[معلومات العضو ناصر الجعيدي]

هات القلم يا نشمي اكتب تعابير=يوم الهجوس اتزاحمت بالشطاره
اللي سبايبها معزّه وتقدير=ماقلت من بعد الكتابه خساره
قالت صباح الخير ياراعي الخير=في حكيها مجهود وإلاّ جساره
قلت ارحبي ياسيد كل الغنادير=من قلب مايعشق كلام العثاره
واتربّعي في صدر ذاق التعازير=أمّا يمين القلب وإلاّ يساره
يا ام العيون اللي هدبها طوابير=لاسلهمت كن الحياة استداره
وعود ٍ تمايل به هبوب العواصير=انا اشهد انها تستحق الإثاره
من خفّْت المشيه شبيه النوادير=الله خلقها للجمال افتخاره
لا قيل ساره قمت اخفف عن السير=لأن الجمال يهيم بعيون ساره
وان قيل وش لك بالبلش والتصاوير=مادام ربعك معتلين الصداره
قلت ادري اني من رجال ٍ مشاهير=اللي غلاهم داخلي له وقاره
لكن هذي من حروف وتعابير=لأن الجمال يهيم بعيون ساره