آل صويان الصخابرة وبجانبة الشيخ فيحان بن شجاع بن سويلمة وبجانبة الشيخ شافي بن حمد بن سعدون الصخابرة


من اليمين الشيخ فلاح بن محمد بن زيد بن جريس الخييلات وبجانبة الشيخ محمد بن زيد بن جريس الخيلات شيخ قبيلة الخييلات


من اليمين الاعلامي راشد بن حماد الغريري وبجانبة الشاعر عبدالله بن فهد الصخابرة وبجانبة الشيخ فهد بن عبدالله سعدون الصخابرة


من اليمين الشيخ فهيد بن منصور بن دغش الصخابرة وبجانبة فهد بن هادي الغريري وبجانبة راشد بن محسن المسعري




من اليسارالشاعر سعد بن فهيد آل بريك


من اليسار الشيخ بدر بن عبدالله السيد الخييلات ويليه رئيس مركز البديع الشمالي الشيخ فهيد بن صويان آل صويان الصخابرة


من اليمين الشيخ فهد بن سعدون الصخابرة ويليه الشيخ عبدالعزيز بن محمد بن مشرف العجالين ويليه الشيخ فالح بن سعد بن ناصر ال عمار رئيس مركز مروان


دغش بن حمد بن منصور الصخابرة


شبيب بن حليس الخييلات


من اليمين الشاعر مدعث بن محمد بن جريس الخييلات




























________________________________________

بدعوة كريمة من الشاعر عبدالله بن فهد آل فراس الصخابرة لــ موقع الدواسر الرسمي بمنزلة بـــ البديع حيث كان في استقبالنا الشاعر عبدالله بن فهد آل فراس الصخابرة وجمع من الصخابرة الكرام




الشاعر عبدالله بن فهد آل فراس الصخابرة






توجهنا الى الشاعر / عبدالله بن فهد آل فراس الصخابرة حيث قال هذه الابيات الترحيبيه:





مرحبا في ملتقى الطيب في دار البديع=عد ذعذاع الهبايب وهتان السحاب

عند بانين المراجل هل الشان الرفيع=متعبين قرح الخيل وظهور الركاب

عزوة في حزة الحرب للانفس تبيع=ساعةٍ فيها اشهب الملح والبارود ذاب

هجننا صوب الاعادي تنحا كل ريع=فوقها كل ابلج في المعارك مايهاب

لابةٍ لاجا نهار يشيب ابه الرضيع=كم خذو من ديرة القوم تلعات الرقاب

وتيهوها لاد صخبور بالحد الوسيع =وحتموها بالهنادي وذلقات الحراب

يوم صاح الشمري في ضحا اليوم الشنيع=قال ياخطلان الايمان واكبر المصاب

انتخا بالاد زايد مروين الوريع=قالو ابشر موترك مثل مانا والزهاب

وانثنا دغش المسمى كما السد المنيع=وانتخو معه النشاما هل الراي الصواب

خلدو فعل البطولات و ذكارن تشيع=عادة رجال المهابه مهدين الصعاب

المفاخر والنواميس تحسب للجميع=فعلنا واحد والا رواح قافيها الذهاب



يقول احد فرسان ال فراس لايحضرنا اسمه قديما :

لنا على هامات الامجاد منزال=ياسعد منا بالمواقف حزامه.

ومن فرسانهم باختصار :


الفارس حبيان بن سليم ( عدو القوم ابو سليم)

الفارس سعيد بن سليم

-مطيران وابناءه :
وعاجان وسليم ومحمد(ابا الغرما)

-ووريش واخية الشغاط

-محمد الجنوبي (راعي الشدقا)

والفارس محمد بن مفرح



ومن الرجال اللي يشهد لهم بالكرم

1-حبيان بن سليم
2-فهدبن وقيان
3-محمد بن حمد ( بن ساره )
3-جبعان بن سريع
4- سعيد بن شليش

ومن الرجال اللي شهد لهم في الاونة الاخيره بسقيا الماء على سياراتهم للباديه في بداية تطوير المملكه

حبيان بن حضرم
واخيه مطيران

وهذي ابيات من قصيده في الصخابره للشاعر عبدالله بن فهد ال فراس :



الجبال الشمخ اللي بها ضل وذرا =ترتهج منا لاجات العلوم الطاريه
لابة كم تيهة بالطرف حم الذرا=خالطت صيد الجوازي ورمس اثاريه
حن بعيدين المغازي معفين القرا=هجننا كم جات جو رماله ذاريه
فوقها كل ارجحٍ في مغازيها ضرا =في يديهم سلةٍ للجماجم باريه
كم شهد لامجادنا بالجهل كون جرا =في نهار فيه خيل الخصوم مثاريه
ننهل الصافي الى جات حزات المرا = مانوردها هماج الرسوس الصاريه


