اللقاء التاريخي الشامل مع الأمير ناصر بن فيصل بن حفيظ وأسرة آل حفيظ الكريمة - ::: مـنتدى قبيلـة الـدواسـر الـرسمي :::

العودة   ::: مـنتدى قبيلـة الـدواسـر الـرسمي ::: > :::. الأقســــام الـخــــاصـــــة.::: > :: قسم اللقــاءات والفعاليات والتغطيات الخاصة::

إضافة رد
انشر الموضوع
 
أدوات الموضوع انواع عرض الموضوع
قديم 16-12-2007, 11:01 PM   #1
 
إحصائية العضو







الإداره غير متصل

الإداره is on a distinguished road


افتراضي اللقاء التاريخي الشامل مع الأمير ناصر بن فيصل بن حفيظ وأسرة آل حفيظ الكريمة






بسم الله الرحمن الرحيم


والصلاة والسلام على أشرف الأنبياء والمرسلين سيدنا محمد وعلى آله وصحبه أجمعين.


الأخوه أعضاء وزوّار موقع قبيلة الدواسر الرسمي


يسرّنا أن نضع بين أيديكم اليوم لقاءا ً تاريخيا ً شاملا ً فريدا ً من نوعه ،اجراه موقع قبيلة الدواسر الرسمي مع الشيخ ناصر بن فيصل آل حفيظ بحضور جمع كريم من أسرة آل حفيظ العريقه .

فبدعوه كريمة من أسرة آل حفيظ أمراء قبيلة الشكره العريقه، التقى الأستاذ هايف بن مبارك العماني رئيس موقع قبيلة الدواسر الرسمي مع جمع من أسرة آل حفيظ الكريمة يتقدمهم الأمير ناصر بن فيصل بن حفيظ والأمير محمد بن مناحي بن حفيظ (أمير قبيلة الشكره) وعدد من اسرة آل حفيظ .

وقد أجرت ادارة موقع قبيلة الدواسر الرسمي مع الأمير ناصر بن فيصل آل حفيظ، هذا اللقاء التاريخي والذي يتناول في طياته سيرة هذه الأسرة المجيده وقبيلة الشكره العريقه تلك القبيلة العزيزة اشتهرت بفزعاتها الشهيرة ونخوتها الدوسرية وكرمها الزايدي .

قبيلة اشتهرت بألقاب عديده تدل على شجاعتها واقدامها فهم (( أهل الست)) وسجلهم حافل بالقصص والوقعات والشواهد على ذلك فهم أهل الشهامة والحميّه والفزعه ، وعرفوا بمحبتهم لقبيلتهم فنالوا محبة الجميع واحترام جميع القبائل في الجزيرة .

قبيلة انجبت انجبت فرسان وابطال وشيوخ وشعراء خلدوا أسماءهم واسم (الدواسر) في صفحات المجد بأحرف من نور ، سواء بالشجاعه أو بالكرم او بالحميا والفزعه ، فاذا قلنا الشجاعه ذكرنا ابن حفيظ واذا قلنا الكرم ذكرنا كريم سبلا ابن هذال.


ويعتبر الأمير ناصر بن فيصل آل حفيظ أكبر أسرة آل حفيظ سنا ً ومن أحفظهم لتاريخ هذه الأسرة العريقة التي سطرّت الكثير من الأمجاد والمفاخر ، والتي يعتز بها كل فرد من أبناء قبيلة الدواسر العريقة .كما يعتبر الأمير ناصر بن فيصل آل حفيظ من أمراء قبيلة الدواسر المعروفين والذي لهم مواقف كريمة وشجاعه تحسب له مدى الدهر .نسال الله ان يطيل بعمره ويمتعه بالصحة والعافية .


أجرى اللقاء :

الأستاذ هايف بن مبارك العماني الغييثي .

أجاب عن الأسئلة :

الأمير ناصر بن فيصل بن عجب بن حفيظ .

حضر اللقاء وشارك به :

الأمير محمد بن مناحي بن حفيظ امير قبيلة الشكره ، الأمير فرج بن عامر بن حفيظ ، الأمير عجب بن سند عبدالله بن سند بن حفيظ رئيس مركز المثناه بالأفلاج ، الشيخ الداعية حفيظ بن عجب بن فيصل بن حفيظ ، الشيخ سند بن عجب بن فيصل بن حفيظ ، وجمع من أسرة آل حفيظ الكريمة .





من اليمين : الأمير محمد بن مناحي بن حفيظ(أمير الشكره) ، الأمير فرج بن عامر بن حفيظ ، الأمير ناصر بن فيصل بن حفيظ ، الأستاذ هايف بن مبارك العماني




من اليمين : الأمير فرج بن عامر ، الأمير ناصر بن فيصل ، الشيخ سند بن عجب.




الأمير ناصر بن فيصل آل حفيظ (حفظه الله)




س : بداية يابوفيصل هل تعطون ابناءكم أعضاء موقع قبيلة الدواسر الرسمي بطاقتكم الشخصية؟


ج : بكل بسرور ، اما بالنسبة لي باسمي الكامل :

ناصر بن فيصل بن عجب بن محمد بن فرج بن حفيظ
واشغل رئيس مركز مقبوله احد أحياء الخرج .
والعمر : 71 سنه .

س : هل ممكن ان تعطونا تسلسل أمراء آل حفيظ ؟

ج : طال عمرك آل حفيظ اول امارتهم على فرحان بن حفيظ ولم يعقّب ، وبعده شاخ أخوه فرج بن حفيظ

،وكل أسرة آل حفيظ الموجودين حاليا ً هم من سلالة فرج بن حفيظ .

وآل حفيظ الآن ينقسمون الى أربعة أقسام :

اولهم : سند بن فرج ، أنجب عبدالله وعبدالله أنجب شجاع وسند .
وشجاع لم يعقّب أحد ، واما سند فأنجب عبدالله ومسفر
وعبدالله أنجب : شجاع وبادي ومسفر وكذلك سند ، وسند أنجب عجب بن سند بن عبدالله رئيس مركز المثناه بواسط بالأفلاج.

ثانيهم : محمد بن فرج ،

وأكثر آل حفيظ من سلالة محمد بن فرج ، ومحمد بن فرج أنجب :

سند ، وعجب ، وعامر ، و فرج ، وفرج انقطعت سلالته .
فأما الأمير سند بن محمد بن فرج أنجب : مناحي ، وتريحيب ، ومحمد ، وشجاع .
ومناحي بن سند أنجب : سند وفيصل وشجاع وعجب ومحمد (أمير قبيلة الشكره حالياً).
واما تريحيب بن سند أنجب : عماش .
ومحمد بن سند أنجب : فهد.
وشجاع بن سند أنجب : خالد .

وأما الأمير عجب بن محمد بن فرج فأنجب : فيصل وحسن
فأما فيصل بن عجب : أنجب عجب بن فيصل وناصر بن فيصل في (مقبوله)، ومحمد بن فيصل وفهد بن فيصل ، وفيصل بن فيصل .
وأما حسن بن عجب فأنجب :
محمد وبداح وفيصل وفرج وعجب وعبدالله .

والأمير عامر بن محمد بن فرج أنجب : محمد ، وخالد وفرج ،
وثالثهم : شايع بن فرج ، وأنجب مسفر وفرج ومحمد
ورابعهم : بدّاح بن فرج ، ولم يعقب احدا ً .





لذلك يتضح أن التسلسل الزمني لإمارة آل حفيظ كالتالي :

1- فرحان بن حفيظ.
2- فرج بن حفيظ، وبعده ابنه سند بن فرج بن حفيظ ، ولم تطل به حياته.
3- محمد بن فرج بن حفيظ.
4- سند بن بن محمد بن فرج بن حفيظ، وهو اكبر أبناء الأمير محمد بن فرج بن حفيظ.
5- عجب بن محمد بن فرج بن حفيظ، وهو شقيق سند وتولى الامارة بعد وفاة أخيه. وهو أيضا ً أمير هجرة مشيرفه بالخرج .
6- مناحي بن سند بن محمد بن فرج بن حفيظ وتولى الامارةبعد وفاة عمّه الأمير عجب.
7 - سند بن مناحي بن سند بن حفيظ وتولى امارة الشكره بعد وفاة والده،
وناصر بن فيصل بن عجب وهو أول أمير لـ(مقبوله) .
وعجب بن سند بن عبدالله رئيس مركز المثناه بواسط في الأفلاج.
8-محمد بن مناحي بن سند بن محمد بن فرج بن حفيظ ( أمير قبيلة الشكره حاليا ً) ،



وآل حفيظ كلبوهم دربهم واحد وسنعهم واحد والله يعز الإسلام



س : أبا فيصل ، ستكون بداينا بالأمير فرحان بن حفيظ ، فهل تخبرنا بموقفه اثناء مغزى ابن سعود على الأفلاج وماهي تفاصيلها ؟

ج : قام واحد من العربان ويروح لابن سعود في وقته الإمام عبدالله الفيصل .
وقال :

ياطويل العمر أنا وراي أنهار تمشي ماعليها الا شملول بدو ماهم مقدرٍ لها وتصلح لك .

وقام ابن سعود وارسل له قوة فيها عدد من القبائل ، احد قال انها بقيادة جلوي بن تركي آل سعود ، واحد ٍ قال بقيادة محمد الفيصل .

وعندما علموا أن آل عمّار الدواسر ، ان ابن سعود بيجيهم بقواته ، فاركبوا مستحمي (طلب فزعه) ، حوّل على آل حفيظ والشكره ، وقال :

انـّا بيجينا أمة ٍ ماعاد لنا فيهم نطحه (لاطاقة لنا بهم) ولا تخلوّنا.

قام فرحان بن حفيظ وهو وجماعته وحوّل وناوخ مع آل عمّار ، وخذوا في المناوخ حوالي شهرين والحلال معقّل ( مقيّد) .
وعندما علم فرحان بن حفيظ أن من ضمن القوات المهاجمة ابن حثلين وجماعته ، أما فلاح او ابنه راكان ، قام ابن حفيظ وارسل هذه الابيات لابن حثلين :

يالله يالمطلوب ياخير مزهوم = يامخرج ٍ نفس الفتى من وحلها
ياراكب اللي ينبه الكور مزموم = مثل السفينه علقوا في دقلها
يلفي (لابن حثلين) زبن كل مضيوم = زبن الحدور اللي هفت في نقلها
فأمّا حما لديار ذباحة الكوم = ولا شهر واقفى وعندي بدلها (1)
يذكر لنا منافعهم دايم الدوم = بسيوف هند ٍ تعجب اللي نقلها(2)


1-سبق وان قضى ابن حثلين فترة من الزمن مع آل عمار في ديرتهم ويذكره بال حفيظ بذلك وبموقفهم الطيبه معه .
2-يذكر ابن حفيظ ابن حثلين بمواقف الدواسر الطيبه مع قبيلة العجمان في عدة معارك (كالرضيمه) .


فلما وصلت القصيدة لابن حثلين ، انسحب هو والعجمان من القوة المهاجمه.


ابن سعود جاء بقوته وناوخ ، يبغي ان آل عمّار يبدؤون بالهجوم ، وأهل الديره يبغون القوات التي جاؤت هي من يبدأ بالهجوم .

المهم خذى لهم شهرين والابل معقّله واصابها الجوع وقامت الابل ترمي حيرانها وتأكل صعدها (الحوار غير مكتمل النمو) من شدة الجوع ، وقام راعي من الدواسر وفك ابله عشان ترعى من الحمض اللي قدامها .

شافت خيل ابن سعود الابل ترعى وكدّت عليها ( هجمت عليها ) وراحت بها .

ويلحقونهم واول من لحقهم خمسة خيالة من الشكره .وأعلقوا بسلاحهم واللي عقر عقيله واللي ذبح رجال ، وتلاحقت الفزاع للطرفين . وانسكرت القوة المهاجمة .وفك الله آل عمّار ووطنهم .


وبعد المعركة قال فرحان بن حفيظ هذه القصيدة مكملاً لقصيدته السابقه :

واللي مهيضني حنين أم قعصوم = بين القرايا نوّخت في سهلها
طويلة النسنوس ماهيب زرموم = يوم الهداد معربين فحلها
نوّختها يوم التقى البيع والسوم = عند آل عمّار يثوّر نفلها
ونوّختها يوم التقى كل شغموم = عند الغروس الداجية هي وأهلها
فالله على الى بدل الصلب بالقوم= هو مادرى إنها خجلة من خجلها
لهوب من قلاً ولهوب مضيوم= ولاب مثله يوم دبر فعلها
والله لولا الدين راعيه مرحوم = ماعاد يرجع من ديار ٍ نزلها

اما القصيدة الثاني فهي للشاعر من الوداعين يقال له الهذية (الشاعر الكبير مبارك بن شيبان آل ضويّان).

وكان أعمى وكان وقتها حولهم ، وبنته تقوده ، ويسألها :

علميني ويش صار على ذي الأمة اللي مناوخٍ بعضها لبعض .

فعلمته بنته بما حصل ، وعلمته بالخمسة الخيالة الشكره الذي كانوا أول من لحق الإبل .

