جاني وانا في وسط ربع وناسي = جاني نشلني مثل ماينشل الناس
مني نشل روح تشيل المآسي = تشكي من ايام الشقى تشكي الياس
اثر الألم في سكرة الموت قاسي = ماهالني مثله وانا انسان حساس
جابوا كفن ابيض مقاسه مقاسي = ولفوا به الجسم المحنط مع الراس
وشالوني اربع بالنعش ومتواسي = عليه ومغطى على جسمي لباس
وصلوا علي وكلهم في مآسي = ربعي معهم ناس من كل الاجناس
ياكيف سوى عقبنا تاج راسي = وأمي الحبيبه ويش سوى بها الياس
اسمع صدى صوت يهز الرواسي = قولوا لها لا تلطم الخد ياناس
قلوا لها حق وتجرعت كاسي = لا تحترق كل يبي يجرع الكاس
اصبحت في قبري ولابه مواسي = اسمع قريع انعولهم يوم تنداس
من يوم قفوا حل موثق لباسي = وعلي رد الروح صوت بالاجراس
هيكل غريب وقال ليه التناسي = صوته رهيب وخلفه اثنين حراس
واقف يقول ان كنت يانمر ناسي = هذي هي اعمالك تقدم بكراس
من هول ماشفته وقف شعر راسي = وانهارت اعصابي ولا ارد الانفاس
ياليتني فكرت قبل انغماسي = بالغفلة اللي منتهاها الافلاس
وفزيت من نومي على صوت ناسي = واصرخ واقول الموت واحذر الناس