مصدر المعلومات التي ذكرت عن آل فراس الشاعر عبدالله بن فهد الصخابرة




















































________________________________________


بدعوة كريمة من رئيس مركز البديع الشمالي الشيخ فهيد بن صويان آل صويان الصخابرة لــ موقع الدواسر الرسمي بمركز البديع الشمالي بـــ البديع حيث كان في استقبالنا الشيخ فهيد بن صويان آل صويان الصخابرة و جمع من الصخابرة الكرام



الشيخ فهيد بن صويان آل صويان الصخابرة




بعد ذلك توجهنا الى رئيس مركز البديع الشمالي

الشيخ / فهيد بن صويان بن مرضي ال صويان ..

وكانت امارة البديع في الوقت الماضي عند الفارس / عسل بن محمس بن صويان
وعرف بشجاعته وحكمته ..

وقد ارسل بن رشيد مندوب الى اهل الجنوب في ذلك الوقت مرورا بديار الدواسر وبعد مارجع المندوب سئله الامير بن رشيد وقال :
وش اخبار ( الجنوبات ) بلكنة اهل الشمال :

قال لقيت الشيوخ والفرسان واهل الكرم وذكر منهم الامير / عسل بن محمس

ومن فرسان ال صويان على سبيل المثال :

صويان بن مرضي
ومحمد بن مرضي
وعسل بن صويان

ويذكر ان الفارس محمد بن مرضي قد غزا مع الملك عبدالعزيز في معركة جراب وقد اصيب في هذه المعركه وبعد مارجع لديرته سئله واحد من جماعته بشر عن صحتك فجاوبه بابيات نذكر منها :

سقوا الى منه بدا الكون يبرا=امشي مع الظفران والبال منساح

في مجلس ماعاد لي منه صبرا=وربعن مضرينٍ على كسب الامداح

لاشبها زبن المناعير فجرا=لاصك له باب ولاشيل مفتاح

وجدي عليهم وجد منهو تحضرا=ومن اول يتبع مصاغير والقاح




الشيخ محمد بن مرضي له قصه مشهوره في الكرم وهي :

كانت احواله الماديه قليله وضافه امير من امراء يام الشيخ / بن ملحان
واكرمه بالموجود وقدم له الصحن وتحته الصفو وقال البيت المشهور :


( سمو ياضيفان عسى فيكم مثلنا=مجربٍ عسر الليال ولينها )

له ابيات مشهوره في الصخابره :

لاد صخبور كما السم جاير=حفهم تكثر عليه الهموم

لابتي ماحسبوا للخساير=يوم لحقوا حذفوا بالهدوم

يوم لحق ضويحي هو وراشد=شبع ذيب العرق واللي يحوم

قوس البارود والعج الثاير=عند خلفاتن عليها الوسوم




وضويحي المقصود هو الفارس المشهور ضويحي ال عفيص

وراشد هو الفارس المشهور جد ال حضن المقابله راشد بن رشدان

ومنهم الشاعر المعروف شاعر الحرب
ناجي بن مرضي له قصايد كثيره في ربعه الصخابره ..

عند مرور الملك سعود وزيارته للمناطق مر الافلاج ثم سووا له الصخابره في البديع غداء واحتفال كبير ولعبوا العرضه وهي لناجي بن مرضي ونذكر منها ابيات :


مرحبآ ياهل الراي الرفيع=ياموطين عدوان القبايل

جمعهم لامشى يتم الرضيع =مقعدينٍ صغى من كان عايل

ترثة العود حكمه مايضيع=ماخذينه بمفتوق السلايل

اخذه سعود واخوانه جميع=واودع الحف في كبده ملايل

البريمي ترى حكمه يضيع=بوفهد حاربه صدق وصمايل

قالها ناجي راعي البديع=معجبه فعل كساب الجمايل



يوم خلصت العرضه ثم قلط الملك على الغداء قال وين الشاعر ناجي ثم قال تراك خوينا لنا اليوم ودوم واركب معنا ثم مشوا على ديار الدواسر ثم الى المناطق الاخرى ثم الى الرياض وجلس معه حول 6 شهور ثم قصد في البديع وربعه الصخابره وسمعه واحد من الاخوياء وعلم الملك سعود ثم ناداه وقال سمعنا الابيات ولايحضرنا منها الا هذه الابيات :

ديرتي كل طماعن يخليها =من تحلا سواد نخيلها راعه

من الاوايل وهي محدن يدانيها=دونها لاد صخبور هل البيعه

والقبايل الا عمست طواريها=حن هل البيعه العليا وبزاعه



وامر بعدها الملك سعود بسياره مليان فيه خير وقال سلم عليهم وعود علينا وبعدها بوقت قصير توفى رحمه الله ..


