البارحه جاوبت لي حس عـاوي=ذيبا عوى جاوبت بالصوت وايـاه
ذيبا يجر الصوت كانـه خـلاوي=وياقلبي اللي جاوب الذيب بعـواه
والصبح بانت في ضميري اهاوي=جريت صوتا ليت خلـي توحـاه
يادار ماشفتي ضبّـي المطـاوي=اتلا علامي بـه غشنـك رعايـاه
وانا على شوف الحبّيب شفـاوي=كانـه هنيـا خبرينـي بمسسـاه
قالت لي الاوطان قلـع ضحـاوي=اليوم راس الرجـم هـذا توطـاه
امسى هنيا واصبح اليـوم نـاوي=يتلي سلف بـدوا بعيـدا معشـاه
كشف لهم برقا سديـدا عشـاوي=يخيلونـه يـم خشـم المسـنـاه
يبون مرباعـا بهـاك الحـراوي=اليا زاف زملوقه وشبعت رعايـاه
اخذ الخبر ماهوب خرص وهقاوي=اعطيك علم صويحبك وين تلقـاه
ادنى مرابيعه بخشـم الصـداوي=وبيـوت مقياضـه بقريـه مبنـاه
مير اطلب الله لو صوابك مخاوي=كم واحدا قبلـك عشيـره تمنـاه
يالعين ماينفـع كثيـر الشكـاوي=الا على اللي دبر الغيث وانشـاه
ياونتـي ونـة وحيـدا جـلاوي=اللي سبب دينه من ادنـى دنايـاه
ولا خلافه مـن يحـل الدعـاوي=لا صار ربعه منه تبـا المثـاراه
عليك ياللي لـك بقلبـي مكـاوي=ثلاث كويـات هـوادي وعرقـاه
عقبه فقدت من المنـام الحـلاوي=وحتى متاعي قامت النفس تجفـاه
يا لايمـي لعـل مالـك عـراوي=بلاه مـا ولعـك بالحـب حليـاه
من لايعرف الحب عنده دعـاوي=يشره على راع المـوده ويشنـاه
ويقول هذا فـي مماشيـه غـاوي=وحنـا نـدل الـدرب والحمـدالله
يالله عسى مثله كثيـر الهـزاوي=يبلا ببلـوى مـن لسانـه تهـزاه
حتى يعرف ان المحبـه بـلاوي=ويشوف مثل اللي من الحب شفناه
عساه يبلا فـي محبـة حيـاوي=حب الهنوف اللي يحده على اقصاه
تفرى ضميره فريّ دلو الـرواوي=اليا صفقاها الجال من حد ملقـاه
اليا لجلجتـه بالنظيـر السهـاوي=كلامها لبيـه عـن قولتـن هـاه
كلامهـا للقلـب مثـل المـداوي=اللي عرف علـة مريضـه وداواه
ياربي انـي بالتفاتـك رجـاوي=تلم شمل الولف من عقـب فرقـاه
لوتنفـع الفزعـات ولا النخـاوي=على المحبه كـان كـلا نخينـاه
مار الرجاء والياس صار متساوي=ياقلبي اصبر فـي تدابيـر الالـه
لو مابقي في حالـك الا شـلاوي=مادبر الوالي على العبـد يرضـاه