اقتباس:
المشاركة الأصلية كتبت بواسطة بو ثمام الدوسري
الله يحييك ياخالد المطيري بين الدواسر والاخوان بإدارة المنتدى ماقصروّا
معك استقبلوك بحفاوه تستاهلها رغم انك قفيتهم بموضوع بمنتدى مطير
ولا ذكرت فيه الحقايق كامله حول السبب الحقيقي لحذف موضوعك بمنتدانا
وأبشرك ان هذي سلومنا يالدواسر ما نبور بالرفيق .
بخصوص موضوعك هذا صرت فيه مثل المعزي بالمقفّي جيت عقب صدروّا الناس
أنا ألي ودي أفهمه هاللحين وش الهدف من موضوعك هنا ياخالد ؟
هل هو محاولة أقناعنا يالدواسر ان هوامل مطير مطران الاصل ؟
أو محاولة تأكيد نسبهم للدواسر ؟ إذا الهدف الأول فالقاعده تقول
(( اليقين لا يزول بشك )) وانت واضح من ردودك هنا ومداخلاتك
مع ابن دمخ بمنتدى مطير أنك ماتملك أدنى مقومات البحث لتأكيد نسب
الهوامل لمطير وكل مافي الأمر انك تقتبس من ردود فلان وفلان بنفس
الموضوع , وبقول لك إذا القصد أقناعنا يالدواسر بأن هوامل مطير لايرتبطون
بصلة نسب بهواملة الدواسر فعطنا دليلك الواضح العقلي او النقلي وحلف
واصل بمطير ماهو خافيك ولا يخفى على الناس ولاهو خافي ايضاً مرور نجد
بقرون من انعدام التوثيق التاريخي وهجرات افخاذ القبائل جماعيه او شبه
جماعيه لأسباب شتى لا يسع المجال لحصرها.
وإذا قلت أن الهدف من موضوعك اقناع الآد السيالي ربعك فما اعتقد انك
أحسنت الأختيار بكتابة موضوعك بمنتدانا لأن مافيه احد معنا من هوامل
مطير واذا معنا احد فعضويتهم قديمه ومشاركاتهم نادره وعساك ياخالد
على القوه أكتب موضوعك بمنتدى هوامل مطير اذا لهم منتدى وأقنعهم
ورح لبني عمك بمبايض والقصيم والكويت ولا تذخر شي بأقناعهم
لكن ثق ان المتعلم منهم مثل ابن دمخ ألي رد عليك يعلم حرمة انتساب
الرجل لغير ابيه شرعاً ولا رايح تقدر تقنعه واذا غيره من عامة الهوامل
فهم متوارثين انتسابهم للدواسر اباً عن جد وراثه سماعيه ألي هي
من اهم أدلة اثبات النسب ولهذا بيصعب عليك اقناعهم !
ولعلمك حنا نفرح بالطيب من ربعنا سواء معنا او مع غيرنا من القبائل
الأخرى ولا نحرص على نسبته لنا لأنهم ماعاد هم دواسر وحنا بغناة الله
عنهم وقت الجهل خل عنك يوم الناس عايشه بفضل الله بالرغد والامان
ولو نبي ننسبهم لنا كان قلنا حناتيش الروقه العتبان وشيوخهم المحايا
منا وانت مايخفاك شهرتهم وتاريخهم العريق الي كل يتمنى انهم بني عمه
غير بدارين حرب وشيوخهم الرواجح وغير وغير وغير .
مسألة ترديدك وترديد المؤيدين لك بمنتدى مطير ان السبب بنتساب الهوامل
لهواملة الدواسر تشابه الاسماء فما اعتقد انها صحيحه اطلاقاً ماشفنا بشارية
حرب منتسبه لبشارية قحطان ولا بني عمرو الجنوب اهل النماص لبني عمرو
حرب ولا بدارين مطير ذوي بدير لبدارنة سليم وغيرهم كثير .
وحنا نتمنى ان الله يوفقك ويعينك على اعداد بحث تاريخي مؤصل بالادله
وحيادي بعيد عن العاطفه يثبت او ينفي العلاقه لأن الأمر في النهايه
يخصكم ياهوامل مطير ولا يخص غيركم وختاماً مبروك عليك وعلى الجميع
الشهر المبارك وكل عام وانت بخير.
|
بو ثمام الدوسري اسمع الله يهديك فارس حزوا غير وانا غير فارس حزوا مثل ماذكر اسمه بالمنتدى فيصل المري الهاملي وانا اسمي خالد عبدالله الحمر الهاملي هذا اولا ,,,,
وانا برد على اسئلتك :
أنا ألي ودي أفهمه هاللحين وش الهدف من موضوعك هنا ياخالد ؟
اخوي انا سجلت بعد رد العضو هذلول بعد مااستهزا ببني عمي وعزوتي الآد واصل ...
هل هو محاولة أقناعنا يالدواسر ان هوامل مطير مطران الاصل ؟
شي طبيعي بعد ما حذفتوا موضوع العضو فارس حزوا انا اللي اقتنعت ان الهوامل مطران في الاصل ...
انت تقول (وكل مافي الأمر انك تقتبس من ردود فلان وفلان بنفس الموضوع)
ارجع لموضوع العضو فارس حزوا في منتدى مطير وتعرف كل شي ...
