محمد بن حشفل

[معلومات العضو شافي القويسي المخاريم]

بسم الله الرحمن الرحيم






ديوان الشاعر محمد بن محسن بن حشفل الخضراني

 

 

 

 

[معلومات العضو شافي القويسي المخاريم]

انا لغير السفاري ماأبدي أسراري=من كل حاسد عسى الله يسلمه شرّه
لاعفت شوف البلاد ودك بي طاري=ينساح بالي لزين الصـــــــــــوت لاجرّه
مرواح وإلا تحت نور القمر ساري=خاطي مراحٍ يعيش القلب ويســــــــرّه
لو كان مانيب بياعٍ ولا شـــــاري=ولالي من الفائده مايازن الــــــــــذره
إلا غلا غاليٍ يفرح لمسياري=واهواية القلب تجبرنـــــي على المرّه

 

 

 

 

[معلومات العضو شافي القويسي المخاريم]

الجيب شاريه لي ماهوب للبيع= ماصخيه باغلى ثمن للي يسومه
انا معه بالغلا ماسمع ولا اطيع= الله على موقفه ما اطيب علومه
ابغي الى جات سجات المرابيع= يوسع الصدر ويبعد همومه
اذخر لزومه لحزات المطاليع= لا ودعّ القيظ وانكفت نجومه
ثم قام يصفق من الغربي ذعاذيع= في كل ليل ٍ مراويح غيومه
ناخذ من افراح دنيانا تناويع= والوقت لو شح يوم ٍ مانلومه
اللوم ينصى قليلين المنافيع= واللي على الطيب ما تقوى عزومه
جربت انا الناس في بعض المواظيع= واخترت لي منهج ٍنفسي ترومه
ردعت ما ارخيت للنفس المصاريع= النفس من بعض الاشخاص محشومه
واخترت عنهم بعيدين المراميع= كل ابلج ٍ بالوفاء تعرف سلومه
بالذات من رفقة عز ٍ وتشجيع= اعتز لو كان ما قومي بقومه
والفظل لله رزاق المجاويع= مغني نفوس ٍ من الخير محرومه
ثم فظل شيخ مواقيفه مفازيع= على الخوي دايم ٍ يظفي كمومه
شيخ يسوقه على الفزعه دوافيع= مزبان من يعتزي به في لزومه
وانا اعتبر خوته راس المطاميع= واقول يا جعلني ما ذوق يومه

 

 

 

 

[معلومات العضو شافي القويسي المخاريم]

مايوسع خاطري لازعلت من الرياض= والهجوس اللي الى جيت اركدها تهيض
كود شوف البدو لامن رعوا نبت الفياض= لاتقافوا للمرابيع من عقب المقيض
والسحاب الى ارتكز فيه براقه وناض= لا ادلهم وهل وامطر وهو نوه عريض
ما حلا لا شفت سيله على الريظان فاض= لا ارتدم به داجي الغيم من عقب النفيض
يا هل العرف السوالف طويلات ٍ اعراض= مير انا بابيّن العلم عن طب المريض
ما لقيت لظايق الصدر شي ٍ يستعاض= كود شوف اهواية النفس وافراق البغيض
ورفقة اللي طيب فعله كسا وجهه بياض= لا دريت انه رفيقي دريت اني حضيض

 

 

 

 

[معلومات العضو شافي القويسي المخاريم]

ياوجودي على لاما حسين الوصايف= وعنا الحال كانه داله ما درابي
واحد من غلا غيره نويت النكايف= عن كثير العرب لرظاه صكيت بابي
والله اني عقب طول البطاء منه خايف= لاتعود مناويه سوات السرابي
ان ذكر رفقتي ما الحقت روحي حسايف= هو مسامح وانا اللي باتحمل صوابي
راح ماهوب عايفني ولانيب عايف= ماتناسيت نزه العرض سهل الجنابي
يابعد رفقة اصحاب العقول الخفايف= بعض ناس عثوا بالحب بين وغابي
بالجهل يتبعون الغي كنهم ولايف= يدعون الغلا وعيونهم فالمخابي

 

 

 

 

[معلومات العضو شافي القويسي المخاريم]

