المعلم ما يكفي بتعليم الدروس =كود دورات اليالي وبعض دروسها
والمثايل للعوارف كما وصف العسوس =مايقود لنية العرف كود عسوسها
والرجال اهل الوفاء تنعرف والها نفوس =مثل ماقالوا نفوس الحرار انفوسها
والرصيد الدين والعز ماغيره لبوس =هو غذى النفس العزيزه وهو ملبوسها
والخضوع يحط في سمعة الرجال سوس =لا ومرها بالمذله كلاها سوسها
علم اللي يصغر النفس من شان الفلوس= يحسبٍ ان الناس بتكبره بفلوسها
والبشر تفنى ومن طاب يبقى له ارموس =وطيب طاريها يجدد قديم رموسها
ماتساوى بينها بالطبايع والجنوس =تختـلف بطـبوعها واختلاف جنوسها
فرقها بالفعل فرق العدود من الرسوس =تنعرف من غزر ماها وضعف رسوسها
نحمد اللي عز الاسلام عن دين المجوس =وامتة في دين الاسلام ترفع روسها
يانديبي فوق شاص ٍمع الخبه يهوس= دار ابن حشفل طلبتك لزوم تنوسها
شاقني قول بدابه كما نقد الفلوس =شاعر ٍطرق المراجل كسب ناموسها
من رجال تكسب المجد فاليوم العبوس= للمراجل دايم ٍشوقها واهجوسها
والرجال اهل المعرفه بنظرتها تقوس =تبتصر بالراي بعلومها وتقوسها
من بغاء طيب الثمر يحرص بطيب الغروس =ويتلذذ في ثمرها وطيب غروسها
كم صبي ٍظاع مبدى حياته بالجلوس =في حياته سالي ٍمايمّل جلوسها
والحياه بدورها مثل ماتمضي تدوس =ناس ترفع مستواها وناس اتدوسها
يالله ياللي تحيي القاع من عقب اليبوس =لين تخضر بالحياء عقب طول ايبوسها
تستر امن اهل الحسد والنميه والنجوس =ويالله انك لاتكثر وجيه انجوسها