بسم الله الرحمن الرحيم
الأخوه الكرام
السلام عليكم و رحمة الله و بركاته
يسرني مشاركتكم بهذه القصيده
و هي بمناسبة مزاين قبيلتنا العريقه قبيلة الدواسر
(( خطلان الايدي ))
و الدافع لكتابة القصيده هي الشله المصاحبه لإعلان المزاين في قناة الساحه
وقد تكون مجاره لها
أقوووووول فيها :
بسم الدواسر كلهم دون نقصان = يا مرحباً أعداد ما طايرٍ طار
با اللي لفونا يا المناعير ضيفان = الضيف له حشمه و قيمه و مقدار
ترحيبةٍ يأهل الوفاء شانها شان = يا مرحباً أعداد همال الامطار
حنا هل الطالات في كل ميدان = حنا الدواسر منبع العز و الكار
للجود منباعً وللطيب عنوان= أهل الشيم و العز حماية الجار
يشهد لنا بالطيب من ماض الازمان = تشهد لنا العربان شيبان و صغار
شجعان لا من ثار فالجو دخان = عدونا نلهده و نسقيه الامرار
الاحسان ما نجزيه يا كود باحسان = افعالنا جزله و وافين الاشبار
حنا هل النخوه طويلين الايمان = و النعم فينا يا المشاكيل تكرار
حنا هل البل من قديمات الازمان = من شانها نقطع طويلات الامتار
من شانها سقنا كثيرات الاثمان = لو جيت اوصفها ابا ضيع و احتار
يا زينها لا ربعت وسط ريضان = روضٍ فلاته يا الحلاحيل نوار
البل ليا من شفتها خاطري زان = خصٍ ليا من شفتها وسط الاقفار
القلب لو به غم و هموم و احزان = الهم لا من شفتها يا عرب طار
البل تنومس يا عرب كل زعلان = في وصفها تعجز ترى كل الاشعار
يا كم فقيرٍ عقبها صار شبعان = يستاهلون البل بعيدين الانظار
و الحمد لله ديرتي خير الاوطان = با الخير دايم يا عرب تثمر اثمار
المملكه دار الوفاء دار الايمان = ديرة هل العوجا طويلين الاعمار
في ظل عبدالله و في ظل سلطان = اخوان نور مسعفة كل محتار
آل السعود مطوعة كل شيطان = آل السعود منزحت كل غدار
نفدي الوطن برواحنا وين ما كان = حنا رجالٍ طوعت كل جبار
ما همنا الحاقد و لا أي خوان = لجل الوطن و أهل الوطن نرخص اعمار
دون الوطن حنا سلاطين شجعان = نفدا الوطن و الدين و الحاكم البار
عدونا قسمه مهانه و خسران = العز و الهيبه تراها لنا شعار
الله يعز ملوكنا عيال شامان = عبدالعزيز الصيرمي ضلع سنجار
يا الله يا معبود يا عالي الشان = يا جعل منزاله بساتين و ازهار
خلف رجالٍ فعلهم يا عرب بان = قوم الفخر و الطيب حماية الدار
عبدالله المغوار هو طير حوران = حرٍ قطاميٍ و وقفاته كثار
ترفع له البيضاء على كل ميدان = بو متعب اللي للكسر دوم جبار
و سلطان راع الجود و المد سلطان = يا كم و كم فرج عن صغار و كبار
و مشعل عريب الجد و الخال ذيبان = حرٍ خذا من قمة المجد ميكار
و راع الوفاء و الطيب و الخير سلمان = و نايف جميل الفعل محمود الاذكار
و جميعهم يا ناس من دون نقصان = حامين دار العز من كل الاخطار
و من قبلهم يأهل المواقيف فرسان = من دونهم حالت تدابير الاقدار
سعود مع فيصل رقوا كل ميدان = و خالد من رجال الفخر نسل الاحرار
و فهد فهد شيال ثقلات الاوزان = يقدر على اللي هي صعيبات و عسار
اللي ليا منه وطا قاسيٍ لآن = و الله ما مثله حكيمٍ فا الاقطار
يا الله يا المنان يا رب الانسان = أجعل مقامه بين جنات و انهار
كل القبايل عقبهم صاروا أخوان = و الأمن و الامان من دار لا دار
قلته و أنا من لابةٍ دوم كرمان = قومٍ تحوش الطيب و الجود و خيار
نارد على عد الفخر ورد ظميان = الخصم لا من شافنا دوم ينهار
لاد الحبيبي منبع العز ظفران = على العدو دايم كما السيف بتار
حنا المصارير أهل العز شيخان = قومٍ نهار الهوش لا لا ما تحتار
تشهد لنا با الطيب بدوٍ و حضران = و النعم فينا يا عرب سر وجهار
من دون نقصٍ فالقبايل و حقران = كل القبايل نعم مليون مليار
شاعر و أحب الشعر و اجر الالحان = شاعر و لي فالشعر بصمه و تذكار
و صلاة ربي عد همال الامزان = على نبيٍ في طريق الهدى سار
محمد المبعوث من نسل عدنان = نبينا نبينا خير مختار
و سلامة الجميع
أخوكم الشاعر : مسفر بن منيف بن عبدالله المصارير الدوسري
أبو نايف