قالوا وحيد وقلت ماعندي اونـاس=وقالوا غريب وقلت بأرض بعيـدة
ابعدت مابي شوف ناس من الناس=بعدت عن بعـض المـلا وتعديـده
مطاوع قلبي على كـل الأجنـاس=والبعد عن شوف المكـاره يفيـده
اخترت بعد الدار عن قرب الانجاس=عن دارهـم نلقـى ديـار جديـدة
في وسط نجد اتبع هوا كل نسناس= واطرب لشوف طيورهـا وتغريـده
اعشق ليالي نجد لو انها ادمـاس=وايامهـا عنـدي جنـان سعيـدة
شمى لعشب رياضها يقعد الـراس=ومافات من ساعات عمري بعيـدة
شوف الزهر يبعد عنا كل هوجاس=ويريح عن قلـب الشقـا مايكيـده
وحس الرعد في رايح المزن رجاس=دقات عـود عنـد سمعـي فريـدة
وان قال لي بعض المخاليق لاباس=قلت الهضايـم بالضمايـر مجيـدة
الله من هـم بالاضـلاع غطـاس=اقام وسط القلـب وابطـى شديـدة
فكرت بالدنيـا بتقديـر واحسـاس=ولا جات لي الدنيا علـى مانريـده
اللي نبى تقطعت عنـه الارمـاس=وعنه اختفت كل العلـوم الوكيـدة
القلب يبغض كـل غـادر وبـلاس=اللـي يلطـخ دم الاجـواد بـيـده
واحب من يتعب على كل نومـاس=ومن فيض جوده مايمـد الزهيـده
اللي ليا كـادت والاريـاق يبـاس=يصبر على كود الامـور الشديـدة
وللنفس عن طرق المثاليم حبـاس=يتعب على كـل العلـوم الحميـدة
واحب نجد وكل حبي على سـاس=حب بقلبـي لـه قصـور مشيـدة
عندي وعرها مع سهلها والاطعاس=غابات ورد فـي زهـور نضيـدة
برياضها محلا هـدد كـل قرنـاس=ان شاف حفان الحبـارى يصيـده
عدل المناكب لابرق الريـش دواس=ماناش في مخـلاب كفـه يجيـده
ياحلو هداته على الجـول غـلاس=ينحـر كثيـره ويتعـدى الفريـدة
اجرد عديم لهايش الخرب فـراس=والطايرة لـو ترتفـع مـا تكيـده
ايام عجات الهـدد كلهـا اونـاس=ياحلـو بالخـد البيـاح تهـديـده

المشاركة الأصلية كتبت بواسطة فهدالمحيسن (المشاركة 337404) الله يرحم الشاعر محمد بن احمد السديري البدراني رحمه واسعه مشكور اخوي ابن محمد على النقل الطيب

المشاركة الأصلية كتبت بواسطة ابواسرارالودعاني (المشاركة 337413) بيض الله وجهك يانجم الوداعين والموقع يابومحمد علي الاختيار الرائع والله يرحم الامير الشاعر

المشاركة الأصلية كتبت بواسطة سالم بن صمهود (المشاركة 338944) صح الله لسان الشاعر العلم والامير الراحل محمدالاحمد السديري رحمة الله رحمة واسعة وسلمت يمينك يابن محمدعلى النقل الرايع والاختيار الموفق