[معلومات العضو شافي القويسي المخاريم]

المدح في من يستحقه يجي زين= يصوغ في ذكره وينقاد صوبه
في كل شهمٍ فالقساء فعله يبين= مواقفه عند الرجال محسوبه
ما نافس اللي يكنزون الملايين= يسوق ماله دون حاله جلوبه
ياطالبٍ سلم الوفاء خلك يمين= المرجله ماهيب عنك محجوبه
راع الوفاء يرجح بكل الموازين= والناس يلقونه على ما هقوبه
لا احتجت ولا احترت من بين الامرين= ترى السنع لك بيناتٍ دروبه
الشهم لا جا واجبه يعجب العين= والحر لولا موقفه ما قنصوبه
والطيب كايد والرجاجيل شرهين= والناس ما خلوا حدٍ ما حكوبه
من طاب قالوا فيه والله ونعمين= ومن هان قالوا عند ذكره وكوبه
والعز كنزٍ ما يقدر بتثمين= للغانمين اللي شقوا واتعبوبه
والوقت يمضي والخلايق مغيرين= ولا به احدٍ فيه يصفي شروبه
من عاش قرنٍ قال انا عشت يومين= يفطن بها العاقل وياخذ جروبه
ان الحياة احلام والعمر تقنين= والادمي مثل القمر وصفوبه
واتعس حياةٍ جارنا الله من الشين= من طال به عمرٍ وكثرت ذنوبه
يالله عسانا سالمينٍ معافين= في رحمتك نطمع ونخشى العقوبه
ياللي عبادك لك صيامٍ مصلين= واسمك بمبدا دينهم وحدوبه
المومنين الخاشعين الملبين= من زود جودك يرتجون المثوبه