أمس العشي في طويل الرجم عديته =عديت في قمته في راسـه العالـي
دولاب فكري على الأشعار فريتـه =فرت خبير يعرف الشـي لامالـي
استرسل الشعر حاكانـي وحاكيتـه=شـي يقـدم وشـي يقعـد التالـي
تقول طابور عسكر يـوم صفيتـه =عنها الشوايب حذفناها على الجالـي
من حط معروف عندي ماتناسيتـه=والرجل يقناه حتى شـرب فنجالـي
عز الله إني عزمت الشيـخ عنيتـه =شيخ عنا بالكرامة قـدر وإجلالـي
ماقصدي أكلفه بالكرت يـوم جيتـه =لكـن والله حشيـم وعندنـا غالـي
ذليت يشـره عليـه يـوم ماجيتـه =أغط عرسي وانـا للشيـخ دهالـي
الطيب في الشيـخ فـراج تحريتـه= مانيب أقوله يقوله غيـري رجالـي
شيخ تعرف النشامـا منزلـة بيتـه = بيتاً قديـم وفيـه الطيـب مازالـي
شيخ عمل بالقضاء حتى ظهر صيته =عز الله إنه غريب بوقتنـا الحالـي
شيخ كريم يرحـب كـل ماجيتـه =عسـى لجاويـد مايفنالهـا تالـي
ياموت دور لغيـره كـل ماجيتـه =أمهل حميد السجايا ذرب الأفعالـي
مانيب أقوله ولي موضوع ونهيتـه =ولانيب أقوله وأنا في وضع سوالي
لكن زان المثـل عنـدي وغنيتـه =والشعر لقبل على راعيـه ينهالـي
تزاحم القاف عنـدي يـوم هليتـه = كنه حيام تزاحـم بشهـب اللالـي
لـو المعازيـب تـارا ماتواريتـه = كان رفعوا مستواه المستوى العالـي
شيخ وأمير يصلح حيـث حطيتـه =ابن حمولة ولد شيخـان ورجالـي
من عزني معلـن عـزه وعزيتـه =والخيـل مايقتنيهـا كـون خيالـي
ان جاء ولد عقب هذا اليوم سميتـه = فراج ذرب اليمين وطيـب الخالـي
ولاغيره أحد من العربـان ذميتـه =والناس كل على وضعه وله حالـي
شاعر وأعرف الكلام اللـي تنقيتـه =مانيب خبل يروح يميـن وشمالـي
أموت جوع وولد الـلاش ماجيتـه =ولا أتنـازل عليـه أدق جـوالـي
مـع الردييـن لاعديـت عديـتـه =يعجز عن المرجلة ماهوب محتالـي
وصلاة ربي على محمد وأهل بيته =عـداد مارتلـوا طـه والأنفـالـي