الشاعر الكبير محمد بن محسن بن حشفل آل سفر الخضراني في لقاء (حصري) مع الموقع الرسمي لقبيلة الدواسر العريقة - ::: مـنتدى قبيلـة الـدواسـر الـرسمي :::

العودة   ::: مـنتدى قبيلـة الـدواسـر الـرسمي ::: > :::. الأقســــام الـخــــاصـــــة.::: > :: قسم اللقــاءات والفعاليات والتغطيات الخاصة::

إضافة رد
انشر الموضوع
 
أدوات الموضوع انواع عرض الموضوع
قديم 05-12-2009, 06:31 PM   #1
 
إحصائية العضو







الإداره غير متصل

الإداره is on a distinguished road


:e-e-4-:. الشاعر الكبير محمد بن محسن بن حشفل آل سفر الخضراني في لقاء (حصري) مع الموقع الرسمي لقبيلة الدواسر العريقة



الحمد لله رب العالمين والصلاة والسلام على سيد الأنبياء والمرسلين سيدنا ونبينا محمد ابن عبدا لله وعلى آله وصحبه ومن وآلاه ومن اهتدى يهديه واستن بسنته إلى يوم الدين

إخواننا أعضاء وزوّار ومرتادي الموقع الرسمي لقبيلة الدواسر



أجرى اللقاء وطرح الأسئلة :
عضو مجلس إدارة الموقع الأستاذ فهد بن هادي الغريري .


يسرنا في هذا اليوم أن نقدم لكم هذا اللقاء الخاص والحصري للموقع الرسمي لقبيلة الدواسر مع أحد كبار شعراء قبيلة الدواسر وأحد شعراء الموقع البارزين والمتميزين والمعاصرين للموقع منذ بدايته ومن أوائل الذين شجعوه سواء بالشعر أو بالأراء .

شاعرنا الذي نسلّط عليه الضوء اليوم هو شاعرٌ ظلم إعلامياً من قبل القنوات الفضائية الذي غلب في برامجها الشعريّة الغث على السمين ، شاعرنا حصل على العديد من خطابات الشكر والاشادة من بعض المراكز العلمية والمسؤولين والمهتمين بالأدب الشعبي . كلف برئاسة لجنة الفعاليات والإشراف والتحكيم لمسابقة الشعر الشعبي التي نظمت على هامش المهرجان الأول لمزاين الإبل في محافظة الخرج عام 1428هـ كما كلف بكتابة وإلقاء قصيدة الحفل الرسمي لهذا المهرجان بحضور عدد من أصحاب السمو الملكي الامراء يقوم حالياً بإعداد صفحة عن الموروث الشعبي بصفة مستمرة في مجلة البادية

شاعرنا ملك المفردة فطوعها فصفق الجميع لعذوبة قصائده وجمالها المطلق ، شاعرٌ له حضورٌ في محافل القبيلة السنويّة فنجده يقول بالمحفل السنوي الثالث لقبيلة الدواسر بدولة الكويت :



دواسر فعلهم بالمدح ياسر=اهل الامجاد خطلان الايادي
رجال ٍ من على التاريخ الاول=تصون الحد وتضد المعادي
على القالات ومصالا الحرايب=رسوا والشره ينصونه عمادي
ياكم خصم ٍ شكا الضدات منهم=كسر ولا تعشته الحنادي
ايلوا باعدها الامثال واجد=مواقف مروية حدب الهنادي
هم الحصن الحصين اللي يزبن=الا يا سعد منهم له سنادي
اهل شيمه واهل كرم وشجاعه=واهل رايه واهل راي ٍ قيادي
واهل نخوه واهل خوه وجيره=مقاطع حق عراف ٍ عوادي
واهل غرس ٍ واهل ملك وحضاره=واهل حردٍ واهل سرد وعتادي
واهل حدٍ وسيع ما يوصف=مسايـيـل تنثر في حمادي
من الوادي الى الخرج وشماله=على ما حدر العارض قصادي
واهل علم واهل سلم وبداوه=واهل مارد واهل قفر ومنادي


إلى أخر ما قال الشاعر ..

وعندما أقيم الحفل التكريمي لقبيلة الدواسر وذلك بعدما أنقذوا الشاب محمد بن فهد الصخابرة من حدّ السيف بمدة قياسيّة ، كان له حضور فقال :


يوم ان ابن عواد ماستر بالنوم=حارب لذيذ النوم مما جراله
امر ٍ من المولى مقدر ومقسوم=حكمه صدر في واحدٍ من عياله
ما لذ له شربٍ ولا لذ مطعوم=يرجي جليل الملك يلطف بحاله
ويوم الله انقذ نفس من عد معدوم=وخلاه عقب الظيق ينساح باله
نادى بني عم ٍ مشاكيل وقروم=كل ابلج ٍ يحري بكسب الجماله
حميةٍ نادى بها خص وعموم=من ثقل ٍ حمل ماقدر باحتماله
وجاوه ربوع ٍ للوفاء تفرق السوم=ومن الدواسر كل شهم ٍ عناله
وقفّ بجنبه وانتخى كل شغموم=واصخا بدفع المال من حر ماله
خطلان الايدي هم حجا كل مظيوم=ومن المفاخر كسبهم كل طاله
وقفاتهم ما توها تعرف اليوم=في ما مضى وقفات جود وصماله
بسلومهم كم فرجوا هم مهموم=وبافعالهم كم صدروا كل قاله
امدح هل الفزعات ذباحة الكوم=اهل الشيم واهل القيم والجزاله

إلى أخر ما قال الشاعر ..

وعلى الرغم من مشاغله الكثيرة فقد فتح أبواب مجلسه مرحباً بالمنبر الإعلامي لقبيلة الدواسر على شبكة الإنترنت وخصّ هذا الموقع بالحديث عنه وعن تجربته الشعريّة بمختلف أنواعها وطرح الأسئلة المتلهفين الكثير من متابعيه بمعرفتها .

إخواني لا نطيل عليكم ، لقاءنا مع الشاعر الكبير

محمد بن محسن بن حشفل آل سفر الخضراني


ضيف اللقاء الشاعر الكبير محمد بن محسن بن حشفل الخضراني





حضر اللقاء :
الأخ سالم بن محسن الأخ الأكبر لضيفنا وأبناء عمه الأخ الشاعر والمراقب بموقع الدواسر الرسمي محمد بن سالم الخضران والاخ ناصر بن سالم وبعض أبنائه .


عضو مجلس إدارة الموقع الأستاذ فهد بن هادي الغريري وبجانبه ضيف اللقاء .






س) في بداية اللقاء يا أبو محسن نحب نرحب بكم في الموقع الرسمي لقبيلة الدواسر العريقة ونسعد بإجراء هذا اللقاء المميّز معك .. بالواقع بودنا أن تتحدث لنا عنك من حيث النشأة والدراسة والحياة العملية ؟

ج) الله يحيّك يا أبو راشد ويحييّ الحضور والليلة عندي من أسعد الليالي على كل حال , النشأة ً أنا من مواليد 1387هـ تقريباً وحنا بطبيعة الحال كنا بدو اهل حلال عندنا ابل نشد وننزل وتخبر في ذاك الوقت مر على أكثر ديار نجد دهور قلت فيه قيمة الإبل وصار الكثير من الناس يحاول انه يتخلص من حلاله ومنهم والدي بعد ما عانا من ذلك تسنى له مرافقة سمو الأمير محمد بن سعود الكبير وحينها خطر في باله أن يبيع الإبل ويدرسنا أنا وأخواني ونزلنا في الخرج عام 1395هـ ودخلنا المدرسة في بداية هذه السنة وواصلنا الدراسة أنا وأخواني طبعاً أنا درست حتى المرحلة الثانوية ثم تعينت في المصانع الحربية بالخرج في عام 1404هـ وخدمت فيها تسع سنوات ثم بعده ترشحت من قبل ديوان الخدمة للعمل في دارة الملك عبدالعزيز بالرياض في عام 1413هـ وخدمت فيها ما يقارب خمسة عشر سنه ، ثم نقلت خدماتي إلى قيادة منطقة الخرج في عام 1428هـ ولا زلت فيها على رأس العمل الآن .

س) الكثير يتساءل متى كانت بدايتك مع الشعر ؟

ج) والله يا أبو راشد من الصعب إن أي شاعر يوقت بدايته مع الشعر , أنا والدي شاعر وطلعت في بيئة شعر وإستفدت منه ومن توجيهه لي والبداية الفعلية يمكن في عام 1405هـ تقريباً .