فانشد الهذية :

قم يامقهوي قام ناعي من شناك = سو فنجال بن ٍ باعتجال
في دلال ٍ وصفها مثل النجوم = ماثناهن المقهوي بالحثال
خمسة ٍ نفلتهم ذاك النهار = يوم غدى ضرب الفشق مثل الشعّال
منهم ( وقيّان بن ريعان) = حربته خجّت طوابير الشمال
والمنافق بالخرز دزّه (ابداح) = في الشقيب وقال ذا قبر ٍ هيال
ومنهم (فرّاج ) وديع المسمنات = قال جنبوا عن در حلوات الوشال
ومنهم (حسين الجرو) رحمة المولى عليه = جعل له في الجنة الخضرا ظلال
الصبي (الزايدي) وافي الشبور = حربته ماجرّت الا بالحبال

أما البيت الذي يذكر فيه الرجل الخامس فللأسف لا أحفظه .



س : ماهي سالفة فرحان بن حفيظ مع عمّال ابن رشيد الذين يجمعون الزكاة ؟

ج : كان فرحان بن حفيظ مقيّظ مع جماعته على مشرب من مشارب (الأفلاج) ، وهو بدوي يشد وينزل .

ويوم جاء وقت الزكاة لين ذا طارفة ابن رشيد جاية ٍ تريد جمع الزكاه .
قال فرحان بن حفيظ لهم :
هاذي زكاتكم ، الحاشي ذا خذوه .

ويوم جاؤا يريدون أخذ (الحاشي) ، جاءت أخت للحاشي (بكره) أكبر منه تخطّم على اخوها (الحاشي) تريد ان تردّه .
فلحقوا اهل الابل يريدون ان يرجعوها ، فتعصّت عليهم حيث انها تريد ان ترد اخوها (الحاشي) .

فقال عمّال الزكاه للرعيان : يا اخوان حوش الزكاه قريب من هنا ، دعوا (البكره) مع اخوها (الحاشي) حتى نصل الى حوش الزكاه ، ثم ندخل (الحاشي) في الحوش ثم نغلق عليه الباب وبعدها ترجع البكره عليكم .

راحوا الرعيان وياهم ويوم وصلوا حوش الزكاه ، طمعوا ايضا في (البكره) فادخلوها مع (الحاشي) في الحوش وطردوا الرعيان وقال واحد من العمال (عبد) وهو يزجرهم :

يالله توكلوا على الله !!!!

قالوا الرعيان : يابن الحلال زكاتكم فقط هذا (الحاشي) .

قال العبد : يالله روحوا ، البكره هاذي تصلح للشيوخ ، وقام العبد وطردهم .

جاءوا الرعيان وعلموا فرحان بن حفيظ وجماعته ، وهب جماعته يريدون الفزعه ، فقال لهم فرحان :

لا لا ، لحد يفزع ، من جاء وقت مصدار ابله فليصدّر واتركوا الأمر لي .

يوم جاء حل مصدار الابل ، أخذ فرحان البشت وجعله بينه وبين بشته ، وذهب لحوش الزكاه .
وعندما وصل للحوش وجد (العبد) حاط ٍ رجل على رجل عند باب الحوش .

فهوى فرحان بن حفيظ بالسيف على راس (العبد) فقطعه . وأظهر بكرته (أم قعصوم) مع اخوها (الحاشي) وجعلهم يعارضون امهاتها .

وانشد فرحان بهذه المناسبة هذه الأبيات :

ياهجن ياعجلات حل المراحي = لا مال من في المقيّل الأظلّه
ليت الردي لامن بغى الكور طاحي = وان جاء يبي لعيوزهن قيل خلّه
ماتنقل الا من طيور الفلاحي = واللي لا من نشّف الريق بلّه
بالعلم نببوا مبعدين المناحي(1) = ذيدانهم في كل قفر ٍ تحلّه
عقب (ام قصوم ٍ) ترى الحكم باحي = تناكفوا ياهل القلوب المغلّه
يالابتي حطوا عليهم صباحي = حتى يتوب (العبد) من مسهن ٍ له
يازينها قادت عصير النواحي = تنفى الصدير وتعمل الليل كلّه
مع صلاة الصبح ليهي ضواحي = ولي ذا حنين اولادها مرزن ٍ له

1- يقصد بهذا البيت جماعته من (الهوامله الدواسر) وزوجته منهم .


س : قصص الأمير فرحان بن حفيظ كلها جميله ، هل تذكر لنا سالفة اخرى له ؟

ج : نعم، بعد الهية التي فزع فيها فرحان لآل عمّار هو وقبيلته ، راحت بهم الأنواء والنيات ، حتى جاؤا (للديره) من تحت (الأحساء) ، والبدو يسمون الديار اللي من فوق الإحساء (الديره ) .

وجلسوا هناك فترة جاذبهم الرعي ، ولم تأتيهم أخبار تشفيهم عن ديارهم بالحيا( المطر) .

وفي يوم من الأيام ارسل فرحان بن حفيظ عبده وقال :

رح هات لنا (شاة) من عند فلان .

وكان فرحان ماعنده غنم عنده ابل .

ويوم جاء نصف الليل ، أمر فرحان العبد أن يذبح الشاه ، وتعشّى مع العبد منها ، وقال للعبد بعدها :

اذهب واجلب واحدة من الجيش(الركائب) ونوّخها عند كسع البيت اهنيّا قريّب، ولحم الذبيحه دعه في صحنه وطبقه (غطّه) .

يوم أصبح الصبح قال فرحان للعبد :

حط الحطب على الضو (النار) وصوّت بالخبر (أي نادي في القوم ليأتوا) .

صوّت العبد ، فإذا الجماعة جايين : العلم يالأمير ؟ّ!!

قال فرحان بن حفيظ لهم :

العلم يسر خطّركم ، أبشروا بالحيا (المطر) على دياركم.

فقالوا له :
من اللي جايك واعلمك بالخبر ؟

قال فرحان :

جايني واحد من بني عمكم عليه (مدري) ولا نيب معلمكم به ، هاذي باقي ذبيحته ، وهذا مبرك ذلوله ، هجدني(جاءني) تالي الليل وسرى (ورحل ) .وترانا حايلين(شادين) وعلى الله متوكلين ، ديارنا مرجوعة(سايله) .


وفرحان لا يعرف ان كان فيه حياء او لا وانما هي حيلة ، وكان قد مل من الديار التي هم فيها ومتبخت ٍ بالله وآمل به الخير وانه سيسقي ديارهم .

المهم حطوا الجماعه العمود على القعود(شدوا) وجاؤوك مسندين ، وعندما أقبلوا على (الدهناء) ، قال فرحان :

اركب يافلان واركب يا فلان ، روحوا وعسوّا (التوضحية) ومسايل بطنانها ، وانظروا هل جاءها مطر ام لا.

ذهبوا العساسه ويحلفون بالله انهم عندما تبينوا مع العروق التي توالي (التوضحيه) اليا التوضحيه كنها بحر جدّه (كناية عن غزارة الماء) ، والسيل يحز في العرق من كثرة الماء .

ورجع العساسه ليبشروا قومهم وقاموا وحذفوا عليهم بالبشوت :


ابشروا بالحيااا !

والله انه من الخرج الا الافلاج وهو مايخرج بخرجه ، والخباري هاذي هي قدامكم مثل البحور .

فزانت هذه الاخبار لفرحان بن حفيظ وفرح لصدق توقعاته ، وأنشد هذه القصيدة :

يالله ياعلاّم ماكان يدرا = بأمره اليا منّه نوى الصيف طاحي
راحت به سحج الخلايا تمدرا = وغدا الوعر منها طريق سماحي
تبرا المحجّه بري يعودان مجرا= طق الدجر منها كبار اللقاحي
وراحت بنا الأنوى على الربع عزرا = واليا فقد ضاعت علينا المشاحي

وسوالف الأمير فرحان بن حفيظ ومواقفه كثيرة وطيبه .



س : هل ممكن ان تذكروا لنا من قصص الأمير سند بن فرج بن حفيظ الملقب بـ ( ختاّل الخيل الشجر ) ؟

ج : نعم ، تقارب رجال الدواسر ورجال يام في وقت الصيف في وقت (ورد الماء) ، وكان في (هجلة ماء) يريدون ان يصبحوا عليها جميعهم .

فقالوا اليامية : يا دواسر ، انا بنتوارد انا واياكم الصبح وبيجي بينا علوم ٍ ماتصلح ، انا نبغي يظهر منكم فارس ومنا فارس ، واللي يهزم فارسه يتركون الماء ولاياردونه .

قال الدواسر : من فارسكم يايام .

قالوا : فارسنا الغاوي ،( من العجمان) ، ومن فارسكم يادواسر؟

قال الدواسر : فارسنا سند بن فرج بن حفيظ .

واتفقوا ان يكون ميعاد المبارزة عند صباح اليوم التالي .وكان الجمعان متقابلان وتفصل بينهما مسافة بسيطه.

وفي الليل ، قام الفارس العجمي (الغاوي) يدرب فرسه ويرشها بالماء لتكون مستعدة لنطح المجاول في الصباح وهو يحدي على هذا البيت :

أن سبلوا لي حبة (أم سعود) = نطحة أنا منهم (سند)
والله أن أنخه نخّة المفرود = لعيون مركوز النهد


فسمعه سند بن فرج ، فأخذ يحدي على فرسه ويقول :

أن سبلوا لي حبة (أم عويش) = نطحة منهم خيل يام
علي أرد بخيلهم للجيش = لعيون مردوع الوشام


وتجاولوا الفرسان عند الصباح وحوّل سند بالفارس العجمي من فرسه ولم يقتله ، ووفوا يام بالاتفاق ونزحوا عن الماء .


وهاذي من مواقف سند بن فرج وهي كثيرة .

س : هل ممكن أن تذكرونا قصة سند بن فرج مع الإمام سعود الفيصل ؟

ج : في فترة الخلاف بين الإمام عبدالله الفيصل وأخيه سعود الفيصل ، كان سند بن فرج من قوم سعود الفيصل .

وطلب الامام سعود الفيصل من سند بن فرج بمحاولة (طرح) فارس من سبيع وهو (وبدان أبواثنين) و كان من قوم عبدالله الفيصل.

وفعلاً تناطح سند بن فرج مع الفارس السبيعي وحوّل به وجابه منيع عند سعود الفيصل وطلب عليه .

فجاء عند سعود الفيصل وقال : انا جاي ٍ لك بحصان واطلب من الله ثم منك جاهي فيه(أي العفو عن وبدان أبو اثنين) .

فقال سعود الفيصل : الله عطاك الا وبدان أبواثنين( أي أطلب ماتريد الا العفو عن ابواثنين).
قال سند بن فرج : انا ماجيتك إلا في وبدان ابو اثنين.
قال سعود الفيصل : الله عطاك اياه (اي عفا عنه واطلقه من اسره) .

وقد اعطى الامام سعود الفيصل سيفا ً لايقدر بثمن لسند بن فرج ولايزال موجودا ً عند أحفاده حتى الآن .وإعطاة كذلك الفرس المعروفه باالدهماء.

س : الكثير يسأل عن سالفة (شعب طلحا ) فما هي قصتها ؟

ج : قصتها طال عمرك ، أنه جاء احدهم عند الدامر(أحد شيوخ وعقداء قبيلة العجمان المعروفين) ، واخبره ان أباعر (إبل) المساعرة على عد ٍ ما عندها أحد وأهلها يتقيضّون عند النخيل ، وسوف أدلك عليها .وفعلا قاده عليها وجاء الدامر وربعه من آل ضاعن وأخذوا الابل من دون وادي الدواسر .

ويوم قد الدامر ظاهر ٍ مع (برك) ، ووصل الخبر للأمير محمد بن فرج بن حفيظ ان الدامر جاي ٍ بأباعر بني عمه ، فتجهز هو وقبيلته لأستردادها منه .

المهم ان الدامر عندما ظهر مع برك ورد على ماء ، وجاءه واحد من بني عمه من (آل شامر العجمان) وهو جار للشكره ، وقال له :
يالدامر يوم أن الله عطاك ابل المساعرة وهم غايبين منها ، اشرب وتوكّل على الله ، عن ذا ابن حفيظ يتعدّاه الصوت ( أي ان ابن حفيظ قريب منكم فسارعوا بالرحيل) .

فرد الدامر :
انا ماجبنا بالابل من بعيد وحنا بنعيّن من يفكها من قريّب .لكن انت ذال ٍ لا تكرمنا .
(أي تريدنا أن نشرب ونرحل حتى لا تأدي لنا واجب الضيافة) .

قال الشامري : لا والله بكرمكم ، انتوا عشرين (خبره) وأنا عندي عشرين عنز .كل خبرة ٍ بحذف عليهم راس عنز .مير ذال ٍ لافجرت بكم خيل الشكره عقب شوي ليني جار ٍ لهم من جهه وانتوا بني عمي من جهة اخرى .

المهم قام الشامري جار الشكرة وكرّم الدامر وربعه .وعارضوا الشكره الدامر وربعه عند (شعب طلحا) وهو شعب يباري (برك) .

