ارسخي يا حمرة الهضب و البسي الجمال=دام صبيان المنيعي على قيد الحياه

يا سعود ترتيبك مهو بأي ترتيب=قوي باس و شره نفس وحمر عين
على الطوال الراسيات المراقيب=ترقا كما ترقا فروخ الشياهين
رفعت روس الربع عند المعازيب=عينٍ على الدنيا و عينٍ على الدين
وش لون ما نهقى بك الخير و الطيب= وانت العوض يا صاحبي في عوضين

الحر والبـرد وأدوار المسـاء والمقيـل=والعسر واليسر وفصول السنة والهـلال
تقول ما في الحيـاة إلا دروس الرحيـل=إن قل عمر الفتـى ولا تمـادى وطـال
هذا يشيـع مـن الدنيـا وهـذا نزيـل=والكون كله مصيـره للفنـى والـزوال
لكن ياليت عمر أهل المراجـل طويـل=وأهل الردى والحسد يا مال قصر الآجال
اللاش لو طال عمره مال طولـه ذبيـل=وعليه سعيه إليا من طال عمـره وبـال
والكفو لا طال عمره صار طوله سبيـل=للخير والمجد وفعـول الوفـا والمعـال
مثل ابن خشنان راعي المرجله والجميل=اللي رحل بالمحبـة والوفـا والجـلال
مرحوم يا أبو فهد مرحوم يا أبـو دليـل=مرحوم يا اللي تربع في قلوب الرجـال
يا طيب المد لا شحـت يديـن البخيـل=كل(ن) ينعم إليا منـه حصلـه مجـال
ركن يذري ولا جاء الحر ظـل ظليـل=ومنصى(ن) لربعه إليا جاءت الأمور الثقال
ليته ملى حفرته من غير شكلـه بديـل=من قصر(ن) في القبيلة ما اقتدوا به مثال
أحد(ن) يثير المشاكل مثل فعل العميـل=وأحد(ن) يمينه بخيله ما تمـد الريـال
يا بعد فرق الكديش من الحصان الأصيل=ويا قل نفع الردي لوا كان له رأس مال
أمدحه من باب قول الصدق لا منه قيـل=ولا فلا له علـي مـن ٍ وفضـل يقـال
لكن عاني وابن عم(ن) وطبعـه نبيـل=لاجَوه اللي مشاكلهـم عـراض طـوال
يصلح ويبذل من أمواله ومـده جزيـل=الله يغفـر ذنوبـه دقـهـا والـجـلال
ولا أقول كامل وهذا مطلـب مستحيـل=الكامل الله ولا لأحـد سـوى الله كمـال

يالله يالمطلوب يا خير معبود=يا عالمٍ مافي النفوس ووراها
يا واقي العثرات يا مجري النود=عطفك و لطفك يوم تبحث خفاها
في موقف ما بين شاهد ومشهود=تبلغ به نفوس الخلايق مداها
احدٍ سجلاته من المعصيه سود=و يسود وجهه مثلها لاقراها
و احدٍ سجله من حسانيه مرصود=اللي عملها في حياته لقاها
و اللي بعد دعوة سند كل مضهود=صلوا على سيد المخاليق طاها
سلام يا حفل به الطيب موجود=في حلة صحت ايدا اللي بناها
قومٍ لهم في صفحة المجد مجهود=اللي بنا و اللي بقى ما جفاها
مصيونةٍ من كل طامع وحاسود=و الله من زين الطبيعه عطاها
و الخير يرقبها بعد رشح سعود=إن قاله الله يرتفع مستواها
فيك الرجا و الظن يا سعود معقود=يا نجل من كل المراجل حواها
عساه فالجنة مخلد ومحمود=في جنة الفردوس يقطف جناها
لا فني عودٍ نبت في منبته عود=و الشجرة الخضرا يذري ذراها
راح الاسد و اصطف من بعده يسود=ابناه و اخوانه و ربعه تباها
بالمرجله و العرف و الدين و الذود=عن ديرةٍ كلٍ يبي حلو ماها
الحمرة اللي كلها ظلال و عدود=ونوايفٍ يجنا الوحش من حجاها
شوامخٍ كنها محاريب داوود=وكن المهيمن بالجواهر كساها
سياحةٍ فيها بلا حجز وقيود=مفتوحةٍ يدله بها من نصاها
الا ليا منه طمع كل مقرود=يحرم عليه يشم حتى هواها
من دونها ربعٍ خطرهم على الزود=أحفاد عيسى الاول اللي حماها
الاد ابن خشنان كسابة الجود=سمو الرجال اللي ينومس نباها
من لابة ترهي على كل مقصود=الله من كل المكارم حباها
الدين و النخوه وحماية حدود=بين القبايل ما يدنس حماها
لاد المنيعي متعبة كنس القود=يوم السنين الماضيات و غثاها
لا شرعن الخيل و السيف مجرود=يا ويل منهو واقفٍ في نحاها
من لاد زايد ممنة كل مطرود=لاخاف من سطوة غريمه و جاها
مناقب ما تبغي إثبات و شهود=كم راويٍ بمولفاته رواها
و لا علي من باقي الناس منقود =كل على طولاته اللي حواها
ما يجحد أمجاد العرب كون ملهود=و الا سفيهٍ ماشيٍ في عماها
الطيب مثل العد و العد مارود=و البير يوردها على الماء رشاها
و صلاة ربي عد ما دندن رعود=على شفيع الخلق في منتهاها