س) هذا السؤال لطالما يطرح نفسه بالساحة على كل شاعر وهو : هل تأثرت بشاعر معين ، وإن كنت تأثرت بأحد فنرجوا منك ذكر الأسماء وما هي أهم الإشادات التي حصلت عليها طيلة مسيرتك الأدبية ؟

ج) لا ما تأثرت ولكن إستفدت من الشعر القديم بحكم إطلاعي عليه صرت احرص على أني أطلع على تجارب الشعراء القدامى وأحفظ لهم ولاهوب شاعر معين ولكن فيه عدة شعراء استفدت منهم , أضرب لك على سبيل المثال الخلاوي ، وإبن سبيل ، والعوني , والقاضي ، وإبن لعبون كنت أقرأ لهم واسمع الناس اللي يحفظون لهم. أما الإشادات من فضل الله واجد منهم أمراء أشادوا بي عدة إشادات كتابية وشفوية وصدف أني تعرفت لي على رجال فيهم خير شرواكم سمعوا بعض محاولاتي الشعرية اللي أقولها في ذاك الوقت , منهم الشاعر عبدالهادي بن القعيمة الله يغفر له وهو يعتبر من كبار الشعراء صار بيني وبينه معرفه بدايتها عند الشيخ سعد بن معيذر المعيذر، من أعيان أهل الخرج والرجل هذا مجلسه مجلس لحواتٍ غانمة يجونه أمراء وأدباء وشعراء وصار تستهويني الجلسة فيه وعبدالهادي بن القعيمة رفيق له رفقةٍ خاصة وصرت أحصله عنده دائماً فترة من الزمن وكان يسألني عن الشعر ويشجعني وعطاني دافع قوي وصارحني لدرجه أنه قال لي أنا ودي أوجه لك قصيده أختبرك فيها وتوفي الله يغفر له ما بعد وجه لي شي منها كذلك شعراء من بني عمنا منهم عيدان بن راجس الهوامله وجه لي قصايد وهذه القصايد اعتبرها إشادة منه لي ليش لأنه ما وجه لشاعر غيري وصار لي مع عدة شعراء غيره فهذي من الأمور التي عطتني ثقةٍ بالنفس .

س) سؤال يطرح نفسه ويسأل عنه كثير من الناس وخاصة من القبيلة .. لماذا انت بعيد عن الإعلام ؟

ج) صحيح نسبياً أعلمك ليش بعيد عن الإعلام , أنا بدايتي مع الشعر كما قلت لك هي عام 1405هـ تقريباً وهو الوقت اللي كان عندي فيه هواية كبيرة وحماسي فيه قوي وكان ما فيه قنوات شعبيه مثل اليوم ما فيه ولا قناة سوى إذاعة الرياض وفيه جرائد وغيرها مجلة اليمامة وكنت متواصل معها وبعد ما جات القنوات هذي صارت رغبتي في الشعر قليله وصرت أنظر للوضع بعين الناقد وقل اهتمامي وصرت أكتفي بمجالس الطيبين شرواك وأحرص إني أحضرها ويصير لي فيها مجال .

س) تجد لدى كثير من الشعراء قصائد مقربة من نفسه كثيراً فتجده دائماً ما يرددها ويكررها .. فهل تطلعنا على اقرب قصائدك لنفسك ؟

ج) أكثر قصايدي قريبه لنفسي ولكن منها قصيده قد يكون لها إنتشار واسع عند الناس أقول فيها :


اول ما اقوله من كلامٍ وابديه=لا جا مجاله والرجال ابتدوبه
ذكر الله الواحد ويدعى باساميه=والمومنين بدينهم وحدوبه
ما خاب طلابه ولا خاب راجيه=يقبل دعا المسلم ويغفر ذنوبه
نطمع بغفرانه ونرجي حسانيه=منا اتباع امره ومنه المثوبه
من طاع كل امره وجنب نواهيه=كافاه بالرحمه وسهل دروبه
والشعر تاريخ العرب ينلقى فيه=سموه ديوان العرب واعتنوبه
مثل البحر سواحله مع مثانيه=باعماقه اهل الغوص تلقى صعوبه
احدٍ يجيب الدر منه ويجنيه=واحدٍ عليه يصير صيده عقوبه
ولا يجي زينٍ وينذاق حاليه=الا مع اهل الطيب لا سالفوبه
قال المثل قولٍ مع الناس ترويه=قبلي وانا جربت منه جروبه
عرف الرجال اللي على العز تبنيه=تجارةٍ طول الحياة محسوبه
والرابح اللي طيب الله مساعيه=له سمعةٍ عند الرجال محبوبه
ان غاب منهم ذكر بالخير طاريه=واليا نصاهم رحبوا وافرحوبه
حافظ على دينه وجود عراويه=ونفسه عن دروب الفساد محجوبه
وعرظه عن المنقود والهون حاميه=ولا لبس ثوبٍ للرياء فوق ثوبه
ولا صار به كبرٍ عن الحق يغويه=تنقاد لسلوب التواضع سلوبه
واللي سعيد الحظ والله مهنيه=من سلم من ذم العرب ما حكوبه
حساني ابن ادم تكافح مساويه=ومكارم اخلاقه تخفي عيوبه
ولا خير في منهو تنكر لماضيه=والوقت ما يدري حدٍ عن غيوبه
ما كتب للمخلوق فالعمر بيجيه=ماحدٍ يعمر به ويصفي شروبه
من طال به عمرٍ بدنياه يمديه=يمشي على دربٍ الاوادم مشوبه
منها شباب وعقبه الشيب قافيه=وسقمٍ عقب صحه لزومٍ ينوبه
وفرقاً عقب جمعاً تشتت هقاويه=وعقب الحياه الموت والدرب صوبه
من لا اتعظ من دور وقته وما فيه=لو زان له بيشوف منه العجوبه
واللي جهل عن حالنا اليوم ينبيه=ما حل بالعالم وحالة شعوبه
ويشوف كم شعبٍ على الله مشاكيه=غير المجاعه قايماتٍ حروبه
الموت من كثر المصايب يعانيه=على امرها الانفس تروح مغلوبه
وحنا بامانٍ عالي الشان مظفيه=وخيرٍ من الله غيرنا ماهتنوبه
عهدٍ يباشرنا السعد والرخا فيه=لو حكي للماظين ما صدقوبه
طابت لنا ايامه وطابت لياليه=الله يعز الدين واللي سعوبه
في ظل حكامٍ تطبق مباديه=العدل والسيف الصقيل حكموبه
صانوا حدود الدار وارسوا مراسيه=من فعلهم عدوانهم ما طمعوبه
دار السلام وكل مسلم يراعيه=دار الشرف بيت العرب والعروبه
دار عزيزٍ وعزه الله باهاليه=كلٍ يسوق الروح دونه جلوبه
من عهد ابو تركي ومجده يباريه=الدين ينشر والحدود مهيوبه
قلته ونا مابدي بقولي ولا اصخيه=الا اليا شفت العوارف رظوبه
ان ايدوني واعجبتهم معانيه=شريت من سوق الغلا ما شروبه
وان ما حصل تاييد مانيب باغيه=روحي على الناقص ماهيب مغصوبه
من لا عرف مقدار نفسه توطيه=ومن هان بعيون العرب ما حسبوبه
وصلاة ربي عد مانشت مناشيه=نوٍ من القبله تزبر انصوبه
على رسولٍ نور الله ممشايه=ادى الرساله والعباد اقتدوبه


س) أبو محسن صدر لك ديوان مقروء قبل عدة سنوات .. فهل لك نية بإصدار ديوان صوتي ؟

ج) إي نعم ، أبشرك الديوان اللي سويته كان بإلحاح من بعض المحبين حيث أشاروا علي به وأصدرته عام 1418هـ مع العلم أني ما طبعت منه كثير ألف نسخة ما بقت في السوق و أكثرها خصصته إهداءات للرجال اللي لهم حق علي مما شجعني إني أطبعه ثاني مره بطريقه أفضل من الأولى بإستشارة من عندهم معرفه إضافة إلى ديوان مسموع وهو الشي المطلوب الآن في السوق لأن الناس اليوم ما عندهم إستعداد إنهم يقرون أكثر الناس يبغون يسمعون وقد بديت بتسجيله بس بقى إضافات ضرورية وهي إلشيلات سوف تستغرق بعض الوقت بالكثير ستة أشهر .

س) أيهما أقرب إليك في نشر إبداعاتك الشعرية .. هل هي عن طريق الأمسيات أم من خلال التواصل عبر الصحف والمجلات أم عبر المنتديات ؟

ج) والله الأمسيات أنا ما أحرص عليها ولا تستهويني وبالذات أمسيات الأعراس كثيراً ما وصلني عدة دعوات واعتذرت من أصحابها واكتفيت بالنشر في بعض الصحف ، والمنتديات دورها كبير وتفاعلت معها وقدمت الكثير فيها وخاصة منتدى قبيلة الدواسر الرسمي .

س) نلاحظ طول بعض القصائد لديك هل تقصد ذلك أم لغرض القصيدة ؟

ج) أنا أعلمك الصراحة إن أكثر قصايدي يمكن تكون طويلة لأني أحب إللي فيها نوع من الشمولية تكلم عن عدة مواضيع , مع العلم إني بعض الأحيان ما أقدر أقول أكثر من بيتين ثلاثة بحكم إنها أدت الغرض المطلوب .

س) سبق وأن حصلت إحدى قصائدك على المركز الأول في إحدى المسابقات .. حدثنا عن ذلك ؟

ج) نعم هَذي مسابقه أقامتها جمعية الثقافة والفنون في عام 1417هـ للشعراء الشباب على مستوى المملكة , وكانتً عن ثلاث مواضيع :

1- عن أجمل قصيدة وطنية . 2- وعن أجمل قصيدة وصفية . 3- وعن أجمل قصيده غزلية .

