السلام عليكم ورحمة الله وبركاته ،،
أقدم لكم قصائد الشاعر/ مهل المصروري الدوسري ،، قصائد جزله عسى أن تنال رضاكم ،،،
الله من دنيا كما وصـف الامـواج=دنيـا بهـا وقـتٍ كثيـرٍ نـزاعـه
دنيا تقلـب والعـرب عـده ازواج=ازواج مختلفةً على كمـن اشاعـه
ناس تعليهـم علـى روس الابـراج=بالمـال والـلا ماوراهـم طماعه
ونـاس توطيهـم على حسب الانتـاج=بالفقـر ولاهـم عيـال الشجاعه
فقطعك يا وقت على النـاس منعاج=وقتً نجاء بالبوم وغـرق سباعه
حط النفوس العاليـه تحـت الأدراج=وحـط البيـوت الواطيـه برفاعـه
بعض العرب بيته على كـم مزلاج=مسكـر بـابـه قلـيـل متاعه
وبعض العرب مثل الثمد طين ورجاج=ما يسقي الضميان ولوربـع ساعه
وبعض العرب عدن به الجم هداج=جمـن قـراح ومدهـل للجمـاعـه
وبعض العرب لاجاك لكنـه محواج=يومى وراء الاجواد والسـر ذاعـه
وبعض العرب قلبه كما نير الصـاج=قلبه غشيش مـا تجيبـه الاشاعـه
متعافي والمال مـا هـوب محتـاج=ولا صارع الدنيـا وذاق المجاعـه
في غبه التسعين من بيـن الأمواج=مغيـم جـوه ويـبـرق شعـاعـه
وإذا نهيتـه عاصيـاً مالـه عـلاج=واللي تقولـه مـا يريـد استماعـه
فيا سارى الظلماء بلى نور وسـراج=غـرك زمانـك ونتحابـك ضياعـه
متعرض الاقـدار والـدرب مطنـاج=خطر على حالـك يـزود أوجاعـه
الليـل كلـه بيـن سـهـره ودواج=والله يعلـم ويـش فـود البضاعـه
وإذا تحرا الفجـر وصبـح ينبـاج=حـط المخـده والمكيـف متـاعـه
خلى الفرايض كلها وقال انـا سـاج=النـوم سلطـان قـوي المنـاعـه
وإذا تنهـض تالـى اليـوم معـاج=دنـاء رحيلـه مايونـي كـراعـه
يكوي الشعر والثوب ويحط مكيـاج=ويراجع الكـواي فـي كـل ساعـه
واكله من المطعم دجاج على صـاج=وليا مـلاء بطنـه توسـد ذراعـه
ويقرب الشطه مع ببسـي وعـلاج=ويقول أنا راسى تزايـد الصداعـه
هات الجميع اللى له النفس تحتـاج=ومزينـه هنـدي قلـيـل نفـاعـه
والبيت لو فيـه مـن كـل الانتـاج=البيت زاده مـا يناسـب أوضاعـه
أنا شوف ناس دوبها تولـج أولاج=وكلً علـى شكلـه يـدور أنواعـه
اهل المعاصى بينهم ضيق وحـراج=وكلً وراء الثانـي بـدرب اللكاعـه
حياتهم ما بيـن حسـرات وزعـاج=وبليـس يلعـب بينهـم بالقطاعـه
واصحاب دين الله على وجيهم تـاج=تاج الشرف ونور باعلـى رفاعـه
نور على نـور مـع عنبـر فـاج=كلً يبي قربـه ولـو ربـع ساعـه
النـور نـور الله مـع درب لازراج=درب النبـي محـمـد و تبـاعـه
لاجاء نهار كنهـم وصـف حجـاج=وكلً يبي من عنـد ربـه شفاعـه
تمت وصلى الله على صاحب المعراج=صلواعلىالمختار وسعـوا مساعـه
انصح اللي يستمع قولي وقافـي=لانصحته ما يقول انـي نسيتـه