مصدر المعلومات التي ذكرت عن آل صويان علي بن محمد آل صويان



































________________________________________

وبدعوة كريمة من عضو المجلس البلدي في البديع
الشيخ ناجي بن محمد آل صويان الصخابرة لــ موقع الدواسر الرسمي بــــ البديع حيث كان في استقبالنا الشيخ ناجي بن محمد آل صويان الصخابرةوجمع من الصخابرة الكرام





الشيخ ناجي بن محمد آل صويان الصخابرة




















الشاعر / عبدالله بن ماجد ال صويان

القاء الشاعر / عبدالله بن ماجد ال صويان قصيدة ترحيبية بهذي المناسبة




يابنات الفكر هدي وهاتي بالفريد=واستبيحي كل من جالها مانالها

اتركي اللي يندهَل والفي ابدعٍ جديد=القصيده وجه للشاعر اللي قالها

مرحبا في مرحبا عد ماتقال وتزيد=مرحبا ترحيبتن نومست من شالها

موقع ن بسم الدواسر لفا واليوم عيد=موقع ن يزهاه من لابتي واشبالها

لين جملنا وكل ن يصفق له يشيد=جملونا جعل ربي يجمل حالها

مرحباً في ديرة اللي يسرون الوحيد=مزبن الجاني شكى من فجور ليالها

لاد صخبور(ن) هل البل واهل زين الجريد=عندها والى احتما الجمع حنا رجالها

ديرة (ن) مابوَّبوها بباب من حديد=ولاسهرنا خوف من طامع(ن) يعنا لها

سورها صيت ن يهيب سعاطير العقيد=خوف لا يتِّم بني لابته وعيالها

وابلنا للضيف ماورثت فينا زهيد=حالبينٍ فالها والحوار عقالها

قلتها من هاجسٍ لابدا شعره يجيد=عايفن لهزالها هاوين لجزالها

عقب اللي لانشد قيل جعله مايفيد=وكثر مابتقال ذالوقت وقول امثالها

بختم وصلوا على من نشر دين الحميد=احمد الأمه وهو عز من منزالها






________________________________________

وبدعوة كريمة من الشيخ شافي بن حمد بن سعدون الصخابرة لــ موقع الدواسر الرسمي بــــ البديع حيث كان في استقبالنا الشيخ شافي بن حمد بن سعدون الصخابرة وجمع من الصخابرة الكرام


الشيخ شافي بن حمد بن سعدون الصخابرة



ثم بعد ذلك توجهنا الى الشيخ / شافي بن حمد بن سعدون ال عفيص الصخابره

من سند الوادي فالعود ملفاه =سعدون اللي بينن في الاسامي

تم في وقت مضى ايام المغازي وكسب الابل الصلح بين الدواسر وال مره

على يد الشيخ / شافي بن سعدون
مع الشيخ / حمد البطين المري
والشيخ / بن نقادان المري

ومن بعده طينان بن سعدون مع الشيخ / المرظف المري ثم مع بن دحباش المري
ثم مع بن نديله المري

وهو ان ابل ال مره ترعى في حدود الدواسر بدون محد يعترضها كذلك ابل الدواسر ترعى في حدود ال مره بدون ان يعترض لها احد .وتم هذا الصلح الى ان تم توحيد المملكه على يد عبدالعزيز رحمه الله ..


ابن سعـدون بالهرجة امـثـنـيـها=شيخ قـوم (ن) توطى كل شيطاني


وفي وقت توحيد المملكه طلب الملك عبدالعزيز من يكفل على ال حسن فتقدم / بداح بن سعدون .. فقال من انت فعرف بنفسه وقال مطلق ياولدي .. وكان في ذاك الوقت صغير سن

كما انهم شاركوا مع الملك عبدالعزيز في توحيد البلاد ويذكر ان الشيخ / شافي بن سعدون شارك في معركة القصيم ..

وعلى سبيل المثال فقط نذكر بعض من فرسان ال عفيص :

الفارس حسن بن سعدون
وراشد ( فرثان )
وودي بن جاهل
وعبيد بن فلاج
وضويحي بن صويان
شليويح بن شافي بن سعدون


ولهم قصص كثيره في اصلاح ذات البين فيما بين الدواسر

واهل كرم منهم محمد بن ناهض ( بنى )

ضافوه امراء منهم الامير / سعود الكبير وسلمان بن محمد ( مزبن المجرم )

كذلك شيوخ قبايل معروفين وفي احد المرات ضافه الشيخ / فهد الدامر وهو مجلى من الملك عبدالعزيز فذبح ذلوله لاكرامه
وعندما علموا بفعله اهدوه ذلول ..