و تقدمت لهذه المسابقة وحصلت قصيدتي الوصفية على المركز الأول , ودعونا في مقر الجمعيه في الرياض وأقاموا لنا أمسية أنا والشعراء إللي معي واستلمنا جوائزها والحمد لله وهذي من القصائد إللي أفتخر فيها .

س) أبو محسن .. يميل بعض الشعراء إلى أغراض معينة من الشعر فما هو أقرب أغراض الشعر لنفسك ؟

ج) قد يكون شعر الحكمه هذه من الامور اللي تستهويني والشي الثاني الشعر اللي فيه غموض اللي يتكلم عن موضوع لا يفهمه إلا قله من الناس مثل يوم أقول :


قال من قولـه سليـم ٍمالعيـوب= يرفعـه مالهـون دايـم ويحمـاه
لي سوال ٍعن الاجابـه ماينـوب = اسأل اللي كـل قصـدي ماخفـاه
كيف يضهر من سجن ماله ذنوب= بالله انشد كيف يسجن وش خطاه
اشرقت شمسه وكنه في غـروب= ماتلـذذ طـول وقتـه بالحـيـاه
واصبح المظلوب بالظلم مغصوب = من هواه اخطاه واخطاء من هواه
العديم اللـي تفـز بـه القلـوب= ظنتي ذالوقـت مايوجـد احـلاه
لابس ٍله من ثيـاب العـز ثـوب = والنزاهه لبسهـا لبـس العبـاه
لوعرف في وقتنا صار محبـوب= وارتفع بيـن الخلايـق مستـواه
كامل ٍبالطيب فـي كـل الـدروب = قومه اللي مالردى يحمـى حمـاه
حاكم ٍيحكـم ولحكامـه اسلـوب= المعرفـه مبـتـداه ومنتـهـاه
اتمنى يطلقـه فـي كـل نـوب عقب= منهو غث غيره من غثـاه
وقتنا سيره على الناس محسوب= واكثر العربان يمشي فـي عمـاه
كل مانظـر للشمـال وللجنـوب = شفت نـاس ٍعاكسيـن الاتجـاه
صار قول الصدق ذالوقت محجوب = والحقيقـه سلمهـا ماحـد ٍبغـاه
نسبة الناجح اقل امن الرسـوب = لان سلم العـرف عـوّد مغتـواه
الصدوق يحير من هرج الكـذوب = والكذوب يضيع من صدق احكـاه


س) والدك محسن بن حشفل شاعرٌ كبير .. ولكن السؤال الذي يبرز هنا هل قمت بجمع شعره ؟

ج) بصراحة هذا إعتراف مني وتقصير باني فرطت فيه يوم كان الله يشفيه يحفظه ويعلمنا به ما كنا نسجله وما عندنا نيه أن حنا نجمعه بحكم صغر السن في ذلك الحين وبعد ما تعب صحياً صار ما عاد نقدر ناخذه إلا من بعض معارفه اللي يحفظونه بيت أو بيتين مع إنه مقل وقصائده الغزلية إمتنعت من نشرها لأنها خلاص شي انتهى وقته وشي يمكن هو ما يرضاه والإخوان في موقع الدواسر جزاهم الله خير و مجله اليمامة سووا تقرير عن حياته و نماذج من شعرة .

س) في وجهة نظرك ضعف القصائد بين الشباب خاصة في الوقت الحاضر مع كثرة الشعراء .. على ما يعود السبب في ذلك ؟

ج) نقول بعضهم ما هوب كلهم , بعضهم يقصد بدون دافع حتى الشعراء الكبار منهم إذا قصد الشاعر مجاملة أو بدون دافع صارت قصيدته أقل مستوى من المطلوب وبعض الشباب إللي تشوف الكثير منهم في حياته ما مر في تجربه ولا عانا من شي من ضروف الحياة شاعر يبي يطلع ويُعرف قدام الناس اللهم إنه يكتب قصيده موزونة ومقفاة , هذى تطلع قصيدته ضعيفة .. الشاعر الحقيقي ما يقصد إلا من معاناة مثل الشعراء القدامى .. مثل ما قال المثل : الشعر من هيض ولا من غيض .

س) بودنا لو تحدثنا عن وجهة نظرك وهل أنت مع أم ضد قصائد الحداثة المنتشرة ؟

ج) لا أنا ضدها ، هذا فكر دخيل علينا بعض الشعراء أطلعوا على بعض الكتب الغربية التي تحمل فكر غير أفكارنا وصاروا يوظفونها في الشعر بما يسمى شعر الحداثة وهذا ماله عندنا أصل ولا أؤيده .

س) أبو محسن هناك من يجعل الشعر سلم يرتقي به لأغراضه الشخصية .. هل لك من تعليق على هذه النقطة ؟

ج) فعلاً اليوم بعض الشعراء يبغي يقضي لزومه باسهل الطرق ولا له وسيله في ذلك فتلقاه يحاول أنه يدرك مطلبه من فلان أو فلان بشعره وبالتأكيد فيه نزول بالشعر وهذا راجع لنفس الشاعر مع إن المدح باب من أبواب الشعر ولكن الصح ما يقال ولا يزين إلا في من يستحقه .

س) بودنا لو تعطينا مرئياتك وبكل صراحة في كثرة البرامج الشعرية في الأونة الأخيرة وبذات المسابقات الشعرية ؟

ج) أشوف إنها ضرت بالشعر اللي هي بعض البرامج الشعرية ليه لأنها فتحت المجال لمن هب ودب وصار كل وده يصير شاعر حتى بعضهم يفرض نفسه على الناس بالقوة لأن الشعر من أسهل الطرق لبروز الإنسان , وتحصله يبرز بأية وسيله حتى لو يشتري الشعر ما عنده مشكلة , المهم أنه يمشيها وتمشى هذي من ناحية والناحية الأخرى اللي هي المسابقة الشعرية اللي تعتمد على التصويت أنا ضدها بكل ما تعنيه الكلمة لأنها استنزاف لجيوب الناس وأكثر القائمين عليها ما قصدهم مصلحة الشعر , قصدهم كسب المال على حساب الشعر والشعراء وهذا ما نلاحضه مع الاسف ، مع العلم إني أحترم وجهة نظر جميع اللي يشاركون فيها ولا أقول فيهم إلا كل خير وتبقى هذي وجهة نظري الخاصة فأنا ضد الشي هذا لأن كرامة الإنسان أكبر والشاعر إللي يثق بنفسه أو الرجال العاقل يعرف أن الأمر هذا إنه يكسب من وراه ليش يكسب من وراي أنا شاعر لي مكانتي وتقديري والشعر في نفس الوقت ما هوب ذيك الوسيلة الوحيدة اللي يبرز فيه الشخص غير الشعر أمور كثيرة يمكن يبرز بها الإنسان نفسه أما علمٍ طيب أما مرجلة يعرف بها قدام الرجال , الشعر موهبة من الله يعطيها من يشاء إن حافظ عليها وعرف قيمتها فهي نعمة من الله وإن ما عرف قيمتها فهي ضده بكل تأكيد .

س) بحكم إطلاعك وإهتمامك بالتاريخ حدثنا عن بعض مؤلفات الدواسر عامه بحكم عملك السابق في دار الملك عبدالعزيز ؟

ج) الدواسر بصفه عامه أطلعت على أكثر المؤلفات التي تكلمت عنهم بحكم عملي السابق ومن قبله أنا كنت أحاول اطلع على أي شي يهتم بتاريخ الدواسر ، وأنا أعتبر أن هذه القبيله من أكبر القبائل الجزيره ومن أكثرها أمجاد ومن أوسعها أنتشاراً حيث نجد لهم ذكر في المصادر القديمه والمخطوطات والوثائق بس إن المشكله ما كتب تاريخهم بالطريقه الصحيحه واعتبر ان اكثر ماكتب عنهم حتى الان يعتبر محاولات لاترقى لمستوى هذه القبيله والمفروض ان الباحثين منهم يجمعون مايذكر أمجاد قبيلتهم بما يليق بهم ، الكلام في هذا يطول وأعتبر ان فيه نوع من التفريط وهذي مسؤليه الباحثين .

س) قلت : باحثين الدواسر .. لماذا بحاثين الدواسر خصوصاً ؟

ج) نعم لان مافيه غير الدواسر بيهتم في هذا الشي وأي دوسري أو أي إنسان يفتخر بقبيلته تلقى عنده أنتماء لقبيلته ومما يحز في النفس أن هالأمجاد اللي نسمعها ونقراها ما جمعت بالطريقه الصحيحه يطلعون عليها الأجيال القادمه وهذا شي ضروري ولكن هذي المسأله ما زلنا نأمل من باحثين الدواسر اللي عليهم الكلام أنهم يجمعون الشي هذا ويهتمون فيه ويبينونه للناس ، قبيلةً الدواسر كغيرها من قبائل المملكه لها تاريخ ولها أمجاد ، والحمد لله اليوم حنا في نعمه الله لا يغيرها علينا والهويه سعوديه هوية العموم كل أبناء قبائل المملكه تعتبر اليوم تحت رأيه واحده وهذا أكبر ما نفخر به وأكثر ما نحرص عليه ولكن لا زلنا نفتخر بأمجاد قبيلتنا وهذ شي ٍ لابد أن الناس يهتمون فيه ويحرصون عليه وأهم شي النشء اللي هم صغار السن المفروض أنهم يطلعون على أمجادهم وتاريخهم ، أنا وأنت والثاني نعرف الشي هذا بس بيجيك أجيال قادمه مايعرفون الشي هذا ، فمثل ماقلت حنا نؤمل من مؤلفين وباحثين قبيلة الدواسر أنهم يهتمون بما يخص الدواسر عامه .