النصيحه قلتها والقلـب صافـي=منصـح والله فـي قـاف بنيتـه
من يطاوع واحداً مهـوب وافـي=ضايع ومضيـع رايـه وصيتـه
كثر خلان الرخـاء دام العوافـي=وكـل منهـم يستعـد اليا دعيتـه
وان بداء اللازم غدوعج مقافـي=وكل منهـم لابغيتـه مـا لقيتـه
قلوا الخلان والماء جـاه سافـي=والصحيب اللى ضحك لى صك بيتـه
يضحك الناجد ولادري ويش خافي=والخفي اللي غبـي مـا قريتـه
ان بغى منك يجي عندك سنافـي=لين ياخذ مطلبـه اللـي عطيتـه
وعقبها يقفي وينوى الانحرافـي=ونصدفته قال انـا والله نسيتـه
يختفي عنك ليالـى مـا يشافـي=لين يخلص لازمك اللـي بغيتـه
لأنتها اللازم يجي ويقـول لافـي=لاوني موجود مطلوبـك قضيتـه
من تغيب في اللـوازم الاخفافـي=ما يجي في الكايده اليـا نخيتـه
والرفيق اللي معك بالراي صافي=ينقل حمولك وياطاء مـا وطيتـه
وان بداء لك لازم يجيـك حافـي=يقضي اللازم ولوك مـا دعيتـه
الرفيـق احذرتوريـه التجـافـي=الجفاء يشنـاك اليامنـك شنيتـه
غلطه الخلان ما تحسب خلافـي=وان حسبت اغلاط محبوك جفيته
ادمح الـزلات وايـام اعجافـي=والرفيق احـزام اليامنـك بغيتـه
مثل سيف الهند ونصابiزرافـي=يعجبك في الضيق اليامنك خذيتـه
والقروم رجال ونفـوس خفافـي=لوهـم شـوي مطلوبـك لقيتـه
والرخوم رخـوم لونهـم ملافـي=فذهم مـا ياصلـك حيـه وميتـه
والصلاه عداد من كبـر وطافـي=في ليالى الحـج والمسعى وبيتـه
شارب الدخان مالـك منـه ثابـه=يا ضعيف النفس عندي لك نصيحه
حاول انك تتركـه وتصـك بابـه=صك باب السوء لا ياتيـك ريحـه
البلاوي والمصائب مـن اسبابـه=كم مريض اصبحت كبده شريحـه
خاسرٍ ماله وحالـه فـي شبابـه=والضمائر ولعـت منـه جريحـه
مثل من ولـع بنـاره فـي ثيابـه=ناتـخ عينـه بيمنـاه الصحيحـه
راعي التنباك ما يبـرى صوابـه=.مشغـل البـال والعالـم مريحـه
من شروبه غادي صدره خرابـه=ما يبات الليل كلـه مـن كحيحـه
انصحك ثم انصحك واسمع لجابـه=.يا قليل الراي مـا منـه منيحـه
انتبه للـداب مـن سمـه ونابـه=.قرصة الحيه مـا ترجـع مليحـه
والتهـم يـوم بيناديـك بحسابـه=والعمل مكتوب في عرض الصحيفه
اطلب المولى وما جاء فـي كتابـه=سنة مفروضة وهـي الصريحـه
الفرائض من على وقت الصحابـه=سنـة قيادهـا وجـيـهٍ فليـحـه
النبـي محمـدٍ وضــح كتـابـه=.من صلاة ومن صيام في صحيحه
من عمل له خير يحتـاج ألثوابـه=.ومن عمل له سوء يلقاه بمطيحه
الله مـن قلـبٍ وزا بـه مليلـه=كثرت هواجيسه وروحـي اكلهـا
هات القلم واكتب بيـوتٍ جزيلـه=بيوت شعـرٍ والـردى مادخلهـا
بيـوت منقيـه ولوهـي قليـلـه=نصايحٍ تهدا علـى اللـي قبلهـا
أشوف لي وقـتٍ غريـبٍ مديلـه=وشوف لي دنيا على الله عدلهـا
