سلام الله على رجلٍ نحس بغيبته لا غاب=خويٍ لا تباطيته تشوقني مكاتيبه
خويٍ له بمجد العز و امجاد العرب محراب=إلى عدّوا رفيق الضيق بافعاله نماريبه
مشى في شف ذودٍ للبروق تعوج الارقاب=تقدمها لروضٍ لا رضي عنه تعشي به
والا اركاها لزولٍ لو يطيب له الزمن ما طاب=على الركبي يحودب حفّرت جنبه عراقيبه
نفل يا طيب السمعه شكيت البعد لك بكتاب=غيابك عن خويك يا نفل وش هي تسابيبه
الا يا اهل النداوي شرعوا لاهل العتاب الباب=عتاب الطيب لا من الرفيق اشتاق لصحيبه
وانا في المنتدى بارسل لابو نادر وانا مرتاب=انا اخاف النداوي ما تجي صوبه مناديبه
بعثت له الرسايل و الرسايل ما لها حسّاب=تغمّس دون ذوده في عُمر وّلا محاضيبه
تضمن بالنفل و الخزم يقطف من جبل وشعاب=يرافقها سؤالٍ له الا من جاه يدري به
انا بانشدك عن بنتٍ لها عند الرجال حساب=إلى غابت فلا يفرق بخبث العود من طيبه
وانا بانشدك عن رجلٍ فهيمٍ ياخذ الالباب=إلى حرّك فهم قصد الاشاره من معازيبه
وانا بانشدك عن طفلٍ غريرٍ ما شلع له ناب=إلى من نًشد قال ان السنع هذي محاسيبه
تفكّر يا نفل شرواك حرٍ يدمي المخلاب=إلى من هد سرّ الموت شاله في مخاليبه
و عطني ردك الوافي وانا له يا نفل رقّاب=وإلى من صبت نيشان المثايل فانت تحري به

الا يا مرحبا ترحيب غالي مثني الترحاب=و أهلي بالكتاب و كاتبه و اللي لفاني به
لفاني من عزيزٍ عزّه الوالي و رايه طاب=و لو مجروح مدحي فيه مير الناس تدري به
تعلا و اعتلا بالمرجله في عالي المرقاب=كما حرٍ تعلاّ و اعتلا عالي مراقيبه
سبيقني بالتشره يحسبن ما عاد له طلاب= انا ريّض مع الموضوع اباخذ فيه و اعطي به
يعاتبني على طول الغياب و لا يمر الباب=على ظنه إلى مر البلد مانيب داري به
و على طريا الرسايل ما وصلني منك كون اكتاب=عسي ربي يضيع ساعيٍ ضيّع مكاتيبه
وانا مانيب اسولف لين يبدا للعلوم اسباب=و انا اللي هاضني قافٍ من مبارك يغني به
و اقول البنت تبغاها رصاصه عادي و شبّاب=ترا يزهبها الرشّاش و الرجّال يمشي به
واقول الثاني الدش المسمّى جعله الذهاب=عسى وقتٍ لفا به يا ابيض الشارب يقفي به
و على الطفل الغرير ان كان ظني صايبٍ ما خاب=اقول الجرمني تعرف به الاسناع و تجيبه
وانا ابنشدك عن بنتٍ صغيره كبر راس الدّاب= الا يا طيب ثرها بين كل الناس يا طيبه
وانا بنشدك عن رجلٍ خذا ثنتين دون اسلاب=ركب وحده و الاخرى تركبه و يزين تركيبه
وانا بنشدك عن بيتٍ بلا ساسٍ و دون اطناب=تفكّر كيف بيتٍ دون عمدانه و اطانيبه
و ابختمها بذكر الله عدد ما صب من صبّاب=حقوقٍ من سحابه لين ضاقت به محانيبه

لفاني من نفل خطٍ صفق له خافقي باعجاب=و لولا الحدب ردّت خافقي عدّا يحيي به
لفاني قاف من يرسم على المعنى و رميه صاب=و من قوّة شهود القاف يطبع في حنازيبه
هلا به عد ما هز الهوا عودٍ نبت بهضاب= و ما ركّب حقوق الوسم لين القاع تنبي به
و ما غنّت حمام الورق لامن شاقها من غاب=و من هاضه حمام الورق غصبٍ يظهر اللي به
شكيت البعد يا المنعور و اردفتوا لنا بعتاب=و من يشكي على رجلٍ يعزّه ما يثاري به
انا جيت اطلبه واجب و اشوفه صار هو الطلاب=ولين الحق له كلّه ثبوتٍ ما معه ريبه
نطحني بالتشرّه و افختت كفي من المقضاب=و جيت اقدّم اعذاري و حقي اليوم مالي به
يقولون انتبه بالك من السكر الا من ذاب=حلاته غطّت السم المعرسم في مشاريبه
انا ما ذقت سم الهرج لكنّي لمحت الناب=ومن لا يفهم وش المقصود لا يقعد يلاغي به
حكيم الراي صبت القيل و ارسلتوا لنا ما ناب=و صح الله لسانك و استلم ردي على اللي به
اشوف البنت بصمه تكشف الصادق من الكذاب=إلا بانت تبين كل خدّاعٍ و اساليبه
و اقول الرجل كربون الورق لا خط فيه خطاب=يوسّط بين ثنتين الورق و يزين ترتيبه
و اقول البيت بيت الدود يالله تقبل اللي تاب=و من لا يرحمه ربّه الا من مات للخيبه
و صلاة الله على عبدٍ بعث به خالقه بكتاب=شفيعٍ لامته يالله عسانا من مناجيبه

المشاركة الأصلية كتبت بواسطة مبارك بن محيا الدوسري صالح الجعيدي الله لا يهينك يا الغالي نقلك لقصايدنا دليل وفاك و طيبك تقبل تحياتي و تحيات نفل بن سعود أخوك

المشاركة الأصلية كتبت بواسطة فهاد السلام عليكم ورحمة الله وبركاته صح لسان الشعائر وصح لسانك يالقرم يا صالح وبيض الله وجهك ولا هنت ولا تبخل علينا بمشاركاتك

المشاركة الأصلية كتبت بواسطة دغش البطي السلام عليكم ورحمة الله وبركاته المشرف الرائع والمميز جداً : صالح الجعيدي عسى الله يبيض وجهك على هذا النقل الجميل فصح الله لسانك ولسان الشاعرين الكبيرين ودمت لنا بهذا التوهج الجميل والله يعطيك العافيه تحياتي القلبية محب الجميع