بسم الله الرحمن الرحيم
هذه قصيده للشاعر /حشان بن فهيد بن لويف الفهادي
قالها في الشيخ /عبدالله فرج الرواعيه الدوسري
وقد قالها الشاعر الفهادي بعد موت بعيره شيبان
المهدى عليه من عبدالله الرواعيه
عسى الله يعوضنا الصبـر فيـك ياشيبـان=وعساك مخلوف وفضـل ربـي تواهيبـي
حزنـا لفقـدك كلنـا والمـقـدر كــان=وذا أمر الله اللـي يعلـم السـر والغيبـي
أجي مشربك وأروح وانشد على الرعيـان=واعـود ودمعـي مثـل سيـل المحانيبـي
أعزك وبـرك مثـل مابـر فـي الشيبـان=واحبـك محبـة شالـح لـولـده ذيـبـي
غلاك امتزج بالدم يجـري مـع الشريـان=رسخ في سويدا القلـب غصـب بلاطيبـي
ولكـن الامـر الله ربـي عظيـم الشـان=عطاك وخـذاك ولاعـن الحـق تجنيبـي
كظمت الغضب والغيظ ودارى على الجيران=وذبـيـت ياشيـبـان روس المهاظيـبـي
وجريت صوت من صميم الحشـا مليـان=ولاحيت من حزني علـى فقـدي الذيبـي
ومما جرى صخرت قـاف مـن الوجـدان=بيـوت علـى معنـى بـذوق وترتيـبـي
تليـق بمقـام الـي فعولـه لهـا برهـان=عزيزالجنـاب اللـي يعـرف المواجيبـي
حميد السجايـا النـادر مطـوع الفسقـان=عبـدالله فـرج ستـر البنـي الرعابيبـي
سليل الفخر والمجد والطيـب لـه عنـوان=وله سيره فـي صفحـه العـز والطيبـي
هو اصل الكرم ساس الكرم منبعه لاغـان=يحلى علـى هـداج صافـي المشاريبـي
راعي مجلـس تلقـاه مزحـوم بالضيفـان=ويبهـج خطـا طيـره بزيـن التراحيبـي
وصدره رحيب بالمعرفـه وسيـع ابطـان=ذخيرة بنـي عمـه ومنصـى الاجانيبـي
معز الخـوي والجـار هـو والله كحيـلان=ومـن لاذبـه عـدى بـروس المراقيبـي
ابيض الفعايـل والوفـاء رجـح الميـزان=يوم ان الردي مثل الرصـاص المكاذيبـي
وفاه السمـؤل جـود حاتـم بـلا نقصـان=شجـاع مهلهـل هيبتـه هيبـة كليـبـي
وبسمـه تجيـر قمـة الطيـب والاحسـان=خـذا الطايلـه مافيـه شـك ولاريـبـي
ولد شايب فعلـه تعـدى علـى الشيخـان=جميـع القبايـل تعـرفـه والمعازيـبـي
من اولاد مسعر لكتسـى الجـو بالدخـان=تساق لحـوض المـوت وتجـري الهيبـي
مداغيش قوم فـي اللقـاء كلهـم ظفـران=حمـو غرسهـم باللـي تفـج المظاريبـي
لمن لحقو الابل جندلـوا فـارس الفرسـان=بني مسعـر اللـي تيهـت شمـخ النيبـي
من اللابه الي مـن زبنهـا لقـاء مزبـان=تزبن دخيـل البيـت والموقـف صعيبـي
وتشهد عدامه غالـب وزور بـن جلبـان=كلامـي علـى برهـان ماهـو باكاذيبـي
من اولاد زايذ مرويـة كـل حـد اسنـان=هل المدح والنامـوس قـوم(ن) معاطيبـي
دواسر كواسر في النـذر تنـزل الحـدان=وترعـى القفـر ذيدانـهـم بالمغاليـبـي
وعبدالله اكبر من قصيـدي وصيتـه بـان=جزيـل العطايـا ماضيـلـه تجاريـبـي
نصيتـه وقـال ابشـر بشيبـان ياحشـان=عطانـي هـدود الشـول زينـه تعاجيبـي
وخذيته ولاهوجسـت بالبيـع مهمـا كـان=وشرايـة الابـل يرسـلـون المناديـبـي
وحلفت وفيـت انـي فلاصخيـه بالاثمـان=لوامشي فقيـرٍ وحافـي ٍوخالـي ٍ جيبـي
ابي حرد شيبان تشوفـه علـى الحيـران=ويظهـر علـى حـرده بكـار حنازيبـي
وتحكمت فيهـا بالغـلاء والبكـار ازيـان=وحايا من الرحمـن شيـب علـى شيبـي
على ذكرها يأتيك رامـس وبـن حمـدان=وتركي علـى كبـد الشريطـي لواهيبـي
عطيـة كريـم والله المعـطـي المـنـان=عبدالله فـرج خيـال حـرش العراقيبـي
عطاياه جـزلات ودايـم اتجيـك اسمـان=بعيـد المـدى ياقريبـيـن المحاظيـبـي
وشيبان ياهل الصنف من خيـره الذيـدان=مـن حيـار ذود مالحقـهـا عذاريـبـي
وعسى الله يعوضنا الصبر فيـك ياشيبـان=وعساك مخلوف وفضـل ربـي تواهيبـي