اانت تقول(وبقول لك إذا القصد أقناعنا يالدواسر بأن هوامل مطير لايرتبطون
بصلة نسب بهواملة الدواسر فعطنا دليلك الواضح العقلي او النقلي)
ذكر (فارس حزوا) تحالف الهوامل مع ابناء عمومتهم واصل في حلف واصل الذي تم في قصر صفينة بالحجاز والمتحالفين من مطير لمطير وكان هدف هذا الحلف الخروج من الحجاز الى نجد والدليل ان البرزان من واصل اول من نزل نجد وقد كانوا الهوامل يسكنون وادي الفرع ووادي الحجر وهذه مساكن بني عبدالله من مطير في الحجاز قبل نزول مطير الى نجد وذكر ان حلف واصل قد تم وانتهى قبل وطبان الدويش اول شيخ لقبيلة مطير وفي عهد وطبان الدويش وقعت هذه القصة اللي ذكرها فارس حزوا بمنتدى مطير وهذه هي القصة :
اغار قوم من بريه من قبيلة مطير على ابل المحانيه وبعض آل منجل من
قبيلة السهول ثم لحقهم الطلب وبعد معركه شديد استطاع الســـهول استرداد
ابلهم إلاّ ناقة غانم بن بديح السهلي (ام رمان)الذي لم يكن حاضرآ
حيث ضاعت مع الهجيج وحينما عاد غانم وعلم بخبر المعركة التي جرت
والتي ضاعة ناقته(ام رمان)فيها قال قصيد يذكر فيها المعركه
ويهيب بالشيخ وطبان الدويش ان يرد ناقته:
ياليت منهو حاضرك ياأم رمـان
فـي ساعـة وشـر ماينتمـنّـى
اما غديت وكلني الذيب سرحـان
والا تعـود فاطـري يـم اهلنـا
غدو بها مع طلعة الشمس برهان
الاد واصـــل مرذيـة كـل دنــا
بمعنى ان حلف واصل قد تم وانتهى من عهد وطبان الدويش اول شيخ لقبيلة مطير وهذه القصة من منتدى السهول انفسهم ...
انت تقول(وحلف
واصل بمطير ماهو خافيك ولا يخفى على الناس ولاهو خافي ايضاً مرور نجد
بقرون من انعدام التوثيق التاريخي وهجرات افخاذ القبائل جماعيه او شبه
جماعيه لأسباب شتى لا يسع المجال لحصرها)
طيب حلف واصل يتكون من عشر افخاذ كبيرة ليش تحالفوا ودخلوا في مطير؟؟ وش يبون في مطير؟؟ ليش ماكونوا قبيلة مستقلة مثل قبيلة القرينية؟؟ ليش مادخلوا مع عنزة او مع عتيبة او مع قحطان او مع العجمان او مع شمر او مع الظفير ؟؟ وماهو انت اللي تعلمنا انسابنا ولا تنسى انك تتكلم عن انساب مطير وانت تعرف منهي مطير ...
انت تقول(وإذا قلت أن الهدف من موضوعك اقناع الآد السيالي ربعك فما اعتقد انك
أحسنت الأختيار بكتابة موضوعك بمنتدانا لأن مافيه احد معنا من هوامل
مطير واذا معنا احد فعضويتهم قديمه ومشاركاتهم نادره)
ذكر العضو (فارس حزوا) في منتدى مطير ان السبب في وضع موضوعه في منتدى الدواسر ان الدواسر هم المعنيين في الامر هم اللي يقولون هوامل مطير يرجعون لنا وهذا هو سجل في منتداكم ووضع ادلة واثباتات على كلامه فما كان منكم الا انكم اوقفتوا عضويته و حذفتوا موضوعه ...
انت تقول( كان قلنا حناتيش الروقه العتبان وشيوخهم المحايا
منا وانت مايخفاك شهرتهم وتاريخهم العريق الي كل يتمنى انهم بني عمه)
الحناتيش من ذرية دعلوج بن حنتوش بن حمارس بن طلحة بن روق من عتيبة من هوازن هذا ماذكر في منتدى عتيبة ...
نت تقول(غير بدارين حرب وشيوخهم الرواجح وغير وغير وغير )
البدارين في حرب ينكرون ذلك وادخل منتدى حرب وتعرف وكذلك الباحث فايز البدراني الحربي ينكر ذلك ,,, لكن وشرايك اذا قلنا ان فخذ اللويمي من الدواسر هم في الاصل من الجبلان من مطير ؟؟؟ اكيد بتعصب واللي ما ترضاه لنفسك لا ترضاه لغيرك وانت منت وكيل على انساب حرب ولا عتيبة ولا مطير ...
انت تقول(مسألة ترديدك وترديد المؤيدين لك بمنتدى مطير ان السبب بنتساب الهوامل
لهواملة الدواسر تشابه الاسماء فما اعتقد انها صحيحه اطلاقاً )
طيب ليش بذات ينتسبون للهواملة ليش ما ينتسبون للهواشلةولا للصخابرة ولا للوداعين ولا للغييثات ولا للخييلات و هناك فخذ من فخوذ قبيلة بني الحارث يدعى الهوامل ليش ما ينتسبون له هوامل مطير لانها تشابه اسماء فقط الله يحيك ...
انت تقول(وحنا نتمنى ان الله يوفقك ويعينك على اعداد بحث تاريخي مؤصل بالادله
وحيادي بعيد عن العاطفه يثبت او ينفي العلاقه لأن الأمر في النهايه
يخصكم ياهوامل مطير ولا يخص غيركم)
والله العضو (فارس حزوا ) ما قصر جاب ادلة واثباتات والدليل انكم حذفتوا موضوعه و اوقفتوا عضويته ...
انت تقول(وختاماً مبروك عليك وعلى الجميع
الشهر المبارك وكل عام وانت بخير)
مبروك عليك الشهر وكل عام وانت بخير ...