غامرت في بدع المعاني والامثال= وكسبت منها في حياتي تجاره
تجارة ٍ ماهيب كنز ولا مال= المال يمكن عقب ربحه خساره
لا والله الا عرف ذربين الافعال= اشتاق له واعطي عليه البشاره
من طاب صوبه رحت ما احتاج مرسال= ومن شان خليته وجنبت داره
هذا هواي وكلمة الحق تنقال= كل ٍ يميل لرغبته واختياره

 

 

 

 

[معلومات العضو شافي القويسي المخاريم]

قبل ما ابدع خيار المعاني واجيبها= علي كلمةٍ ياجب علي ابتديبها
ابدى بذكر الله ونطلب اهدايته= باياته اللي دايم ٍ نهتديبها
والحمد للمعبود والشكر والثناء= فضايله للناس ما ينحصيبها
سبحان خلاق الخلايق من العدم= واجالها وارزاقها يعتنيبها
خلاق ما بالكون علام ما خفى= مدبر تصاريف اليالي وغيبها
مخلوقات ربي جل شانه وقدرته= من الصعب نحصي عدها وتحسيبها
ومن بعد ذكر الله بديت بمثايلي= انقى معانيها وادوّر غريبها
مثايل ٍ تهدى لمنهو يبيها= عساها مع اهل العرف تاخذ نصيبها
ولانيب مادحها يلوموني العرب= فلكن بانزها عن اللي يعيبها
واليا جازها عرف الرجال وظمنتها= حكيتها والمستمع بيحكيبها
هيت لي الفرصه وقوت عزايمي= اشهر بصوتي والمحافل ماهيبها
من منبر التمجيد والمدح والفخر= بالابل وباللي مالعرب يحتفيبها
باذكر عطايا الله مع فعل اهلها= اللي بحزات الشقا تشتقيبها
الابل رصيد اهل الوفاء متعة النظر= هي زينة الدنيا ولا ينصخيبها
الابل تجارتنا وغاية مرامنا= شفٍ لنا واهواية نهتنيبها
الابل الى كلٍ تذكر مكاسبه= كسبٍ لنا بين العرب يندريبها
الابل ذخيرتنا الى شحشح الدهر= من خير مدات الولي نغتنيبها
الابل الى كلٍ مع الوقت باعها= من دونها الاشغال مانلتهيبها
نمشي بصالحها ونتبع شفوفها= وكل العلوم الطيبه نحتسيبها
دواسر ٍ تنسب لهم كل طايله= دليلها البرهان ما ندعيبها
منهم بني عمي هل المجد والثناء= اللي تنزح عن حماها حريبها
فرجان في دار العداء تاصل الخطر= وان صاح صياح النذر تعتزيبها
مناب منها نقتني كون سودها= طوال الثمن ما كل حظٍ يجيبها
لا قبل دخول الوسم وارخى قلايده= حنا الذي صوب الحيا ننتويبها
بدو ٍ بداوتنا لنا مصدر الفخر= وبيض المراجل دايم نكتسيبها
جدانا قدامنا ذي سلومهم= وسلومهم طول المدى نقتديبها
والابل مع كل القبايل سواتنا= جميع الرجال اللي تفاخر بطيبها
تمت وصلى الله على سيد البشر= عللى النبي ختمتها وانتهيبها

 

 

 

 

[معلومات العضو شافي القويسي المخاريم]

يالله ياللي ماحدٍ غيرك يدوم= ياواحدٍ سر العباد تعلمها
تكتب لنا من رحمتك حظ وقسوم= ويسر لنا نفحات فظلك وادمها
انت الذي تنعم على كل محروم= وان مارحمت الحال ماحدٍ رحمها
ايامنا تعطي تجاريب وعلوم= وبعض البشر يبطي وهو ما فهمها
اقبالها واقفايها كنه حلوم= ودوراتها حلوٍ ومرٍ طعمها
الرابح اللي ما يفرط بها يوم= ما مرّ من لذاتها يغتنمها
مع طاعة الله صان عرظه عن الوم= والعز ودروب المراجل لزمها
نصيحتي مادمت للنصح ملزوم= ياللي جهلت اسمع لها واستلمها
لاترافق الا فالعرب كل شغموم= شهمٍ علوم الطيب يوفي سهمها
اللي يصير لرفقته عهد وسلوم= لامن بناها بالوفاء ماهدمها
وان شفت من عرظه مع الناس مذموم= النفس عنه عزها واحترمها
ترى له لسانٍ من الخبث مسموم= عقرب ثرىٍ يلدغ ذنبها وثمها
قلته وسلم العرف للناس مقيوم= وعن طولها ياجب علي اختتمها