وذبح من العجمان ثلاثين ومن الشكره واحد هو بدّاح بن فرج بن حفيظ وكان في بداية شبابه .

وعندما انكسر الدامر وكثر القتل ، تغانم الدامر نفسه وزبن على ابن ملحم الحراجين في بيته ، وقام أهل بيت ابن ملحم وطرحوا العمدان عليه ، ونطح ابن ملحم محمد بن فرج بن حفيظ وعياله اللي معه وجماعته وفريّس الشكره ، وقال ابن ملحم : تكفى يا محمد شايب ٍ زبن عند شايب .

قال محمد بن فرج : يارجال سلم من يوم دخل بيتك وهو سالم ، خلّه يظهر يسلّم .

ومنعوا الدامر ، وأما ربعه فجلُد منهم ثلاثين رجل .

ووصلوا الدامر فرسان من الشكره عدّوه حدود الدواسر حتى أوصلوه لأهله .


وبعد الهية ، تذكر الأمير محمد بن فرج بن حفيظ (الشامري) واكرامه لبني عمه وهو جار لهم ، فأنشد الأبيات التالية :

الشامري عقب الكرامة تعرّا = كني بما يجري على العير داري
دمحت أنا له زلتين ٍ تمرّا = والثالثة قد هو بغوجه يماري
طعنتهم طعن ٍ كله لعينك يسراّ= كله لعينا لابسات الخزاري
ولا لعينا بكرتين ٍ تجرّا = حنينها غب الصلف والمساري


ومن القصائد التي قيلت في هذه الهية قصيدة لشاعر من الشكره يقول :


هيضني الدامر مقدي جردة = يزفى (صخاف الشول) من مصدارها
ثم التقوهم لابتي في (طلحا) = ربع تعفي مدنها وأمدارها
يوم التقوهم لابتي ما سندّوا = واللي يعز القوم فعل اكبارها
منهم (ثلاثين) ومنا (واحد) = وان الله اللي ممضي ٍ اقدارها
ثم سال (مخضارٍ) بسيل أدميهم = من وقع ربعي مرخصة عمارها

وقال شاعر أخر من الشكره قصيدة منها :


ياهيه يالصبيان اللي تدوفون الملاح = حذرته الأول وكبوا كدار احثالها
ما بعد خبر المداري تلذذ واستراح = كون من هو للحرايب يشب اشعالها
خلي (الدامر) عليه العمد والبيت طاح = و(شعب طلحا) من الزنايج عذت نزّالها
في نحانا يشبع الطير خفاق الجناح = وتشبع العرجا ويبقى عشا ً لعيالها


س : هل تذكروا لنا بالتفصيل قصة الأمير محمد بن حفيظ وسالفة (الست ركايب) ؟

ج : نعم ، في سنة من السنين في وقت (القيظ) ، قال الأمير محمد بن فرج لجماعته :

يا جماعة حنا بنروح (غوّارة ) (نوّاره) ، ولا يذهب معي إلا راعي ذلول ٍ طيبة ٍ سمينة ٍ وناطحة ٍ للمغزى ، فالوقت حار ويتعب الركائب ويتطلب ذلك الناقة السمينة .

يوم ثوّر للممشى فإذا بعددهم جميعا ً خمس ركايب فقط ، ويوم قدهم بيمشون لين حولهم على عد الماء الذي هم عليه ابن عم لهم من قبيلة آل بريك الدواسر ،وعارضهم البريكي يريد الذهاب معهم .
فلحقت ابنة البريكي بأبيها وقالت : يا ابوي ذلولك ليست كجيشهم ، ذلولك عليها موخل والرجاجيل ذولا جيشهم ناطحه .
قال البريكي : بروح وبيستر الله ولا بيتاقي من دونا الله ثم حظ ابن حفيظ .

وفعلا ذهبوا وخذوا لهم ابل لآل روق من قحطان وأقفوا عليها ، ويوم اقفوا عليها ، فيلحقهم عندها ثلاثين خيّال ، ويوم لحقوا أهل الخيل ، قال ابن حفيظ لخوياه :
يالربع الخيل لحقت بأهلها ، وأنّا قدامنا هذا الدرب واذا وصلناه نوخنّا جيشنا لنرميهم كون الله يمنعنا غثاهم .

ويوم اقبلوا على الدرب وكان فيه مثل المضيق ، نوخوا ركايبهم واستعدوا للرماية ، ويوم قد الهيج بيلحق اهل الخيل ، فثورّا عليهم ويطيح من اهل الخيل ثمان من الخيل والرجاجيل أصاويب .
ولين ابن حفيظ وربعه ذابين مع الدرب ، وتقوم بكرة خويهم البريكي اللي مهيب سمين وتطيح في الدرب الضيق ، ويتحاضنونها ويلحقونها رفايقها .

وبهذه المناسبة يلعب ابن حفيظ :

عند الضحى بادي ٍ روس المراقيب = هني من طاب حظه واستراحي
يابندقي جارك الله من التسابيب= ياللي تسوقون مشخول الملاحي
لحقوا هل البل (ثلاثين) تقاطيب = (آلاد روق) مروية الرماحي
في الهيج الأول (ثمان) من الأصاويب= والضيق غدى لنا طرق ٍ سماحي
عقرت صفرا ً محمسة العراقيب = كله لعيناك يازين الصباحي
كله لعينا البريكي في المواجيب = لا قصرت بكرته ماله مراحي
حنا اهل الست ياوالله التعاجيب = كن الركايب بنا رتع ٍ ضواحي
بـ(لاد شكر) مروية المغاليب = مانبتع الا بصبيان الفلاحي

س : ماهي قصة الأمير سند بن محمد بن فرج بن حفيظ عندما عقر ثلاث من الخيل بطلقة واحده ؟

ج : كان الشكره واللي معهم من قبائلهم من الدواسر ، في أسفل (هريسان) ، وجاءهم خبر ان قوم ٍ سوف يغزونهم من (حدرى) من يام .فقام سند بن محمد بن حفيظ وكان في بداية شبابه وابوه محمد بن فرج قد هو كبير في السن .
وقال سند بن حفيظ : انـّا ياجماعة ، بنكمي(نتصدى) للقوم اللي صدنا خبرهم ونكمي لهم من دون الدبش والعرب .
قالوا وركبوا لهم على خيل وعلى جيش وجو من تحت العرب ومن تحت الدبش .

ويوم ناوخوا ، قال سند بن حفيظ لاثنين او ثلاثة من ربعه :
روحوا لـ (البرقة) ذي واسبروا من وراها وشوفوا يمكن تشوفون شوف ولا شي .

راحوا السبور ، وتباطئهم سند فركب فرسه ولحقهم ويوم لحقهم ، قضّب (جعل) فرسه بيد واحد منهم ، وذب سند بنفسه مع البرقه المرتفعه ، حتى يرى ماوراءها لعله يرى الاعداء .وكان مع سند بندق (كريزيه) ماخوذة ٍ من واحد من آل حثلين العجمان من خالد بن حثلين .

ويوم ذب (ارتقى) البرقة ولين ذا فرس معترضه أمامه فجأه ، فثور عليها ويوم طاحت لينها ثلاثة أفراس .

أثرهن ثلاث من الخيل عليها ثلاث سبور من الاعداء جاؤوا وذبوا البرقة من الجهة الاخرى ، ويوم ذبوا البرقة قبّضوا (اعطوا) ارسان خيلهم لواحد منهم والاثنين الاخرين ذهبوا يتجسسون ويتشوّفون .ويوم تبيّن سند بن حفيظ فاذا الفرس قدامه ويوم ضربها بالبندق لينها طايحات ثلاث بمخباط واحد (بطلقة واحده) .

المهم تشابكوا مع القوم ويعقرون فرس رابعه لهم ، وياسرونهم ويذبح من القوم واحد من كبارهم .

فأنشد شاعر من الجماعه هو محمد الهريش من آل تركي الشكره :

نافدى اللي ذببوا خيلهم مع كل ريع = خيلهم من خيلنا يستزيد اجفالها
(أربع ٍ) من شيخنا في اللقاء طاح(ن) جميع= كل منهم ماتعوّق يكون احبالها
و(ابن محنان) لعب فوقه الطير المجيع = خليّت منارته يهجرن دلالها
و(المرضف) جعل ربي يجينا ابه سريع = تسحبه سحم الضرايا عشا ً لعيالها


وانشد الأمير محمد بن فرج بن حفيظ هذه الأبيات في ابنه سند بعد موقفه هذا :

اسمه( سند) وان الله اللي مسميه =اسمه (سند) ومسند ٍ كل عايل
مخباط ( سند) يوم ربي مقديه = عقر ثلاث ٍ مكرمات ٍ أصايل
ماقومه الا عوده اللي مربيه = ومعلمه وشلون ضرب الفصايل
ماني على هد الجماعه مضريه = ابغيه في يوم يشيب الهوايل

س : اشتهر آل حفيظ بحبهم وولعهم بالخيل ، من اكثر من احبها منهم ؟

ج : كلهم يحبون الخيل ، واكثر من يحبها وينشد فيها محمد بن فرج بن حفيظ ولهم فيها نشيد واجد .

س : ماهي انواع خيل ال حفيظ ؟

ج : خيلهم هي الربد والدهم .
الدهم مربط لآل سند بن فرج .( هدية من الامام سعود الفيصل)
والربد : مربط لمحمد بن فرج وباقي آل حفيظ


س :هل بقى من مرابط هذه الخيل شيء ؟

ج : لا ، الحمدالله حنا الحين تحت راية الإسلام ، وبدل الخيل الدبابات والمدافع والله يعز الإسلام والمسلمين .


س : هل تسمعونا شيء من قصائد محمد بن فرج بن حفيظ في الخيل ؟

ج : قصائده كثيرة ، في مرة ٍ من المرات في صارت هية بينه وبين قوم ٍ من (السهول) ومن معهم من (سبيع) .

ولين حصانه (ربدان) مازال صغير ومعجبه مراكيضه ومعجبته أموره .

ويوم حصلت الهية عقر حصانه (ربدان) ، وقام محمد بن شايع بن فرج (الدحّام ويلقب بالدحّام لأنه يداحم الجموع) وعبدالله بن سند بن فرج ، وكل منهم ذبح له رجال وقلع له (كسب) فرس :

اركب ياعم!! اركب ياعم!!

وحصان محمد معقور .

وكان بينهم وبين السهول صلح محد يغير على أحد ، لكن السهول ماألتزموا بالصلح وغاروا ،

المهم ان نتيجة الهية ذبح رجالين من القوم المغيره ، وكسبوا الشكره فرسين .

وبعدها رجع محمد بن حفيظ الفرسين على السهول (بسبب الصلح الذي بينهم) وقال للسهول ان يعوضوه في حصانه المعقور (ربدان) .

تأخر السهول ، وتأخر العلم على محمد بن فرج بن حفيظ فأنشد :

طرشت انا صوب (الرصيعي) مطيّه= وابي اتنبّا ويش علمه وطاريه(1)
أحب (ربدان) يوم غذيّه = مزين ٍ طبعه وربي مسويه
راسه كما وصف العلق في يديّه = وذيله يرادفني اليا صرت محميه
ويصبر على الدخّان في كل هيّه = وصبره على الدخّان من صبر راعيه
ويانفدى اللي حط عنده ضحيّه = غمر ٍ شجاع ٍ ماتوني نعاويه (2)

1 : الرصيعي : كبير السهول .
2- يقصد محمد بن شايع وعبدالله بن سند عندما قتلوا رجلين وكسبوا فرسين عوضا في فرسه .


أما قصيده في خيله الأخرى ، فيقول في فرسه (ربداء) بعد هية صارت بينه وبين قحطان ، حيث غار عليهم وأخذ له ابل ، وعارضهم عندها ثلاثة سلفان وفكوا ابلهم ، كل ماظهروا من سلف ، عارضهم السلف الثاني ، وكانوا في طراد من ظهور الشمس الين جاء عقب العصر المهم افتك ابن حفيظ وربعه على جيشهم وراحوا .

ويوم الفوا على أهلهم ولين مع ابن حفيظ قوم ٍ من (آل مره) وقيل انهم على راس واحد ٍ من آل شريم .
ويوم نطح المري ولده يبغي يسلّم عليه :

مرحبا ً يابه ّ!! ( أي مرحبا يا أبي )

رد ابوه :

لا لا ياولدي ، والله ماتسلم عليّ لين تسلم على( محمد بن فرج) اللي كل ماضيّق علينا مايفرج لنا الا الله ثم هو .

سمع كلمة المري أحد الدواسر فقال :

لا اله الا الله ، حظوظ ٍ من الله والا مافعل ابن حفيظ اكثر مما فعلنا .

سمعه محمد بن فرج بن حفيظ ولم يرد عليه .

