ياراكب اللي لو شرينـاه بقصـود=اهون علينا قيمتـه مـن لزومـه
اليا صلح ماهمنـا النقـص وزود=انزود في سعره على اللي يسومـه
فكسار له في عالم الصنع مشهـود=علامة الجـوده عليـه امختومـه
مايصنعونه غيـر كفـار ويهـود=ولا العـرب ماتصنـع الا رقومـه
مثل القمر لونه مع الحمر وسـود=كامل مزايا فـل مركـب حكومـه
اليا اشتغل مثل الحساوي على العود=ولا هنوف(ن) لزفـاف امعزومـه
شقحى عليها عود وخدود وجعـود=وللي تماريهـا تصيـر امهزومـه
وليا سرى فاالليل والعالـم ارقـود=يبعد عن القلب الشقاوي اهمومـه
ماكنه الا من صواريـخ السكـود=اللي على العدوان وجه اسهومـه
اتخيل براقه بـلا مـزن ورعـود=يوم السما غيم وغابـت انجومـه
كنه مع الحزم الجلد ذيب مطـرود=مثل البرد ضرب الحجر في اكرومه
وليا عطى التغريز ماعنه منشـود=يطلع كمـا حـرٍ قويـه اعزومـه
ابمدحـه والمـدح مافيـه منقـود=واللي يحب الجيب لحد(ن) يلومـه
ابغى عليه النصا هل الطيب والجود=خص الرفيق اللي تسلي اعلومـه
وبغى اليا طاح المطر وخضر العود=اّخذ مع الريضـان شـده اوقومـه
وبغى عليه اّدوج لصيـد واعـود=لو ماخذ الا لليـل واحـد ابيومـه
وبغـاه للـلازم موقـف وماجـود=سواة شيخ(ن) جالس(ن) للخصومه

الجنوبي

لاهنت وبيض الله وجهك على النقل

صح ألسانك والسان الشاعر فيحان القعياني على القصيده الجميله

تقبل مرروي