ياراكب ست كما وصف الاطوار=مبرمات مثل عوج الحنايا
فج العضود منسعة قب الازوار=فيح مدابيح كبار العضايا
مادقلن بدوجه بين الامدار=ترعى بدثر متيهين الرعايا
سند الغوارب زاهية زين الاكوار=فج العضود الفيح عوص هدايا
تسرح من الشاعر مع نور لانطار=والعصر تلفى عند زين الحلايا
عيد الركاب اللي من السير ضمار=لاجات هزلا والمزاهب خلايا
تبشر بترحيب معا البن وبهار=وحيل سمان مشتراهن غلايا
في مجلس تلقا به الكيف والكار=في ربعة تزها الدلال العذايا
فنجالها كنه محنا بزعفار=مزعفر يبري عماس الخوايا
ونجر ليا حرك صخيف وجظار=محنش تصبيب ماوه صفايا
في ربعة غيث على الضيف والجار=وسعد القريب ونازحه والدنايا
قرم ولد قرم على العسر صبار=لاضاعت اذكار الرخوم الفنايا
لاتبدي الشكوى على كل عثبار=لامن بليت بحر كثر الشكايا
لامن نويت ابتدي السد فاختار=دور لسدك طيبين العنايا
اشكي على ابو نايف زبن من حار=لا طفحوهن راكبين السبايا
حالي كما عود تداناه نجار=ماعاد من حالي يكون السمايا
والعين كن في حجرها عود زنجار=عيت تكف من الدموع الذرايا
لاكن ونيني تالي الليل مزمار=وذا شرع من كثرت عليه الهوايا
وجدي عليهم وجد من حير باحيار=او وجد من حامت عليه الحدايا
او وجد من ذوده مصاغير وعشار=واقفوا عليها اهل الكبود الطنايا
او وجد من عقرت جواده ولا نار=حامت عليه معسكرات الحذايا
(على وليف في العرب ماله اقدار=ماله وصيف في جميع الصبايا)
العين عين موحش ربة الغار=سودا وكن فيها جموع وسرايا
والراس ذيل مشمر حشمت كار=والخد براق سرا له رفايا
بالهرج مكار وبالعين سحار=يرمي على راعي الهوا بالمنايا
ياطفل ريم يوم شاف الدبش ذار=مرباه دمثات الزبار العذايا
ماعاد جاني منه مردود الاخبار=ولا مناديب ترد الوصايا
يالله ياعالم خفيات الاسرار=افرج لمن يشكي جروح خفايا
افرج لمن كنه على واهج النار=من صاحب جدد عليه الكوايا
خيرتنا الله واستدليت بخيار=قرم شجاع من سهوم المنايا
شبره يزود اليا هفا كل شبار=جعل الرخوم ومالهم له فدايا
اما تهيا صاحبي عقب ماصار=والا انا جاني جديد الوفايا

يالله يامطفي سنا لاهب النار = انك تعدينا جميع الخطايا
يارازق الحوت في غب الابحار = بالارض رزاق وهو بالسمايا
انك تجير اللي شكا حر الامرار = وعيت تشافي به كثير الدوايا
طرش لنا ست يجنه بالاخبار = قلت الخبر قالوا علوم وروايا
سعد مطرشنا خطير بالاخطار = وذي ساعة النفعات ياهل الحمايا
قلت ارفقوا لي ياهل الجيش مقدار = الجيش ونيات واهلها طوايا
واليا قضيتوا شانكم يظهر خيار = يظهر لي غلام يحفظ الوصايا
باركب لعينا اللي زهمني ومختار = ومختصني من بد كل النحايا
علي جيرات المطاليق والعار = ياللي زهم ماحط دونه تقايا
انكانها بالمال فالمال بايسار = باشريه لو زادو علي الشرايا
وان ما تهيا بالثمن هو والاخسار = فالراي عندي ياسهوم المنايا
بازهم ربوع ماتعذر بالاعذار = يردون حوض الموت ورد الظمايا
بيدينهم صنع الفرنجي والاكفار = وامات خمس موسعات الهوايا
وامات تاجين طويلات وقصار = وسيوف هند كن فيهن حيايا
يالاد زايد مابها شور واشوار = لولا الحمايا كان رحتوا همايا
الحد لا يرخا على غير حجار = والكسب في حسنات زين الصبايا
اليا استوا فعل يجي بين الاقطار = تبرا به كبود الربوع الطنايا
من عقب ذا ياراكب فوق عبار = كنه غيا ذيب تحده ضرايا
تلفا سعد لامن غلا سوق الاسعار = في ربعته تلقا الشحم والترايا
من هل صخاف الشول لاجات الانذار = مرزين قحص معسكرات الحذايا