السلام عليكم ورحمة الله وبركاته
أغيب كثيرا وأشتاق إليكم أكثر وأعتذر عن تأخر الردود
تحية للجميع من قلبٍ يقدر قيمة تواصلكم ومروركم
في الحديث القدسي : ( إن من عبادي ما لا يصلح له إلا الفقر )
وقد أتى ذم العائل المستكبر
وربما يقدر له الله الغنى ابتلاء له ولغيره فيكون كما ذُكر في حديث الأعمى والأقرع والأبرص
( إنما أوتيته كابرا عن كابر )
.............................
انا اشهد انّ الفقر راعي جميلة=يكسر جناح (ن) ما لجبره صلاحي
كم من فقير(ن) راس ماله شليله=لو اغتنى ضيّق وسيع البراحي
يشيل حمل(ن) عجْـز غيره يشيله=وصدره وزى به كل سم (ن) ذحاحي
يحقر خلق الله وكفّه محيلة=وش لون لو ريّش وجا له جناحي
الله يقطع جورته واللهي له=والله لا يسّيه بايّة نواحي
الطبع يغلب والتطبّع مخيلة=ما غرّنا برق(ن) على الافق لاحي
والذيخ لا منـْه التوى راس ذيله=ما ينعدل ما دام صوته نباحي
الزود نقص(ن) والتواضع فضيلة=وما ينقل الزّومة بعيد المشاحي
لا خير في مال(ن) يعوّد فشيلة=ولا خير في كفّ(ن) بليّا مناحي
المال في الدنيا مجرّد وسيله=والذِّكر ما يمحاه في الناس ماحي
وهرج الملا مثل السيوف الصقيلة=هنيّ من هو من غثاه استراحي
الله لا يغني النفوس الثقيلة=والله لا يملا الكفوف الشحاحي
انا اشهد ان الكبر راس الرذيلة=وانا اشهد ان الخلق باب الفلاحي
وانا اشهد ان الفقر راعي جميلة=يكسر جناح (ن) ما لجبره صلاحي
محبكم
تأبط خيرا