الأخت نجــــــــــــديه لبية الدعوه فشكراً لك على مجهودك وبيّض الله وجهك ووجه راع القصيد
هذي مجاراتي ولولا السحاء لكانت أطول من كذا تمنياتي للجميع بالتوفيق
حنا لها حنالها شبة النار = والمعركه في الحرب تحتاج تعزيز
عبدالعزيز اللي رفع راية الدار=صقر الجزيره حرّ ماهو كماالعيز
راياتنا عليا بعيدين الانظار=وحكم السعودي مو كما حكم برويز
لفيت بأبياتي على جد وإصرار=وتشمل على فتح وضم وتهميز
لبيه يامن دق ناقوس الاشعار=تعكز أبياتك على الفكر تعكيز
جيتك وأنا من لاهب الود منثار=مغروز من بين الضلاعين تغريز
نقّيت لك شعر على الكيف وأختار= والشعر مايخبز في العقل تخبيز
صيّرت لي في البحرقارب وبحار= وفرّزت لولو البحر عالشط تفريز
ياكم وعدني البحر والبحر غدار= يهز يخت الشوق بالموج تهزيز
ياما رجيته بس جاني بالاعذار=الين قلت بالانجليزي له بليز
محدٍ يقاوم ياعلى حكم الاقدار= تحزنا الاقدار ياخوك تحزيز
لي ربع مثلك تحشم الضيف والجار=متميزه بين المطاليق تمييز
شم الجبال أن جاء لها دك تنهار=وتغيب في عمق الثرى عقب تبريز
لبّست متني ثوب من ثوب الاحرار= ورزيت كم الثوب بالطيب تزيز
ثوبي كرم والجودفي ثوبي أزرار=وطرزته بشور النواعير تطريز
ماحب مقعاد الخنا صارماصار= وأعف نفسي عن دروب المخانيز
أهبّ في فكرالشعر مثل الاعصار =وأحوز علم غانم دوم تحييز
أحب أساير مطلق خير الأخيار= وأكنز علو المعرفه منه تكنيز
ماحب أماشي لاشي من نسل الاشرار=يقضي نهارفي المخاليق تلميز
ماله في العليا نصيب ولا ثار = مامنه فود بس تلميز تغميز
ياماحلا الفنجال بالهيل لادار=لاقزني طرف النواعيس تقزيز
جاريت شعار على القدرشعار= أرجوزة ياحلو بعض الاراجيز