 

 

 

 

[معلومات العضو شافي القويسي المخاريم]

ياللي بزعمك للمعرفه تسمويت= اعرف ترى مالي عليك احتجاجي
لا تقول وشبك ساكت ٍما تحاكيت= انا ماسولف دام مالي خراجي
ماهوب كبر ٍيومني عنك صديت= سوالفك عيت توافق مزاجي
باعرض بعض الناس شفتك تجريت= معك ام خمس وتحتمي بالمحاجي
تذكر علوم ٍما عليها تثابيت= كنك مظيع صيدته فالعجاجي
وانا بعرف الطيبين استدليت= اشرب قراح الماء واعيف الهماجي
ماشفت ماحصلت ماقلت ماوحيت= والمشتبه مالي بخده مداجي
وانا هواي مرافقة طيب الصيت= وراعي علوم الهون بعده علاجي
اشفق لخاطي طيب ٍكل ماجيت= القى بشوفه للهجوس انفراجي
اللي اليامن شافني له تعنيت= قام يتبلج حي ذاك الحجاجي

 

 

 

 

[معلومات العضو شافي القويسي المخاريم]

اللاش لا من شان ممشاه نشه= شف ماتشوف اشلا ولا شوفة اللاش
شم للشلي لاعاش من شفت غشه= لا تشتقي بمشاهد الشين لا عاش
غش الغشيش ينوشبه ما يخشه= شر البشر يشفا وشره من الجاش
شبرٍ تشهل به وماشان مشه= ممشا الشرف تشرى مشاريه بالكاش

 

 

 

 

[معلومات العضو شافي القويسي المخاريم]

مانيب امل مشاهد الطيبيني= اهل المعزه والقلوب النظافي
ولقيت في سج القدم لذتيني= سوجة نفس ولا معرفة سنافي
انا رفيقي لا حصل منه زله= اخذتها منه على المحمل الزين
اما دمحت لزلته حشمة له= ولا قصرت الهرج واغضيت بالعين
ملزوم من بينّ لك الود ملزوم= حق ٍعليك وياجب انك تزوره
خلك سوات الشمس في دورة اليوم= ولا تجي مثل الهلال بظهوره
وداعتك في عز نفسك عن الناس= والعرض لا ترضى بشي ٍيمسه
حتاك تبقى دايم ٍرافع الراس= والبال ماحد ٍفي حياتك يحسه
من بان لك في رفقة ظن وشكوك= لا ترتجي ود ٍيجي فيه شكه
نزه جنابك عنه والبعد مبروك= وخلك عليه اثقل من جبال مكه
لاتنصح الخبل عند الناس تنشبّه= تراك لامن نصحته نفص عيونه
اما ادخلك فالملام وحطك السبه= ولا تهايل وجاك يعد طبلونه
الواجب اني مالحقه ذم وهروج= باقفي وهو مني بعد ذاك دربه
بذرت بذر ٍماحصل منه منتوج= المشكل انه ما لقى طيب تربه
سلم الهوى بين العرب شان تاليه= ينعاف عقب علومه اللي تجينا
اسباب ناس ٍبالجهاله مشوا فيه= الله يعـافيهـم ولا يبــتليـنا
عد كلمتك لي لو تكرمت عدها= عدها تراني ما عرفت مغزاها
اقول يمكن قالها ما قصدها= ولا ان نفسي بس يبحث خفاها
الانعزال امن الخلايق فيه لذه= كود من خاطي رفيق ٍلك سنافي
كل شهم ٍينلقى بالطيب فذه= منصح ٍوان قال قول ٍفيه يافي
امدح شيوخ وناش مدحي مطاليق= في كل مدغوش ٍبراسه نعاره
فيهم صدقت وحالف المدح توفيق= الا وحيد ٍمدحتي له خساره
وعذري لقيته مثل عذر التفافيق= ما كل رمي ٍصاب مظرب الاشاره

 

 

 

 

[معلومات العضو شافي القويسي المخاريم]

