ترسي ارسوم الحد على غير تعريف = باقوال شاعر في بيوت طريفه
شب البحر والا فحزوه بالسيف = من شانكم ياهل العقول الضعيفه
يلي تسمي خرب رمح على الكيف = ما شد رمح والوحيد وليفه
لا ينسمع لك صوت والزول ما شيف = واصبحت تايه في ديار مخيفه
اما فخله لا تشله ابتحريف = والا افشله من جنوبي امنيفه
كلام صدق مايرهم بتزييف = والمصبح المعرف باسمه رديفه
والصدق بالنيات ما هوب بتوليف = تجارة لاهل القلوب النظيفه
يسقيك يا رمح مخال من الصيف = براق برق مستديم قنيفه
مدهال عطران الشوارب هل الكيف = دواسر خطلان الايدي شريفه
خيالة لصخاف شول مشاغيف = لا طار سترام الخضاب العفيفه
سلام احلى من فواق المصاييف = لمدلهين الجارينسي وليفه
جعل الوطن ودياركم وارضكم ريف = يا هل المراجل والنفوس الخفيفه
يوم القنا والخيل والرمح والسيف = كلا يعدي من حياضه بسيفه

يا مل قلب مولع بالمشاريف = يطرب لذب في الرجوم المنيفه
لا داج في قاع لعشبه تصانيف = وبنة فياضه بالنسايم لطيفه
في نجد لسقته المزون المراديف = من بارق يعجبك لقبل رفيقه
رفق الخيال اللي سحابه مهاتيف = لا حن رعاده يعيشك رجيفه
ترتع به الطرعات من غير تعليف = جل العشار اللي لذيذ عطيفه
سود البكار اللي اذنيها مقاييف = شول ليا جيته قليل وصيفه
وسج النبات ودوجت به لياشيف = مصيف مثلي لا نشد عن مصيفه
وقلبي يشوقنه اجزال السواليف = وهذا هوى بالي وكل بكيفه
وهاض الكلام وكلش له مداريف = وزانت مجاراة العلوم الطريفه
ابن سويد ذرف القول تذريف = ببيوت شعر بالمعاني حصيفه
من لابة تعرف نهار المواقيف = صبيان يام اهل الفعول الكليفه
دمناني لا من مشا الحيف للحيف = قوم وفاها يغلط اللي يضيفه
قطف زهر عذبات الامثال تقطيف = والنور عده ريف جاره وضيفه
والصدق للظفران عز وتشريف = والظلم طبع للوجيه الكسيفه
ترفع له البيضا بروس الاطانيف = يوم الوفا والصدق وجهه حليفه
وسمعت في قوله لما سمع توصيف = في خرب والمصبح ورمح وكنيفه
حدا بيان ثابت دون تزييف = واللي يزيف فيه ما فاد زيفه
وقبله شهد مثله رجال عواريف = قول الحبيشي في السنين الوحيفه
وقول الخلاوي صدق ماهوب تخريف = قول مؤرخ ثابت في صحيفه
والزايدية يا زبون المواجيف = ترسخ على حد السيوف الرهيفه
اديارنا من ماضيات الاساليف = قبل الهلالي والزناتي خليفه
وحدودها تعرف بكل الاطاريف = ومن دونها العدوان ترجع معيفه
وجنوبها رمح عروقه مهاييف = وشمالها جزع الركا لا عريفه
ومن شرق لدناها الوسيع المناكيف = ومن قبلة قوز الشريف وشريفه
دار حميناها بضرب المراهيف = فوق المهار وموميات السفيفه
وفعل القبايل وافي دون تعريف = والذم يرجع صاحبه للحسيفه