مساء الخير ..
مشاركه اولى
ان شاء الله تلقى الصدى الطيب ...
قال منهو بادين حلو المقال=بسم واحد كلنا له راجعون
الرحيم اللي عليه الاتكال= ما يخيّب من عنوا له تأبون
خالقن ذا الكون في ستت ليال=وجامعن هـ الناس يومن يوعدون
كل مـُـلكن لو يعمــّر في زوال=وكل حي(ن)ذايقن كاس المنون
الا وجهك يا العظيم وذو الجلال=يوم كل الخلق بأمرك هامدون
جــّل شانك في صفاتك والكمال=عالمن ما كان وما سوفا يكون
مسلمين ورافعينٍ بابتهال= اليدين وفيض عفوك يطلبون
لولا فضلك كنــّا في جهل وظلال=مرسل احمد لاجل خلقك يهتدون
والصلاه اعداد ذعذاع الشمال=وعــّد همــّال السحايب والمزون
عـ الذي كـ البدر نوره والجمال=خير خاتم خير كل المرسلون
هو شفيع الناس في يومن وبال=تشخص الابصار وتذهل به عيون
ويا قصيدي لا طلبتك بـ ارتجال=أزحم الشعــّار واللي يقصدون
عادتن لك لا كتبتك بـ أنفعال =ما يشابه حبكك اللي يكتبون
ما خبرت البيت منك (مش حال)=مثل هـ اللي في الجرايد ينشرون
يا تجيب من الفرايد والجــّزال =او تكب الشعر واللي يشعرون
طالبك بالله تكفى قـــّم تعال=اسرد القصه على اللي يسمعون
يوم حــّول لي رفيقي الاتصال =واثرها بنت(ن) عليــــّه ما تمون
لا سلام ولا عطتني من مجال =ولا عرفت السائله منهي تكون
قلت سمي وفاجئتني بالسؤال =انت مرسل لآجل ناسك يضحكون؟
افتضحنا منك جعلك للزوال =يا فشيلتنا ويا كبـــّر الطعون
ذي رساله للدواسر واحتفال =دشنوا جوال ومنه يرسلون
فيه تقرى اخبار مجدك والرجال =لابتن وقت الحرايب يقبلون
قلت لحظه فهميني باعتدال =يركدون ويركدون ويركدون
بختصرلك ما قصدته في مثال=وافهميه وخلي غيرك يفهمون
(ما على جال الرساله غير جال)=دوسرين لو طلب روحي تهون
دون ربعي ذايدن في كل حال=ومستعد وحاضرن للي يبون
بس نوماسي يسبب الانفصال =لين وصلني الى حــّد الجنون
النعاره ورثّ جدي والخوال =زايديــّه واللي مثلي يفخرون
خصّ لا صار الحكي عن مجد آل=زايد الملطوم حامين الحصون
راسيين مثل ما ترسي الجبال=في نهارن قـــّل فيه الصاملون
في نهارن تحذف العذراء جلال=وينتخي من دونها رجلن زبون
لا تعزوا شل حملن ما يشال=وارتكاله لين شالته المتون
ما يهاب الموت لو أنــّه مـــ آل=ولا حسب له مثل ناسن يحسبون
واحدن يسوى عدد حب الرمال=من رجالن فـ اللقاء ما يـُــقهرون
ترخص الدنيا في عينه والعيال=لا اعتزا به كل رجــّال امغبون
زايدي والزايدي مهما يقال=عنه ما يوفيه ياللي تمدحون
هيه يا بنت القبايل والحلال=لو بغيتي الصدق واللي يصدقون
اقسم بربي وعليــّه بالحـــّرام=ما درينا عنك ولا هم يحزنون
بس غاوي شعر واكتب بـ أنفعال=وانطرب واخلي غيري يطربون
كتبها الفقير الى عفو ربه
سعد بن فيصل آل ناصر الودعاني
27/05/2007 مــ