كذلك خريزان بن سعود ( راعي مقدره ) عمه محمد بن ناهض ( بنا ) ... ومقدره هي السكين ... واشتهر بهذا اللقب لكرمه المعروف :


والا لراعي مقدره بالصحوني=يدهن شحمها من يمينه ذراعه

ويقول بن سعدون :

قلته وانا بن سعدون في حب ربعي=قلته وانا اللي في يميني زمامها

سلالة اللي خامس الخمس خيله=وارخى على العدوان منها لجامها

من لاد صخبور العريبه اليا انتحت=تنحي كما سيلٍ محانيه زامها

موسعة لاجل المجاهيم حدها =اهل المغازي في ليالي عتامها

هم لابتي هم عزوتي يامسندي=لاجاء نهارا به تطاير عسامها




مصدر المعلومات التي ذكرت عن ال سعدون وال عفيص الشيخ شافي بن حمد بن سعدون والشيخ طينان بن سعود بن سعدون










































________________________________________

وبدعوة كريمة من الشيخ بداح بن قريع آل عود الصخابرة لــ موقع الدواسر الرسمي ب بــــ البديع حيث كان في استقبالنا الشيخ بداح بن قريع آل عود الصخابرة وجمع من الصخابرة الكرام



الشيخ بداح بن قريع آل عواد الصخابرة


توجهنا الى مزرعة الشيخ بداح بن قريع بن عواد ال سعود الصخابره في سدير البديع

ابن عـواد للسربة يـقـديها=يوم ذيك الحلول ولبس الأكفاني

يتعـب الهجن حفـيات (ن) سماريها=لا غدت شـحَـمـِـن جت حيلها واني

مسبعـتها مع الحدبا وأثاريها=صوب نجد وتاصل ساحل عماني

كم عزيب (ن) خذوها من مفاليها=لين والله سهدها طير حوراني



ال عواد اهل العقاده المعروفه .. وكان يغزا تحت بيرقهم الفرجان وقبائل اخرى من الدواسر وغير الدواسر وقصصهم منقوله ومذكوره

وهذي ابيات للشاعر / محمد بن مبارك بن حبيان من عرض قصيده :

روس قـومـاً تـسـود ومـجدها سـادي
شـيـخـتاً تــرفـع الـهـامـات طـريـاها

ال عـــواد نـجـماً بــا الـسـما بــادي
ســـيـــرةً راوي الــتــاريـخ يــقــراهـا


اهل منسف وسيف وسرج وشدادي
كـــم وكـــم غـزوتـن قــادو سـرايـاها


نـتـعب الـهـجن مـحـدارن ومـسنادي
وكـــل قــومـن خـذيـنا مــن رعـايـاها


حــن بـعـادالمغازي وهــل الامـجادي
فاالجزيره من اقصاها الى اقصاها


لادصـخـبـور بــا الافـعـال تـنـشادي
ون تـبـيـن جـمـوعـاً نـسـهـج حـمـاها

نـــار عـــزن لـضـاهـا لـــه تــوقـادي
يــقـصـر الــشـره عـنـهـا لاتـهـقـواها
ا


.. لهم قصر في البديع يسمى ( ام الخيل ) =بدأت العقاده مع عواد ثم بعده ابنه

محمد بن عواد ( رغوان )

ثم قريع

ثم بادي

ثم سعود بن عواد ( اخو رفعه )

ثم محمد بن محمد بن عواد ( دويع)

وقال الشاعر / عبدالله بن فهد في ال عواد قصيده نذكر منها هذه الابيات :


ماتعب مواطي الجيش مثل ابن عواد=كــــم مــــارد داجــــه وصــبــح عـزيـبــه
زيــــزوم هــجــن لاحــمــر الــمــوت وراد=كـــم فـرقــن بـيــن الـحـبـيـب وحـبـيـبـه
جـــرة سـمـاريـهـا مـرامـيــس وجــــداد=مــع تخـتـخ يشـكـي المـجـاعـات ذيـبــه
غـاراتـهــا مـابـيــن مـنــحــا ومـســنــاد=تـتـبــع طــلـــوع الـنــجــم ولا مـغـيـبــه
كونـه بــزوغ الشـمـس مـاغـار مهـجـاد=يشـهـدبـهـا فـعـلــه ويـشـهــد حـريــبــه
مـــن لابـــة عـنــد الـلـقـا ســـم الاكــبــاد=امـجـادهـم شـمــس الـنـهــار تحـكـيـبـه
الـلـي خــذو بعصيـهـا مـالـهـا اعـــداد=راحـوبـهـا صـلـبـيـن الاريــــا غـصـيـبـه
حاموعلـيـهـا عـقــب صـــولات وطـــراد=وشـلــف تـسـمــر بـالـنـحـر والـتـريـبـه
اقفـو بهـا غصـب علـى روس الاشهـاد=عـلـى النـضـا ومـلاويـات السبـيـبـه
قــومٍ لـهـم مــع سـاعـة النـصـر ميـعـاد=ايمـانـهـم تـرمــي الـسـهـوم العطـيـبـه
اصحابهـا عقـب الصلـف راحـو ابــداد=كـــل جـفــا حـوضــه بمـسـقـى قـلـيـبـه
عاداتـنـا عـنـد اللـقـا مــن عـصــر عـــاد=لـطــم الـخـشـوم وخصـمـنـا مانهـيـبـه
لازعــزعــو صـخـبــور سـاطـيــن الاولاد=جـــــــد لـــنــــا بـالـمـعــركــه نـعـتـزيــبــه