س) بودنا لو تعطينا رأيك بكل صراحة عن الموقع الرسمي لقبيلة الدواسر العريقة ونبذة عن بداية إنضمامك بهذا الموقع ؟

ج) موقع الدواسر الرسمي اعتبره من انجح المنتديات وذلك بتقدمه الذي نراه وكما قلت لك سابقاً إني كنت أحرص على إني أطلع على كل شي ٍ يخص الدواسر وفي يوم من الأيام كنت مشغل جهاز النت وداخل على القوقل وأبحث عن أي شي يخص الدواسر وبالصدفه طلع لي موقع قبيلة الدواسر الرسمي وفرحت به وحرصت إني أعرف متى فتح ومن القائمين عليه وبالفعل كلمت الأخ دغش البطي الله يغفر له وهذا من الرجال اللي إفتخرت بمعرفتهم وأخبرته بالموقع وفرح به وهو بدوره كلم الاخ ابومبارك العماني وأخبره عنه ورجع وكلمني ثاني مره وشرح لي عنه ودعاني وسجلت فيه كعضو ، وهذي من الامور اللي نفتخر بها وحصدنا ثمارها اللي هي تعارف بني عمنا وأجتمعاتهم اللي صارت وأستفدنا منها فالملتقيات السابقة الحقيقة ماقصروا القائمين عليه قاموا بالواجب ولموا شتات القبيله وصار اكثر الشباب يسجل فيه ، لقينا فيه رجال تعرفنا عليهم بعضهم تشري معرفته شرواك يا أبو راشد وغيرك من الطيبين اللي عرفنا وهذي ثمرة من ثماره وأنا سبق وان ذكرته فاحدى قصائدي :


بجهد المنتدى اللي بان نفعه= نهج له منهج ٍ يحسب ريادي
لجمع الشمل واللي قايم ٍ به= رجالٍ في مساعيهم سدادي
وهي جمعا صلة رحم وتعارف= بعد ما صار كل ٍ في بلادي
أسودٍ دارهم وادي الدواسر= عرين ٍ ما طمع به كل عادي
بعضهم فيه واللي عنه راحوا= الى حلوا بدار صار وادي
بكل انحاء الخليج لهم مواطن= بعد ماحدهم مالوقت حادي
تنحوا يوم شحات المعوشه= وكل ٍ صاد خير ٍ واستفادي
ومعهم سمعة المجد القديمه= وكسب الطيب لاغلي المزادي
لاجت الاخبار لاحدٍ من طرفهم= الى انه راقي روس المبادي
دواسر فعلهم بالمدح ياسر= اهل الامجاد خطلان الايادي



إلى أخر ما قلت ..


ضيف اللقاء الشاعر الكبير محمد بن محسن بن حشفل الخضراني يتحدث للموقع الرسمي للقبيلة



س) بودنا لو تعطينا رأيك حول الأسماء المستعارة والتي تستخدم بالموقع للمشاركة بالقسم التاريخي ، وهل تؤيدها أم تعارضها ؟

ج) أنا لا أؤيد الكتابة بالاسماء المستعاره وأفضل كل عضو يكتب باسمه الصريح ، في كل الاقسام ماهوب التاريخ ليش لأن فكرة موقع قبيلة الدواسر ربط القبيله كل منها بالثاني ، انت اذا صرت تكتب بإسم مستعار وأنا بأسم مستعار ويش الفائدة المفروض كلا يكتب بأسمه الحقيقي ويصير تعرفني وأعرفك ، أنا مثلاً طرحت لي قصيدة وعقبت عليها انت بأسم مستعار مايعني لي كلامك شي هذا لأني ماعرفك ، أو حتى قصة تاريخية يصير مالها أي قيمه ، لا صرت واثق من نفسي ومن كلامي ليش ما أكتب بأسمي الحقيقي هذى من الضروري مع إن بني عمنا كلهم من خيرة الرجال ، أنا دخلته بأسمي الحقيقي من البدايه ولازادني هذا إلا خير والحمد لله رب العالمين ، الأمر الثاني بالنسبه لقسم التاريخ ، أنا أشوف أنه يخصص له باحثين مميزين من القبيلة .

س) بودنا لو توضح لنا هذا الأمر تخصيص باحثين مميزين من القبيلة ؟

ج) أنا ما أقول أن فيه قصور بس المفروض تخصيص أسماء ناس مختصين في التاريخ ولا ننسى جهود مشرف الاقسام التاريخية الاخ الاستاذ:ابوزيد الغييثي, لكن لابد من تضافر من قبل باحثين القبيلة لعدة أسباب الأولى أنه ما يطرح أي بحث أو كلام عن القبيله إلا مطلعين هؤلاء الباحثين عليه ، يعني يصير معتمد إذا نزل في قسم التاريخ حتى يصير بإمكان أي باحث أو مؤلف يرجع له وياخذ منه يصير الكلام هذا موثوق فيه ماهوب يحط بأسم مستعار ثانياً اي شخص عنده روايه ما نقحت ولا عرضت على الباحثين وتنزل في الموقع هذا سوف يلقى عليه بعض المأخذ ، لان موقع قبيلة الدواسر ما فتح ولا أستقطبوا أعضائه من جميع فخوذ القبيلة إلا للأمور المشرفة اللي نطمح لها وهي لم شتات القبيله وتعارفها وإبراز ماعندهم من أمور طيبه ، أنا بودي وهذا ما نأمله كذلك عدم تطرح ماقد يسء للأخرين .

س) من تقصد بالأخرين ؟

ج) أقصد القبائل الأخرى لأن كل ٍ فيه حقه من العلم الطيب .

س) أبو محسن هذا ولله الحمد والمنه سياسة الموقع منذ إنطلاقته وحتى يومنا هذا .. فهل لديك أي ملاحضة على هذه النقطة ؟

ج) صحيح هذا منهجه بس أنا احب أنه يركز عليه اكثر ؛ لأن القبائل الأخرى لها علينا حقوق أحد تربطنا به جيره وأحد تربطنا به صداقه وأحد تربطنا به أمور أخرى أضف عليها إن فيه منهو عضوا منهم معنا في هذا الموقع ولهم علينا حق الاحترام والتقدير وحنا وياهم اليوم الحمد الله رب العالمين تحت راية لا إله إلا الله في كل حال والطيب من القبائل الأخرى ما نعتبرهم إلا أخوان لنا كذلك يقدرونا ولنا عندهم مكانه.

س) بودنا لو نتحول إلى محورٍ أخر هو بخصوص ملتقيات قبيلة الدواسر السابقة التي تحدث تحت مظلة الموقع الرسمي لقبيلة الدواسر العريقة حدثا عنها وعن بعض تطلعاتك القادمة لها ؟

ج) جميع من تقدموا بتنظيم هذه الملتقيات قدموا ما فيه الكفاية وما قصروا وتولوه رجال منهجهم منهج طيب ومرجله والله يجزاهم خير على كل حال لو ماحصدنا من ثمارهم إلا معرفه كل طيب هذى بحد ذاته فخر وبالعكس كل ملتقى أفضل من اللي قبله ولازالت الأمور تتطور ولكن حنا نطمح لما هو افضل فالمستقبل ، الأولين ماقصروا بذروا بذره طيبه وهذا شي يحسب لهم والمقبلين إنشاء الله نأمل أنهم يقدمون ماهو أفضل ، فيه أمور هامة إذا حصل إنه يركز عليها فالملتقيات القادمه يكون أحسن أذكرها لك على سبيل المثال في عدة نقاط

أولاً : يكون عدة لجان كل لجنه يتولاها أحد الرجال المشهود لهم بالمعرفه وتدبير الأمور ، ثانياً : تكليف أحد الشعراء إللي يقيمون الشعر ويعرفون الشعراء إللي عليهم الكلام من القبيله لإختيار الشعراء إللي مفروض إنهم يستدعون أو يكرمون ، ثالثاً : مشرفين المنتدى لازم يكون لهم رإي وكلمه في تنظيم الملتقى ، رابعاً : إستقطاب الإعلامين والمذيعين المميزين لازم يكون لهم تواجد ، هذا من ناحية لجان تنظيم الملتقى إذا رجعنا للتكريم إذا فيه تكريم أو مفروض أنه يكرم :

