لو كل من يخطي يصحح خطايـاه=ماصار بين الناس وقفة مشاريـه
ومن لايميز غلطته داه فـي ارداه=بيسمع كـلامٍ مايسـره ويؤذيـه
كلام منقـودٍ مـن الطيـب ينفـاه=شئٍ سمعه وشئ توحيـه اذانيـه
يكدر اصحابه على فرحـة اعـداه=داس الرجوله والرخامه تخاويـه
ويصيـر منبـوذٍ علـى ماتبنـاه=يعزله عن درب الشهامه هقاويـه
لاصار هقاويه الردى كيف ترفـاه=بالعكس يصغر كل ماحـل طاريـه
والادمـي لاصـار يرثـع بعميـاه=ماتنفعه لو كان كثـرت عزاويـه
والعزوه اللي ماهي بفعـل يمنـاه=حطته من ضمن الوجيه المكاريـه
ومن لايداري سمعته ضاع ممشـاه=مهما يتحسف مالقى من يواسيـه
يمكن تواسيه الرخـوم و توطـاه=تلعب على خبـلٍ يدلبـح علابيـه
والا الرجال اللي لها سمعت الجـاه=في ذمتي مـن مثـل ذا ماتدانيـه
والفرق بين الناس من ثبت خطاه=يمشي سنع لامن مشى في مماشيه
يحب فعل الخير في يـوم دنيـاه=ويحسب حساب الاخره في مساعيه
ويحسب حساب الموت قدام ينصاه=ويطلب من الرحمن من النار ينجيه
والعرف والمعـروف كـلٍ تمنـاه=ويصعب على اللي مايدله وغاويـه
بعض النفوس تقول ياما سمعنـاه=وبعض النفوس تقول حنا حراويه
وبعض النفوس تقول حنا زرعناه=والزرع ما اثمر يوم جفت دوانيـه
وبعض النفوس تقول حنا قطفنـاه=وبعض النفوس مربعه في مفاليـه
وبعض النفوس تقول وهبه من الله=والحظ لامن قام ماطـاح راعيـه
وكلٍ على ماقيل يشعـب مطايـاه=والله اعلم منهو اللي نـزل فيـه