وبعد مرور سنة ، واذا (ربداء) على أحسن غاية ، فقال محمد بن حفيظ :

ربدا تشعشع كما بالوصف شيهاني = على العلف مع صلاة الصبح ندعيها
يامرحبا عد حصما العرق لاباني = ترحيبة ٍ يا جوادي ويش يحصيها
ألها الجلاده تنازا فوق الأجماني = يوم الردي جواده زاهد ٍ فيها
يحلب لها من حجر حلوات الألباني= والفرد من ضدها بان الخلل فيها
يشرى لها القت والصفري بالأثماني = ويدوّر للي غالي ٍ بقويها
ويقطع لها الصانع البيطار حذياني = أربع وطي ٍ بصير ٍاللي مسويها
مهيب تغدى لنهار العيد حبّاني = والا لاجاء عرضة ٍ ليهو يورّيها
أبي لمن تفرشي الجو دخاني = وكلاً نسى عزوته ماعاد يطريها
ليهي تصالى بشلفا وقعها باني = بأمر الولي دايم ربي مقدّيها
يوم (ابن قطنه) بسو الموت ينحاني = شلفاي من فطحته روية ضواميها
وانا وديع لراعي البكرة الواني = لعاد هداد في المجلس يخلّيها
وحنا شيوخ العرب اللي شانهم شاني = وحنا هل الراية العليا ونبنيها
هل فرسة ٍ من عصر (ابن بدراني) = من ركب منا يوسع في مناحيها
وانشد هل الخيل عن صفرا (عظيماني)= شلفاً وديع ونا بالكف مهديها
نافي بحق القصير وواجب العاني = وسلوم المراجل نعبّرها ونعطيها
فاللي لا جاء الفهاني ضاق وازراني = والخيل في نجد تبغي من يناحيها


ويقول ايضا :

ربدا كما شاهنت يوم هبّاب = تصفق وتصفح في علاوي الفروقي
شبتهتنا سبيبها يوم للداب = شختور صيف ٍ في مخال ٍ حقوقي
فاما عليها طارف النشر وأشراب= ولا توردنا حلاة العروقي
مانيب منهو منزله وسط الأجناب = يتبع قصيره غادي ٍ له سلوقي
مع بني عمي هل الدين وكتاب = ومن ضاق منا نحمسه بالحقوقي


وقال أيضا في حصان له آخر اسمه (ربدان) :

ياغوج يازين الحلا والتواصيف = ياللي ذراعه كل ما اقبل طفوحي
أعطيه من لبن العرّاب المصاخيف=وأعطيه ذخر البيت واضد روحي(1)
ابغي لمن دبروهن هل الكيف =نكسب عليه من الثناء والمدوحي
وأبغيه يبرى للبكار المشاعيف = لاقام برّاق الوسامي يلوحي
لعيون من خدّه كما بارق الصيف = اللي من الحجّار عيّت طموحي



1- العرّاب : المقصود الإبل .

س : ماهي سالفة قصيدة محمد بن حفيظ في أخيه( بدّاح) ؟

ج : طال عمرك ، غزى آل حفيظ وجماعتهم في ناحية وغزى محمد بن فرج بن حفيظ في ناحية اخرى وترك ابله عندها فقط عبد وفيها ستين ناقة وذهب للمغزى .
المهم غزى على قوم وخذى أباعرهم ولحقوهم أهل الإبل وجاء بينهم طرّاد وفكّوا اهل الابل حلالهم ، وعوّد محمد بن حفيظ ويوم عود على اهله وعود على ابله ولين العبد مذبوح وإبله مأخوذه .

ولين آل حفيظ والشكره في ناحية اخرى وسمعوا بالخبر وجاءوا بالسلفان وبالخيل وجاءوا ناصين الأمير محمد بن فرج بن حفيظ ، واللي جاب فرس واللي جاب ابل :

أبشر بالعوض !! أبشر بالعوض !!

فقال الأمير محمد بن فرج بن حفيظ :

ياجماعة ، وفيتوا ولا هفيتوا وعلومكم كلها طيبه ، وانا باخذ بس فرس أخوي بدّاح ، والباقي كلن يرد حلاله صوب محله ، مراحنا اليوم خالي والصبح ان شاء الله بيمتلي .

وانشد هذه القصيدة :

حي الرجّال وحي من قال حيّيت = حي الرجال اللي طرّي ٍ نباها
(بدّاح) في عطى الأصايل تعدّيت = صفرا ً ولا قبلك كريم ٍ عطاها
بنت الحصان اللي قديمٍ على بيت = عساني اعطي من ظهرها جزاها
لاشفت انا صفرا ً من الخيل فزيّت = وكلن يفز لحاجته لا لقاها
يالربع هـاذي غايتـي لاتمنيـت=ربدا هوى نفسي وغايـة مناهـا
لاصاح صيّاح الضحى ثم تعليت =(ربدا) على الموت الحمر سقتناها
وان جيتنا عنـد المعقـل تثنيـت=مع لابة ماهـو بيسهـج حماهـا
انطح بهم وجـه العـدا ماتتقيـت=ابني بيوت الحرب وانطح شباهـا


س : تداولت البعض مؤخرا ً قصة أن الأمير سند بن محمد بن فرج بن حفيظ قُتل على يد يام، فهل هذا صحيح؟

ج : الذي ذُبح على يد يام مهوب الأمير سند بن محمد بن فرج ، وانما اللي ذبح على يد يام (سند بن فرج بن حفيظ ) وكان في في (الجوب) جوب الدهناء اللي شمال ٍ من خريص حيث وقعة معركة بين يام والدواسر بعد أن قتل الدواسر المرضّف شيخ آل مره . وحصلت معركة وذُبح من المشاهير هذاك اليوم سند بن فرج من الدواسر وذبح من يام (ابن الدعيّه) .

اما سند بن محمد بن حفيظ ، فالذي قتله هو ابن الرومي من قوم ابن عقيّل من الدعاجين عتيبه .وذبحوا الشكره ناصر ابن عقيّل العقيد في ساعتها .

ذُبح سند بن محمد بن حفيظ من الشكره وذُبح ناصر بن ابن عقيّل الدعاجين في وقتها ، وهذا على بداية حكم الملك عبدالعزيز بن عبدالرحمن .

وقصتهم أنهم جميعهم غزوا ذولا قوم وذلا قوم ، وتواجهوا وتنابوا بينهم بالكلام ، وقالوا : مالكم فينا لحام ولا لنا فيكم لحام وكل ٍ يروح في فاله .

قام واحد من الدعاجين وكان أول مغزى له وغلام توه ظاهر ، ولاحظ الرجال (سند) اللي مشهر ٍ على الذلول الزينه ولبسه زين ، ووده يتفوّه بذا الرجال الشّهر ، وثور عليه فجأه وبدون سابق انذار وثوّر عليه بالبندق لينه ذابح سند .

فيقوم واحد من الشكره اسمه( مرضي بن خليّان من آل موسى الشكره ) في نفس اللحظة ويثوّر على ناصر بن عقيّل الدعاجين لينه فاقع ٍ راسه .

وليـن ذا نـد ٍ لـذا .

س : يسأل البعض عن صلة القرابة بالضبط بين آل مهنّا الشكره في العيون واسرة آل حفيظ ؟

ج : نعم ، آل مهنّا الذين في العيون منّا و هم مارثة محمد بن جمعان من الطلاحبة ، والطلاحبة اربع فخوذ ، وهم :
آل حفيظ ، وآل تركي ، آل فرج بن طلحاب ،و آل مهنّا .أربع فخوذ ٍ كلها ترجع في (طلحاب) .

وآل مهنّا عيال محمد بن جمعان الطلاحبه .واسم (مهنّا) منتحلينه من ربع ٍ تجاوروا هم واياهم في (العيون ) ، وذولاك من زعب أو من بني هاجر . وإلا فهم ينقال لهم آل محمد بن جمعان .

س : هل يتواجد احد الأن من قبيلة الشكره في (وادي الدواسر) ؟

ج : نعم فيه ولاهم واجد ، فيه حمايل من (الحنابجة) ، والحنابجة فخذ كبير من الشكره .

س : متى نزح الشكره من وادي الدواسر ؟

ج : ظهر الشكره من الوادي يوم جاؤهم قوم ٍ من (جميلة) يستفزعون بهم على بني عم ٍ لهم بينهم وبينهم حرب ، وكسروهم اقبلاهم وجاؤرا مستفزعين بآل زايد في الوادي .ذاك الحين الأفلاج مابعد فيه أحد من رجال آل زايد .

ويوم جوهم جميلة في الوادي ، قالوا آل زايد :

ياجميله ، انتوا جيتونا تبون منّا الفزعه ، وحنا بنفزع لكم لكن القوم اللي وراكم حنا أكثر منهم عدد وبعضنا بيكفي عن بعض وانّا بيجيكم من كل قبيلة فارس ورمحه معه واختاروا الرمح اللي تبون حمياته وفزعته .
ويجيهم من كل قبيلة من الدواسر خيّال على فرس ورمحه معه .
واختاروا جميله رمح آل حسن بن صهيب بن زايد .

فقالوا آل زايد :

خلاص يا آل حسن انتوا المعنيين بهم .

ويركبون الشكره وآل عمّار والفرجان ويجونك مشملين ويحولون على خصوم القوم الذي طلبوا منه النجده ، ويظهرونهم من الأفاليج ويروحون وبعضهم بالكويت، وينزلون الشكره في الأفلاج وماقعد في وادي الدواسر الا الحنابجة .وآل عمّار نزلوا في سيوح الأفلاج ، والفرجان في قرايا من الأفلاج وبدو .

هذا اللي قضبنا من علوم الرواه .



س : تعرف سالفة البيت ( هم الذروة العليا سنام آل زايد ) ؟

ج : هذي القصيدة طال عمرك راعيها عجمي ، كان عزبيٍ (ضيف) لثاري ، وثاري من آل بوعلي من الشكره ، وفي البديع أو في السليل ، ويوم دارت السنة ، ويسلم العجمي على ثاري ويوادعه ويرحل ، ويوم راح ويوم قده عند عربانه شمال ، فخلف له بنشيده :

ياراكب يا مترحلين ٍ قلايص = اخذوا معكم يا منجبين سلام
سلام احلى من در شمّخ الذرى = واخن وانود من عنابير شام
وألفوا على الأفلاج فانها ديرة = ديرة كرام وللهاشلين اكرام
ترى (ثاري) الأدنى اليا نوّس القرى= مضيّف ضيفان الشمال ويام
ولا قضيتوا فاقلطوا عند (دهمي) = راعي زلفات ٍ فوقهن ايدام
وترى (فايز بن عويمر) مزبن مجرم = لاصار من ضيم الزمان يضام
من (لاد شكر) مركز الجود والندى = لاجاء الصيف نوّه عجة ٍ واكدام
رسى جدهم في الجود مثل مارسى = مبدا ً طويل ٍ قاعتيه احثام
هم الذرة العليا سنام آل زايد = مدح ٍ قديم ليس فيه أوهام


ثاري ، دهمي ، فايز وعويمر : من الشكره

هذه قصيدة العجمي يثني بها بسبب مالقاه من علم جميل من ثاري .


س : حصلت مواقف مهمة بين الأمير سند بن محمد بن فرج بن حفيظ والملك الموّحد عبدالعزيز بن عبدالرحمن هل تذكروا لنا بعضها ؟

ج : من ضمن مواقف الأمير سند بن محمد بن فرج بن حفيظ .

ان به قافلة للدواسر ظاهرة من (الإحساء) ، وجاء قوم من عتيبه واخذوها ، ويوم صار بعدها بفترة ، وتمر قافلة لعتيبه ويعارضها سند بن حفيظ والجماعه وياخذوها .
فلما علم عبدالعزيز بن عبدالرحمن آل سعود ،وصلى ان يأتي سند وكان هذا في بداية حكمه وفي عهد أبيه الإمام عبدالرحمن الفيصل .

وعندما جاء سند ، قال له عبدالعزيز :

من شق بالإسلام يا ابن حفيظ (يقصد قافلة عتيبه التي اخذها سند وجماعته) .؟

فرد سند :

ياطويل العمر ، فكك لنا من عتيبه اللي خذونا ، وفكوا منّا .وحطونا في حكم واحد .

فقال عبدالعزيز :

انا داري انك منتب مخطئ لكن الإمام مهوب راضي ٍ عليك .وانا بوقفك قطعة أيام عشان خاطر الإمام ( الإمام أبوه عبدالرحمن الفيصل) .

وراح عبدالعزيز ووقفوا سند بن حفيظ في السجن ، ويوم أخذ له عشرين يوم ، واذا به يستغرب انهم لم يخرجوه حسب ما قاله عبدالعزيز .

ويمر السجّان من أمام سند وقال له سند :

ياولد عبدالعزيز وينهوا ؟ّ

فرد السجّان :

عبدالعزيز مهوب يمّك ، راح قنّاص ٍ صوب الشمال .

عندها عرف (سند) ان الأمر سوف يطول به بالسجن .ونوى بالهروب منه .

وقام (سند) وأخذ رشا (حبل) الدلو التي تنزل في بئر السجن ، وأخذ الرشا ، وانزلها الرشا مع نافذة السطح من فوق ، ويوم وقف الرشا واذا به لم يصل الا الأرض وبقي مسافة بسيطه تفصل الرشا عن الأرض .

