هاذي قصيده هامه جدا من ناحية قيمتها التاريخيه..تؤرخ تاريخ شبه مفقود.. تاريخ السدارا في عمان.. ليس فقط هذا .. بل تاريخ الدولة السعودية الثانية في تلك الجهات..قصيدة لم تنشر في السعودية في اي كتاب.. واكثر السدارا انفسهم ما يعرفونها الاالشياب..مصدري نسخه من القصيده مصوره من المكتبه الوطنيه في البحرين..كما اني سمعت بعض ابيتها من لسان المرحوم الامير مساعد الاحمد السديري في مجلسه بالغاط..
عذرا يالاد زايد.. ترا ماعندي arabic key boardفاعذروني من التشكيل والتنوين والهمزات / واللمزات/.. انا متاكد انكم تقرون القصيد احسن مني..
ماني متاكد اذا كانت للامير احمد بن محمد السديري او لابنه تركي اللذي اغتيل في تلك المناطق ولا يوجد له خلف ولاتلد.. وانا ارجح انها لتركي.. واللي عنده علم يعلمني..
[line]
[num="0,black"]
ياالله يا مغني الرجال المفاليس = يامنبت ني الشحم بالفقاير
ياخير مطلق احبال المحابيس = آمنت بك يا عالم بالسراير
افرج لقلب داخل به هواجيس = كنه يقلا فوق حامي الصهاير
من صاحب عنا اعلومه مراميس = ناس الخبر وانا اترجى البشاير
اللي ثليله فوق ردفه دبابيس = متعكرش من فوق مثل الزباير
ورد و جوخ خالطه كالقراطيس = بالعون فكري بعد فرقاه حاير
ما ياصلنه مسمنات العراميس = الا شحمهن مابقى له ذخاير
حنا تعوضنا بكسب النواميس = والحمد للوالي لما راد صاير
وثيابنا ماهيب تصبح نواريس = الا من البارود فيها غثاير
ما ناب من يلهى بكثر المعاريس = كيفاتنا من فوق عوص فطاير
نسري الى من الدجى جا خراميس = من فوق ما يحتاج ضرب المساير
نزوى سهجناها بحد العبابيس = غصب عليهن لين رد المخاير
ياما وطيناهم بوسط المتاريس = من فوق قب ما علقهن بناير
وطيت منهم خمسة بالملاميس = وعندي على هذا شهود براير
خيالة ياوي والله مداعيس = لو هو ينفل من ركض بالبراير
لا شك واسوهم بناس نواريس = بناية المجلس بهرج الفشاير
وجينا لشي ماتجيه القرانيس = عن راس رجمه ينثني كل طاير
النو خالفنا نشوفه مغاليس = على الوطا يمطر وحن بالحجاير
ودسنا لدرب للعرب ما بعد ديس = غصب على وجه الخبيث المغاير
حنا وطينا له بعزم وتهويس = وهو بنا سوى لك الله عباير
ياما تركنا فيه هجن مراويس = وخيل تركناها ولا هي خساير
وقمنا نبشر بالسهل و الطعاميس= من شين ما جينا عساها ستاير
واخيلنا اللي كنها في محاميس= حتى تهاتف من عرقها مطاير
هاذي سواة امبعدين المناييس = اللي على القادي تجر الجراير
نجرها في دار قو م مناجيس = على النقا نمشي بيان جهاير
دار السعيدي فيه شبت مقابيس = سووا بها ربعي لهوب السعاير
غرنا صحم و صحار و ام قيس = وهو ببركه باني له حضاير
لو هو تريض لين جينا كراديس = لازم على السيد تروح الكساير
حتيش لو حط العجم و الكبابيس = حنا على شوفه نسوق البشاير
هذا جزا من باعنا بالبهانيس = وخذ العوض بربوعنا كل باير
وديارنا ما حط دونه حراريس = حامينها بمصقلاتن طراير
في شف شيخ ما طرا بالدنافيس = خيالنا يوم اشهب الملح ثاير
ساجر وابو نايف وشيخ السناعيس = نادوا عليه الخيل فوق الحراير
ايضا وابن هذال خوف الخماميس= تخمس نياقه في رشاش الزباير
الا وابن شعلان هجنه مقاويس = حفيا ومن طول التنايف جماير
وجميع شيخان القبايل ملابيس = صاروا بحكم السبا في العشاير
من ولب من هد الصعب والمطاويس= ومن خوف سيف جاير بيد جاير
يتلاه صبيان و قب نواعيس = وفي ساقته يلقى من المال خاير
وعقب النياق المجهمه جت حراريس = زمايل تعقل واهلها نحاير
يا شيخ يا مردي لشيب النسانيس = من حاربك عمس النظر والبصاير
اشكي عليك الحال ما نيب بليس = والحظ يا فرز الوغى بات باير
من يمكم يا كاسبين النواميس = غاد عور ويصفقه كل عاير
الى عاد لا بخس ولابي حواسيس = ولا نيب بالذله على الربع شاير
آمنت باللي يدجي الزرع والخيس = الخيير اللي رازق كل طاير
ذا قول من لا طاوع النفس وابليس = مستعصم بالله وبالحجر جاير
ما قل دل وحاجتي ياهل العيس = معكم على شيب كبار الحصاير
باهوم واترك لي هموم وهواجيس = والشح بالدنيا واخيره سفاير
وصلوا على من خصه الله بتلبيس = محمد جا بالبشر والنذاير
[/poem][/poem]
وجينالشي ما تجيه القرانيس/ هذا وصف للجبل الاخضر في عمان
السعيدي/الاسره المالكه في عمان
صحم و صحار و ام قيس و بركه/ مواقع معروفة في عمان
حتيش لو حط العجم و الكبابيس/عمان كانت محميه بريطانيه او برتغالية على ما اظن
ساجر/اظنه ساجر الرفدي
ابو نايف/ماادري
شيخ السناعيس/اظن انه الامير عبيد الرشيد
ابن هذال/ شيخ العمارات العنوز
ياشيخ يا مردي لشيب النسانيس/اظنه يقصد الامام عبدالله بن فيصل بن تركي بن عبدالله آل سعود.. الله اعلم
تمنياتي ان يشاركني اعضاء المنتدى في تحليل هذه القصيده وفك طلاسمها التاريخيه.. مع العلم على حسب ظني انها سبق لمنتديات قبيلة الدواسر..