ونذكر من فريس ال سعود على سبيل المثال :

الفارس لهمان بن عواد
الفارس والشاعر خجيم بن عواد
الفارس محمد بن مناع الصخابرة
وناصر بن عواد
السنافي بن بتال ( راعي الركباء )
وقريع بن قريع

ومحمد بن لبنه

وكان في وقت مضى يدعابهم مثل لاجاء راعي الابل بكره وبشروه بها قال بشروبها بن عواد او يدعي على ابله بذكر طاريهم وهذا يدل على شجاعة بن عواد والصخابره في كسب الابل وبعد المغزا

وذكرها الشاعر / مسعود بن سعد في قصيده لل عواد ونذكر منها :


هـــل شـيـخـة مـاهـيـب تـحـتــاج تـوكـيــد=قـبــل الـخـتـوم مــــن الــرهــاف تخـتـيـمـه
مخلـيـن ســـود الـمــرح صـبــح ومهـاجـيـد=يــدعــى بــهــم يــــوم الـسـنـيـن الـقـديـمـه
تـشـهـد لــهــم لــعــدا حــــدور ومـسـانـيـد=والسـيـف والبـنـدق عـلــى شـــداد ريـمــه
وجـيــش تـقـيـض لــيــن تــبــرد مـلاهـيــد=لــهـــا عــلـــى بــعـــد الــمــغــازي عــزيــمــه
قـــد جـالـهـا صـــوب البـريـمـي مـهـاديــد=فــــي طــرقــه مـاهـيــب فـيــهــا غـشـيـمــه
وخـيــل تـغــذا مـــن ثـمــر شــــرع الـغـيــد=تــعــبــى لـــيـــوم مــايــهــوون عـسـيــمــه
تنـسـع حـذاهــا مـــن كـثــر ذرعـــة الـبـيـد=مـاتـنـثـنــي قـــــــدام قـــشــــع الـغـنـيــمــه
مـــن فـوقـهـا الـلــي يلـحـقـون المقـاصـيـد=فـهـود الــزراج أهــل الـفـعـول الجسـيـمـه
سـقــم الـحـريـب سـتــار متـنـوقـة الـجـيـد=لامــن زمــي وجـــه الخـصـيـم لخصـيـمـه



مصدر المعلومات التي ذكرت عن ال عواد وال سعود اقتبسناها من عدة مواضيع طرحت في الموقع









































_________________________________________



الشيخ سعود بن محمد بن شويرب الصخابرة


ولم يسعفنا الوقت لكي نتوجه للشيخ سعود بن محمد بن شويرب الصخابرة وذالك لظروف خارجة عن ارادتنا



وسعود هو ابن الفارس الشاعر / محمد بن شويرب بن بدن الذي لم يذكر انه تغيب عن غزوه من غزوات الصخابره ومعروف عنه انه يحول خلاف الركايب من دون القوم


يستاهل بن شويرب ثربة الحيل=عدوله الفنجال قبل العيالي
عقر ثلاثٍ مكرماتن مواحيل=يوم السبايا عند تاليها تثاري



الى اخر الابيات
والابيات السابقه لشاعر من قبيلة الغييثات بعد ماشاف فعل بن شويرب في احد الوقعات ..