واذا المصمك من وراه حفر ، وكانت أرجل( سند) مقيّده بالحديد ، ويقوم سند ويرفع الحديد الذي في رجليه حتى بطنه ويربطه ، ونزل (سند) مع الرشا( الحبل) ، وعندما شارف على الوصول الى نهاية الحبل وكانت الأرض لاتزال بينه وبينها مسافة ، فقام سند ورمح الجدار برجله واذا الجدار طايح جزء منه ويسد الحفره ،واذا الله فاك ٍ له من هذه الحفر .

ويحط له الله مخرج ، ويظهر مع الدروازه (البوابة) الحدرية من الدراويز ، ويسري لين جاء الى (البطحاء) ، ووجد امرأه عندها مخايط ، ويفك الحديد اللي مقيد به ، وواصل مسيره على رجليه .

ويوم وصل السّليْ (أحد احياء الرياض حالياً) وكان في الليل ، واذا به يشاهد الضو (النار) أمامه ، ويوم اقبل على الضو ولين اهنا ذلولٍ باركه ، وقربتها مليانه وشدادها عليها ووالمه للسفر مافيها الا عقال .ولين ذا راعيها قدامها مستغرقٌ في نومه .

فقال سند بن حفيظ في نفسه :

اللي فكني من (المصمك) وفكني من الدراويز وفكني من الرياض ، بيكفني ان شاء الله مع باقي طرقتي .ولا أفجع راعي ذا المطية في مطيته
( أي لا اسرق مطية هذا الرجل ابدا ً فالله الذي انقذني من السجن كفيلُ بأن يسهل باقي طريقي) .

فقام سند وشرب من قربة الماء ، واكمل دربه ، ولم ياخذ شيئا من الرجل النائم .

وفعلا ً سهل الله له أموره حتى وصل لجماعته ، وكان جماعته مع (برك ) يبغون يسندون ل(الأحمر) ولـ (الدّحي) ، وكان اخوه (عجب) قد جمّع من الشكره خيل وابل يريد ان يتوجه بها لعبدالعزيز ليهدوها عليه ويتشفعون لإطلاق سند من السجن .

ويوم خذوا لهم شوي واذا زوجة سند تقول :

ياعجب :

قال عجب بن حفيظ :

نعم .

قالت : ابشروا بسند .

قال عجب بن حفيظ :

ويش العلم ؟

قالت :

اهنا رجال ٍ يغني جايكم مع أسفل ذا الباطن من حدرى ، والله ان يموت ماعاد تشوفون سند .
(سمعت صوت زوجها سند وعرفته) .

ويوم جاءوا اذا هذا سند .

فقال سند لهم :
ياجماعة ، تراني قوم ٍ على ابن سعود (أي عدو له ) ، وانا بحدر لـ(قطر) وابن ثاني ، اللي بيخاويني حياه الله ، واللي بيقعد في بيضة الإسلام بصره .

وقال سند هذه القصيده بعد خروجه من السجن :

يالله ياللي تجعل الصبح ينـطار = ياخير ٍ ماغيرك احد ٍ شفاني
لابار (ابوتركي) فلانيب بوّار = ويالله لا ترضى علي بالهواني
لانيب زرّاع ولانيب بـقّار = ولا نيب فلاّح اسو ق السواني
لامن ركبنا فوق زينات الاكوار = ياويل من نطلب عليه الوحاني
ولامن ركبنا فوق قحصات الأمهار = نقصر حبال اللي له اليوم داني
مير عديتني جعل تعداك الأشرار = عديتني يالنادر الصيرماني
وعديتني ... = ماشفت عقب (الجريباء) مكاني

الجريباء : مركز لمدفع ابن رشيد في (الدلم) ، وكان سند هو اللي قتل المدافعي وكسر المدفع .وانكسر ابن رشيد ، ويذكر سند عبدالعزيز بفعله بالجريباء وموقفه معه .


بعد وصول سند لجماعته ، أخذوا لهم أيام والعلوم تروح وتجي ، المقصد انهم عزموا على الرحيل مع سند ، وحدروا ، ويوم قدهم من تحت(الإحساء) واذا بالخطوط تلحقهم (مراسلين الملك عبدالعزيز الذي ينقولون الرسائل) .

والملك عبدالعزيز الله يرحمه سياسته محنكه ، فكان لسند بن محمد بن حفيظ ، ابن عم له ينقال له عبدالله بن سند ومعروف وعلمه طيب وكان معهم ،وعبدالعزيز موجه لعبدالله بن سند بن حفيظ الخطاب ويقول فيه :

(من عبدالعزيز بن عبدالرحمن الى عبدالله بن سند بن حفيظ ، لا يأخذكم ذا القيماني في جرايره ، هذا قيماني ٍ مرتد ٍ عن الإسلام ، وانت اقعد وتراك أمير الشكره ) .

ويوم جاء الخط لعبدالله بن سند وقرأه ، ويوم احتار عبدالله ، فقال له ابن عمه الأمير سند بن محمد بن حفيظ :

يا عبدالله من كلى(أكل) صاحبي تعشاني ، لا تقعد سق عصانا والعلم اللي تبغي مهوب حاصل ، معنا؟

قال عبدالله بن سند: قال أي والله معكم .وحدروا كلهم .

ويوم قدهم من تحت الاحساء وصار لهم سنتين ، فإذا بعبدالعزيز يرسل لهم الخطوط .


( يا ابن حفيظ وعوّد ، ظالم وتجي سالم ، وعليك الله وعهد الله) .

رجع سند وجماعته ويوم قدهم مع (مثناة الدهناء) ، بيحطون (الرياض) على يسراهم يبغون يسندون ، وابن سعود بيجونه ، قال بعض الشكره لسند :

ياسند ، لا تسـنّد ، فسنعارض عربان بينا وبينهم مطالب رجاجيل وتعارضنا قيمان(خيل) وسيأخذونا .خلنّا نعوّد من يسار صوب بني عمنا .

فرد سند :

والله ان أسنّد والعدو مهان = من بين اصاحيب وقوم
كله لعينا الفاطر المسمان = اللي على الرص الدحوم

راح سند وجماعته بهدايهم لابن سعود وقبلها وعفى عنهم ، وسندّوا ، ويوم قدهم مع مثناة العارض ، ولين معهم واحد من آل دمنان من يام مع ابل ٍ واجد وجار ٍ لصويّان من الشكره .

ويوم خذوا مع المغرب ولين ثلاثة رجاجيل من احدى القبائل كل منهم يشاور الثاني في أخذ ابل الدمناني ، ولين مع الدمناني بندق صمعا كريزيه ، وثوّر عليهم لينه ذابح ٍ منهم اثنين ، والثالث سلم .

وضف ابله وحول على على جاره صويّان الشكري وقال :

يا صويّان ، الجبل ذا بياكلني وبياكل ابلي ، ابلي واجد وبياكلها ، حدرني لين تعديني الخرج ووجهك أبيض .

الجماعة اكملوا طريقهم ، أما صويّان فجاء مع جاره ويوم قده عند (فرزان) بالخرج ، واذا هنا عرب من عربانا ،ويغيرون على ابل الدمناني وياخذونها .

فقال صويان الشكري :

يابني عمي يا صهبه ، لا تاخذون ابل جاري .

قالوا :

ماعندك جار

وطقوه وبغوا يفقعون راسه .واخذوا الابل ، ويقوم الدمناني ويعقر اثنين من الخيل اللي غارت على الابل ، ويشيل جاره الشكره على ذيك الذلول ويروحون صوب جماعتهم سند واللي معه .

ويوم وصلوا لهم ، قال سند :

ويش العلم ؟

قالوا :

العلم هذا اللي حصل .

قال سند :
سلّه سلّه ،

قال ابوه الشايب الكبير محمد بن فرج بن حفيظ :

مالك لوى ، مهيب سلّه ، الا العمود على القعود ، والظعن والسلف .

ويحدرون عليهم مع (نساح )، ويجون عربانهم اللذي خذوا ابل الدمناني ويفكونها كلها .

وقالوا : رح بابلك يادمناني .


س :هل تتحدث عن الامير عجب بن محمد بن فرج بن حفيظ؟

ج: تولى الاماره بعد أخيه سند بن محمد بن فرج بن حفيظ ، فكان أمير الشكره في زمن الملك عبدالعزيز بن عبدالرحمن, وشارك في توحيد الجزيزه العربيه, وكان حاملا للواء (مشيرفه) في فتح مكه زعيماً للشكره وأحد الابطال المقدمين عند الملك عبدالعزيز يرحمه الله ، وأصابت الحمى الامير عجب بن محمد بن فرج في فتح مكه وتوفي فيها ، وكان رحمه الله مضرب المثل في شجاعته ، وقد كان ممدوحا من الشعراء ومن ذلك قول احد الشعراء فيه.

عيّا علي الهجن( أبوساره)= يوم الردي طارت اعيونه
الحرب لا شبت أقطار= اشيوخنا اللي يصالونه

ومن ذلك قول ابن الجعاثنه:

تلفي على (عجب) صبي التجاريب= تثني جواده في نهار المثاري
هل سربة تركض على الموت لا هيب= طريحهم داجت عليه الضواري

والامير عجب مع هذا كله فارس ومقدام ومن القلائل الذين يجدون اصابة الهدف بدقه متناهيه " بواردي " وهو ايضا شارع مجيد رحمه الله وغفر له.

س : هل تحكي لنا احدى مواقف الأمير عامر بن محمد بن فرج بن حفيظ ؟

ج : عامر هو أخ سند وعجب أبناء محمد بن فرج بن حفيظ وهو أصغر منهم ، وكان مع اخوانه يوم وقت اخوانه ، ويوم حصل حرب اليهود على فلسطين ، وتروح قوة من المملكة العربية السعودية لفلسطين ، ورئيس الشكره واللي في ضفهم عامر بن محمد بن فرج الله يرحمه .وعلومه كلها طيبه في الإصلاح وفي الراي الأعلى لين الله توفاه رحمة الله .

س: بلدة المثناه في الأفلاج تتبع لأي آل حفيظ ؟

ج : هي لآل سند بن فرج بن حفيظ ، ولهم مركز فيها .


س : هل تذكر لنا ماتعرف عن وقعة (العراص) أو (العريق) الشهيرة ؟

ج : العراص سبق ودوّنت ، والكلام فيها كثير والوصف فيها كثير والوهيلة فيا واجد والزبدة انه قام واحد من آل نصار أمراء الغييثات خواله الأعزه من سبيع ، وجاله عندهم بعض اللزوم ، والله مدري ويش صار من بعض الخلافات من السبعان بينهم وقاموا عليه وذبوحه على ذلول وروك خاله السبيعي .

وعقب طلب منهم الأمير وقيان بن نصّار المخاليص ، وواعدوه ولا وفوا في وعدهم ، واستحمى ابن نصّار ببني عمه، واستحموا بني عمه ، الشكره والفرجان وآل عمار والحراجين وطبعا ربعه الغييثات واللي حضر من الدواسر .

ويوم شافوا السبعان ان الدعوة بتكبر ، قالوا تدرون يادواسر للحقان (الجلوس للحق والتحاكم)، ولا يحصل مواجهه .

ويوم قد الدواسر على (التنظم) عند الجلالية ، واردين الدواسر يشربون على ان الدعوى محاكم حقّان وحق ، واثر السبعان ناوين بهم بمبغاته وهجوم .

ولاخذوا الى السبعان ظاهرين عليهم بالبيارق والمزينات ، وبيوت آل حفيظ قد بنيت ، واللي غيرهم بعضهم اللي بنى واللي مقبل واللي مابعد بنى .

ويتواقعون هم واياهم ، ويكسرون سبيع الدواسر ويقفون بهم ويوم قد الدواسر مقبلين على حلّتهم التي بُنيت ، قام سند بن حفيظ وعقل رجله ويزهم حياة سند الله يرحمه :

يا لاد صـهيب ، يا آلاد حـسن ، يا آلاد شكر ، يا لاد عـلي مخصوصة .

ويثنون عليه من فريس الجماعه والغييثات والدواسر ويتحامون حوله ، وأول بندق ثارت من بندق الأمير عجب بن محمد بن فرج بن حفيظ ويطيح منها بسّام السبيعي وكان يقود بالمزيّن ، ويكسرون السبعان ، والوقعة معروفه ويشهد عليها نشيدها وتفاصيلها كثيرة ولكن هذا مختصرها .

منها قصيدة محمد بن كليب الشكره منها :
يا مخال من المنشي سب حلّه = هل وبله على (التنظم) سبهاني
السبيعي غدى في زمته اغثا ً له = قومه يومه سروق ٍ بايق العاني
جمعنا ينطح الجمعين شرع ٍ له = قومنا في اللقا ماحن بذلاني
(العماني) طريح ماحدا ً شلّه = في نحا لابة ٍ ماهم بذلاني

واكثر من نشد فيها واحد من الغييثات يقال له دغش ولانيب احفظ قصيده جدا ً .