دنيا علي الاجواد راحت سحيلـه=محدٍ يميـز مرهـا مـن عسلهـا
كثرت مشاكلها وصـارت طويلـه=واسباب قل الدين ضيـع أهلهـا
ان اقبلت كنها سحـاب المخيلـه=مزنٍ على الوديان سيـل فحلهـا
يشدي نبات فـي شغايـا مسيلـه=متخالـطٍ نوارهـا مـع نفلـهـا
وان أدبرت فيها سيوفٍ صقيلـه=تظرب بحد السيف محـدٍ سألهـا
كم صفـةٍ راحـت بليـا عقيلـه=راحت بهم الايام يمـرس عجلهـا
دنيـا تفـرق العميـل وعميلـه=والله يعلم ويـش تالـي عملهـا
معـاد تصفـي للخليـل وخليلـه=عشـره ليالـي مايطـول أملهـا
جانـا زمـان ماعرفنـا لجيـلـه=ناسٍ على الدنيـا كثيـرٍ جهلهـا
خلت فروض الوقت دون النفيلـه=وان سمعت المذن تزايـد كسلهـا
تحلق لحاهـا والملابـس طويلـه=ولاعاد تعرف نوقها مـن جملهـا
وعيال الحمايل ما تهاب الفشيلـه=والذيب يصبح خايفٍ مـن ثعلهـا
وجانا من المغرب أمـورٍ مهيلـه=ومخططات الغرب جتنـا احيلهـا
وغزوٍ يراودنا علـى كـل حيلـه=جاب المعاصي والمشاكـل دبلهـا
جيل على الاسلام يغلـي غليلـه=الله يبطـل كيـدهـا ويخذلـهـا
ضيـع شبـاب نـاشٍ عزتيـلـه=قلد اسلوم الغرب حتـى وصلهـا
خطوى الصبي لا جاك عاين زميله=كلٍ على شكلـه دروبـه جدلهـا
أما غشاه اللـوم عنـد الحليلـه=واللى رقا العليـا بعالـي مثلهـا
من دور العليـا بـدرب الجميلـه=دروب المراجل عز للـي فعلهـا
ومن دور الهسات يلقي الفشيلـه=ومن دور العـالات يلقـى بدلهـا
ومن طاوع الشيطان ضيع دليلـه=وضيع حياته بيـن تايـه شللهـا
والمرجله والدين عـز وفضيلـه=والله عوين اللي جهـوده بذلهـا
وكثر التعاون عـز بيـة وسيلـه=ربع هداهـا الله وعـزه شملهـا
وكثر المشاكل مـا تعـز القبيلـه=وكثر التفـرق للجمـوع يخذلهـا
وربع بـلا عقـال ماهـي دليلـه=وربع بـلا جهـال يكثـر فشلهـا
ورجل بلا ربـع عزومـه قليلـه=ويمناً بلا يسـرا عطيـبٍ شللهـا
يصبر على العجفا لوهـي هزيلـه=ويصبر على جور الليالي وميلهـا
ويصبر ولو جاه من الناس عيلـه=ويسايس الدنيا ويتـرك زعلهـا
من خوف لا تصبح حياته ذليلـه=وما يقدر الصعبـات لجـا نكلهـا
ويا من على ربعه دبوره يشيلـه=متكابـرٍ نفسـه ويتبـع زللـهـا
ماجرب الدنيـا عصـور الدبيلـه=يوم الحرايـب كـل نـارٍ شعلهـا
واليوم في الاسلام يسحب شليلـه=ويقول أنا عنتر بماضـي جهلهـا
متكابرٍ راسـه عسـا الله يزيلـه=ماقـدر النعمـه وروحـه سألهـا
ويش الذي نهار القيامـه جيلـه=نارٍ وجنه وفـي حديهـن نزلهـا
أما دعـي عليـه وللـى دعيلـه=وكلٍ يواجـه سمعتـه ويحملهـا
تمت وصلوا عـد وبـل المخيلـه=وعداد عشب نابتٍ فـي سهلهـا
،، وسلامتكم ،،
مع خالص التحية و الاحترام ،،،