من عود لربعه فلا هوب ندمان =عيال زايد في اللقا ما تمالي

بديت باسم المعتلي عالي الشان = الوالي العالي على كل عالي
سبحانه إله عزيز ورحمان = رب الملا يعلم ساير أعمالي
لا من ذكرت اسمه ذهب كل شيطان = وإبليس ما له في مجالي مجالي
ومن بعد هذا يوم بدع المثل زان = عبرت أنا الأمثال مما طرا لي
لا ضاق صدري يا فتى بعض الأحيان = خذيت فيها سجة لاتسالي
يطبع لها في داخل الصدر ديوان = أخذ وديها وأكب الهزال
وخير ما هيض غرامي بالألحان = قافل لافاني من ابن عم وغالي
قوله على معناه يوزن بميزان = يصرف كلام مثل نقد الريال
راعي الكلام الزين يا جعله معان = لكان هو ما خصني بالسوال
وأقول يا المنعور منتب غلطان = يا الله عساك تفداك ناس أنذال
ناس غدوا مع جملة الناس ذا هان = وولد الردي عن لابته ما يسالي
يتبع طريق الهون لو انه يهان = يصبر ويرضى بالخمل والميال
هذاك كبه واترك اللاش كبان = أشهد إنه فاشل في العيال
ويا فهيد يا المنعور يا طير حران = يا اللي رقيت مشمخرات الطوال
قولك صحيح وصدق والصدق برهان = وهذا الكلام اللي تعد الرجال
لا فيه لا زود ولا فيه نقصان = وبيوت شعرك كلبوها جزال
شاعر وقافك يا بة الجود مليان = ومن قافك المليان يستّر بالي
هات القلم نكتب على الظرف عنوان = يرسل لابن جزوى كريم السبال
سلام أحلى من لبن كل مسمان = وألذ من در البكار الهجال
لا سجت المرباع تبرال حيران = ترعى نبات غادين له أشكال
تقطف من الزلوق حلوات الألبان = حليبها لا جا على الكبد حالي
لك يا عريب الساس من روس شجعان = كسابة الناموس في كل حالي
وهم آل جزوى فعلهم بالوفا بان = أفعالهم تذكر من أول وتالي
ربعنا لنا هل الضيق في الهوش شجعان = وكل منهم للمراجل يصالي
حرارشة وافين من نسل رجبان = اللي تقيد بالحديد الجمال
ومن آل زايد مقعدة كل داقان = لا طار من قحص المهار الجلال
دواسر لا صار للحرب ميدان = نرسي كما ترسي خشوم الجبال
تامن بنا دار بها حط بستان = على النهر يرسخ ويشرب زلال
ما حط من دونه حظار وجدران = إنا ذراه من الحديد الموالي
دواسر من وقت عصر ابن بدران =اللي ذكر عنه أبو زيد الهلالي
عامر بنى مبنى وزدناه بنيان = مبنى على طول الدهر ما يزال
حصن حصين من تواريخ جدان = وملجا من صكه من الضيق جالي
وقصيرنا يلقى الكرامة والإحسان = وعن عازته نعطيه غالي الحلال
وتفرح بنا عرب مجاهيم وزيان = جرد الرقاب اللي لنا راس مال
ننجع بها العشب من حيث ما كان = بحد اليمن ولا بحد الشمال
نرعى بها جوسن على كل عدوان = ومن جا يبيها جا منها جفال
من دونها ربع على الخيل فرسان = بضرب السهوم مقصفات الاجال
ذا فعلنا والناس ماهمب رديان = وكل مضى له من القبايل أفعال
من أول وهم بغارات وأكوان =واليوم جا الإسلام والجهل زال
من فضل ربي نعمة اليوم وأمان =وكل أمسى من الخوف خالي
في ظل حكم حاكم كل الاوطان = حكم آل سعود اللي مشوا بالعدال
الله ينصرهم على كل خوان = ومن كان عاداهم عساه الزوال
ندعي لهم بقلوبنا سر وإعلان = نصر من المولى عزيز الجلال
وختمانها يوم ان للقول ختمان = صلوا على المختار واختم مقالي