الحمد لله وحده الباقي المتفرد بالقوة والجبروت سبحانه الحي الذي لا يموت
والصلاة والسلام على أكرم خلق الله محمد بن عبدالله رغم أنف بابا الفاتيكان وأساطين الكهنوت وبعد
انقطعت كثيرا عنكم أحبائي مشرفي وأعضاء منتدى قبيلة الدواسر
أسعد الله الجميع ووفقهم لما يحبه ويرضاه
أتمنى أن تغفروا لي تقصيري غفر الله لكم
جئتكم اليوم مكلوما نعم مكلوم بفقد أخ غالٍ وصديق حميم
لم أكن لوحدي فالجميع افتقده وأقض مضجعه فقده
نعم توفي أبو ماجد ولكنه ذهب إلى رب هو أرحم به من أمه
يكفيه طاعة وشرفا أنه لو سيقت له الدنيا بحذافيرها على أن يسجد لغير الله ما رضي
يكفيه شرفا بره بوالديه وبأقاربه وإحسانه للقاصي والداني
ووقفته مع الضعيف والعاجز وتواضعه الجم وخلقه الدمث وأسلوبه الرائع
ماذا أقول وماذا أترك ؟
إنه فهد بن ماجد
من عرفه سيعرف أنني لم أبالغ وإنما هضمته حقه ومكانته
تملك القلوب كتملكه للقوافي الجزله وانسابت المعاني لشاعريته انسياب المحبة له في قلوب من عرفه وقابله
رحمك الله يابو ماجد رحمة واسعة وأسكنك فسيح جناته
هذه أبيات متواضعة في الفقيد الغالي وقد سبقني إلى ذلك من هم أقدر وأجدر كأمثال أحبابي الكرام أبو فراج وابو مبارك ومهدي وابن عريمة
وهي غيض من فيض
يفزّ قلبي كلما شفتنا جيب = ويضج لا من شفت زولن يحاليه
لا والله الّا مات راعي المواجيب = نسل الحرار اللي طيابٍ مجانيه
في ذمتي مافيه طاري عذاريب = كنّ الإله منزّهه عنه تنزيه
اليا حكى .. تَمـْر النخيل المهاديب = احلى من الشهد المصفّى حكاويه
واليا عطى .. غيث الكبود المجاديب= تكاشف بروق الصخا في يمانيه
النادر اللي في السما له مراقيب = كم زول خربٍ حوّله مع علابيه
تفّاق جزلات المعاني الذواهيب = تعوّدت بدع الفرايد قوافيه
اليا بغى الندّر تجي له مهاذيب = جلمود صخرٍ وانحدر من علاويه
فهد فهد سِعد النّضا والمناديب= عِدّ القروم اللي تخالف سوانيه
فهد ولد ماجد ولد كاسب الطيب= طلق الحجاج اللي جزالٍ هقاويه
مراجله ما تنحصى بالحواسيب= حاز المراجل كلّها في مخابيه
من لاد ناهش لا عوى الذيب للذيب= سقم الحريب اللي عجز من يداويه
اقولها ودموع عيني سواكيب= والقلب فيه من اللواهيب ما فيه
طالبك ياللي ما تكوده مطاليب= يالمعطي اللي كلنا في حسانيه
من يسأل الرحمن ما يمكن يخيب= الواحد اللي ما بعد خاب راجيه
يالله عسى قبره جنانٍ واطاييب= واغفر له ذنوبه وزلات ماضيه
دارت بنا الدنيا سواة الدواليب= وابن ادمٍ فيها على سكة التيه
ميت بكى ميت والاقدار تسبيب= والقلب يبغى له وصاية وتنبيه
بابطي وقلبي فيه علة وتصويب= ما لوم قلبي لا بكى فقد غاليه
يفزّ قلبي كلّما شفتنا جيب= ويضجّ لا من شفت زولن يحاليه
أخوكم
عبدالله بن راجس الخضاري
..