أرسل لي سطام سعود العتيبي وهو صديق عزيز من أيام الدراسة هذه القصيدة بعد موقف بسيط تبينه الأبيات :-
*
دايم على صحبة هل الطيب نفخر = وانا رفيقي طيبن وافتخر فيه
يقدم على فعل السعد ماكر الحر = يوم الردي يقصر وتقصر خطاويه
عون الرفيق اليا غدا يومه اقشر = هو فزعة المضيوم لا جاه ناصيه
عن واجبه يوفيه ماقال ماقدر = يستاهل التقدير عدة مواطيه
راشد وفعله واضحن ماتغثبر = من لاد زايد والعدو خاب ساعيه
جاته حروفي من ضميرن تكدر = تبغي بعد ماغاب تعرف خوافيه
عقب الصدود اللي حصل جعل ماشر= ابطيت عنا والبطا وش دواعيه
قال المثل حزم العصي ماتكسر = وإن فكت الحزمة تكسر عصاويه
وحنا ترى مثل الحزم يابن مسعر = الكل منا لصاحبه مايخليه
نعرف وش اللي صار والعلم يذكر = محد معصوم من الخطا مايسويه
لا اخطيت في حقك لك الحق يحضر = ماني من اللي جاهلن سلم اهاليه
اعرف ترى الرجال ينسى ويكبر = ومنهو علومه طيبه مانت ناسيه
أرجي السموحة كان عذري توخر = والمعذرة فأول كلامي وتاليــه
ورديت على سطام:-
مشى القلم مابين الاصباع وافتر = ردن على اللي خصني في قوافيـه
يامرحبا ياللي بالأبيات عبر = ترحيب صادق للمناعير نوفيه
نوفيه للنادر مواريث ندر = صطام ولد سعود نعما بطاريه
اللي على الطالات يرقى ويشهر = حرن تسلسل من حرارن تغذيه
أرسل مراسيله وبين وفسر = بعض الكلام اللي يحسـّـه ويوحيه
يقول ماكسر لزوم يتجبر = والماء لزوم إنه يعود لمجاريه
وحق الصداقة لازم انه يقدر = مصيون طول ايامها مع لياليــه
فحنا صداقتنا على العز تذكر = على الوفاء والطيب والعز نشريه
ماهي صداقة هوتميل ومسنجر= مفعولها ماظن الأيام تمحيه
وصاحبك لو طال الزمن ماتغير = ماغيرت عوج الليالي مباديـه
ومن حسّب الزلات تكبر وتصغر = ماظن يبقاله رفيقن مصــافيه
واقول يابن سعود لو ماتعذر = أنت الصديق اللي نعزه ونغليه