وفي احد الوقعات المعروفه كذلك باسم ( النيس ) حالوا القوم على احد فرسان الفرجان وقام يزهم ويعتزي ورجع له الفارس بن شويرب واعتزى بعزوته المشهوره ( خيل الاهج محمد ) فذبحهم واخرج صاحبه من بينهم

وقد اشتهر مع فروسيته بشعره ومن ابياته في الفخر :


يافاطري يابعد من دش في العيد =ابو دليقن على الامتان يثعاه
من جاء يبي مشربه يلقى مواريد=ومن جاء يبي مشربه عطشان نسقاه
يوم الردي مافاخت من المعازيب=ولاقطع فرجتن والذيب خاواه
معنا ام تاج سريعات النواظير=صنع الكريزي صليب العظم تشظاه
طمرتنا طمرتن يوم نشّف الريق=يوم دبر الاش والناموس خلاه


ويعرفون الصخابره انهم اهل صلح ويذكر انه في احد المرات وصل ال مره بقيادة راشد ال غضبان عند ابل شويرب وهو ابو محمد بن شويرب وعندما تحققوا من الوسم قالوا للراعي حن ماحن بغزايه على ابل الصخابره لان بينا وبين شويرب صلح ولاترد الخبر منا ..

كذلك نذكر قصته مع احد جماعته في الرمله الشاعر فويران المقابله .. سافر فويران عن دياره ورجع بعد وقت ولقى ابله محفوظه وقد كلف احد بناته برعيها فاعجب بفعل الفارس بن شويرب وقال هذه الابيات :


يابنت منهو يرحب بالمسايير =قدام بيته لهل الانضا مراحي
يابنت منهو عدا الخيل المشامير=لاساعف الدرج مشخول الملاحي
يابنت منهو حما الجيش المدابير=لمن اختلف ضرب مذلوق الرماحي


وقد قال فيه الشاعر عنبر بن مهدي ال مفرج مرثيه :

مرحوم ياعودٍ علينا فقيده =يبكونه الجيران هم والقرايب
ابو شويرب عز منهو عضيده=مرحوم ياحامي عقاب الركايب
لاضيقوا بالقوم فالهوش عيده=يثني خلاف الجيش ماهوب هايب
جمعا من القيمان فرق عديده=حول عليه وحط فعل العجايب
منهم خويتم كل علمٍ يريده=عود وخلا تالي الجيش هايب


وعندما جاء توحيد المملكه شارك مع الدواسر في فتح نجران وكانت الحصون منيعه وابراجها طويله فقام بمداهمة البرج وقتل من بداخله

نذكر ( بعض ) من فرسان ال مفرج والذين عرفوا بحماية الركايب :

ناصر بن بدن (راعي العدو )
هران بن منصور ( راع القافل )
والشاعر شنوف بن فهيد

ومنهم من اشتهر بالكرم مثل :

صاحب المناخ ( سعيد بن فالح ) ومكانه المعروف ( مقصورة الزباره ) ومن بعده ابنائه كذلك اشتهروا بالكرم :
سعد بن سعيد وفهيد بن سعيد
وفهد بن سعيد

كذلك شويرب ابن الفارس محمد بن شويرب عرف بالكرم وكان يمتلك اطيب الابل من ابل الصخابره وباعها بسبب الكرم وتراكم الديون عليه في ذلك الوقت

ويقول شنوف بن فهيد في مدح ربعه وابلهم :

لاهن بخور ولاغبرن مغاتير=ولاشرايا من سوق يجمعونه
الزين والله خبرته يامناعير=صفةٍ دلال ونجرن يرمعونه
انفز بالضيف ونرحب بالمسايير=منا من اللي اليا جاء يكرهونه
اهل الكرم يوم السنين المدابير=يومن ولد الاش بيته مايجونه



مصدر المعلومات التي ذكر عن ال شويرب وال مفرج الشيخ سعود بن محمد بن شويرب

_________________________________________


وفي نهاية هذا التقرير المبسط نذكر بعض من فرسان الصخابره على عجاله :


معجب بن طامي ( راعي الهامل )
ومحمد بن مناع ( راعي البلهاء ) وكان يعتزي في احد الوقعات خيل البلهاء محمد ياحلو رصاصهم حلواه
وعبيد بن شليش ( ولد العون )
فريع بن فرحان
وسعود بن ناهض
ومحمد بن سعيد
وبن القابيه المقابله
وحظرم بن مطيران
وراشد بن رشدان
وضويحي بن ناهض
وفريع بن السنافي
وهادي بن رشدان
وشامان بن سريع
وسبر بن محمد
وسريع بن محمد
عنبر بن فرحان
ومحمد بن ناصر
وحميد بن شافي ( راعي الفحله )
وابراهيم بن دمشق
سعدون بن ناصر
وجهيمان بن حفيظ
هجرس بن راشد






وختاماً، فإنه ليسر إدارة الموقع الرسمي لقبيلة الدواسر أن تتقدم بخالص الشكر والعرفان لمشايخ وأعيان " الصخابرة" بــ البديع على رحابة صدرورهم وكرمهم الغير مستغرب ونراااكم في رحلة أخرى سوف تطرح الأيام القادمة بإذن الله تعالى






(صوت قبيلة الدواسر)
موقع قبيلة الدواسر الرسمي
www.alduwaser.org/vb



 

 

 

 

 

 

التوقيع


حسابنا في تويتر

@alduwaser1
آخر تعديل دغش بن حمد بن منصور يوم 15-08-2017 في 09:29 AM.

