[معلومات العضو حسن بن بطحيه]

بسم الله الرحمن الرحيم

السلام عليكم ورحمة الله وبركاته ... اما بعد

أسعد الله جميع أوقاتكم بالخير والمسرات

والشهر عليكم مبارك ولعلها أتت متأخره قليلاً


أقدم لكم أخواني اخواتي هذه المجاراه التي كانت بيني وبين

الشاعر الكبير// راجح السبيعي

واتمنى من العلي القدير أن تنال إعجاب وإستحسان جميع المتصفحين

لمنتدانا منتديات قبيلة الدواسر الرسمـــي

أقول فيها :

عندي على الشطه وسام وشهادات=مع الشرف لاول بتقدير ممتاز
كنت ولازلت اصارع الوقت بسكات=عمر الزمن مايوم في صفي انحاز
وين انت ياللي تنفقد بالملمات=ياللي بساعات الشدايد لك إنجاز
هذاك راجح لويدينه خليات=خوي خويه ماخبر قيل نعتاز
من رنية السبعان لا أطراف سيهات=مامثل أبو شافي على الكايده حاز
نادر حرار رابي في الطويلات=طير السعد من هدته يشبع الغاز
في هدته مايكسب الا السمينات=من فيض مده تكرم أنفوس أعزاز
ذي عادته ذيب الخلا دوم بالذات=سهله عليه وهي على غيره إعجاز
بدعي لعود جابه بكل الاوقات=يرفل بثوب العافيه دون معكاز
الشايب اللي شفت بك منه شارات=الله يديمه دوم لك ذخر وعناز

فرد راجح يقول :

ياشاكي جور الليالي سلامات=أصبر ومن يصبر على حاجته فاز
مافيه في الدنيا نعيم ومسرات=ماجاز فيها اليوم فالصبح ماجاز
دنياك هذي كنها احلوم يقضات=ولا بقايا صورة وسط برواز
والحر مثلك يفتهم بالاشارات=شرواك ياحلال صعبات الالغاز
يانسل عود ينذكر بالمهمات=اللي يهوز اعداه ماهوب ينهاز
دليل راي في نهار المتاهات=ثقيل وزن أفعول ماهوب ينراز
علمك وأمنك وحفظت الامانات=تركة حرار مادخل بينها الباز
وناخويك باليال العصيبات=تاصلك فزعاتي لو أنك بالاهواز
ركايبي في لازمك مستعدات=على انتظار منك تعطيني العاز
لجل غلاكم ياحسن بأي الاوقات=ركايبي في لازمك ترهز أرهاز
وختامها مني سلام وتحيات=تحية تمشي على زل شيـــراز

وسلامتكــــــــــــــــــم ،،

تقبلوا تحيات أخوكم

الوحيـــد