تقول بخوت
جعل وبل الغيث يسقي ديار المفرعين
منزل اللي كن حديثه حليب (معدّيه)
ضيقتي في خاطري دايمٍ ماهوب زين
قومي اللي سم حالي وبيّح سدّيه
أن سجنته قام يتبع دروب الدالهين
وأن نشدته قال أنا علتي متعدّيه
أن بغى خلّي جنابي فلا غيره ضنين
وأن بغى يقفي فيقفي مراح مودّيه
ــــــــــــــــــــــــــــــــــــــــــــــــــ ــــــــــــــــــــــــــــــــ
وجودي على بيت الشعر عقب بيت الطين
وجودي على شوف المغاتير منثرّه
وجودي على خوّة هل الموتر المقفين
وجودي على شوف السهل من ورى الحرّه
اليا حلوّا العربان وصاروا على بيتين
ومن كان له خلٍ معَ ذاك ما غرّه
ــــــــــــــــــــــــــــــــــــــــــــــــــ ــــــــــــــــــــــــــــ
حن قلبي حن ماكٍ على سمر العجل
عشّق السواق والدرب ممسوكٍ وراه
أن عطا مع طلعةٍ عشقوّا له بالدبل
وأن تسّهل ريّحه لين ياصل منتهاه
مابشفي لا دريول ولا ريس عمل
شفي اللي كل ما شاف براقٍ رعاه
قاطنينٍ فوق عدٍ على جاله عبل
طيبٍ للبل وراعيه ما يقطع ضماه
ونتي ونة خلوجٍ ولدها ما جدل
تشرف المرقاب للذود وتعوّد وراه
الله الله الله الله ذكرى طيبه