أولاً : مافيه شي أفضل من كتاب الله وأشوف أنهم يشجعون صغار السن حفظه كتاب الله وهم المعروفين على مستوى القبيله ليكون حافز لهم واعانه على فعل الخير . ثانياً : تكريم المتفوقين دراسياً في جميع المراحل واللي حاصلين على المراكز الأولى على مستوى المملكه أو المناطق ليش ما أشجعهم وأستقطبهم ليهتم الناس بالشي هذا ويكون تشجيع للعلم وتشجيع الناس اللي بذلوا جهد . ثالثاً : وهو مهم تكريم الباحثين المميزين وتشجيعهم على البحث والتأليف . رابعاً : دعوة الرواه المميزين واستقطابهم ليتعرف كل منهم على الاخر والاستفاده من ما لديهم من الروايات . خامساًً : تكريم الشعراء المعروفين بالجزاله لأن الشاعر الجزل يمثل بني عمه وبالذات شعراء المنتدى وكذالك الشعراء اللي تمثيلهم مشرف لبني عمهم فالمناسبات الرسميه وبعض المحافل الاخرى . سادساً : تكريم رجال جالهم مواقف مشرفه ومنها المواقف الإنسانيه والمواقف اللي فيها فخر للقبيله عامة . سابعاً : تكريم الداعمين مادياً للمنتدى لأن المنتدى هو سبب الملتقيات هذه وهو الركيزه والعضو الفعال في الملتقيات ويعتبر نجاح الملتقى من نجاح المنتدى . ثامناً : تكريم الإعلاميين اللي جالهم جهد وخدموا بني عمهم بحيث يصير لهم حلقه وصل في مابينهم ويحط لهم أليه إنهم يجتمعون وتشجيعهم على مايبرز أخبار القبيله والتواصل في مابينهم وبالنسبه لتنظيم الحفل الرسمي لهذا الملتقى انا اشوف انه يسبقه ليلتين يكون فيها اجتمعات وامسيات منوعه حتى يكون فيه متسع من الوقت لجميع المشاركين . هذي تقريباً من الأمور اللي المفروض أنها تصير في الملتقيات القادمة وكل واحد منا يتطلع لها ومافيه شي كامل ، يصير بعض النقص والنسيان في بعض الأمور وحنا دائم نلتمس العذر للي يقصر في مثل هذا الشيء .

س) مجلة البادية الشعبية حسب ما طلعت عليه إنها خصصت لك مساحه في كل عدد .. حدثنا عن ذلك ؟

ج) مجلة البادية أصدرت من سنة ومؤسسها هو الأخ الإعلامي المميز مبارك بن وقيان الدوسري ، رجل تعليم فاضل ومن أصحاب المعرفة ومن الرجال اللي عندهم طموح وتطلعات عندما أنشأها طلب مني بعض الأراء وزودته بها مع ما يملكه من الأراء الناجحة وقام بإصدار هذه المجلة الراقية وعرض علي فكرة أنه يخصص لي مساحه في كل عدد أكتب بما لدي مناسب ، طبعاً مجلة البادية هي تحمل من أسمها الشيء الكثير تكلم عن أي شي يخص البادية وهذا شي يشكرون عليه وبدئت معهم تشجيعاً لهم بدون مقابل مادي وحسب علمي انها نجحت ولقت قبول عند الناس وحصلت على إشادات من اكثر المسؤلين ورجال فيهم خير حتى من دول الخليج ولا زلنا نأمل إنها تقدم ما هو أفضل للقارئ الكريم .

س) هل بإمكانك أن تحدثنا عن كتاباتك فيها ؟

ج) كتاباتي تحت عنوان (إختيارات) بدئت أول شي بمسميات الأبل في ثلاث أعداد ، بحثت في الموضوع هذا وجمعت مجموعه جيدة بحيث أذكر الأسم والمعنى والشاهد الشعري للمسمى وخلصت منه ، وبدئت في مواضيع أخرى في الأعداد القادمة منها ما يتكلم عن العادات والأماكن التاريخية والشيم وسير بعض الأعلام اظافة الى بعض قصائدي .

س) في ختام هذا اللقاء هل من نصيحه تقدمها للموقع الرسمي لقبيلة الدواسر ؟

ج) الموقع بكل ماتعنيه الكلمه ناجح ومميز ولا فيه عمل يكون كامل والكامل وجه الله ولكن حنا لنا تطلعات نرغب أنها تحقق فيه ، أولاً أنا ودي الاستفاده بما جمع بهذا الموقع من السوالف والاشعار الطيبه او ما صار من ملتقيات سابقه ولاحقه بحيث يألف كتب تاريخيه عن القبيلة . ثانياً الابتعاد عن كل مايثير الشحناء بين ابناء القبيله والحرص على كل مايجمعهم ويرفع سمعتهم . ثالثاً انا ما أؤيد كثر المنتديات اللي تحمل إسم القبيله بالكثير إثنين أو ثلاثة وهذا يمكن يكون فيه نوع من الصعوبة ، والمفروض أنه يكون واحد من شان يكون الناس وجهتهم واحدة والله يكتب اللي فيه خير للجميع .



(( يتبع بالمتصفح التالي : الشاعر الكبير محمد بن محسن بن حشفل آل سفر الخضراني في لقاء (حصري) مع الموقع الرسمي لقبيلة الدواسر العريقة ))

 

 

 

 

    

رد مع اقتباس
قديم 05-12-2009, 06:35 PM   #2
 
إحصائية العضو







الإداره غير متصل

الإداره is on a distinguished road


افتراضي رد: الشاعر الكبير محمد بن محسن بن حشفل آل سفر الخضراني في لقاء (حصري) مع الموقع الرسمي لقبيلة الدواسر العريقة

من قصائد ضيفنا :

القصيده الوصفيه لضيفنا الحائزه على المركز :


الحمد للمعبود جزل الوهايب=اعظم عظيم ٍ واجبٍ الثنا له
واكرم كريم وللملا خير ثايب=ما ينحصى فظله تعالى جلاله
بامره تتالا مرزمات السحايب=على جنوبي البلاد وشماله
لا انشت مزونه جا لوبله سكايب=من رايح القبله يسوقه خياله
يسـّيل بطون السهل والجذايب=لا فاض سيله مع متالع جباله
لاجيت لك دار ٍ من الخير صايب=لا كل روض ٍ به تساقى هجاله
تشوف عشب القاع شوف العجايب=قاع ٍ جديد النبت يظفي جماله
وراع الحلال اللي يحسب الحسايب=استر بالمرباع وانساح باله
كلٍ بداره جا له الكيف طايب=مربع ٍ به مايدور بداله
ساعة رخاً ما حل فيها نشايب=ماحدٍ يضد احدٍ شرابه صفا له
امن وامان وسالمين المصايب=مصايب شعوبٍ سببها الظلاله
واكبر غناة الرجل لوكان غايب=يامن على عياله وحاله وماله
في ظل حكم ٍ حط الاعداء صحايب=مبداه دين الله وشرع العداله
حكم الشيوخ موردة كل هايب=اللي خذوا باسماء الفخر كل طاله
ماخذوا فخرهم بالحكا والطلايب=ولا رجعوا ملك الجدود بسهاله
الا بصير ٍ في مصالى الحرايب=لين احتموا نجد المسمى رجاله
زاحوا طواغيت الفتن بالغصايب=والغوا حياةٍ تعتريها الجهاله
يوم الجزيره بين سلب ونهايب=فيها القوي يبلا الظعيف بحلاله
حياة خوفٍ ما وراها كسايب=يجفل المخلوق فيها ظلاله
والجوع والحرمان صار السبايب=ما ياجد الرجال عيشة عياله
دور ٍ محاه اللي يدير الهبايب=دور ٍ على الله حلته وارتحاله
يوم الله بحكمه نواله ذهايب=حط الله ال سعود سبة زواله
جاها النجيب يحث سير النجايب=للموت ولا ديرته لا محاله
ما جاب جيش ولا جمع له كتايب=غامر بكل مجربٍ عرف خاله
خمسين قرم وعشرةٍ مالقرايب=عيال عمه كاسبين الشكاله
يتلون ابو تركي عطيب الضرايب=نجدٍ توصي له وهب الهوى له
من يوم ذعذع له نسيم الهبايب=ما عاد قر وراس خصمه زما له
عاف الحياة وعاف شوف الحبايب=عشر سنوات ومرقده ما حلاله
بالف وثلاث اميه عن الدار غايب=وتسعة عشر هجري من البعد جاله
باعوا عمار العز بيع الجلايب=خامس شهر شوال باول هلاله
ليلة دخول القصر راع الركايب=عقب السرى والسير نزل رحاله
يوم الثميدي جا لحسه نحايب=عيد وفرح وسرور والنصر فاله
ضحى بعيد الفطر يا للعجايب=باللي يظن الوقت فيها صفا له
قضى على خصمه وطفا اللهايب=واقفت همومه والزمان استواله
وطاب الفرح مع ناقضات الذوايب=وعقب التكدر شرب صافي زلاله
حيثه غسل مر ٍ على الكبد ذايب=عز ٍ من الله يوم حظه دعا له
نادى السعد والمجد جاله ندايب=احيا تواليّه وجدّد سماله
نبع المصايب حط فوقه نصايب=والدين علا كلمته وارتكاله
بالعدل عدل كل ما كان عايب=واقام ثالث دولةٍ للرساله
وحد كيان ٍ ما يشوبه شوايب=تكفل به حقوق المواطن كفاله
والناس من عقب السنين الصعايب=في نعمةٍ كل ٍ بها اليوم داله
يجهل بها ياهل القلوب اللبايب=الجاهل اللي ما تفكر بحاله
من خلقته ما شاف فيها غلايب=ينعم بامان ويسر عيش ٍ هنا له
ماهوب يدفع في ثمنها ضرايب=الغافل اللي ما بخص دورها له
الله يعدينا جميع النوايب=فضل ٍ يدوم بشكر من كان ناله
ولا يصيب ابن ادم الا عقايب=كم واحدٍ تيار الاوهام شاله
توحي له افكاره ومسعاه خايب=يسمم عقول البشر من هباله
والدين له ما ينتسب كل سايب=من خالف المله جذت به حباله
والحمد للمعبود جزل الوهايب=اعظم عظيم ٍ واجبٍ الثناله