    

رد مع اقتباس
قديم 29-12-2014, 11:02 PM   #2
 
إحصائية العضو







الكاتم غير متصل

الكاتم will become famous soon enoughالكاتم will become famous soon enough


افتراضي رد: التغطية المصورة لجولة موقع قبيلة الدواسر الرسمي الثالثة لـ محافظة الافلاج " الــبــديــع "

اول شي بيض الله وجيهكم ادارتنا الكريمه ومن مشا معكم في مثل هذه الزيارات التعريفية الهامه
وبيض الله وجيه الصخابره خاصه واهل البديع والافلاج عامه على الاستقبالات والترحيب بالمنتدى ومن معهم وعلى راسهم الامير فيحان بن سويلمه

 

 

 

 

 

 

التوقيع

    

رد مع اقتباس
قديم 30-12-2014, 01:13 PM   #4
 
إحصائية العضو







نآصر البدراني غير متصل

نآصر البدراني is on a distinguished road


افتراضي رد: التغطية المصورة لجولة موقع قبيلة الدواسر الرسمي الثالثة لـ محافظة الافلاج " الــبــديــع "


بيض الله وجيه ربعنا الصخابره على الاستقبال الطيب والحفاوه

وكرم الضيافه وافين وعلومهم غانمه أول وذلحين ,

والله يبيض وجيهكم يا ادارتنا على هذه الجوالات وتعريفنا بديار ربعنا

ومعلومات عن اهلها وفرسانها وجعلكم على القوه

 

 

 

 

 

 

التوقيع




استغفر الله لي ولوالدي وللمسلمين والمسلمات


المؤمنين والمؤمنات الأحياء منهم والأموات


    

رد مع اقتباس
قديم 30-12-2014, 05:33 PM   #5
 
إحصائية العضو







دغش بن حمد بن منصور غير متصل

دغش بن حمد بن منصور is on a distinguished road


افتراضي رد: التغطية المصورة لجولة موقع قبيلة الدواسر الرسمي الثالثة لـ محافظة الافلاج " الــبــديــع "





لاد صخبور هل المجدد و الفعل التتليد =من قديييم الوقت كلن يعرفف افعالها

في البدايه :

بيض الله وجيهكم على زيارتكم اللي تثلج الصدر والغير مرتب لها في الحقيقه ولكن تممتوا لربعنا بعد ماواجهتوهم مع انكم كنتوا على سفر وهذا يدل على خف النفس وتقديركم لربعكم ...


ونشكركم على هذا التقرير المبسط المختصر عن البديع وعن الصخابره وشيوخهم (وذكر بعض من فرسانهم ) وعن كرمائهم كذلك

وفيه قصص ووقعات وقت المغازي يحفظها رواة الصخابره وتاريخ يشرف كل دوسري وباذن الله تواعدونا ناخذها عند اقرب فرصه ياادارة موقعنا الشامخ .. دمتم ذخر لقبيلتكم

 

 

 

 

    

رد مع اقتباس
قديم 30-12-2014, 07:02 PM   #6
 
إحصائية العضو







ابومبخوت الدوسري غير متصل

وسام الدواسر الذهبي: للأعضاء المميزين والنشيطين - السبب: لنشاطه الكبير وجهوده الطيبه في خدمة الموقع
: 1

ابومبخوت الدوسري has a spectacular aura aboutابومبخوت الدوسري has a spectacular aura aboutابومبخوت الدوسري has a spectacular aura about


افتراضي رد: التغطية المصورة لجولة موقع قبيلة الدواسر الرسمي الثالثة لـ محافظة الافلاج " الــبــديــع "

بيض الله وجيهكم ادارتنا الكريمه على هذه الزيارات التعريفية الطيبه ..
وبيض الله وجيه الصخابره خاصه واهل البديع والافلاج عامه على الاستقبالات والترحيب بالمنتدى ومن معهم وعلى راسهم الامير فيحان بن سويلمه

 

 

 

 

    

رد مع اقتباس
قديم 31-12-2014, 10:31 PM   #7
 
إحصائية العضو







دغش بن حمد بن منصور غير متصل

دغش بن حمد بن منصور is on a distinguished road


افتراضي رد: التغطية المصورة لجولة موقع قبيلة الدواسر الرسمي الثالثة لـ محافظة الافلاج " الــبــديــع "

وصلتني رساله من شاعر المخاريم / محمد بن باني
بعد مشاهدته لتغطية موقع الدواسر اثناء زيارتهم للبديع ..
متنومس بما ذكر في التقرير وهذا من طيب راسه الله يبيض وجهه ويصح السانه والمدح والفخر واحد
وهم المحزم اللي مايخجل صبيان المنيعي ..