س : هل قُتل احد من الشكره في ذلك اليوم ؟

ج : لا لم يقتل أحد من الشكره .

س: هل تذكر لنا احدى مواقف الشيخ مسفر بن سند بن فرج ؟

ج : مسفر بن سند بن فرج ، صار في خاطره على بعض قرايبه وراح في غزوة مع بني عمه (المساعره) ، وغزوا على قحطان مدري عتيبه ، وخذوا لهم ابل ويجي عندها طراد مهوب هويّن ، ولين بعض القوم مايعرف مسفر بن حفيظ ومكانته ، يعرفون انه دوسري وبس ، ويوم جات الهية لا ضيّق بهم ماحوّل الا هو ومثله من ظفرين الرجاجيل ، وتطيح عقيره ولا رجال ، ويعتزي : خيال البويضا انا ابن حفيظ .

ويوم انفك الطارد من المطرود ، قاموا اخوياه وحطوا له الفراش وحطوا له المعناز وقالوا :

العذر من الله ثم منك انّا (نحن) ماعرفناك مع بداية المغزى ، واما الحين فانت معروف وهذا محلك وانت راعيه ، ولا خذوا وهم جالسين ، فإذا رجالين اثنين مقبلين عليهم ، واحد منهم معه مشعاب(عصا) ، اليوم وصلوا لهم وسلموا عليه ويوم وصل الرجل الذي معه مشعاب لمسفر بن حفيظ ، ويصقع مسفر بالمشعاب على راسه وهو يعتزي :
خيال الحرشا الخضيري !!!

ويقومون المساعره ويطرحونه ويجيبونه قدام مسفر بن حفيظ ، قال مسفر:

اتركوه اتركوه.

وسألوا الرجل الذي ضرب مسفر : أنت خضراني ؟!! (الخضران من الدواسر) .

قال الرجل : الله الله

قالوا : تعرف الرجال اللي انت طقيته ؟

قال الخضراني : نعم ، هذا مسفر بن حفيظ .

قال مسفر بن حفيظ :

شقومك طاقني ؟ هل ضربك احد من آل حفيظ؟

قال الخضراني : قال مالك لوى (لا) .

قال مسفر : طاقك (ضربك) احد من الطلاحبه(أقرب الشكره نسبا ً الى آل حفيظ).

قال الخضراني : مالك لوى ( لا ) .

قال مسفر : اجل من طاقك (ضربك) ؟

قال الخضراني : طاقني واحد ٍ من الغرابا من الشكره .

قال مسفر : واذا مني خليتك مع ذي الطقه ، بتخلص من الغربي ماعادك بتالبه؟ .

قال الخضراني : ايه نعم .

قال مسفر : ها خل الصهبه يدرون اني مانيب راعي مشاعيب ، رح ياخضراني تراها منك خط ٍ في ماء ( أي غفرت لك وكأن شيئا ً لم يكن ) ، والغربي ترى ماعاد لك فيه سنع .

وهاذي من نوادر العلوم التي تذكر للرجال الذين يفعلونها ، لاهوب تلاّب ولا راعي مشعاب .


س : ماهي عزوة الشكرة ؟

ج : عزوة الشكره طال عمرك ، من طرف فندة ٍ كبيرة منهم وهم آل بوعلي عزوتهم : ابن علي .

وآل بوعلي فخذ ٍ من فخوذ الشكره وعزوتهم كلهم مع آل حسن : ابن حسن .

س : وآل حفيظ ماهي عزوتهم الخاصه ؟

ج : البويضا عزوة آل حفيظ الخاصه وباقي الشكره كلن له عزوته الخاصه .

اما آل حفيظ فعزوتهم في الإبل : البويضا
واما عزوتهم في النسوان : أخو نوره .

س: ماهو وسم الشكره ؟

ج : وسم الشكره ، آل بوعلي وهم الواجد : الشمطري وهو مطرق مضرب فوقه رقمه وتحته رقمه .
وباقي الشكره لهم ستة وسوم :

اللي كاز واللي ثاقبي واكثرها كاز وثاقبي ، واللي سرد وغيرها .

س : هل تعرف شي من سوالف الأمير الكريم وقيان بن هذال ؟

ج : وقيان بن هذال راعي كرم ومعروف على مستوى نجد وأهلها وفيه قصيد واجد .

ومن اللي قيل فيه قاصد ٍ فيه قحطاني :

ياباني بيته على مفرق الطرق = وياماخذ ٍ ضيف (الأحمر) بالضماني
حر ٍ على حر ٍ ومنشاه من غرق = مهوب اللي ماكره مشبهاني
واليا عطى يعطي عطاياه من فرق= مهوب يطلب فيما عطا بالمثاني


وكرمه معروف على مستوى نجد وأهلها ، وعياله من بعده مثله .

س : هل ممكن ان تعدد لنا بعض شعراء الشكرة المعروفين ؟

ج : من شعراء الشكرة المعروفين ، جلوي بن سالم من آل حوشان .

ومنهم شايع بن برجس من الجعاثنه ، ومنهم طويرش بن بدّاح من آل فرج بن طلحاب .

والباقين شعراء مثلهم وعلى حدهم واجدين الشعّار .



ومن عرض القصائد للشعراء التي ذكرتهم ، قصيدة لشايع بن برجس :

صار له بعض الصدف مع حضري في (ميراه) ، وجاء بينهم مساءله كل منهم ينشد رفيقه من انت منه ، وكل منهم علم الاخر منهو منه ، ونشده الحضري من انت منه :

قال شايع : انا دوسري .

قال الحضري : من أي الدواسر؟ .

قال شايع : من الشكره .

(ولين في ذاك الأيام توه متوفي الشيخ هذال بن وقيّان الشكره راعي الأحمر) .

قال الحضري : انت من الشكره ، الله أكبر ويش بتسوون يا شكره يوم مات أميركم .

قال شايع : اعقب ، لعنبوك ويش أميرنا ؟

قال الحضري : أميركم هذال .

قال شايع : قال لعنبوك هذال أمير ٍ وغيره أمراء .

رجع شايع الى اهله في (عرق السر) ، علوا ً من (ميراه) ، وتهيّض تالي نهاره وانشد :

قال ابوبرجس بادي ٍ في مرقب = من ضيقة ٍ في خاطري مصطاع
اعد للقيفان لا ضاق بالي = بهرج دليل ٍ ثابت ٍ ما ضاع
هيضني الحوّاج بايـع فلفله = ويقول ظعتوا مابكم شجاع
(هذال) اللي قد مضن فعوله = شيخ ٍ على شيخ ٍ اعروف سناع(1)
مخلف ٍ ربع ٍ قروم ٍ ندّر= ماكر حرار سيفهم قطّاع
و(أبوسند) له ربعة ٍ مدهوله =صينيته تشبع بها الأجياع(2)
موارث اللي تدبل الخيل روسهم = حرز السبايا ترخي المصراع
نطاحة الفرسان لا حل البلا = في دقلهم كم طاح من صعصاع
و(أهل الحمر) ربعي مقابيس البلا= لاجاء المصيّح مقدم ٍ فزّاع
لاجاء الخطاء من عايل ٍ متعيفن=لازاد له شبر ٍ زادوا باع
عقب العباصة جاء دليل عارف = قدهو لمن ينصحه مطواع
عزالله انه مشحنتني بندقي = سبر نظرها ضربها وقاع
أبغي بها نطمر خلاف الضمّر = لاجات زلبات الرمك خرّاع
عادات ابوي وخالي وجدّاني = لاجاء المضايق حولوا في القاع
و(عصام) في بيعاتهم طاروا به = شوق الهنوف مسوية الأفناع(3)
عشوا به السرحان واخذوا سابقه = شقرا ً أصيل توها رباع
وانا صحيب الضيف لاجاء هادف = هرج لبابه دايم طرّاع
ماكان في بيتي لهشال الخلا = مانيب منهو لقبلوا يرتاع
ولانيب بقن ٍ دايم مسربل = ردي عزمي ٍ دايم ٍ رعراع
في حقوي اللي كنها سم الحنش = والا بخمس ٍ ضربها شلاّع
وانا لمن لحق ربعي ضدّه = مانيب لأشوار الردي سمّاع
مخشع ٍ لهم واصبر على زلاتهم = وان جاء الخطا من غيرهم جزّاع
وان لحقهم كرب ٍ كعام العايل = الين ياتي يقتدي الأسناع
ونخبر اللي جاهل ٍ بفعلونا = الخامل اللي في هروجه ضاع
ان قبلنا ربع ٍ مضن فعلوهم = يردون عوص الجيش في الأطماع
اجابهم في الابل بسند الغارب = عثوى السنام الفاطر المقراع
نزالة الجيّان لا زاف عشبها = عشب السهل فيها وعشب ٍ انقاع
وحنا هل المنزل اليا جت ردّه = غدوا العرب تبعنا وكل ٍ ضاع

1-هذال : الشيخ هذال بن وقيان الشكره .
2-أبو سند : الأمير مناحي بن سند بن محمد بن فرج بن حفيظ امير الشكره .
3-عصام : احد فرسان يام .

س : ماذا عن الشاعر دخيل الله بن محمد الشكره ؟

ج : الشاعر دخيل الله بن محمد بن دخيل الله رحمه الله من شعراء الشكره المعروفين ويعتبر من شعراء الشكره المعاصرين، وهو من ال موسى من ال ابوعلي .



س : هل تعرف سالفة ناجي بن نادي الجعاثنه الشكري وقصيدته عندما كان جار مع قبيلة اخرى ؟

ج : ناجي بن نادي من الجعاثنه ، راحت به الصدف مع العجمان في نية ٍ معهم وفي ربيع معهم وقاصرهم ،ويوم من الأيام يسولفون في المجلس ، جاء ناجي يبغي يسولف ، فقال خامل ٍ من أهل المجلس :

يادوسري ، انتوا سلومكم ماهي مثل سلوم القبايل لا تسولف !!

فقال ناجي :
الا لنا سلوم وأطيب سلوم القبايل سلومنا

قال :
مهيب أطيب لاتسولف يادوسري .

فقال ناجي :

ياجاري أسولف ولا ما أسولف .

قال جاره العجمي :

الا سولف وكنك في مجلس بني عمك.

قال ناجي :

ها برد عليك الصبح .

يوم اليوم الثاني واجتمعوا قال ناجي :

ياراكب اللي مااعترضهن شواذيب = غضع الرقاب وناحلات السماري
معهن دليلتهم اليا اقفن مجانيب = واليا يخوّع في الليالي الغداري
تلفي على (عجبٍ) صبي التجاريب = تثني جواده في نهار المثاري(1)
هل سربة ٍ تركض على الموت لاهيب = طريحهم داجت عليه الضواري
ثم نصّها (هذال) من الفطر الشيب = لاجات نكلات خلاف المساري(2)
تبشر اليا من جات ببن ٍ وترحيب = وصحون بر ٍ فوقها الثرب واري
ياشيبيه حر ٍ في طوال المراقيب = من طير سنجار ٍ يصيد الحباري
ثم حدّره للي نكل الأصاحيب = غمر ٍ على شرع الرجاجيل ضاري(3)
اهل مقاصير ٍ تبنى على الطيب = ماصككت بيبانها في العساري
ربعي عزاز الجار يا ابا القصاصيب=ياللي على شيل المشاكيك ضاري(4)

قال العجمي : تعقّب

قال ناجي : يعقّب شاربك .


1- عجب : الشيخ عجب بن محمد بن فرج بن حفيظ أمير الشكره
2- هذال : الشيخ هذال بن وقيان البرده الشكره .
3- يقصد : فارس من آل بوعلي الشكره اسمه منيف بن حمدان في (البديع) .
4- المشاكيك : اللحم ، ويقصد الشاعر ان من سلوم الدواسر الطيّبه عدم بيع اللحم .


س : هل تعرف سالفة الأمير سعود الكبير وشهادته للشيخ الفارس عبدالله بن سند بن فرج بن حفيظ ؟

ج : نعم يروي لنا فريج الشكره وكان أحد جلساء الأمير سعود الكبير (سعود بن عبدالعزيز بن سعود الفيصل ) .

وكان لفريج قضية في الرياض ويلفي على سعود ، ويجيه ،

قال الأمير : يافريج تعال بجانبي وسولف علي .

جاء عنده فريج ، وقال له الأمير سعود : عِد علي آل حفيظ كل منهم ويش عليه من العيال ؟(أي :عدد لي ابناء آل حفيظ) .

قام فريج وعدد له آل حفيظ الموجودين ، ولين في خاطر الأمير سعود الكبير رجال من آل حفيظ نسى ان يذكر اسمه فريج .

قال الأمير : فيه رجال ماجينتي باسمه وينهو؟

قال فريج : منهو ؟

قال الأمير سعود الكبير : عبدالله بن سند بن فرج .

قال فريج : عبدالله بن سند رجال ٍ مات مبطي وعليه رجالين .

ويقوم الأمير سعود ويصد عن فريج ويوّجه وجه للحاضرين وقال :
ياجماعة ، عبدالله بن سند على الدهماء والله أنه أظفر من ظهرت عليه الشمس منا ، وغابت عليه منا ، لكن الرجال حظّه وسط .

