[معلومات العضو شافي القويسي المخاريم]

جعل السحاب اللي تكاشف بروقه=لا انشت مخاييله قنوفه مزابير
ترزم رعوده والهبايب تسوقه=حل الوسامي يوم جاله مباكير
كن الهوى الغربي يخايط فتوقه=روّح من القبله مزونه محادير
يضفي على العارض وينساق فوقه=يمطر وسيله ينتحي للمحايير
امن الجبل للعرق ينثر حقوقه=لا نش هل وزاد خير ٍعلى خير
هني قلبٍ داله ما يشوقه=شوف السحاب الى نشا تالي عصير
لا من نشا جو البلد عفت سوقه=شفق ٍعلى لذات بعض المشاوير
وقلبي كما طير ٍ يناتل سبوقه=على المطير يتوق ويتله السير
متولع ٍ قلبي وعيني شفوقه=شفي بممشاً في نبات المخاضير
لاجاه ولي ٍ واستجلت عروقه=من كل نوع ٍ كاسي ٍ العثامير
مع كل صبح ٍلا تبسم شروقه=قام يتـشكل فالفياض النواوير
لا هبه النسناس مايل عنوقه=بنة شذاه تفوق طيب العطاطير
راع الولع غاية مرامه وذوقه=لا داج به ينسى جميع التفاكير
قفر ٍ من النزال يبخص طروقه=يحن له قلبه حلول المضاهير
مشاغله عن رغبته ما تعوقه=هواه في دنياع ماله هوىً غير
يكون دين الله يكمل حقوقه=ثم والديه ورفقته للمناعير