قصيدة صوتيه بعنوان ( تايه الايام )
متى يا تايه الأيام تلقى للسنين علاج = مضى نص العمر والباقي الله يعلم أسراره
تسير بدرب له مدخل وله مجرى وله مخراج = توقع من ملفات الطريق وطول مشواره
قبلك أفواج مشيت به وبعدك يا لبيب أفواج = ولا ياقف مسير الركب غصب النفس تختاره
هذا في دربها تضوي جروحه مثل ضوي سراج = وذاك أمسى لهيب الذنب جوفه يهتك استاره
عليك من المواجع والمآسي في زمنك سياج = ونفسك بين حلو المغريات وزفرة امراره
تنادي للفرح وأنت الغريق تصارع الأمواج = يجاوبك الصدى هذي صروف الدهر وأخباره
خبر يطوي خبر وأحلام تسكن عالي الابراج = مصير الحلم يطويه الفراق ويهدم اسواره
تضيق الدايره ويصير درب الآخرة منعاج =ولا عندك خيار الا تدوس الدرب وأحجاره
ما دام أن الدروب تضيق توب وعدل المنهاج = ترى ما تضمن الغاره يجي من بعدها غاره
لذا سوق الركايب للكريم وناصر المحتاج = يعدلها قبل طاري الرحيل يجيلك انذاره
قبل ما ينحني عود ك وتطلب للهموم افراج = ترى الأقدار صيّاده وروحك دونها الشاره
تغانمها ودّور لليال المقبلات علاج = رحل نص العمر والباقي انته تجهل اسراره