وهاذي شهادة من الأمير سعود الكبير في عبدالله بن سند بن فرج بن حفيظ .


س : هل ممكن ان تعطونا قصيدة محمد بن حفيظ ردا ً على قصيدة صحن بن حويزي بن قويد وسالفتها :

ج : قاموا المساعرة وحدروا بالجهام والسلفان يبغون الديرة والمرابيع الزينه ، وخلوا عد ٍ لهم عد ٍ في الدحي معروف باسم (الجفير) .

وياردون قحطان على الجفير ، ويقوم خامل ٍ من الخاملين ويجي له بكلام ٍ مهوب زين في العد وأهله ، ورد العلم لابن قويد.

قال ابن قويد : يامساعره ترانا مسندين على قحطان وترانا حرّابه .الرجال اللي مهوب جاي ٍ مظهوره وأهله وأبله ، تراه ماحما لنا ولا لنا فيه حاجة .

انضموا عليه رجال المساعره .

أراد الله أن المساعرة يتواجهون مع آل مسعود من قحطان ، ويكسرونهم ويذبح منهم عرب ، ويلعب واحد من القوده ينقال له صحين بن حويزي بن قويد وقال قصيده منها :

ياراكب من فوق ست تعنّا = من حميها تكسر قوي المواسير
تلفي على ابن حفيظ زبن المجنّا = من عزوته ذبن بروس القناطير
ياليت سلفانه تباري ظعنّا = يوم التقينا بين عذال ومشير

وصلت القصيده ورد عليه محمد بن فرج بن حفيظ :

ياراكب من فوق تسع تعنّا = محيلات في الليالي المخاضير
تلفي (صحين) عيدهم لأقبلنّا = عيد الركاب اللي هجاف ٍ من السير
يامرحبا ً بركابه اللي لفنّا = لامنه بدل رفقته قاطع السير
ليت الحمايا يوم جنّا لفنّا = بين (اللدام) وبين عوج الدواوير(1)
والله ان يجيكم يارفاقه ظعنّا = وخيل ٍ تنازا بالقروم المناعير
حربينا لاشافنا جظ منّا = مثل الخريش اللي بلاها من الطير
ماقومه الا في الملاقا طعنّا = من فوق قب ٍ معسكرات المسامير
مير يانفدى اللي يوم غبنّا كفنّا = سربة (صخاف الشول) عند المعاشير .
لاجرّها( ابن قويد ) زبن المجنّا = يسهج حفيف مثل سهج الطوابير

1- يتمنى انه قريب منهم لكي ليفزع لهم .

س : هل تذكر لنا ايضا بعض القصائد في قبيلة الدواسر ؟

ج : الشعر ديوان العرب ، والقصايد كثيره :

هتلان بن هتلان من آل حوشان الشكره ، عربه دايم صوب العارض وهو يحب الجماعة اللي يمشون مع الأسهال ويمشون مع النيّات الوساع ، ويوم جاء سنة من السنين حدر بمظهوره واهله يبي يعارض الجماعة اللي يبون يروحون شمال ، واذا العرب قد سبقوه وفاتوه ، فيقول :

يادار وين ملينين المصاريع = هاذي جداياهم عفتها الرياحي
أهل ذيدان ٍ توّلد مرابيع = عرب ٍ مظرّات برعي الفياحي
وأهل مظهور من القفر مازيع = لا نغزلت في الصيف بيض الفقاحي
اهل سربة فيها رموع المداريع = لاقادها عقب العذير الصياحي
يروون مثل مورّدات المنازيع = لاجات تجذبها سواني (ارماحي)(1)
ولهم على شّان (سِعد) مراييع = لامن استوى عشب الوعر والسماحي(2)
ومقياظهم بين العذوق المهانيع = ومجالس ٍ فيها اشقر البن فاحي (3)


1-اراماحي : المقصود عد رماح المعروف .
2-سِعد : عد سعد المعروف .
3-العذوق المهانيع : النخيل .


س : مواقيف أسرة آل حفيظ الكريمة كانت ولازالت كريمة ويفتخر بها جميع ابناء الدواسر سواء في الماضي او الحاضر ، هل تذكروا لنا بعض هذه المواقف ؟

ج : صار سنة من السنين دهر على البوادي ، وضاف الحلال مع البدو ، وبعضهم ماقدر حلالهم يشيله من محل الا محل ، عقب قام الأمير مناحي بن سند بن محمد بن فرج بن حفيظ الله يرحمه وراح للملك عبدالعزيز وقال :

ياطويل العمر ، البوادي لحقهم نصب وحلالهم ضعف ، والزوامل التي تشيل اثاثهم وقفّتهم ، وفي حاجتكم بالفزعه .

قال عبدالعزيز الله يرحمه :

ارسلوا مع ابن حفيظ عشرين سيارة تشيل عرابانه وقبايل اللي يبي وين يبون ، وين تبغون تروحونهم؟

قال مناحي :احد بنروحه للأفلاج وأحد بنروحه للحساء .

قال عبدالعزيز : عطوهم سيارات اللي يبغي يروح الأفلاج للأفلاج ، واللي يبغي الحساء يروّح للحساء على الريل ، وحطوا على( التوضيحة ) مقصب ذبايح ومطبخ وعيشوا المسلمين لين الله يرفع خملهم.

ويفرج الله على المسلمين باسباب الله ثم اسباب الأمير مناحي بن سند بن حفيظ .

والموقف الثاني للامير حسن بن عجب بن محمد بن فرج بن حفيظ ، ، حصل بعد دهر ٍ مثله ، ولحق البوادي نصب ، وركب وراح للملك خالد ولي العهد وكان الملك في وقتها فيصل ، وقال:

ياطويل العمر البدو لحقهم من الأمور من اللي معاد يطيقونه ، وباديتكم في حاجتكم .

قال خالد :

يظهر امر على المالية تظهر سيارات بتمر ورز ودهن مع ابن حفيظ يوزعها على قبايله في المحل اللي هو يبي .

قال حسن بن عجب : تروح لخريص .

وفعلا جاته في خريص سبع وعشرين سياره ، أكثرها (شاحنات مرسيدس سقوس) .

ويفرج الله على المسلمين باسباب الله ثم باسبابه .وومواقف ال حفيظ من ذي وأكثر من العلوم الطيبه .



س : ابو فيصل ، عرف انك شاعر مجيد ولك قصيد في الفخر هل تشرفن بسماع بعضه ؟

ج : بكل سرور ، أقول في الفخر :

نعس ونشد اليا جلبنا الهنيّات = عرب البكار الي تنومس طبايعها
اليا نقصت مدوهن اقبلن عجلات= على ثر زعوجن ظاهرات شوايعها
رعينا الزعوج بحاير زايف النبات = بجو الخباري يوم زانت مراتعها
عند الجهام ننوس ماردنا خيفات = ولا زارنا قوم ٍ طماميع نطمعها
عمدنا الضويلع من جنوب جونا غزات = وقفى على الابل قد تخزز قرايعها
لحقوه ربعي واعفرو به مع الأموات = ورد الجهام وشلّخو كبد زايعها
ومثل يوم جاء (شعوان) بأهل الكريزيات = يبي عزمة شرق السليّل بيقشعها
عينا اهل البل حاضرين لهم صولات = عثوا به منيع وسربة الشيخ وادعها
ومثل يوم جاء( الدامر) وربعه على العيرات = بثلاثين حوض ٍ من شبا نجد قاشعها
وجاوه مداغيش ٍ عراض ٍ على الزلبات = عثوا به منيع وسربته ضم ضايعها
ذبحنا (الضواعن) يوم جونا على الغرّات = تحذّى حوافر خيلنا من قنازعها
ومثل يوم جاء (مانع) وربعه و له هقوات = وشاف الوضاح اللي كما البرق لامعها
فخاير وقال اليوم ماصابنا قالات = عوّد عبات الذل فوقه مقوبعها
ومثل هية ٍ صارت تنيّف على الهيات = تحامت( سبيع) ولايمت من يشايعها
وجو فوق خيل ٍ حزمباً بالسواريات = وجموع ٍ تزافا ً لين قمنا نطوعها
بضرب المهند والتفق والعرينيات = نشيل النفوس اذا نوى الرب ينزعها
جمع( السبيعي) فر واخلى( الجلاليات) = ومن ضربنا جنّب حلاله وضيعها
هاذي فعايلنا وحنا هل العادات = .(صــهيبة ٍ) رد البرا ما يزعزءها
وصلاة وسلام عد مايزهر النبات= على من عطى حق الشفاعه يشفعها

س : بوفيصل ، في ختام هذا اللقاء الرائع والممتع معكم ، هل من كلمة توجهها لأبناء شباب موقع قبيلة الدواسر الرسمي؟

لسماع الكلمة صوتيا ً



أو أضغط هنــا

ج : الشباب اللي قاموا بخدمة المنتدى ، شباب توجد فيهم جميع المزايا الحميده وتوجد فيهم النفس الطيبه والأهداف النبيلة ، ولا غروى فهم شباب مؤهلين لأكثر من هذا ، ونحن نشكرهم ونثني عليهم وبيض الله وجيهم ، وهاذي اثار ٍ تبقى للأجيال وهم السبب .

س : ما رأيكم بفكرة أنشاء الموقع ؟

ج : ناجح ، وأنا من المؤيدين له .


وبعد هذا اللقاء كان لنا هاذي الوقفات مع ضيوف اللقاء .


وكان لنا هذه الوقفة مع الأمير فرج بن عامر بن حفيظ :




الأمير فرج بن عامر بن محمد بن فرج بن حفيظ


س : هل تعطينا نبذة شخصية عنك لأخوانك وابناءك اعضاء موقع الدواسر الرسمي :

الاسم فرج بن عامر بن محمد بن فرج بن حفيظ
مواليد : 1366 هـ
أعمل في الحرس الوطني وتقاعدت منه ، وكان والدي الله يرحمه أيضا ً قضى عمره في خدمة الوطن في الحرس الوطني وكما ذكر ابو فيصل شارك في حرب فلسطين وكان احد قواد الجيش السعودي .


س : انطباعك يابوعامر عن موقع قبيلة الدواسر الرسمي ؟


لسماع الكلمة صوتياً أضغط هنا

ج : اما بالنسبة للموقع ومنتدى الدواسر ، فنشكرهم على المعلومات الصحيحه التي تنشأ من مصادر حقيقة ، ومن أصحاب الشأن الذي يخصهم أي مجال تسجيله .ونشكرهم على ماقاموا به ، ونبارك لهم في جهودهم وفي مما مشوا فيه.


وبعدها كان لنا هذه الوقفه مع الاميرمحمد بن مناحي بن حفيظ امير قبيلة الشكره


الامير محمد بن مناحي بن حفيظ أمير قبيلة الشكرة


س : ابو سالم ، نحن نعرف انك من أوائل المؤيدين للموقع ومن المتابعين له ، ومن خلال هذه المتابعه فما هو انطباعكم حتى الان ؟

لـسماع الكلمة أضغط هنـا

ج : اولا ً نشكركم على ماعملتوه في منتدى الدواسر ، وهذا شي ٍ شان ٍ للجميع ، ونشكركم على أعمالكم الطيبه و على توجيهكم الصحيح ، ومشكورين على كل حال .




كما كان لنا هذه الوقفه مع الشيخ والداعية المعروف حفيظ بن عجب آل حفيظ


الشيخ والداعية المعروف حفيظ بن عجب بن فيصل بن حفيظ

والذي ساعدنا ً كثيرا ً الى جانب اخيه الرائد سند في اعداد هذا اللقاء ، وقد اثنى الشيخ حفيظ على الموقع وترّجل بهذه الأبيات :

أهلا وسهلاً بك على العز والديـن=ياموقعن حاز الشـرف والكرامـه
(هايف) يديرك من قرومن عزيزين=نسل (العماني) عزته في مرامـه
الله يوفـق سعيكـم يالميامـيـن=ويزيدكـم عـزن بليـا نـدامـه
مني وانا (ابن حفيظ) مافيه تخمين=شاعر واقدر مـن يثمـن كلامـه




الأستاذ هايف مبارك العماني متوسطا ً الحضور


لقطة جماعيه آل حفيظ الكرام أمراء قبيلة الشكره .


الأمير عجب بن سند بن عبدالله بن سند بن فرج بن حفيظ
رئيس مركز المثناه بالأفلاج .