بادي باسم الولي ضامن أرزاق العبيد=و النمل يسمع دبيبه على صم الحيود
يا هجوسي تو مازان لي بدع القصيد=شاعرٍ و القاف لامن بغيته ما يكود
يصبح المسيود وأنا على المسيود سيد=أتحكم فيه و أروضه لو هو شرود
القصيد أنقاه و أختار له نهجٍ فريد=افتله و أحماه عن راعي الشعر النقود
لين أصفه مثل عقد الذهب بنحور غيد=ثم أسوقه لابن خشنان ممدوح الجدود
يوم قرر موعد الحفل ثاني يوم عيد=للحضور بواجب القرم كرست الجهود
واجبك يا سعود يا راعي المجد التليد=يا رفيع الجاه ياللي بما تملك تجود
الف مبروكٍ على مركزٍ نتله جديد=و انت قدامه تحوش المراجل و امحمود
امدحك يا ترثة الجود و أكرر و أعيد=وانت قرم تكسب الطيب و أخوانك عضود
لك على ميلاتٍ الايام و الوقت الشديد=القروم اللي يحلون عسرات العقود
ودّي أنبهك ياللي تفيد و تستفيد=لو ما تحتاج مني نصيحه يا سعود
كان تبغى كلمة الحق و العلم الأكيد=الإماره تبغي اللي مطاليعه سنود
و تبغي اللي يقدر الحلم و الراي الرشيد=و تبغي اللي ما يحاول عن الواجب صدود
و يعدل بالحق عند القريّب و البعيد=لا يجامل ذا ولا ذا و في الموقف صمود
مثل ابوك اللي له المرجله دايم رصيد=الشجاع اللي محله تنصاه الوفود
ايعدل بالحق بالعزم و الراي السديد=طيب الوقفات فهدٍ تسلسل من فهود
اخطل اليمنى ليا مد ما مد الزهيد=باقيٍ طيبه لو انه تحت عوج اللحود
أنت بإذن الله عن خط سيره ما تحيد=ما تجنب عنه لو هو تغاريس و صعود
الهقاوي فيك بالراية العليا تزيد=و العرب قالوا يجي في محل الجود جود
و الختم ما هب صلف الهوى خضر الجريد=و عد ما يوضي سنا البرق و تحن الرعود
نذكر اللي شافعٍ لامته يوم الوعيد=الرسول اللي عن الدين و أنصاره يذود

باديٍ باسم الكريم العظيم المستعين=جل شانه خالق الكون ما شي بيخفاه
ارتجي رب الخلايق اله العالمين=جعل يكتب لي من النار معبودي نجاه
في نهارٍ فيه كل الخلايق شاخصين=يوم حشر يذهل العبد ماب يده سواه
وبعد ذكر اللي بحسناه يجزي المحسنين=زان لي بدع المثايل وزان الي الغناه
قلتنا يا هجس الشعر حضر كل زين=قال هذا و اجب فيه مابغالي وصاه
يا سلام الله على الحفل واللي حاضرين=عد ما هلت هماليل مزن من سماه
من ضميرٍ ما يقدر يكون االطيبين=عنوته صوب المطاليق ترفع مستواه
يوم جتنا دعوة سعود قلنا حاضرين=مثلكم يا سعود لازم نلبي له نداه
لادعانا راعي الطيب جيناله بحين=نتعب الاقدام صوبه هدفنا في رضاه
وانت تستاهل لماره بلا شك ويقين=انت شيخ وابن شيخ و من ربع دهاه
انت ابن منهو فعوله تعز الطيبين=وتصغر كبار المشاكل ليا جت في ذراه
من وفاه ابن سعود مسميه اعوضين=ومن كرم كفه غنوا ناس ما تملك غناه
نادرٍ ما صك بابه على طول السنين=ذخر من حده زمانه على اللي ما بغاه