***

القصيده التي تقدم بها الى مقام صاحب السمو الملكي الأمير سلمان بن عبدالعزيز أمير منطقة الرياض


السلام بمبتداي ورحمة الله وبركاته=للرجال اللي ثمين القول تحضى باستماعه
والقصيد يزين لامن جات حزة موجباته=لا تهيا الاجتماع اللي على عز وطاعه
والثناء للي كثير الناس تشهد مكرماته=حافظ حق العرب عنده مثل حفظ الوداعه
مثل منهو لا نصاه المدح جمل مفرداته=نفتخر به كل وقت ونحتفي به كل ساعه
ذاك والله ستر نجد اللي يذريه وغناته=ونوره اللي فالدياجي دايم يوضي شعاعه
سيدي سلمان هو عز الرياض وهو شفاته=وشوقه اللي دون غيره مولع باسمه ولاعه
ينطق التاريخ با سم المجد وتعده رواته=والوثائق للمورخ جات تعطيه اندفاعه
يكتب الاحداث ويفيد العرب بمولفاته=سلسله الاخبار للعالم حكاها عن قناعه
منهو اللي انقذ ارضه وانقذ الناس بحياته=منهو اللي معجزة الامجاد صانعها صناعه
منهو اللي رد ملكه ثم كسر شوكة عداته=يوم عن داره تنزح ما نواها بالقطاعه
منهو اللي قام بالتوحيد واصبح من احماته=كلمة التوحيد عنده حطها باعلى رفاعه
منهو اللي زال نزعات الظلال ومحدثاته=طهر افكار العرب منّه وحط لها مناعه
منهو اللي زاح عن شبه الجزيره منكراته=الجهل والظلم زاله والتفرق والمجاعه
كان خوف وكان حكم الشرع ما يرضي عصاته=الضعيف من القوي مظلوم ويشوف انهزاعه
كان كلٍ يذبح الثاني مثل ذبحه لشاته=مسرح ٍ فيه الفتن تملي لاهلها كل راعه
مثل ما قال المثل نجدٍ لمن طالت قناته=لين جاها من جلب روحه على سوق المباعه
باعها في ليل ٍ اضلم موحش ٍ يتعب سراته=منه فجر العز وسط الكون يا كبر اتساعه
عقب ماهو فالكويت وشوق قلبه وامنياته=للرياض اللي دعاه وجا يبي ينهي نزاعه
مستميتٍ بـيّت المصمك وعند الله نجاته=من يدين اللي طمع بالحكم يا زين انتزاعه
من يدين اللي يظن الوقت تصفي له حلاته=ما درى ان الدار ترجي واحدٍ بالفعل صاعه
قال حان الوقت ياللي طامع ٍ بالحكم هاته=دار ابوي ودار جدي والله ما توخذ طماعه
ذاك والله هو معزي ويش نذكر من صفاته=قوته بالله خذاها ثم خذاها من ذراعه
خاض نجد وشاف ويلات الزمان ومنغصاته=وكابد الدنيا بعزم وناطح الوضع بشجاعه
كل عدٍ خالي عوص النظاء ذاقن صراته=زرفلن في ساقة اللي ما ملك حتى متاعه
كود مصقول ٍ رقبان ٍ في يده تقطر شباته=ما جزع مالموت حيث الموت مامنّه جزاعه
يوم وحــّـد ما قعد يرقب حدٍ لمفاوضاته=كل عدو ٍ موحي ٍ ذكره غدى قلبه رعاعه
حارت كبار الدول من حنكته ومواجهاته=يوم سكان الجزيره ماحدٍ معه استطاعه
ليث غابٍ حد داره ماحدٍ يقرب جهاته=عقب ماهو للمهالك عرضةٍ تقنب سباعه
طهر البيتين والحجاج حجوا ببركاته=وكل شي ٍ خافي شره نزع عنه قناعه
والزم المسلم على مالله شرع يدفع زكاته=وكل شمل ٍ كان متفرق نوى الله باجتماعه
صار شعبٍ منهجه واحد بعد حالة شتاته=والوطن واحد وحكم العدل رده عن ضياعه
من الخليج ابناء القبايل للحجاز وملحقاته=ومن طريف الى شروره حطهم ربع وجماعه
في مسيره في وقوفه في جلوسه في صلاته=يبتهل لله يجي منه للاسلام انتفاعه
وعز الاسلام بحياته ثم حتى في مماته=خلف الله له عيال ٍ للعهد فيهم بتاعه
ناهجين ٍ ما نهج به واحفظوا منه وصاته=كل منهم منصح ٍ زاهد وفي دينه وراعه
الملوك اللي حموا حد الوطن ومقدساته=من مسك منهم زمام الامر قاده بالوقاعه
واكبوا ركب الحضاره واكسبوا من منتجاته=دولة بالخير فاضت يالصناعه والزراعه
ذا وصلى الله على خير الملا وافضل زكاته=للرسول المصطفى اللي خصه الله بالشفاعه


***

تلقى ضيفنا خطاب شكر من صاحب السمو الملكي الأمير سلمان بن عبدالعزيز أمير منطقة الرياض بخصوص قصيده السابقه عندما تقدم بها إلى مقام سموه الكريم ، ولهذا قال في هذه القصيده :


مانيب في حاجة الشهره والاعلامي=كل ٍ مقدر واقول مكثر ٍ خيره
اللي بعمري كسبت اعتبره وسامي=خطاب سلمان عندي مالي بغيره
حضيت به وافتخر به طول الايامي=دامه لي موجهٍ شكره وتقديره
سلمان عز الرياض وسوره الزامي=زيزوم اهل نجد لاعدوا مشاهيره
شيخ العداله سند من جاه منضامي=بحر الندى ريف شعبه طيب السيره
المدح يعرف له شروط وله احكامي=ومثله الى قيل فيه يزين تعبيره
والشعر امانه وعقل ومنطق ٍ سامي=وذوق ٍ يعبر بشتى الحسن تصويره
اخترت لي منه ما يلزمني الازامي=في ما يورد من العلم ومصاديره
ولا فلانيب طرادٍ للاوهامي=ولا نيب من يجهل القول ومعابيره
انقد على اللي تغره بعض الاحلامي=اللي دليل الكلام اخلف معاييره
لو قال ما يظهره عن دين الاسلامي=اهم شي تصفق له جماهيره
وانقد على اللي يدور فيه الاقيامي=اللي للاطماع حاميةٍ مداويره
يمشي مع الناس مداح ٍ وذمامي=من شاف كنه خشيره في مذاخيره
ما يدري انه لنفسه صار ضلامي=وانه توهم وخانه سو تفكيره
قلته كما قالوا اهل العرف قدامي=يا سعد من دله الله منهج الخيره


صورة ضوئيّة للخطاب :



***

من خواطر ضيفنا :

هذه بعض الأبيات التي قالها ضيف اللقاء في بعض المواقف ولم يكملها بحكم إنها تعتبر من الخواطر


الى بدالـك واجـبٍ مالمواجيـبب = انصحك يالي تستمـع للنصيحـه
لا تروح كود لنادر ٍ يكسب الطيب = ترى الردي عنوتك صوبه فضيحه


***


سود الله وجه من ينسى الجماله = يجحد المعروف ويبور برفيقـه
ما درى انه محزمه في كل حاله = وان طريقه لا بدى الازم طريقه


***


بغيت الفوايد من ورى الفقري الصعلوك=وعقب غدى في راس مال بعـد شكـه

***


لولا الطمع في رفقة الطيبينـي = ارتحت في دنياي ماتعبت روحي

***


تبين الجماله عنـد منهـو يثمنهـا =وبعض العرب لو طبت مافيه متجمل
اجامل من اول واجبر النفس وارهنها = ولكن عقب اليـوم مانيـب متحمـل

***


لقيت ما للبعـد ذالوقـت جـوره = لا بعدت من بعض المخاليق ضوك
وقتاً عسى ربي يكافـي شـروره = ماعاد تعرف صاحبك من عـدوك


***


رفيقي الغالي الى ابطيت منـه = في واجبه حسيت مني بتقصير
ان ماوفيت وجيت من فوق ظنه = لا خير باللي يجحد الطيب لا خيـر


***


بعض العرب لو زان لا تحسبنه = بالود قلبه منصح لـو تبسـم
فلا يغرك من ضحك لك بسنـه = تراه ينثر لك بوسط العسل سم


***


المجلس اللي فيه منتب بترتـاح = الافضل انك منه تخلـي مكانـك
سيّر على اللي عنده البال ينساح = حتاك يدله خاطرك فـي زمانـك


***


طراة الكلام الزين لا زينه راعيـه= ما يصخيبه الا عند منهم يعرفونـه
من اكبر خطا لا خاضوا الجهالة فيه= يحوسونه اللي ما يعرفون مضمونه