الشيخ الرائد سند بن عجب بن فيصل بن حفيظ



من اليمين الشيخ حسن بن ناصر و الشيخ حفيظ بن عجب و الشيخ ناصر بن عجب و الشيخ الرائد سعود بن عجب و الشيخ فيصل بن عجب و الشيخ عبدالله بن حسن




محمد بن مناحي وفرج بن عامر وناصر بن فيصل وسند بن عجب
وعجب بن حسن وسالم بن محمد بن مناحي


الشيخ عجب بن سند ومحمد مناحي وهايف العماني وفرج بن عامر


الشيخ عجب بن حسن بن عجب بن حفيظ


الشيخ فيصل بن عجب بن حفيظ


الشيخ ناصر بن عجب بن حفيظ


الشيخ عبدالله بن حسن بن حفيظ


وفي ختام هذا اللقاء الشيّق ، لا يسعنا الا نتقدم بخالص الشكر والتقدير لأسرة آل حفيظ الكريمة الذين غمرونا بكرمهم وحسن استقبالهم وسعة صدورهم ، وطيب محياهم ، ونسأل الله ان يجمعهم وان لا يفرقهم أبدا ً ، كما نتقدم بالشكر الخاص للوالد الأمير ناصر بن فيصل آل حفيظ على رحابة صدره ، واجابته على جميع الاسئلة ، ونسأل الله أن يطيل بعمره على طاعته ويمتعه بالصحه والعافيه.


موقع قبيلة الدواسر الرسمي
www.alduwaser.org/vb




 

 

 

 

    

رد مع اقتباس
قديم 16-12-2007, 11:35 PM   #2
 
إحصائية العضو








أبونواف الدوسري غير متصل

وسام التميز: وسام التميز - السبب: نظيرا ً لجهوده الكبيره في المنتدى
: 1

أبونواف الدوسري has a spectacular aura aboutأبونواف الدوسري has a spectacular aura about


افتراضي رد: اللقاء التاريخي الشامل مع الشيخ ناصر بن فيصل بن حفيظ وأسرة آل حفيظ الكريمة

أخواني الأداره وفقكم الله علي هذا اللقاء التاريخي مع

الشيخ ناصر بن فيصل بن حفيظ وأسرة آل حفيظ الكريمة

حفظهم الله لنا

وجزيل الشكر والأمتنان لأخونا العزيز هايف العماني حفظه الله ورعاه

علي جهوده في أتحافنا بهذا اللقاء...

 

 

 

 

 

 

التوقيع

    

رد مع اقتباس
قديم 16-12-2007, 11:46 PM   #3
 
إحصائية العضو







أبو سعود الودعاني غير متصل

أبو سعود الودعاني is on a distinguished road


افتراضي رد: اللقاء التاريخي الشامل مع الشيخ ناصر بن فيصل بن حفيظ وأسرة آل حفيظ الكريمة

كفوا في ذمتي ال حفيظ

ولاهان اخي الغالي الكريم

هايف العماني

على هذا الجهد الذي يشكر عليه

وهذا ليس بمستغرب عليه وعلى مجلس إذارة هذا الصرح الشامخ

وتقبلوا خالص ودي وتقديري

 

 

 

 

 

 

التوقيع

wd3ani_ms@hotmail.com

    

رد مع اقتباس
قديم 17-12-2007, 12:00 AM   #4
 
إحصائية العضو








فيصل الشكري غير متصل

وسام التميز: وسام التميز - السبب: نظيرا ً لجهوده الكبيره في المنتدى
: 1

فيصل الشكري is on a distinguished road


افتراضي رد: اللقاء التاريخي الشامل مع الشيخ ناصر بن فيصل بن حفيظ وأسرة آل حفيظ الكريمة

نشكر الاداره الكريمه على هذا اللقاء التاريخي مع اسره آل حفيظ الكريمة

كما ان الشكر موصول للأخ / هايف العماني على اجراءه هذا اللقاء الطيب


وتقبلوا وافر التقدير ,,,

 

 

 

 

    

رد مع اقتباس
قديم 17-12-2007, 12:13 AM   #5
 
إحصائية العضو







جلعود المخاريم غير متصل

جلعود المخاريم is on a distinguished road


افتراضي رد: اللقاء التاريخي الشامل مع الشيخ ناصر بن فيصل بن حفيظ وأسرة آل حفيظ الكريمة

اخي هايف العماني


لك منا كل الشكر والتقدير على ما اتحفتنا به من هذا اللقاء الجميل الذي سوف يحفظ في الاذهان لما اتحتفتنا به من قراءة لتاريخ آل حفيظ المليء بكل ما هو ينومس رجال القبيلة

دمتم بكل خير ونور

 

 

 

 

    

رد مع اقتباس
قديم 17-12-2007, 02:15 AM   #6
 
إحصائية العضو







أبـوشـبيـب @ غير متصل

أبـوشـبيـب @ is on a distinguished road


افتراضي رد: اللقاء التاريخي الشامل مع الشيخ ناصر بن فيصل بن حفيظ وأسرة آل حفيظ الكريمة

بيض الله وجهك يا أبومبارك على هاللقــاء المميز.. والثري..


وكذلك السرد الرائع والطرح القوي ...



إلى الامام وإلى مزيد من التقدم ...



أخوك

أبوشبيب

 

 

 

 

    

رد مع اقتباس
قديم 17-12-2007, 03:22 AM   #7
 
إحصائية العضو







سلطان بن دخيل الله غير متصل

سلطان بن دخيل الله is on a distinguished road


افتراضي رد: اللقاء التاريخي الشامل مع الشيخ ناصر بن فيصل بن حفيظ وأسرة آل حفيظ الكريمة

بسم الله الرحمن الرحيم

نشكر الاداره الكريمه على هذا اللقاء التاريخي مع

الامير ناصر بن فيصل ال حفيظ واسره آل حفيظ الكريمة

كذلك نشكر الاخ الغالي على قلوبنا هايف العماني على اجراءه هذا اللقاء الطيب

الذي سرد لنا فيه ابوفيصل بعض الاحداث التاريخيه التي يجهلها الكثير .


وتقبلوا وافر التقدير ,,,

 

 

 

 

 

 

التوقيع

اخي العزيز
يكفيني ان تقول
لوالدي
اللهم باعد بينه وبين خطاياه كما باعدت بين المشرق والمغرب
اللهم ارحمه واسكنه الجنه . اللهم وسع له في قبره
اللهم اجعل قبره روضةً من رياض الجنه
اللهم اجمعه بالنبيين والصديقيين . واللهم أنس وحشته
وأمن روعته
واموات المسلمين والمسلمات
اللهم امين
وجزاك الله عني كل خير

-------------------------------------------------
تفضل
هذا هو رابط ديوان والدي


http://www.alduwasser.com/vb/showthread.php?t=18139

------------------------------------------------
سبحان الله وبحمده سبحان الله العظيم

    

رد مع اقتباس
قديم 17-12-2007, 04:02 AM   #8
 
إحصائية العضو







خالد الحقباني غير متصل

خالد الحقباني is on a distinguished road


افتراضي رد: اللقاء التاريخي الشامل مع الشيخ ناصر بن فيصل بن حفيظ وأسرة آل حفيظ الكريمة

بيض الله وجيهكم يا ادارة المنتدى على هذه الوقفات مع التاريخ
كل الشكر لك اخي هايف ولهذه الاسرة الكريمة

 

 

 

 

    

رد مع اقتباس
قديم 17-12-2007, 05:01 AM   #9
 
إحصائية العضو







بن حفـيـظ غير متصل

بن حفـيـظ is on a distinguished road


افتراضي رد: اللقاء التاريخي الشامل مع الشيخ ناصر بن فيصل بن حفيظ وأسرة آل حفيظ الكريمة

بسم الله الرحمن الرحيم

نشكر الاداره الكريمه على هذا اللقاء التاريخي مع

الامير ناصر بن فيصل بن حفيظ واسره آل حفيظ الكريمة

كذلك نشكر الاخ الغالي على قلوبنا هايف العماني على اجراءه هذا اللقاء الطيب

الذي سرد لنا فيه ابوفيصل بعض الاحداث التاريخيه التي يجهلها الكثير .


وتقبلوا وافر التقدير ,,,

 

 

 

 

    

رد مع اقتباس
قديم 17-12-2007, 06:57 AM   #10
 
إحصائية العضو








ابن حنيش الودعاني غير متصل

ابن حنيش الودعاني is on a distinguished road


افتراضي رد: اللقاء التاريخي الشامل مع الشيخ ناصر بن فيصل بن حفيظ وأسرة آل حفيظ الكريمة

نشكر الاخ هايف العماني على هذا اللقاء مع اسرة ال حفيظ
وبيض الله وجهه

 

 

 

 

    

رد مع اقتباس
قديم 17-12-2007, 09:45 AM   #11
 
إحصائية العضو








فهد الغريري غير متصل

فهد الغريري is a jewel in the roughفهد الغريري is a jewel in the roughفهد الغريري is a jewel in the rough


افتراضي رد: اللقاء التاريخي الشامل مع الشيخ ناصر بن فيصل بن حفيظ وأسرة آل حفيظ الكريمة

تسلم اياديكم على مجهودها في اللقاء المتميز

مع احد اعلام قبيلة الدواسر


الامير ناصر بن فيصل بن حفيظ واسره آل حفيظ الكريمة



هايف العماني .. بيض الله وجهك على هذا المجهود الجبار


الذي تبذله في سبيل الرقي بقبيلتك


والله يجعلك ذخر لقبيلتك وابناء عمومتكم


تقبل منـي ارق التحـايـا....

 

 

 

 

    

رد مع اقتباس
قديم 17-12-2007, 10:10 AM   #12
 
إحصائية العضو








علي الجعيدي غير متصل

علي الجعيدي is on a distinguished road


افتراضي رد: اللقاء التاريخي الشامل مع الشيخ ناصر بن فيصل بن حفيظ وأسرة آل حفيظ الكريمة

مشكورين على اللقاء مع الاخوان الاعزاء آل حفيظ
ونعم فيهم جميعا وفي الشكره صحبة حلوه وعلوم طيبه وطيب خوه

 

 

 

 

 

 

التوقيع

    

رد مع اقتباس
قديم 17-12-2007, 11:43 AM   #13
 
إحصائية العضو







أبوبندر الحطيم غير متصل

أبوبندر الحطيم is on a distinguished road


افتراضي رد: اللقاء التاريخي الشامل مع الشيخ ناصر بن فيصل بن حفيظ وأسرة آل حفيظ الكريمة

الاخ ابومبارك كاالبحرالمتلاطم دائما كما عوتنا تسلم يمينك وبيض الله وجه ويستاهلون هل الست

 

 

 

 

    

رد مع اقتباس
قديم 17-12-2007, 12:18 PM   #14
 
إحصائية العضو







تركي ال فنيس غير متصل

تركي ال فنيس is on a distinguished road


افتراضي رد: اللقاء التاريخي الشامل مع الشيخ ناصر بن فيصل بن حفيظ وأسرة آل حفيظ الكريمة

كفوا ال حفيظ

ولاهان اخي الغالي الكريم

هايف العماني

على هذا الجهد الذي يشكر عليه

 

 

 

 

    

رد مع اقتباس
قديم 17-12-2007, 01:14 PM   #15
 
إحصائية العضو







الشــقاوى غير متصل

الشــقاوى is on a distinguished road


افتراضي رد: اللقاء التاريخي الشامل مع الشيخ ناصر بن فيصل بن حفيظ وأسرة آل حفيظ الكريمة

بسم الله الرحمن الرحيم

نشكر الاداره الكريمه على هذا اللقاء التاريخي مع

الامير ناصر بن فيصل بن حفيظ واسره آل حفيظ الكريمة

كذلك نشكر الاخ الغالي على قلوبنا هايف العماني على اجراءه هذا اللقاء الطيب

الذي سرد لنا فيه ابوفيصل بعض الاحداث التاريخيه التي يجهلها الكثير .


وتقبلوا وافر التقدير ,,,

 

 

 

 

    

رد مع اقتباس
إضافة رد


الذين يشاهدون محتوى الموضوع الآن : 25 ( الأعضاء 0 والزوار 25)
 
أدوات الموضوع
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة

الانتقال السريع

المواضيع المتشابهه
الموضوع كاتب الموضوع المنتدى مشاركات آخر مشاركة
اللقاء التاريخي مع الأمير علي بن محمد بن وقيّان أمير قبيلة الغياثات الإداره :: قسم اللقــاءات والفعاليات والتغطيات الخاصة:: 57 17-04-2013 10:52 PM
زوجـات الملك عبدالعزيز رحمه الله وابنائه خيالية :: القسم الـتاريخــي الــعام :: 16 18-05-2011 10:58 PM
القرآن لا يغيِّب البسمة ! أبوبندر الحطيم :: قسم المـواضيع الـعامــة :: 2 09-11-2010 06:01 PM
التغطية المصوّرة (الحصريّة) لحفل الصلح بين فخذيّ آل سويلم وآل عرفج النتيفات بحضور أمراء ومشائخ قبيلة الدواسر . الإداره :: قسم اللقــاءات والفعاليات والتغطيات الخاصة:: 28 16-07-2010 04:54 PM
التغطية المصوّرة (الحصريّة) لزيارة صاحب السمو الملكي الأمير تركي بن طلال بن عبدالعزيز آل سعود لـ الشيخ محمد بن مرّان بن قويد الإداره :: قسم اللقــاءات والفعاليات والتغطيات الخاصة:: 31 23-06-2010 05:25 AM

 


الساعة الآن 02:34 AM


Powered by vBulletin® Copyright ©2000 - 2024, Jelsoft Enterprises Ltd.
---