ياعديل الروح ياشبه الهنوف=ماتشوف الحال لاحقها كلف
اتوجد وجد مقطوع الكفوف=في نهارن صايح الغاره هتف
كلها لعيون كاملت الوصوف=من خذا قلبي وغيره ماعرف
حسنها تعجز تصطره الحروف=ويش بذكر ويش بترك من وصف
رمشها عسكر على الجبهه وقوف=والشعر شلال من فوق الكتف
والثغر خاتم يده كنك تشوف=والعيون السود ماتخطي هدف
والجبين اتشوف به برق القنوف=والنهود اصغار مع نابي ردف
والخشم حده مثل حد السيوف=والجسم منحوت رسمه محترف
لاظهر لشمس غطاها الكسوف=والقمر لامن تجلاله خسف
لالالاتعذر ياحبيبي بالظروف=ولاتحملني على وصلك كلف
ليه تقسا خابرن قلبك عطوف=ويش ذنب القلب ويش الي اقترف
غير حبك وانت ماترضى ترووف=وين ذاك الحب وايام الشغف
ياعسا من لامني في حب نوف=يلحقه من صد مظنونه تلف