***


بعض العرب لابطيت منه نصيتـه = يلزم علي لو ما لفى منـه داعـي
وبعض العرب لاجيت من عند بيته = اخترت منهاج الدروب الوساعـي


***


قدر رفيقك كان تبغيـه ينصـاك = بين مقامك له ونضف ضميـرك
حتى يستانس معك كـل ماجـاك = ولا يهجـرك ويتلاجـا بغـيـرك



***


نحمدالله لي مع الطيـب علاقـه= كل شهم ٍذايع بالطيـب صيتـه
من قريب ومن مشاكيل الرفاقـه = اذخره والى بـدا الازم نصيتـه
وافتخر به واتشرف بالصداقـه= يوم بعض الناس عرفه مابغيتـه
قاطع ٍحبل الصله من كل عاقـه = عايفٍ شوفه ونفعـه مارجيتـه



***


آخشى حريبي والبلا من صحيبي = يمسك خطاي وزلتي ما تفوتـه
وده يكبـر غلطتـي ويحكيبـي = يفرح ويشهرها على طول صوته
ما يدري اني مخفي عنه غيبـي = مخفيه عنه وصار غبنة وموتـه
ما أعطية لي غاية ولويحتفيبـي = ما ثق بودة لي ولا أظمن سكوته



***


احسبنـه كـان يحمـل باتـشـرّه= مير ما حصلت للمشـروه داعـي
واحـدٍ حالـي بعـز ٍ مـا يسـرّه= خش وجهه وانكشف عنه القناعي
قلت هذي مـد كفـي لـك مبـرّه= ما دريت اثره يبي يلوي ذراعـي
عقب هذي شمت من خيره وشره= رفقته منها نويت اطوي شراعـي
اشهد ان بعض الظنون انها مغـرّه= واشهد ان بعض الجميل انه ظياعي



***


ان كان تنشد عن سبب ظيعة الراي= انشد وانا باعلمك ويش الاسبـاب
واقول لك الانسان بالطبع خطـأي= يخطي قدم رجله وياطى على الداب
المشكله ماهيب في كـل دعـواي= المشكله موت الثقه بين الاصحـاب
لاعـاد تنشدنـي يكفيـك معنـأي = اليوم انا من عملة الناس مرتـاب
اخذت درس ٍمن تجاريـب دنيـأي =انظر به اللي صار واخذ له حساب



***


مدام ان مزاجه ما صلح لي وهرجه شين =على جيتـه ومشاهـده ويـش كلفنـي
لا بالله باصد ومنه بابعد بشوف العيـن= وعلى ايات حال رفقتـه مـا تشرفنـي



***


وقد قدم الموقع الرسمي لقبيلة الدواسر العريقة ممثلاً عضو مجلس الإداره الأستاذ فهد بن هادي الغريري شهادة شكر وتقدير لضيف اللقاء الشاعر الكبير محمد بن محسن بن حشفل آل سفر الخضراني كـ شكر وتقدير لما قدم للموقع منذ إنطلاقته .




صور أرشيفيّة لضيف اللقاء ووالده ، وبعض الشهادات التي إستحقها :

















صور جماعيّة من اللقاء :











وقد وجه الشاعر الكبير محمد بن محسن بن حشفل الدوسري هذا الخطاب لأسرة الموقع الرسمي لقبيلة الدواسر العريقة ، شاكرا ً مجهودهم مجددا ً الثقة بهم كممثل القبيلة الرسمي على شبكة الإنترنت .






في ختام هذا اللقاء الممتع لايسعنا الا نتقدم بخالص الشكر والتقدير لـ الشاعر الكبير محمد بن محسن بن حشفل الدوسري على إتاحه هذه الفرصة لنا وعلى أريحته وعلى سعة صدرة وإجابته على جميع الأسئلة ، سائلين المولى عز وجل أن يوفقه ويسدد على طريق الحق خطاه .

(صوت قبيلة الدواسر)
منتدى قبيلة الدواسر الرسمي
www.alduwaser.org/vb

 

 

 

 

    

رد مع اقتباس
قديم 05-12-2009, 07:05 PM   #3
 
إحصائية العضو








فهد الغريري غير متصل

فهد الغريري is a jewel in the roughفهد الغريري is a jewel in the roughفهد الغريري is a jewel in the rough


افتراضي رد: الشاعر الكبير محمد بن محسن بن حشفل آل سفر الخضراني في لقاء (حصري) مع الموقع الرسمي لقبيلة الدواسر العريقة

بسم طاقم موقع الدواسر الرسمي اشكر الشاعر الفاضل محمد بن محسن بن حشفل الخضراني. على استضافتنا في منزله العامر وعلى سعة صدره رغم مشاغلة على اجراء هذا اللقاء القيم المفيد ونسأل الله لنا وله التوفيق والسداد

 

 

 

 

 

 

التوقيع

    

رد مع اقتباس
قديم 05-12-2009, 07:26 PM   #4
 
إحصائية العضو








نايف الخييلي غير متصل

نايف الخييلي is on a distinguished road


افتراضي رد: الشاعر الكبير محمد بن محسن بن حشفل آل سفر الخضراني في لقاء (حصري) مع الموقع الرسمي لقبيلة الدواسر العريقة

الشكر الجزيل للشاعر الجزل محمد بن محسن الخضراني على هذا اللقاء الممتع
وعلى قصايده الجزله واقوله صح لسانك واعتلى شأنك , وهو شاعر بلاشك تستمتع
بقرأة قصايده ولو انه مقل في التواصل مع الاعلام فمثله لابد الاعلام يسع له وليس هو
من يسعى للإعلام , وشكر خاص لأخوي الاستاذ فهد بن هادي الغريري على جهده
وتعنيّه لإجراء اللقاء والله يطول بعمره ويجزاه خير الجزاء

 

 

 

 

    

رد مع اقتباس
قديم 05-12-2009, 07:55 PM   #5
 
إحصائية العضو







خالد المشاويه غير متصل

خالد المشاويه is on a distinguished road


افتراضي رد: الشاعر الكبير محمد بن محسن بن حشفل آل سفر الخضراني في لقاء (حصري) مع الموقع الرسمي لقبيلة الدواسر العريقة

نشكر جزيل الشكر للشاعر الكبير / محمد بن محسن الخضراني على اتاحته الفرصة للموقع لإجراء اللقاء الرائع وصح السانك يالقرم

ولا ننسى ان نشكر الأخ الغالي / فهد الغريري على اجراء هذا اللقاء والله يطول بعمره

ونشكر ادارة الموقع جزاهم الله خير على هذا الجهد الجبار لخدمة القبيلة والله يطول بعماركم على الطاعة

 

 

 

 

 

 

التوقيع

ماني من اللي زلة الصاحب لاجاته تفرحه = بعض البشر ماميّزت باصحابها وخصومها
وان جا يحرّث جمر صحبة عمر بالطيب اطرحه = لي عادةٍ يوم العرب بطبوعها وسلومها
يوم الجدي ماغاب نجم سهيل بالعام المحه = مراجلٍ تحضر مع الموسم تغيب نجومها
والقرم فعل الغانمة عند اللوازم مشلحه = والا الضعوف ضعوف لو تكشخ بكل هدومها

    

رد مع اقتباس
قديم 05-12-2009, 08:29 PM   #6
 
إحصائية العضو







من الدواسر غير متصل

من الدواسر is on a distinguished road


افتراضي رد: الشاعر الكبير محمد بن محسن بن حشفل آل سفر الخضراني في لقاء (حصري) مع الموقع الرسمي لقبيلة الدواسر العريقة

الاخ فهد الغريري مشكور على جهودك الطيبه طالتك حياتك على العز والطاعه

 

 

 

 

    

رد مع اقتباس
قديم 05-12-2009, 10:05 PM   #7
 
إحصائية العضو







راشد المسعري غير متصل

راشد المسعري has much to be proud ofراشد المسعري has much to be proud ofراشد المسعري has much to be proud ofراشد المسعري has much to be proud ofراشد المسعري has much to be proud ofراشد المسعري has much to be proud ofراشد المسعري has much to be proud ofراشد المسعري has much to be proud ofراشد المسعري has much to be proud of


افتراضي رد: الشاعر الكبير محمد بن محسن بن حشفل آل سفر الخضراني في لقاء (حصري) مع الموقع الرسمي لقبيلة الدواسر العريقة

بيض الله وجه شاعرن القدير ابو محسن على هذا اللقاء المميز ولاهنت يابو راشد على إجراء هذا اللقاء والذي من خلاله تعرفنا أكثر على شخصية وشعر شاعر الوصف والحكمة متمنين له التوفيق النجاح في مسيرته الشعرية وجميع أموره.
لقاء مميز وممتع وللجميع ودي وتقديري ،،،

 

 

 

 

    

رد مع اقتباس
قديم 05-12-2009, 10:23 PM   #8
 
إحصائية العضو







محمد بن سالم الخضراني غير متصل

وسام شاعر التميّز .: وسام يقدم لمن يستحق أن يطلق عليه وسام الدواسر الذهبي: للأعضاء المميزين والنشيطين - السبب: لنشاطه الملحوظ ومشاركاته المميزه بالموقع
: 2

محمد بن سالم الخضراني is on a distinguished road


افتراضي رد: الشاعر الكبير محمد بن محسن بن حشفل آل سفر الخضراني في لقاء (حصري) مع الموقع الرسمي لقبيلة الدواسر العريقة

