السلام عليكم ورحمة الله وبركاته :
اخواني أعضاء وزوار هذا الصرح الشامخ :
يسرني أن أشارك معكم بهذه القصيدة التي نظمتها مؤخراً , ولها مناسبتها الخاصة بها ,
أتمنى أن ترقى إلى ذائقتكم :
نغيب وألا مانغيب أقدامنا فوق السحاب=وأهل المكر فوق البسيطة ماضربنا حسابها
إليا رضى عن فعلنا الأبيض رفيعين الجناب=رقط الحيايا خلها إتموت بسموم أنيابها
الحر يشهر في السما والبوم ينعق في الخراب=شتان مابين الطيور أشكالها وأسرابها
لابارك الله في حضورٍ يستوي معه الغياب=ناسٍ مع العالم تجي وإتروح مايدرابها
وإن طلّت الشمس الرفيعة من وراء روس الهضاب=غابت إنجومٍ في الدجا محدن شعر بغيابها
ما أقولها ناتج غرور أقولها رد وجواب=على القناه اللي تبث الشوشرة بألعابها
مايوقظ الفتنة ويفتح للردى سبعين باب=ألا حثالات البشر ورخومها وأذنابها
المجد يحضابه ارجالٍ طافوا آفاق الصعاب=صلب العزايم للمفاخر يشعبون إركابها
أما تقيٍ يرجي الجنة ويخشى من العذاب=إدموع عينه في قيام الليل ياما أصخابها
وألا حكيمٍ ثاقب النظرة على الدرب الصواب=لاعمست أريا لابته زينات الأريا جابها
وألا شجيعٍ ثابت الوقفة وقلبه مايهاب=حامي غنادير البنات وسترها وإحجابها
وألا كريمٍ مايدفّن الأرصدة وسط الحساب=إمكبّر الضيفة بدارٍ ماتصكّ أبوابها
واللي جمعهن كلهن ياخذ الأماره بإكتساب=طرقٍ على عوج الخشوم اللي تشم ترابها
وباقي الأوادم ( مشّ حالك) والحياة أكل و شراب=مثل الدواجن تاكل وتشرب وتنسى أصحابها
المرجلة من لاقدر يلحق عليها في الشباب=ماهوب لاحقها لشابت لحيته وأشنابها
والشعر وهبة من لدى ( الوهاب) ماهوب إغتصاب=قولوا لشعار المهايط لاتطول أرقابها
الشعر مايرفع مقام اللاش وأفعاله سراب=لاشان فعله مايحرك في الرجال إعجابها
الشعر ماهوب البطولة والذخيرة والزهاب=حتى المره تقدر تقوله من ورا جلبابها
لذا على الشاعر يسمّعنا القصيدة بإقتضاب=والحكم للجمهور يشرح سلبها وإيجابها
أحدن قصيده في الحلا : درّ المصاغير العِذاب=لاروّحت من روضةٍ نبت الوسم يزهابها
وألا شفايا غادةٍ في ريقها الشهد المذاب=طب الهواوي لاسرى ليله على ( عنّابها)
وأحدن قصيده يرفع الضغط ويجيب الإكتئاب=علة وريدٍ ماتعالجها جميع أطبابها
ومن لايفكر في عواقب كلمته نال العقاب..= من ( الله ) أول ثمٍ أقوامٍ يثير أعصابها
قلته على وضح النقا من دون شكٍ وإرتياب=والكلمه اللي بأستحي من قولها بأبدابها
ياللي تفاخر بالمغازي في المخازي : والترا ب=لوكان ربعك والنعم بأفعالها وأنسابها
انشد عن القصة مع العقال يامال الذهاب=حتى عيونك تبصر اليمّة ولايغدابها
محدن غزانا والليالي كنها لون الغراب=خلْ عاد والدولة على راسك تشد أطنابها
هذي ( الحمر) من دونها (حمر) الشلافي والحراب=و(حمر) السيوف اللي صناديد الحروب إتهابها
(آلاد شكرٍ) لاتعاوت في ضحى الكون الذياب=فزعاتهم تشبع سراحين الخلا بأسبابها
مير اركد وقلّل من الجرعات وأجواء الضباب=لاتقطع إسيولٍ تداحم مع مفيض إشعابها