السلام عليكم ورحمة الله وبركاته:
اسعد الله اوقات الجميع بالخير والمسرات ، أرسل لي الأخ والصديق حمد البدراني أبيات يقول فيها:-
مثل الذهب فعلك وساسك ومجناك = وتركز لك الراية بعالي حجاها
ومثل الحيا لا مر ذكرك وطرياك = يجلي عن النفس العليلة عناها
طلبت ربي يحفظك ويتولاك = ياللي فعول الطيب غصب حواها
لامن نخيته فز يركضلك وجاك = ماجاه عيلة من جدوده قناها
معرب مابين ذولا وذولاك = مساعرة عز اللي اعتزا ثم نخاها
مالوم ابوك اللي على الجد سماك = تخايل مراجل فيك ثم غذاها
وادرجت حومك في سماها للافلاك = وعين الحسود اليوم بيّن عماها
فرديت عليه بهذه الأبيات وليعذرني إن حصل قصور:-
ارحب تراحيب الحيا لاعدمناك = يابن الرجال اللي بعيدٍ مداها
وارحب تراحيبٍ لمثلك وشرواك = يانسل بن بدران حامي حماها
غمرتني بالطيب من طيب مجناك= بابيات شعرٍ عالي مستواها
الطيب ورثٍ لك من اقصاك لادناك=والعز والنوماس شخصك جناها
ومحبة ربوعك من احلى مزاياك= ولابد يا ذيبان تلقى جزاها
واللي زرع له ورد مايجني اشواك = ولابد يالزراع تقطف جناها
ويفداك من جنّب عن الدرب يفداك = ويفدونك خبول العرب وغشماها