السلام عليكم ورحمة الله وبركاتة
اخواني ,, في منتداي العزيز
غيبتنا الظروف عنكم ,, وطيبكم وقدركم ما يغيب
هذه قصيدة للروح استاذي واخوي وابن عمي ورفيقي
الشاعر /فهد بن عبدالله بن محمد آل مهنا .. الله يرحمه
وموتى المسلمين
يا عين دمعتس مهوب رخيص يوم انه = حوّل على غترتي من حر ماجاني
ازريت لاكفكفه وازريت لاكنه = ومن وين ما لقيت وجهي تلقاني
صار الحزن فالحشا شلفا ومنسنه = قدت معاليق خفّاقي وشرياني
على الذي فارق ونادر ولا منه = خذاه منا هادم اللذات وابكاني
كنت اغرف الشعر من بحر ومن فنه = واليوم مالي طراة ولا لقيفاني
يا كبر فقده علي ويا كبر ظنه = فيني وانا من عقب فرقاه متداني
واعدني اشوفه قبل يومين لكنه = شاف المنيّه ولاقاها وخلاني
ابكيه وابكي على فرقاه حيث انه = ماهو ولد عمي .. الا ثامن اخواني
لواني من التراب الطاهر احنه = هيلوا من ترابه على صدري على شاني
لعل تبرى الجروح وتبرد الونه = ويطيب جوفي وتطفي منه نيراني
النفس من كثرة الصكات ممتنه = ولا عاد يفرق معي ضحكي وحرماني
للعمر ذكرى لها فصدورنا حنه = وللوقت وجهٍ شحوبٍ كنه إياني
آمنت بالأقدار واللي كتب لانه = ماصابني لو كرهته ما تعداني
الموت تالِ الحياة وللزمن سنه = ولو طالت الايام مصير الانساني
لكن طاريه لا عرّض علي كنه = يكز دمعي عليه ويضعف إيماني
واستغفر اللي له الافضال والمنه = وألوذ به من شرر نفسي وشيطاني
بموت قبل آتحلوى سجتي عنه = وانا ادري اني ولد فاني واخو فاني
اللي بقوله عسى مثواه للجنه = والله يجبر عزا ربعي وشيباني
.
ماجد المهنا