اخوي فهد الغريري

بيض لله وجهك ولله لايهينك على هذا اللقاء الاكثر من رائع

ونشكر ابن العم الشاعر محمد بن محسن على اللقاء الطيب

تقديري واحترامي

 

 

 

 

    

رد مع اقتباس
قديم 06-12-2009, 09:34 AM   #9
 
إحصائية العضو








عبدالله الحافر الغييثي غير متصل

وسام الدواسر الذهبي: للأعضاء المميزين والنشيطين - السبب: لنشاطه الملحوظ ومشاركاته المميزه بالموقع
: 1

عبدالله الحافر الغييثي is on a distinguished road


افتراضي رد: الشاعر الكبير محمد بن محسن بن حشفل آل سفر الخضراني في لقاء (حصري) مع الموقع الرسمي لقبيلة الدواسر العريقة

الشكر الجزيل للشاعر الجزل محمد بن محسن الخضراني على هذا اللقاء الممتع
وعلى قصايده الجزله واقوله صح لسانك واعتلى شأنك , وهو شاعر بلاشك تستمتع
بقرأة قصايده ولو انه مقل في التواصل مع الاعلام فمثله لابد الاعلام يسع له وليس هو
من يسعى للإعلام , وشكر خاص لأخوي الاستاذ فهد بن هادي الغريري على جهده
وتعنيّه لإجراء اللقاء والله يطول بعمره ويجزاه خير الجزاء

ومنور يابوسالم في الصوره

 

 

 

 

    

رد مع اقتباس
قديم 06-12-2009, 10:11 AM   #10
 
إحصائية العضو







دغش بن حمد بن منصور غير متصل

دغش بن حمد بن منصور is on a distinguished road


افتراضي رد: الشاعر الكبير محمد بن محسن بن حشفل آل سفر الخضراني في لقاء (حصري) مع الموقع الرسمي لقبيلة الدواسر العريقة

في البدايه احب ارحب بالشاعر الجزل / محمد بن محسن ,

وصح الله السانك وبيض الله وجهك على هذه المقابله الطيبه ,

والشكر موصول لادارة هذا المنتدى الغالي , على جهودهم الطيبه ,وعلى هذا اللقاء الجميل , والذي بين لنا بعض الاسرار اللتي يخفيها عنا شاعرنا ومن ظمنها الخطاب الموجهه من امير الرياض وهو يستاهل , وفوزه بعدة مسابقات , ونباركله كذلك ,

واما من ناحية الاعلام ,,فأتوقع شاعرنا وغيره شعراء كثير من بني عمنا مقلين في الاعلام,, فما أدري هل هذا الشي منهم او من نفس الاعلام المقروء والمرئي ,وانحياز الاعلامي لربعه وقبيلته واتوقع وبشكل اكبر انه هذا هو الحاصل ,,


الله يعطيكم العافيه على هذا اللقاء ,, وعودتنا ياادراتنا على مثل هذه اللقاءات الرائعه
ولا انسى المبدع وخفيف النفس (فهد الغريري)على جهوده الطيبه



دمتم

 

 

 

 

    

رد مع اقتباس
قديم 06-12-2009, 11:30 AM   #11
 
إحصائية العضو








فيصل الشكري غير متصل

وسام التميز: وسام التميز - السبب: نظيرا ً لجهوده الكبيره في المنتدى
: 1

فيصل الشكري is on a distinguished road


افتراضي رد: الشاعر الكبير محمد بن محسن بن حشفل آل سفر الخضراني في لقاء (حصري) مع الموقع الرسمي لقبيلة الدواسر العريقة

نشكر الاداره ممثله باالأخ العزيز فهد الغريري على هذا اللقاء


والشكر موصول لشاعر الكبير محمد بن محسن بن حشفل الخضراني على اتاحة الفرصة للاعضاء والزوار للاطلاع على المخزون الشعري الذي يمتلكه .


وتقبلوا تحياتي,,

 

 

 

 

    

رد مع اقتباس
قديم 06-12-2009, 11:38 AM   #12
 
إحصائية العضو








متعب الشكري غير متصل

متعب الشكري is on a distinguished road


افتراضي رد: الشاعر الكبير محمد بن محسن بن حشفل آل سفر الخضراني في لقاء (حصري) مع الموقع الرسمي لقبيلة الدواسر العريقة

نشكر جزيل الشكر للشاعر الكبير / محمد بن محسن الخضراني على اتاحته الفرصة للموقع لإجراء اللقاء الرائع وصح السانك يالقرم

ولا ننسى ان نشكر الأخ الغالي / فهد الغريري على اجراء هذا اللقاء والله يطول بعمره

ونشكر ادارة الموقع جزاهم الله خير على هذا الجهد الجبار لخدمة القبيلة والله يطول بعماركم على الطاعة

 

 

 

 

 

 

التوقيع

    

رد مع اقتباس
قديم 06-12-2009, 12:05 PM   #13
 
إحصائية العضو







ابوبدر المصارير غير متصل

وسام الدواسر الذهبي: للأعضاء المميزين والنشيطين - السبب: لنشاطه الملحوظ ومشاركاته المميزه بالموقع
: 1

ابوبدر المصارير is on a distinguished road


افتراضي رد: الشاعر الكبير محمد بن محسن بن حشفل آل سفر الخضراني في لقاء (حصري) مع الموقع الرسمي لقبيلة الدواسر العريقة

كل الشكر للادارة الكريمه ممثله في الاخ العزيز ابو راشد على اجراء هذا القاء المميز مع الشاعر الكبير محمد بن محسن الخضراني وبيض الله وجهه على اتاحة الفرصه لكي نتعرف عليه اكثر وصح الله السانك يابو محسن وبالتوفيق ان شاء الله

 

 

 

 

 

 

التوقيع

[IMG][/IMG]


توتر

@11_sa3od

    

رد مع اقتباس
قديم 06-12-2009, 11:52 PM   #14
 
إحصائية العضو







سهل الدوسري غير متصل

سهل الدوسري is on a distinguished road


افتراضي رد: الشاعر الكبير محمد بن محسن بن حشفل آل سفر الخضراني في لقاء (حصري) مع الموقع الرسمي لقبيلة الدواسر العريقة

دواسر فعلهـم بالمـدح ياسـر=اهل الامجـاد خطـلان الايـادي
رجال ٍ من على التاريـخ الاول=تصون الحـد وتضـد المعـادي

كفوووو يابن حشفل وصح الله السانك ومنطوقك العذب... وبيض الله وجه فهد الغريري على اللقاء الطيب الشيق





 

 

 

 

 

 

التوقيع

    

رد مع اقتباس
قديم 07-12-2009, 06:27 PM   #15
 
إحصائية العضو








محمد بن حمد الشكرة غير متصل

وسام الدواسر الذهبي: للأعضاء المميزين والنشيطين - السبب: شكر وتقدير
: 1

محمد بن حمد الشكرة is on a distinguished road


افتراضي رد: الشاعر الكبير محمد بن محسن بن حشفل آل سفر الخضراني في لقاء (حصري) مع الموقع الرسمي لقبيلة الدواسر العريقة

الشكر الجزيل للشاعر الجزل محمد بن محسن الخضراني على هذا اللقاء الممتع
وعلى قصايده الجزله واقوله صح لسانك واعتلى شأنك , وهو شاعر بلاشك تستمتع
بقرأة قصايده ولو انه مقل في التواصل مع الاعلام فمثله لابد الاعلام يسع له وليس هو
من يسعى للإعلام , وشكر خاص لأخوي الاستاذ فهد بن هادي الغريري على جهده
وتعنيّه لإجراء اللقاء والله يطول بعمره ويجزاه خير الجزاء

 

 

 

 

 

 

من مواضيع: محمد بن حمد الشكرة

0 دعوة عامة من الشيخ / محمد بن زيد بن جريس الخييلات لحضور ملتقى قبيلة الخييلات
0 ياهـل الموقـع إلــي عنـدنـا غـالـي
0 مرشحي قبيلة الدواسر لإنتخابات نادي السالمية بالكويت-قائمة أبناء النادي
0 وزير التجارة يعين المهندس شويمي الكتاب المصارير عضوا بمجلس إدارة الغرفة التجارية بالخرج
0 سوف بعرض مساء اليوم الجمعة 19/11/1433هـ حفل تكريم الشاعر / نايف بن مسرع الدوسري بمناسبة مشاركته المشرفة في برنامج شاعر المليون للموسم الخامس على شاشة قناة الدانة

التوقيع




الى جنات الخلد يا بو فهد
أسأل الله ان يرحمه رحمةٍ تطمئن بها نفسه وتقر بها عينه
أسأل الله العظيم رب العرش الكريم أن يغفر له ويرحمه ويسكنه فسيح جناته


m.h.s502@vip.cn






    

رد مع اقتباس
إضافة رد


الذين يشاهدون محتوى الموضوع الآن : 4 ( الأعضاء 0 والزوار 4)
 
أدوات الموضوع
انواع عرض الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة

الانتقال السريع

 


الساعة الآن 03:03 PM


Powered by vBulletin® Copyright ©2000 - 2024, Jelsoft Enterprises Ltd.
---