شبيت من راس الفتيلـه قناديـل = وذبحت في ميلاد شعـري تميمـه
شاعر وامثل لابتي خيـر تمثيـل = شعرٍ جديده يفتخـر فـي قديمـه
ابقى على حلـم الليـال المقابيـل = تدفعنـي النخـوه وقـو العزيمـه
ما اقول انا نجيب والا احمد زويل = اهل العقول الراجحـه والحكيمـه
لكن نحاول نرتقي جيل عن جيـل = واكبر فخر إنا من امـه عظيمـه
ايامنـا ذل وهـوان وغرابـيـل = تهدم قيم والجهل مسـرح جريمـه
واعلامنا غـزو العقائـد وتظليـل = قنـاة تمثيـل وصحافـه عقيمـه
والشعر فصل حال الايام تفصيـل = وجسد معانـاة الشعـوب الأليمـه
واصدق لساني حلل الوضع تحليل = احساس شاعر نابعٍ من صميمـه
وانا ليا تغربت من غيـر تأويـل = ارضي طموحي وافهمي يا فهيمـه
انا ادري انه غرك القـال والقيـل = وكثرت عليك علوم راع النميمـه
لكن ترى ماعاد لي للصبـر حيـل = ولا عدت اطيق المهزله والظليمـه
صحيح اجابه صدمة الوقت وآشيل = والصبر مفتاح الفـرج والغنيمـه
واحـاول ادور للأعـذار تعلـيـل = واقول ما ينسـى نديمـي نديمـه
لك بين ريضان الحنايـا مداهيـل = ولك بالحشى حشمه وشيمه وقيمه
خوذي كلام اللي ليا قال ما يميـل = وخلي كلام اهل العقـول السقيمـه
يا وردةٍ مالت على ضفـة النيـل = يهبهـا ريـح العبيـر ونسيمـه
انا احتدم لك وانثني واسرج الخيل = واعن لك واكرب لك شداد ريمـه
ثلثين ليل وثلث باقي مـن الليـل = بعد القطيف وقبل مفـرق رحيمـه
ترسل وانا مانيب يـم المراسيـل = الوضع سـيء والنوايـا مقيمـه
رسايلك توحي بقطـع المواصيـل = الله يبيح اللـي رعـاك ويديمـه
ماهو كذا تقفـي وذودي مباهيـل = وتهل دمعك مثـل دمـع اليتيمـه
جرحتني توك وانا جرحي محيـل = وهزمتني وانا ماعـرف الهزيمـه
وانا من احفاد الرجـال المشاكيـل = بني عطا أهل الصفـات الكريمـه
إليا حدرنـا واديٍ ضاربـه سيـل = وإليـا تسندنـا جبـالٍ مريـمـه
والمرجله لوهي ورا الجدي وسهيل = نسعى لها سعي الغريـم لغريمـه
فهمتنـي والا تبـي ندبـل الكيـل = نصيحتـي خـل العلاقـه حميمـه
لا تحسبٍ دمعـي يبـل المناديـل = لا والـذي منعـم عليـك بنعيمـه
إن رحت عني جعل دربك تساهيل = وإن جيتني غالي وقدر وحشيمـه
طبعي كذا ماركض اخلاف الاقاويل = وحسيبنا محيي العظـام الرميمـه