اترككم مع الرساله :

( بيض الله وجيهكم يابو حمد صراحه لقاء ممتع ومشرف والصخابره معروفين قبل اللقي وبعده مواقفهم وافعالهم ترفع الراس.
وتقبل مني هلابيات كهدية مني لك)
.............

طيب ربعك يادغش مابه غرابه
لاد صخبور بعيدين المغازي

والله انهم بالمراجل خير لابه
الفعول جزال والأنفس عزازي

يكسبون الطيب بعزوم وصلابه
للصديق دواء وللعايل نحازي

عزوتن لا ولعت نار الحرابه
ثم تقدم صفهم .. للحرب فازي

وجدك اللي موقفه كلن درابه
مع وداعينن ثقالن ما ترازي

وشكري ن موقفه يحسب حسابه
كل منهم في مجال الطيب فازي

يوم فرت الشمري لقشر جذابه
في مكان لامصد ولا موازي

شالوا الموتر وحملته وزهابه
والرصاص يثور من عوج الكرازي

والدواسر سلمهم كلن حكابه
الخوي معهم يعز ولا يهازي

 

 

 

 

    

رد مع اقتباس
قديم 07-01-2015, 05:33 PM   #8
 
إحصائية العضو







دغش بن حمد بن منصور غير متصل

دغش بن حمد بن منصور is on a distinguished road


افتراضي رد: التغطية المصورة لجولة موقع قبيلة الدواسر الرسمي الثالثة لـ محافظة الافلاج " الــبــديــع "

اقتباس:
المشاركة الأصلية كتبت بواسطة فهد الغريري مشاهدة المشاركة
اتتقدم بخالص الشكر والعرفان لمشايخ وأعيان لــــ " قبيلة الصخابرة "

على رحابة صدرورهم وكرمهم الغير مستغرب



وترقبوا التغطية القادمه

" الخرج "

تستاهلون الترحيب والشكر والثناء يابو راشد انت ومن حضر معك
والله يبيض وجيهكم ياادارتنا على الجهود الواضحه

 

 

 

 

    

رد مع اقتباس
قديم 05-08-2018, 06:39 PM   #9
 
إحصائية العضو







دغش بن حمد بن منصور غير متصل

دغش بن حمد بن منصور is on a distinguished road


افتراضي رد: التغطية المصورة لجولة موقع قبيلة الدواسر الرسمي الثالثة لـ محافظة الافلاج " الــبــديــع "

للرفع ومشاهدة الموضوع من قبل ابناء العمومه ويشرفنا ذلك 🌹

 

 

 

 

    

رد مع اقتباس
إضافة رد


الذين يشاهدون محتوى الموضوع الآن : 2 ( الأعضاء 0 والزوار 2)
 
أدوات الموضوع
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة

الانتقال السريع

المواضيع المتشابهه
الموضوع كاتب الموضوع المنتدى مشاركات آخر مشاركة
التغطية المصوّرة للحفل السنوي الخامس لقبيلة الدواسر بإستضافة ورعاية الشيخ فيحان بن شجاع بن محماس بن سويلمه آل بريك حفظه الله ورعاه. الإداره :: قسم اللقــاءات والفعاليات والتغطيات الخاصة:: 39 30-04-2011 02:03 PM
التغطية المصورة لحفل المسابقة الشعرية الأولى لموقع قبيلة الدواسر الرسمي الإداره :: قسم المسابقة الشعرية السنوية للموقع الرسمي لقبيلة الدواسر :: 17 11-12-2010 10:09 PM
التغطية المصوّرة لحفل إفتتاح مبرة قبيلة الدواسر الخيريّة بدولة الكويت. الإداره :: قسم اللقــاءات والفعاليات والتغطيات الخاصة:: 16 22-11-2010 08:44 AM
التغطية المصوّرة للحفل السنوي الرابع لموقع الرسمي لقبيلة الدواسر بإستضافة الأمير ضاري بن سعد الحطيم بمحافظة الخرج الإداره :: قسم اللقــاءات والفعاليات والتغطيات الخاصة:: 26 04-05-2010 01:12 PM
التغطية المصوّرة للحفل السنوي الثالث لقبيلة الدواسر بإستضافة ورعاية حسين بن براك آل حضيري المشاوية بدولة الكويت الإداره :: قسم اللقــاءات والفعاليات والتغطيات الخاصة:: 71 03-03-2008 01:25 PM

 


الساعة الآن 08:10 AM


Powered by vBulletin® Copyright ©2000 - 2019, Jelsoft Enterprises Ltd.
---