لعل السحاب اللي تسوقه هبوب النود= من عصير ولا باخر اليل مهجاده
يسوقه من الغربي هوىٍ يدفعه بركود= اليا قام يكشف بارقه حن رعاده
مباكير نو الوسم لانشاء وقام يزود= ثلاثة نجوم ٍمنه والرابع زياده
وخمسين ليل ٍكل مانشاء السحاب يعود= اليا نش ودان المطر منه يعتاده
على انحاء البلاد يعم دار الفخر والجود= بلاد ٍتزيّن بيض الايام بامجاده
ويسقي البياض من الجبل لاسفل النفود= قنوفٍ تزبر من مناشيه منقاده
من عقب المحل ياجعل وبله عليه يجود= اليا عد رجعه قيل ما عنه نشاده
يلج بخضار ٍعقب ما ابطى يباس العود= وثرى القاع يقبل كل يوم ٍتجداده
نباته وماه وسجة ٍ فيه طب كبود= لا ربع به المسني غدا ثالث اعياده
وشوفه يعيش اللي بعد فيه ماله ذود= لاشاف الخضار يسج في غاية مراده
يقولون راع الصنف والقول ذى ماكود= ثلاث ٍتعيد صباه وتسلي فواده
شوف الخضار اليا حصل غاية المقصود= وشربه مشاهد من يوده وهو زاده
وشوف السحاب اللي تسوقه هبوب النود= من عصير ولا باخر اليل مهجاده

 

 

 

 

[معلومات العضو شافي القويسي المخاريم]

مرحباً باللي سلامه يجيني كل يوم= لا لقاء من يصل العلم ودعه السلام
غالي لاجيت باجيه ما جالي سلوم= حامي روحي وحاميه من بعض الكلام
اتعايد من مجي العرب مالي لزوم= ويش عذري لا تعنيت واخفيت المرام
لي لزوم ماقدر ابديه قدام القروم= اتشيم يوم لي عندهم قدر ومقام
ماينزل قيمتة للوطاء كون الرخوم= كل رجل قيمة لا تباع ولا تسام
حي ذكره من بعيد ومردود العلوم= يكفي اني ظامن حشمتي عند الحشام

 

 

 

 

[معلومات العضو شافي القويسي المخاريم]

فز قلبي حي ذالعين من شوف النفود= شوفها ذكر على القلب شيٍ يهتويه
سجةٍ فالبر عقب التنحي والصدود= صدبي وقتي وانا خاطري شفقٍ عليه
كل ما روّح سحابٍ معه نسناس نود= قمت اخيله من مناشيه كني باقتفيه
الحيا يرجع بقلبي وفي حالي يزود= وداجتي بهواية النفس مالقى له شبيه
القدم لهواية النفس ما يبغي شهود= ماهتواه القلب سار القدم حتى يجيه
غايتي واجمل ماشوفه بعيني فالوجود= الخضار وشوف منهو يبي قربي وابيه
وصدةٍ عن شوف ناسٍ يبذون الكبود= عالمٍ تلقى بعظهم يحير الفكر فيه
عزلتي عن بعض الاشخاص ربح لي وفود= عندي انه اخير لي قطع عرفه في يديه
قالوا اتبع سلمنا قلت مانيب محدود= قالوا انك مخطيٍ في كلامك قلت ليه
الخطاء لاصرت اجامل ترى صبري يكود= كل نفسٍ يامخاليق مع من تشتهيه
السنتهم بيض وقلوبهم بالحيل سود= الله اكبر ويش تخفي مصافية الوجيه
حدث العاقل بالانصاح في ود الحسود= علمه وان صدقك فاعرف ان قلبه سفيه

 

 

 

 

[معلومات العضو شافي القويسي المخاريم]

المعلم ما يكفي بتعليم الدروس= كود دورات اليالي وبعض دروسها
والمثايل للعوارف كما وصف العسوس= ما يقود لنية العرف كود عسوسها
والرجال اهل الوفاء تنعرف ولها نفوس= مثل ما قالوا نفوس الحرار نفوسها
والرصيد الدين والعز ما غيره لبوس= هو غذى النفس العزيزه وهو ملبوسها
والخظوع يحط في سمعة الرجال سوس= لا ومرها بالمذلة كلاها سوسها
علم اللي يصغر النفس من شان الفلوس= يحسب ان الناس بتكبره بفلوسها
والبشر تفنى ومن طاب يبقى له رموس= وطيب طاريها يجدد قديم رموسها
ما تساوى بينها بالطبايع والجنوس= تختلف بطبوعها واختلاف جنوسها
فرقها بالفعل فرق العدود امن الرسوس= تنعرف من غزر ماها وضعف رسوسها